1 2

লাক্লিবা নবেম্বর ২০ দগী নবেম্বর ২৮,২০২৪ ফাওবা গৱাদা পাংথোক্কদৌরিবা ৫৫শুবা ইন্তরনেসনেল ফিল্ম ফেস্তিবেল ওফ ইন্দিয়া(ইফি) দা “কন্ত্রি ফোকস” ওইনা অস্ত্রেলিয়া খল্লে হায়না ইনফোর্মেসন অমসুং ব্রোদকাস্তিং মিনিস্ত্রিনা লাউথোক্লে। অখন্নবা ওইনা ইকায়খুম্নবা উৎপা অসিনা মালেমগী ফিল্মগী ইন্দস্ত্রিদা অস্ত্রেলিয়াগী সেনিমানা পীরিবা খুদোল, মসিগী ফজরবা ৱারি লিবগী মচৎশিং, ফজরবা ফিল্মগী নাত অমসুং অনৌবা সেনিমাগী তেক্নিকশিং মশক তাক্নবা পান্দম থম্লি। ওদিও ভিজুয়েল কো-প্রদক্সন ত্রিতি অমনা ভারত অমসুং অস্ত্রেলিয়া মাঙজৌননা পুনখ্রে।

ইফিদা কন্ত্রি ফোকস

‘কন্ত্রি ফোকস’ অসি ইফিগী মরুওইবা শরুক অমনি অমসুং মসিনা লৈবাক অমগী খ্বাইদগী নৌবা ফিল্মশিং উৎনবগী অখন্নবা খুদোংচাবা অমা পীরি। মখল কয়াগী অস্ত্রেলিয়াগী নাত অমসুং মালেমগী শক্নাইরবা ফিল্মমেক্করশিং লৈবা অসিনা সেনিমাদা অকনবা ইথিল অমা পীবা অসিনা চহি অসিগী ওইনা লৈবাক অসি খনখিবনি। মসিদা ভারত অমসুং অস্ত্রেলিয়াগী ফিল্ম ইন্দস্ত্রিশিং পুন্না থবক তৌমিন্নবা মপাঙ্গল কনখৎলকপগী মমি তারে।

অস্ত্রেলিয়াগী ফিল্মশিং উৎপা

মমিং লৈরবা দ্রামাশিংদগী হৌরগা শক্তি লৈরবা দোকুমেন্তরশিং, মীৎফম হোংবা ঙমদ্রবা ফিল্মশিং অমসুং নোক্নিংবা ফিল্মশিং য়াওনা মখল কয়া শুরবা অস্ত্রেলিয়াগী ফিল্ম ৭ ইফিদা উৎকনি। হায়রিবা ফিল্মশিং অসিদা অস্ত্রেলিয়াগী তোপ-তোপ্পা নাত উৎকনি, লৈবাক অসি য়েলহৌমীশিং অমসুং অনৌবা ফুরুপশিংগী ৱারিশিং মমি তাগনি।

ফিল্ম বাজার শরুক য়াবা

ইফিগী শরুক অমা ওইরিবা খা-নোংপোক এসিয়াগী খ্বাইদগী চাউবা ফিল্মগী কৈথেল, ফিল্ম বাজার অসিদা, স্কৃন অস্ত্রেলিয়া, স্তেৎ স্কৃন কম্মিসনশিং অমসুং ফিল্মগী মফম অমা ওইনা অস্ত্রেলিয়া য়োকখৎলিবা অসফিল্মগী মীহুৎ কাংবু অমা শরুক য়াগনি। মখোয়না অস্ত্রেলিয়াগী ফজবা মফমশিং অমসুং অখন্নবা ফিল্ম ওফিস একজিবিসন এরিয়াদা পীরিবা খুদোংচাবশিং উৎকনি। ফিল্ম বাজার শরুক য়ানবা অমসুং পুন্না ফিল্ম পুথোকমিন্নবগী খুদোংচাবশিং খঙদোক্নাব অস্ত্রেলিয়া সরকারদগী শেনগী মতেং ফংলবা প্রদুসর ৬ গী কাংবু অমা ফিল্ম বাজারদা শরুক য়াগনি। ফিল্ম বাজারদা অস্ত্রেলিয়ান কো-প্রদক্সন নুমিৎ অমা লৈগনি অমসুং মদুদা লৈবাক অনিমক্কী মীহুৎশিং পুন্না থবক তৌমিন্নবগী খুদোংচাবা অমা পীগনি। কো-প্রদক্সন মার্কেত্তা ওফিসিএল ইন্ত্রিজ ওইনা অস্ত্রেলিয়াগী প্রোজেক হোম বিফোর নাইত ফিল্ম বাজারদা খল্লে।

অস্ত্রেলিয়া-ইন্দিয়া ফিল্ম কো-প্রদক্সন পেনেল

ভারত অমসুং অস্ত্রেলিয়াগী ফিল্ম ইন্দস্ত্রিশিংগী মরক্তা মতেং পাংনবা  হেনগৎলকপগা লোয়ননা, লৈবাক অনিগী মরক্তা পুন্না ফিল্ম পুথোকপগী খুদোংচাবশিংদা মীৎয়েং থম্বা অখন্নবা খন্ন-নৈনবা অমা পাংথোক্কনি। প্রদুসরশিং অমসুং ইন্দস্ত্রিগী অখঙ-অহৈশিং শরুক য়াগদৌরিবা পেনেল অসিদা পুন্না ফিল্ম পুথোক্নবগী অনৌবা থবকশিং অমসুং চৎথোক-চৎশিনগী মতাংদা খন্নগনি।

সেনিমাতোগ্রাফর জোন সিয়েলগী মাস্তর ক্লাস

মহাক্কী মমিং লৈরবা ফিল্ম মেদ মেক্স: ফ্যুরি রোদ অমসুং ইংলিস পেসেন্তগী মমিং চৎলবা একাদেমি এৱার্দ ফংলবা সেনিমাতোগ্রাফর জোন সিয়েলগী সেনিমাতোগ্রাফিগী মাস্তর ক্লাস অসি য়াম্না পাম্নবা অমা ওইরগনি। সেসন অসিনা নৌনা হৌগৎলক্লিবা ফিল্ম মেকরশিং অমসুং সেনিমা পামজবশিংদা মমল নাইদ্রবা তেক্নিকেলগী লৌশিং কয়া পীরগনি।

মালেম শীনবা থুংবগী ফিল্মশিং উৎতুনা, খন্ন-নৈনবশিং পাংথোক্তুনা, ৱার্কশোপশিং পাংথোক্তুনা অমসুং অখন্নবা ফিল্মশিং উৎতুনা মালেমগী সেনিমা মশক তাক্নবা ৫৫শুবা ইফি থৌরাং তৌরে। চহি অসিগী “কন্ত্রি ফোকস” অসিনা অস্ত্রেলিয়া মশক তাক্কনি অমসুং লৈবাক কয়া লান্না নাত অমসুং চৎনবীশিং পীথোক-পীশিন তৌনবা অমসুং সেনিমা য়োকখৎনবা ইফিগী পান্দম ফংহনবা ঙমগনি।

১৯৫২দা লিংখৎখিবা ইফি অসি এসিয়াগী খ্বাইদগী মরুওইবা ফিল্ম ফেস্তিবেলশিংগী মনুংদা অমনি অমসুং মসিনা মালেম শীনবা থুংবগী ফিল্মমেকরশিং মখোয়গী ফিল্মশিং উৎনবগী মফম অমা পীরি। চহি খুদিংগী গৱাদা পাংথোকপা ইফিদা দিরেক্তরশিং, প্রদুসরশিং, এক্তরশিং অমসুং ফিল্ম পামজবশিং মালেমদা খ্বাইদগী ফজবা ফিল্মশিং উবা ফংগনি।

***