ರಾಷ್ಟ್ರೀಯ ಕಲಿಕಾ ಸಪ್ತಾಹ 2024ರ ಬಹುಮಾನ ವಿತರಣೆ ಸಮಾರಂಭ ಮತ್ತು iGOT ಲ್ಯಾಬ್ ಮತ್ತು ಕಲಿಕಾ ಕೇಂದ್ರದ ಉದ್ಘಾಟನೆಯ ಮುಖ್ಯ ಅತಿಥಿಗಳಾಗಿ ಡಾ. ಎಲ್.ಮುರುಗನ್ ಅವರು ಕರ್ಮಯೋಗಿ ಸಪ್ತಾಹದ ಸಮಾರೋಪವನ್ನು ಆಚರಿಸಿದರು.

ಈ ಸಂದರ್ಭದಲ್ಲಿ ವಾರ್ತಾ ಮತ್ತು ಪ್ರಸಾರ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ವಿಶೇಷ ಕಾರ್ಯದರ್ಶಿ ಶ್ರೀಮತಿ ನೀರಜಾ ಶೇಖರ್, ಸಚಿವಾಲಯದ ಹಿರಿಯ ಅಧಿಕಾರಿಗಳು ಮತ್ತು ಉನ್ನತ ಸಾಧಕರು ಉಪಸ್ಥಿತರಿದ್ದರು.

ಕರ್ಮಯೋಗಿ ಸಪ್ತಾಹ - ರಾಷ್ಟ್ರೀಯ ಕಲಿಕಾ ಸಪ್ತಾಹ (ಎನ್‌ ಎಲ್‌ ಡಬ್ಲ್ಯು)

ಕರ್ಮಯೋಗಿ ಸಪ್ತಾಹ - ರಾಷ್ಟ್ರೀಯ ಕಲಿಕಾ ಸಪ್ತಾಹ (ಎನ್‌ ಎಲ್‌ ಡಬ್ಲ್ಯು) ಭವಿಷ್ಯಕ್ಕೆ ಸಿದ್ಧವಾದ ನಾಗರಿಕ ಸೇವೆಯನ್ನು ನಿರ್ಮಿಸಲು ಭಾರತದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಪ್ರಾರಂಭಿಸಿದ ಪ್ರಮುಖ ಉಪಕ್ರಮವಾಗಿದೆ ಮತ್ತು ಜಾಗತಿಕ ದೃಷ್ಟಿಕೋನದೊಂದಿಗೆ ಭಾರತೀಯ ಮೌಲ್ಯಗಳಲ್ಲಿ ಆಳವಾಗಿ ಬೇರೂರಿರುವ ಕಾರ್ಯಪಡೆಯನ್ನು ರಚಿಸಲು ಎಲ್ಲಾ ಹಂತಗಳಲ್ಲಿ ನಾಗರಿಕ ಸೇವಕರ ಸಾಮರ್ಥ್ಯಗಳನ್ನು ಬಲಪಡಿಸಲು ಈ ಸಪ್ತಾಹವು ಒತ್ತು ನೀಡಿತು.

ಈ ಸಂದರ್ಭದಲ್ಲಿ, ವಾರ್ತಾ ಮತ್ತು ಪ್ರಸಾರ ಖಾತೆಯ ರಾಜ್ಯ ಸಚಿವರಾದ ಡಾ. ಎಲ್. ಮುರುಗನ್ ಅವರು 3 ದಶಲಕ್ಷಕ್ಕೂ ಹೆಚ್ಚು ಕೇಂದ್ರೀಯ ನಾಗರಿಕ ಸೇವೆಯ ಉದ್ಯೋಗಿಗಳ ಕೌಶಲ್ಯ ಮತ್ತು ಸಾಮರ್ಥ್ಯಗಳನ್ನು ಹೆಚ್ಚಿಸುವ ಮತ್ತು 22 ದಶಲಕ್ಷಕ್ಕೂ ಹೆಚ್ಚು ರಾಜ್ಯ ಮಟ್ಟದ ನಾಗರಿಕ ಸೇವಕರು ಮತ್ತು  5 ದಶಲಕ್ಷ  ನಗರ ಸ್ಥಳೀಯ ಸಂಸ್ಥೆ (ಯು ಎಲ್‌ ಬಿ) ಅಧಿಕಾರಿಗಳಿಗೆ ನಿರಂತರ ಕಲಿಕೆಯ ಪ್ರವೇಶವನ್ನು ಖಾತ್ರಿಪಡಿಸುವ ಉಪಕ್ರಮದ ಮಹತ್ವವನ್ನು ಉಲ್ಲೇಖಿಸಿದ್ದಾರೆ. ರಾಷ್ಟ್ರೀಯ ಗುರಿಗಳಿಗೆ ಅನುಗುಣವಾಗಿ ಜೀವಮಾನದ ಕಲಿಕೆಯನ್ನು ಉತ್ತೇಜಿಸುವ ಈ ಕಾರ್ಯಕ್ರಮವು ಖಾಯಂ ಮತ್ತು ಗುತ್ತಿಗೆ ಸಿಬ್ಬಂದಿಗೆ ಹೇಗೆ ಮುಕ್ತವಾಗಿದೆ ಎಂಬುದನ್ನು ಅವರು ವಿವರಿಸಿದರು.

iGOT ಲ್ಯಾಬ್: ಕಲಿಕೆಯನ್ನು ಉತ್ತೇಜಿಸುವುದು

ಸಾಮಾಜಿಕ ಮಾಧ್ಯಮಗಳ ಬಳಕೆ, ಚಲನಚಿತ್ರ ವೀಕ್ಷಣೆಯ ವಿಕಸನ ಮತ್ತು ಛಾಯಾಗ್ರಹಣ ಕೌಶಲ್ಯ ವರ್ಧನೆಯ ಮೇಲೆ ಕೇಂದ್ರೀಕರಿಸಿದ ಮೂರು ವೆಬಿನಾರ್‌ ಗಳನ್ನು ಸಚಿವಾಲಯವು ನಡೆಸಿದೆ ಎಂದು ಡಾ. ಎಲ್. ಮುರುಗನ್ ಹೇಳಿದರು. ಹೆಚ್ಚುವರಿಯಾಗಿ, ಎಲ್ಲಾ ಉದ್ಯೋಗಿಗಳು iGOT ಕರ್ಮಯೋಗಿ ಪೋರ್ಟಲ್‌ ನಲ್ಲಿ ಕನಿಷ್ಠ ನಾಲ್ಕು ಗಂಟೆಗಳ ತರಬೇತಿಯನ್ನು ಪೂರ್ಣಗೊಳಿಸಬೇಕಾಗಿತ್ತು, ಇದು ಕಚೇರಿ ಕಾರ್ಯವಿಧಾನಗಳು, ಲಿಂಗ ಸೂಕ್ಷ್ಮತೆ ಮತ್ತು ನಾಯಕತ್ವದಂತಹ ಪ್ರಮುಖ ಕ್ಷೇತ್ರಗಳನ್ನು ಒಳಗೊಂಡಿದೆ. iGOT ಲ್ಯಾಬ್ ಸ್ಥಾಪನೆ ಸೇರಿದಂತೆ ಸಚಿವಾಲಯದ ನವೀನ ವಿಧಾನವನ್ನು ಅವರು ಶ್ಲಾಘಿಸಿದರು, ಇದು ನಿರಂತರ ಕಲಿಕೆಯನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಶ್ಲಾಘನೀಯ ಹೆಜ್ಜೆ ಎಂದು ಸಚಿವರು ಬಣ್ಣಿಸಿದರು.

ಡಾ. ಎಲ್. ಮುರುಗನ್ ಅವರು ಉನ್ನತ ಸಾಧಕರನ್ನು ಸನ್ಮಾನಿಸಿದರು

ಮಹತ್ವಾಕಾಂಕ್ಷಿ ಭಾರತಕ್ಕಾಗಿ ಎಐ

"ಮಹತ್ವಾಕಾಂಕ್ಷಿ ಭಾರತ"ದ ದೃಷ್ಟಿಕೋನವನ್ನು ಮುನ್ನಡೆಸಲು ಕೃತಕ ಬುದ್ಧಿಮತ್ತೆಯನ್ನು (ಎಐ) ಸದುಪಯೋಗಪಡಿಸಿಕೊಳ್ಳುವ ಪ್ರಧಾನಮಂತ್ರಿಯವರ ದೃಷ್ಟಿಗೆ ಅನುಗುಣವಾಗಿ,  ಉತ್ಪಾದಕತೆಯನ್ನು ಹೆಚ್ಚಿಸಲು ಕೆಲಸದ ಸ್ಥಳದಲ್ಲಿ ಎಐ ಪರಿಕರಗಳನ್ನು ಸಕ್ರಿಯವಾಗಿ ಅಳವಡಿಸಿಕೊಳ್ಳುವಂತೆ ಡಾ. ಎಲ್. ಮುರುಗನ್ ಸಚಿವಾಲಯವನ್ನು ಒತ್ತಾಯಿಸಿದರು. ಉತ್ಪಾದಕತೆಯನ್ನು ಹೆಚ್ಚಿಸಲು ಮತ್ತು ಪುನರಾವರ್ತಿತ ಕಾರ್ಯಗಳ ಹೊರೆಯನ್ನು ಕಡಿಮೆ ಮಾಡಲು ಚಾಟ್‌ ಜಿಪಿಟಿ ಮತ್ತು ಜೆಮಿನಿಯಂತಹ ಎಐ ಸಾಧನಗಳನ್ನು ಅಳವಡಿಸಿಕೊಳ್ಳುವಂತೆ ಸಚಿವರು ಒತ್ತಾಯಿಸಿದರು. ಎಐ-ಸಕ್ರಿಯವಾದ ಡೇಟಾ-ಚಾಲಿತ ನಿರ್ಧಾರ-ನಿರ್ವಹಣೆಯೊಂದಿಗೆ, ನಾಗರಿಕ ಸೇವಕರು ಆಡಳಿತದ ಹೆಚ್ಚಿನ-ಪರಿಣಾಮಕಾರಿ ಕ್ಷೇತ್ರಗಳ ಮೇಲೆ ಕೇಂದ್ರೀಕರಿಸಬಹುದು, ಆ ಮೂಲಕ ತಮ್ಮ ಇಲಾಖೆಗಳಲ್ಲಿ ಉತ್ತಮ ಸೇವೆ ವಿತರಣೆ ಮತ್ತು ನಾವೀನ್ಯತೆಯನ್ನು ಖಾತ್ರಿಪಡಿಸಿಕೊಳ್ಳಬಹುದು ಎಂದು ಅವರು ಹೇಳಿದರು.

ನಾಗರಿಕ-ಕೇಂದ್ರಿತ ಆಡಳಿತವನ್ನು ಉತ್ತೇಜಿಸಲು ನಡವಳಿಕೆಯ ಕೋರ್ಸ್‌ಗಳ ಮೇಲೆ ಕೇಂದ್ರೀಕರಿಸುವಂತೆ ಸಚಿವರು ಕರೆ ನೀಡಿದರು ಮತ್ತು ಸುಧಾರಿತ ಸೇವೆ ವಿತರಣೆಗಾಗಿ ಸಮರ್ಥ ಕುಂದುಕೊರತೆಯ ಪರಿಹಾರದ ಮಹತ್ವವನ್ನು ಒತ್ತಿ ಹೇಳಿದರು.

*****