0 5

Ka Tnad Information & Broadcasting, ha ryngkat ka jingiatreilang bad ka National Film Development Corporation (NFDC) bad ka Entertainment Society of Goa (ESG), ka la pynkhreh ban pynlong ia ka 55th International Film Festival of India (IFFI) ha Goa naduh ka 20 haduh 28 tarik Naiwieng 2024. Ki nongiathuh khana bad ki briew kiba sngewtynnad ia ki phlim ki don ka daw ban kmen namar ka 55^th International Film Festival of India (IFFI)  ka la jan sdang ha ka jingdon ki phlim kiba itynnad bad ki prokram bapher bapher bad kane ka pynlong ba kane ka tamasa kan long kaba rakhe ia ka kam shna phlim na kylleng ka pyrthei.

La pynlong ia ka jingialang bad ki lad pathai khubor halor ka IFFI kaba 55 mynta ka sngi ha ka jingiadonlang u Myntri Khynnah jong ka Sorkar Pdeng ba dei khmih ia ka Tnad Information & Broadcasting bad Parliamentary Affairs, Dr. L. Murugan, Secretary, Tnad I&B Sanjay Jaju, Special Secretary, Tnad I&B ka Neerja Shekhar, u Festival Director, IFFI Shekhar Kapur, u Chairman, CBFC Prasoon Joshi, bad ki ophisar jong ka Tnad.

Ha ka jingai jingkren, u Dr. L Murugan u la kren shaphang ka bynta ba kongsan jong ka tamasa ha ka rynsan kylleng ka pyrthei. “Ka IFFI ka la long ka prokram kaba kongsan, ym tang ha India hynrei shabar ri ruh, ka iasyriem bad ki tamasa kylleng ka pyrthei kum ka Cannes,” u la ong. U Dr. Murugan u la ban jur ia ki sienjam ba kyrpang ba la sdang man ka snem ban kyntiew ia ka tamasa bad u la ong ba ka bynta mynta u snem ka sakhi ia ka jingbun ka jingphah ki phlim na kiwei kiwei ki ri bad kane ka dei ka dak jong ka jingkiew kane ka tamasa.

Ban kyntiew ia ka jingiashim bynta shitrhem ki paidbah, ka Tnad ka la pynlong ia ki roadshow ha kylleng ki nongbah, kynthup ki prokram ba la pynlong dang shen ha Mumbai bad Chennai, bad ka ban sa long ruh ha Hyderabad. U Dr Murugan u la kyntu ia ki nongialam ha kane ka kam ba kin khein ba kane ka tamasa ka dei ka jong ki kaba dei ruh ka dak jong ka jingngeit ha ka Atmanirbhar Bharat bad ka thong jong u Myntri Rangbah duh Narendra Modi ban kyntiew ia ka IFFI kum ka tamasa kaba rakhe ha kylleng ka pyrthei bad kyntu ruh ia ki paidbah ban iasoh bad kane ka tamasa ha Goa.

Ka Phang pdeng jong ka IFFI 2024: ‘Ki samla nongshna phlim’ – ka Lawei kadei Mynta

Ka phang pdeng jong ka IFFI 2024 ka phaikhmat halor “Ki samla Nongshna Phlim,” katkum ka thong jong u Myntri Sorkar Pdeng ba dei khmih ia ka Tnad Information and Broadcasting, Ashwini Vaishnaw, ka jingithuh ia ka sap jong ki ban pynwandur ia ka lawei jong ka jingsaindur.

“Ka India ka la kylla sted kum ka ri kaba heh tam ha ka kam shna phlim ha ka pyrthei, kaba pdiang ia ki rukom treikam bad ki jingsngew bapher bapher,” la ong u Sanjay Jaju, Secretary, Tnad Information & Broadcasting ha ka jingai jingkren mynta ka sngi. U la ong ruh ba la saindur ia ka IFFI 2024 na ka bynta ki nongshna phlim bad ia kiba sngewtynnad ia ka kam phlim bad ka phaikhmat kyrpang sha ki suk kiba tei ia ka lawei, khamtam ki nongshna phlim ba dang khynnah bad kiba dang paw kiba long kiba kongsan bha ha ka jingtei ia ka jingbatai ia ka deiriti jong ka ri.

La kyntiew ia ka sienjam jong ka rynsan Creative Minds of Tomorrow ban kyrshan ia 100 ngut ki samla donsap na ka 75 ha ki bynta ba ladep. 400 ngut ki samla ba dang pule ia ka kam shna phlim ha ki skul ai jinghikai ha ka kam shna phlim ha kylleng ka ri ki la ioh jingkyrshan na ka Tnad ban iashim bynta ha ka IFFI.

La sdang ia ka bynta ba thymmai bad ka khusnam Best Debut Indian Director ban ai jingithuh ia ki samla donsap ha ka kam shna phlim ha kylleng ka ri. Ki jingiamir jingmut ha ki masterclass, ki panel discussion, ka iew phlim bad ka thup jong ki phlim ki dei kiba la pynkhreh na ka bynta ki nongshna phlim ba dang samla. Ka IFFI 2024 kan pynkup burom ia ki riewkhraw ha ka kam shna phlim bad kan pyni ia ki jingsngew bapher bapher lyngba ki bynta ba kyrpang bad ki exhibition, ka ban wanrah ia ka jingshem ba kyrpang ia ki briew ha Goa.

U Secretary, Tnad Information and Broadcasting ruh u la kren shaphang ka jingiatreilang ha ka IFFI kaba 55, bad ua la ong ba kane ka tamasa ka dei kaba ialam lynti da kito kiba trei ha ka kam shna phlim bad ba ka dei na ka bynta kito kiba shna ia ki phlim, ha kaba u nongshna phlim ba pawnam, u Shekhar Kapur un long u Festival Director. U la ong, “Kane ka dei ka sien kaba nyngkong ha ka histori jong kane ka tamasa jong ki phlim ba ngi la sdang ban aiti ia kane ka tamasa sha ka jingpyniaid jong kito kiba don bynta ha ka kam shna phlim, kiba ialam lynti ia kane ka sienjam.”

Ka IFFI: ka jingrakhe ia ka sap iathuhkhana

U Festival Director Shekhar Kapur u la ban jur ia ka bynta ba kongsan jong ka jingiathuh khana ha ka kam shna phlim, bad u la ong ba kane ka dei ka phang pdeng jong ka jingleit peit phlim.

“Ha kane ka pyrthei ba kylla sted, ka jingiada ia ka sap iathuh khana kalong kaba kham kongsan,” u la ong, da kaba bynrap ba ki jingiathuh khana ka dei kaba aibor ia ka phlim. Kane ka jingong jong u ka pyni ia ka jingkut jingmut kane ka tamasa ban pynkup burom bad sumar ia kane ka sap kaba hyndai.

India: ka ri kaba bun ki jingangnud

U Prasoon Joshi, Chairman jong ka CBFC, u la ong ba ka India ka dei ka ‘Ri kaba bun ki jingangnud’ bad u la ban jur halor ka jingdonkam ban ai rynsan ia ki nongiathuh khana ba kin pynsawa ia ki sur jong ki. U la kdew sha ka bynta jong ka IFFI ban kyntiew ia kine ki briew ba don sap da kaba wanrah ia ki shakhmat ha ka pyrthei bad u la ban biang halor ka phang jong ka IFFI 2024. “Kaei kaba ngim pat iohsngew ka dei kaba dei ban pynsawa sha ka pyrthei’, u la ong haba u la iaroh ruh ia ki sienjam jong ka tnad ban sumar bad kyrshan ia ki sur ba dang mih lyngba ka Creative Minds of Tomorrow.