ମହାମହିମ ପେଡ୍ରୋ ସାଞ୍ଚେଜ୍, ଗୁଜୁରାଟର ରାଜ୍ୟପାଳ ଆଚାର୍ଯ୍ୟ ଦେବବ୍ରତ ଜୀ, ଭାରତର ପ୍ରତିରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ ଜୀ, ବୈଦେଶିକ ବ୍ୟାପାର ମନ୍ତ୍ରୀ ଶ୍ରୀ ଏସ ଜୟଶଙ୍କର ଜୀ, ଏଠିକାର ଲୋକପ୍ରିୟ ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ରଭାଇ ପଟେଲ, ସ୍ପେନ୍ ଏବଂ ରାଜ୍ୟ ସରକାରଙ୍କ ମନ୍ତ୍ରୀଗଣ, ଏୟାରବସ୍ ଏବଂ ଟାଟା ଟିମ୍ର ସମସ୍ତ ସହଯୋଗୀ, ମହିଳା ଏବଂ ଭଦ୍ରଲୋକ!

ନମସ୍କାର!
ବୁଏନୋସ ଦିୟାସ !

ମୋର ବନ୍ଧୁ, ପେଡ୍ରୋ ସାଞ୍ଚେଜ୍ ଜୀ, ଏହା ତାଙ୍କର ପ୍ରଥମ ଭାରତ ଯାତ୍ରା । ଆଜିଠାରୁ ଆମେ ଭାରତ ଓ ସ୍ପେନ୍ ମଧ୍ୟରେ ଭାଗିଦାରୀକୁ ଏକ ନୂଆ ଦିଗ ଦେଉଛୁ। ଆମେ ସି ୨୯୫ ପରିବହନ ବିମାନ ଉତ୍ପାଦନ ପାଇଁ କାରଖାନାର ଉଦଘାଟନ କରୁଛୁ । ଏହି କାରଖାନା ଭାରତ-ସ୍ପେନ୍ ସମ୍ପର୍କକୁ ସୁଦୃଢ଼ କରିବା ସହ ମେକ୍ ଇନ୍ ଇଣ୍ଡିଆ, ମେକ୍ ଫର୍ ଦି ୱାର୍ଲ୍ଡ ଅଭିଯାନକୁ ମଧ୍ୟ ସୁଦୃଢ଼ କରିବାକୁ ଯାଉଛି। ମୁଁ ଏୟାରବସ୍ ଏବଂ ଟାଟାର ପୂରା ଟିମକୁ ଶୁଭେଚ୍ଛା ଜଣାଉଛି। କିଛି ଦିନ ତଳେ ଆମେ ଦେଶର ମହାନ ସୁପୁତ୍ର ରତନ ଟାଟାଜୀଙ୍କୁ ହରାଇଛୁ। ଯଦି ରତନ ଟାଟା ଜୀ ଆଜି ଆମ ମଧ୍ୟରେ ଥାଆନ୍ତେ, ବୋଧହୁଏ ସେ ଆଜିସବୁଠାରୁ ଖୁସି ହୋଇଥାନ୍ତେ । କିନ୍ତୁ ତାଙ୍କ ଆତ୍ମା ଯେଉଁଠି ବି ଥିବ, ସେ ଆଜି ଖୁସି ଅନୁଭବ କରିପାରୁଥିବେ।

ସାଥୀମାନେ
ସି-୨୯୫ ବିମାନର ଏହି କାରଖାନା, ନୂଆ ଭାରତର ନୂତନ କାର୍ଯ୍ୟ ସଂସ୍କୃତିକୁ ମଧ୍ୟ ପ୍ରତିଫଳିତ କରୁଛି। ଆଜି ଯେ କୌଣସି ଯୋଜନାର ଧାରଣାଠାରୁ ଆରମ୍ଭ କରି କାର୍ଯ୍ୟକାରିତା, ଭାରତ ଯେଉଁ ଗତିରେ କାମ କରୁଛି, ତାହା ଏଠାରେ ଦେଖିବାକୁ ମିଳୁଛି। ଏହି କାରଖାନାର ନିର୍ମାଣ ଦୁଇ ବର୍ଷ ତଳେ ଅକ୍ଟୋବର ମାସରେ ଆରମ୍ଭ ହୋଇଥିଲା। ଆଜି ଅକ୍ଟୋବର ମାସରେ ଏହି କାରଖାନା ବିମାନ ଉତ୍ପାଦନ ପାଇଁ ପ୍ରସ୍ତୁତ ହୋଇଛି। ଯୋଜନା ଏବଂ କାର୍ଯ୍ୟକାରିତାରେ ଅଯଥା ବିଳମ୍ବ ନ ହେବା ଉପରେ ମୋର ସର୍ବଦା ଧ୍ୟାନ ରହିଆସିଛି । ମୁଁ ଯେତେବେଳେ ଗୁଜରାଟର ମୁଖ୍ୟମନ୍ତ୍ରୀ ଥିଲି, ସେତେବେଳେ ଭଦୋଦରାରେ ବମ୍ବାର୍ଡିୟର ଟ୍ରେନ୍ କୋଚ୍ ନିର୍ମାଣ ପାଇଁ ଏକ କାରଖାନା ସ୍ଥାପନ କରିବାକୁ ନିଷ୍ପତ୍ତି ନିଆଯାଇଥିଲା। ଏହି କାରଖାନା ମଧ୍ୟ ରେକର୍ଡ ସମୟ ମଧ୍ୟରେ ଉତ୍ପାଦନ ପାଇଁ ପ୍ରସ୍ତୁତ ହୋଇଥିଲା। ଆଜି ଆମେ ସେହି କାରଖାନାରେ ନିର୍ମିତ ମେଟ୍ରୋ କୋଚ୍ କୁ ଅନ୍ୟ ଦେଶକୁ ମଧ୍ୟ ରପ୍ତାନି କରୁଛୁ। ଭବିଷ୍ୟତରେ ଏହି ବିମାନ କାରଖାନାରେ ନିର୍ମିତ ବିମାନ ଅନ୍ୟ ଦେଶକୁ ମଧ୍ୟ ରପ୍ତାନି ହେବ ବୋଲି ମୋର ବିଶ୍ୱାସ ରହିଛି।

ସାଥିମାନେ,
ପ୍ରସିଦ୍ଧ ସ୍ପେନିଶ କବି ଆଣ୍ଟୋନିଓ ମାଚାଡୋ ଲେଖିଛନ୍ତି: ଟ୍ରାଭେଲର, କୌଣସି ରାସ୍ତା ନାହିଁ ... ଚାଲି ଚାଲି ବାଟ ତିଆରି ହୋଇଥାଏ... ଏହାର ଅର୍ଥ ହେଉଛି ଲକ୍ଷ୍ୟରେ ପହଞ୍ଚିବା ପାଇଁ ଆମେ ପ୍ରଥମ ପଦକ୍ଷେପ ନେବା ମାତ୍ରେ ଆପେ ଆପେ ବାଟ ତିଆରି ହୋଇଯାଏ । ଆଜି ଆପଣ ଦେଖୁଛନ୍ତି ଯେ ଭାରତରେ ପ୍ରତିରକ୍ଷା ଉତ୍ପାଦନ ଇକୋସିଷ୍ଟମ ନୂଆ ଶିଖରକୁ ଛୁଇଁଛି । ଯଦି ଆମେ ୧୦ ବର୍ଷ ପୂର୍ବେ ଠୋସ୍ ପଦକ୍ଷେପ ନେଇ ନଥାନ୍ତେ, ତେବେ ଆଜି ଏହି ଗନ୍ତବ୍ୟସ୍ଥଳରେ ପହଞ୍ଚିବା ଅସମ୍ଭବ ହୋଇଥାନ୍ତା। ସେତେବେଳେ ଭାରତରେ ପ୍ରତିରକ୍ଷା ଉତ୍ପାଦନ ଏତେ ବଡ଼ ଧରଣର ହୋଇପାରିବ ବୋଲି କେହି କଳ୍ପନା ମଧ୍ୟ କରିନଥିଲେ। ସେତେବେଳେ ଉଭୟ ପ୍ରାଥମିକତା ଓ ପରିଚୟ ଆମଦାନୀ ହେଉଥିଲା। କିନ୍ତୁ ଆମେ ଏକ ନୂଆ ମାର୍ଗରେ ଚାଲିବାକୁ ସ୍ଥିର କଲୁ, ନିଜ ପାଇଁ ନୂଆ ଲକ୍ଷ୍ୟ ସ୍ଥିର କଲୁ । ଆଉ ଆଜି ଏହାର ଫଳାଫଳ ଦେଖିବାକୁ ମିଳୁଛି ।

ସାଥୀମାନେ
ଯେକୌଣସି ସମ୍ଭାବନାକୁ ସମୃଦ୍ଧିରେ ପରିଣତ କରିବାକୁ ହେଲେ ସଠିକ୍ ଯୋଜନା ଓ ସଠିକ୍ ଭାଗିଦାରୀ ଆବଶ୍ୟକ। ଭାରତର ପ୍ରତିରକ୍ଷା କ୍ଷେତ୍ରର ପୁନରୁଦ୍ଧାର ସଠିକ୍ ଯୋଜନା ଏବଂ ସଠିକ୍ ଭାଗିଦାରୀର ଏକ ଉଦାହରଣ । ଗତ ଏକ ଦଶନ୍ଧି ମଧ୍ୟରେ ଦେଶ ଏଭଳି ଅନେକ ନିଷ୍ପତ୍ତି ନେଇଛି, ଯାହା ଦ୍ୱାରା ଭାରତରେ ଏକ ଜୀବନ୍ତ ପ୍ରତିରକ୍ଷା ଶିଳ୍ପର ବିକାଶ ହୋଇଛି । ଆମେ ପ୍ରତିରକ୍ଷା ଉତ୍ପାଦନରେ ଘରୋଇ କ୍ଷେତ୍ରର ଅଂଶଗ୍ରହଣକୁ ବିସ୍ତାର କରିଥିଲୁ, ରାଷ୍ଟ୍ରାୟତ୍ତ କ୍ଷେତ୍ରକୁ ଦକ୍ଷ କରିଥିଲୁ, ଅର୍ଡିନାନ୍ସ କାରଖାନାଗୁଡ଼ିକୁ ସାତଟି ବଡ଼ କମ୍ପାନୀରେ ପରିଣତ କରିଥିଲୁ, ଡିଆରଡିଓ ଏବଂ ହାଲ୍ କୁ ସୁଦୃଢ଼ କରିଥିଲୁ, ୟୁପି ଏବଂ ତାମିଲନାଡୁରେ ଦୁଇଟି ପ୍ରମୁଖ ପ୍ରତିରକ୍ଷା କରିଡର ନିର୍ମାଣ କରିଥିଲୁ, ଏଭଳି ଅନେକ ନିଷ୍ପତ୍ତି ପ୍ରତିରକ୍ଷା କ୍ଷେତ୍ରକୁ ନୂତନ ଶକ୍ତିରେ ଭରି ଦେଇଥିଲା । ଆଇଡିଏକ୍ସ ଅର୍ଥାତ୍ ଇନୋଭେସନ୍ ଫର୍ ଡିଫେନ୍ସ ଏକ୍ସଲେନ୍ସ ଭଳି ଯୋଜନା ଷ୍ଟାର୍ଟଅପ୍ ଗୁଡ଼ିକୁ ପ୍ରୋତ୍ସାହନ ଦେଇଛି, ଗତ ୫-୬ ବର୍ଷ ମଧ୍ୟରେ ଭାରତରେ ପ୍ରାୟ ୧୦୦୦ ନୂଆ ପ୍ରତିରକ୍ଷା ଷ୍ଟାର୍ଟଅପ୍ ସୃଷ୍ଟି ହୋଇଛି। ଗତ ୧୦ ବର୍ଷ ମଧ୍ୟରେ ଭାରତର ପ୍ରତିରକ୍ଷା ରପ୍ତାନି ୩୦ ଗୁଣ ବୃଦ୍ଧି ପାଇଛି। ଆଜି ଆମେ ବିଶ୍ୱର ୧୦୦ରୁ ଅଧିକ ଦେଶକୁ ପ୍ରତିରକ୍ଷା ଉପକରଣ ରପ୍ତାନି କରୁଛୁ ।

ସାଥୀମାନେ
ଆଜି ଆମେ ଭାରତରେ ଦକ୍ଷତା ଏବଂ ନିଯୁକ୍ତି ସୃଷ୍ଟି ଉପରେ ବହୁତ ଅଧିକ ଧ୍ୟାନ ଦେଉଛୁ । ଏୟାରବସ୍ ଓ ଟାଟାର ଏହି କାରଖାନା ଭାରତରେ ହଜାର ହଜାର ନିଯୁକ୍ତି ସୃଷ୍ଟି କରିବ। ଏହି ପ୍ରକଳ୍ପ ଯୋଗୁଁ ୧୮ ହଜାର ପାର୍ଟସ୍ ଏୟାରକ୍ରାଫ୍ଟର ସ୍ୱଦେଶୀ ଉତ୍ପାଦନ ହେବାକୁ ଯାଉଛି । ଯଦି ଦେଶର କୌଣସି ସ୍ଥାନରୁ ଗୋଟିଏ ପାର୍ଟ ଉତ୍ପାଦନ କରାଯାଏ, ତେବେ ଆଉ ଏକ ପାର୍ଟ ଦେଶର କିଛି ପାର୍ଟରେ ନିର୍ମାଣ ହେବ ଏବଂ ଏହି ପାର୍ଟି କିଏ ତିଆରି କରିବ? ଆମର ଅଣୁ ଓ କ୍ଷୁଦ୍ର ଉଦ୍ୟୋଗ କାମ କରୁଥିବା ଲୋକମାନେ କରିବେ,  ଆମର ଏମଏସଏମଇ ମାନେ ଏହି କାର୍ଯ୍ୟର ନେତୃତ୍ୱ ନେବେ । ଆମେ ଏବେ ବି ବିଶ୍ୱର ବୃହତ୍ତମ ବିମାନ କମ୍ପାନୀଗୁଡ଼ିକ ପାଇଁ ପାର୍ଟର ବୃହତ୍ତମ ଯୋଗାଣକାରୀ ମାନଙ୍କ ମଧ୍ୟରୁ ଅନ୍ୟତମ । ଏହି ନୂଆ ବିମାନ କାରଖାନା ଭାରତରେ ନୂତନ ଦକ୍ଷତା ଏବଂ ନୂତନ ଶିଳ୍ପକୁ ବହୁତ ଶକ୍ତି ପ୍ରଦାନ କରିବ ।

ସାଥୀମାନେ
ଆଜିର କାର୍ଯ୍ୟକ୍ରମ ପରିବହନ ବିମାନ ଉତ୍ପାଦନ ଠାରୁ ଆଗକୁ ବଢ଼ୁଛି। ଗତ ଦଶନ୍ଧିରେ ଭାରତର ବିମାନ ଚଳାଚଳ କ୍ଷେତ୍ରରେ ଅଭୂତପୂର୍ବ ଅଭିବୃଦ୍ଧି ଓ ପରିବର୍ତ୍ତନ ଆପଣସମସ୍ତେ ଦେଖିଛନ୍ତି । ଦେଶର ଶତାଧିକ ଛୋଟ ଛୋଟ ସହରକୁ ଆମେ ବିମାନ ଯୋଗାଯୋଗ ଯୋଗାଇ ଦେଉଛୁ। ଆମେ ଭାରତକୁ ବିମାନ ଚଳାଚଳ ଏବଂ ଏମଆରଓ ଡୋମେନର ଏକ କେନ୍ଦ୍ର ରେ ପରିଣତ କରିବା ପାଇଁ କାର୍ଯ୍ୟ କରିସାରିଛୁ । ଭବିଷ୍ୟତରେ ମେଡ୍ ଇନ୍ ଇଣ୍ଡିଆ ବେସାମରିକ ବିମାନ ପାଇଁ ମଧ୍ୟ ଏହି ଇକୋସିଷ୍ଟମ୍ ପଥ ପ୍ରଶସ୍ତ କରିବ। ଆପଣ ଜାଣିଥିବେ ଯେ ବିଭିନ୍ନ ଭାରତୀୟ ଏୟାରଲାଇନ୍ସ ବିଶ୍ୱକୁ ୧୨୦୦ ନୂଆ ବିମାନ କିଣିବା ପାଇଁ ଅର୍ଡର ଦେଇଛନ୍ତି । ବର୍ତ୍ତମାନ ବୋଧହୁଏ ବିଶ୍ୱର କମ୍ପାନୀ ଅନ୍ୟ କୌଣସି ଦେଶରୁ ଅର୍ଡର ନେବାକୁ ସକ୍ଷମ ହେବ ନାହିଁ, ଅର୍ଥାତ୍ ଭବିଷ୍ୟତରେ ଏହି କାରଖାନା ଭାରତ ଏବଂ ବିଶ୍ୱର ଆବଶ୍ୟକତାକୁ ପୂରଣ କରିବା ପାଇଁ ବେସାମରିକ ବିମାନର ଡିଜାଇନଠାରୁ ଆରମ୍ଭ କରି ଉତ୍ପାଦନ ପର୍ଯ୍ୟନ୍ତ ଏକ ବଡ଼ ଭୂମିକା ଗ୍ରହଣ କରିବାକୁ ଯାଉଛି ।

ସାଥୀମାନେ
ଭାରତର ଏହି ପ୍ରୟାସରେ ଭଦୋଦରା ସହର ଏକ ଉତପ୍ରେରକ ଭାବରେ କାର୍ଯ୍ୟ କରିବ । ଏହି ସହର ପୂର୍ବରୁ ଏମଏସଏମଇର ଏକ ଶକ୍ତିଶାଳୀ କେନ୍ଦ୍ର ରହିଛି । ଏଠାରେ ଆମର ଗତିଶକ୍ତି ବିଶ୍ୱବିଦ୍ୟାଳୟ ମଧ୍ୟ ଅଛି । ଏହି ବିଶ୍ୱବିଦ୍ୟାଳୟ ଆମର ବିଭିନ୍ନ କ୍ଷେତ୍ର ପାଇଁ ପ୍ରଫେସନାଲମାନଙ୍କୁ ପ୍ରସ୍ତୁତ କରୁଛି । ଭଦୋଦରାରେ ଫାର୍ମା ସେକ୍ଟର, ଇଞ୍ଜିନିୟରିଂ ଏବଂ ହେଭି ମେସିନରୀ, କେମିକାଲ୍ସ ଏବଂ ପେଟ୍ରୋକେମିକାଲ୍ସ, ପାୱାର ଆଣ୍ଡ ଏନର୍ଜି ଇକ୍ୱିପମେଣ୍ଟ ଭଳି ଅନେକ କ୍ଷେତ୍ର ସହ ଜଡିତ ଅନେକ କମ୍ପାନୀ ଅଛନ୍ତି । ଏବେ ଏହି ସମଗ୍ର ଅଞ୍ଚଳ ଭାରତରେ ବିମାନ ଚଳାଚଳ ଉତ୍ପାଦନର ଏକ ବଡ଼ ହବ୍ ରେ ପରିଣତ ହେବାକୁ ଯାଉଛି। ଏବଂ ଏଥିପାଇଁ ମୁଁ ଗୁଜରାଟ ସରକାର, ଏହାର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ର ଭାଇ ଏବଂ ତାଙ୍କ ସମଗ୍ର ଟିମକୁ ସେମାନଙ୍କର ଆଧୁନିକ ଶିଳ୍ପ ନୀତି ଏବଂ ନିଆଯାଇଥିବା ନିଷ୍ପତ୍ତି ପାଇଁ ଅଭିନନ୍ଦନ ଜଣାଉଛି ଏବଂ ସେମାନଙ୍କୁ ପ୍ରଶଂସା କରୁଛି ।

ସାଥୀମାନେ
ଭଦୋଦରାରେ ଆଉ ଏକ ବିଶେଷ କଥା ରହିଛି । ଏହା ଭାରତର ଏକ ଗୁରୁତ୍ୱପୂର୍ଣ୍ଣ ସାଂସ୍କୃତିକ ସହର । ଏହା ହେଉଛି ଆମର ସାଂସ୍କୃତିକ ସହର । ସେଥିପାଇଁ ଆଜି ମୁଁ ସ୍ପେନର ସମସ୍ତ ବନ୍ଧୁମାନଙ୍କୁ ଏଠାରେ ସ୍ୱାଗତ କରି ବିଶେଷ ଭାବେ ଆନନ୍ଦିତ । ଭାରତ ଏବଂ ସ୍ପେନ୍ ମଧ୍ୟରେ ସାଂସ୍କୃତିକ ସମ୍ପର୍କର ଏକ ସ୍ୱତନ୍ତ୍ର ମହତ୍ତ୍ୱ ରହିଛି । ମୋର ମନେ ଅଛି, ଫାଦର କାର୍ଲୋସ୍ ଭାଲେ ସ୍ପେନ୍ରୁ ଆସି ଗୁଜରାଟରେ ବସବାସ କରିଥିଲେ। ଜୀବନର ପଚାଶ ବର୍ଷ ସେ ଏଠାରେ ବିତାଇଥିଲେ। ସେ ତାଙ୍କ ଚିନ୍ତାଧାରା ଓ ଲେଖାରେ ଆମ ସଂସ୍କୃତିକୁ ସମୃଦ୍ଧ କରିଥିଲେ। ମୁଁ ତାଙ୍କୁ ଅନେକ ଥର ଭେଟିବାର ସୌଭାଗ୍ୟ ପାଇଥିଲି । ତାଙ୍କର ମହାନ ଅବଦାନ ପାଇଁ ଆମେ ତାଙ୍କୁ ପଦ୍ମଶ୍ରୀ ରେ ସମ୍ମାନିତ ମଧ୍ୟ କରିଛୁ । କିନ୍ତୁ ଆମେ ତାଙ୍କୁ ଗୁଜରାଟରେ ଫାଦର ୱାଲେସ ବୋଲି ଡାକୁଥିଲୁ ଏବଂ ସେ ଗୁଜରାଟୀ ଭାଷାରେ ଲେଖୁଥିଲେ । ତାଙ୍କ ପୁସ୍ତକରେ ଅନେକ ଗୁଜରାଟୀ ସଂସ୍କୃତିକ ସାହିତ୍ୟରେ ସମୃଦ୍ଧ ।

ସାଥୀମାନେ
ମୁଁ ଶୁଣିଛି ଯେ ସ୍ପେନରେ ମଧ୍ୟ ଯୋଗ ବହୁତ ଲୋକପ୍ରିୟ । ଭାରତରେ ମଧ୍ୟ ସ୍ପେନିସ୍ ଫୁଟ୍ ବଲ୍ କୁ ଖୁବ୍ ପସନ୍ଦ କରାଯାଏ। ଗତକାଲି ରିୟାଲ ମାଡ୍ରିଡ୍ ଓ ବାର୍ସିଲୋନା ମଧ୍ୟରେ ଖେଳାଯାଇଥିବା ମ୍ୟାଚ୍ କୁ ନେଇ ମଧ୍ୟ ଭାରତରେ ଚର୍ଚ୍ଚା ହୋଇଥିଲା। ବାର୍ସିଲୋନାର ଚମତ୍କାର ବିଜୟ ମଧ୍ୟ ଏଠାରେ ଚର୍ଚ୍ଚାର ବିଷୟ ପାଲଟିଥିଲା। ଏବଂ ମୁଁ ଆପଣଙ୍କୁ ଗ୍ୟାରେଣ୍ଟି ଦେଇପାରିବି ଯେ ଉଭୟ କ୍ଲବର ପ୍ରଶଂସକଙ୍କ ମଧ୍ୟରେ ଭାରତରେ ଯେତିକି ଧସ୍ତାଧସ୍ତି ହୋଇଥିଲା ସେତିକି ସ୍ପେନରେ ମଧ୍ୟ ଥିଲା ।

ସାଥୀମାନେ
ଖାଦ୍ୟ, ଚଳଚ୍ଚିତ୍ର ଏବଂ ଫୁଟବଲର ସମସ୍ତ ଦିଗରେ ଆମର ସମ୍ପର୍କ ମଜଭୁତ ଲୋକଙ୍କ ସହ ଯୋଡ଼ି ହୋଇ ରହିଛି । ମୁଁ ଖୁସି ଯେ ଭାରତ ଏବଂ ସ୍ପେନ୍ ୨୦୨୬ ବର୍ଷକୁ ସଂସ୍କୃତି, ପର୍ଯ୍ୟଟନ ଏବଂ ଏଆଇ ବର୍ଷ ଭାବରେ ପାଳନ କରିବାକୁ ନିଷ୍ପତ୍ତି ନେଇଛନ୍ତି ।

ସାଥୀମାନେ
ଭାରତ ଏବଂ ସ୍ପେନ୍ ମଧ୍ୟରେ ଭାଗିଦାରୀ ଏକ ପ୍ରିଜମ୍ ପରି ଯାହା ବହୁମୁଖୀ, ଜୀବନ୍ତ ଏବଂ ସର୍ବଦା ବିକଶିତ ହେଉଛି । ମୋର ବିଶ୍ୱାସ ଯେ ଆଜିର କାର୍ଯ୍ୟକ୍ରମ ଭାରତ ଏବଂ ସ୍ପେନ ମଧ୍ୟରେ ମିଳିତ ସହଯୋଗର ଅନେକ ନୂତନ ପ୍ରକଳ୍ପକୁ ପ୍ରେରଣା ଯୋଗାଇବ । ମୁଁ ସ୍ପେନିସ୍ ଶିଳ୍ପ ଏବଂ ଉଦ୍ଭାବକମାନଙ୍କୁ ମଧ୍ୟ ଭାରତ ଆସିବାକୁ ଏବଂ ଆମର ବିକାଶ ଯାତ୍ରାରେ ଆମର ଅଂଶୀଦାର ହେବାକୁ ନିମନ୍ତ୍ରଣ କରିବି । ପୁଣି ଥରେ ଏହି ପ୍ରୋଜେକ୍ଟ ପାଇଁ ଏୟାରବସ୍ ଏବଂ  ଟାଟାର ଟିମକୁ ଅନେକ- ଅନେକ ଅଭିନନ୍ଦନ ।

ଧନ୍ୟବାଦ।

*****

NS/SLP