কেন্দ্রগী য়ুম্লৈ-কৈরৈ অমসুং কোওপরেশন মন্ত্রী, শ্রী অমিত শাহনা ঙসি গুজরাত এসেম্বলীদা ‘লেজিস্লেতিব দ্রাফতিং ত্রেনিং’ প্রোগ্রামদা ৱা ঙাংখ্রে। গুজরাত লেজিসলেতিব এসেম্বলীগী স্পীকর, শ্রী শঙ্কর চৌধরী, অমসুং গুজরাতকী মুখ্য মন্ত্রী, শ্রী ভুপেন্দ্র পতেল য়াওনা অঙম-অথৌ কয়া অমনা থৌরম অদুদা শরুক য়াখি।

কেন্দ্রগী য়ুম্লৈ-কৈরৈ মন্ত্রীনা হায়খি মদুদি “লেজিসলেতিব দ্রাফতিং” তৌবা হায়বা অসি কনস্তিত্যুশন্না লৈঙাক ঙাকপা ভারতকুম্বা লৈবাক অমগীদমক্তা য়াম্না মরু ওইবা অমসুং তঙাইফদবা কলা অমনি। মহাক্না হায়খি মদুদি, মসিগী কলা অসি তপ্না-তপ্না মাংশিল্লক্লে। মহাক্না পনখি মদুদি, প্রধান মন্ত্রী, শ্রী নরেন্দ্র মোদীগী লুচিং মখাদা সরকার অসিনা চহি ১০ মপুং ফাখ্রে, মসিগী মনুংদা ভারতনা গুজরাত লেজিসলেতিব এসেম্বলীদা হৌরকফম ওইরদুনা মালেম অসিগী ওইনা পুক্নিং থৌগৎনিংঙাই ওইরবা মফম অমা ওইরে। প্রধান মন্ত্রী মোদীনা হৌখিবা চহি ১০ অসিদা মীয়ামগী য়াইফ-থৌরাংদা মাইপাকপা কয়া অমা ফংবা ঙমখ্রে।

শ্রী অমিত শাহনা পনখি মদুদি “লেজিসলেতিব দ্রাফতিং” তৌবা হায়বসি আইনগী য়ুমফম ওইরিবনি; মসিগী কলা অসি মরাই-চাইথরকপনা দেমোক্রেসীদা অকাইবা পীবদা নত্তনা রাজ্য অমসুং লৈবাক অসিদা লৈরিবা মী মিলিয়ন কয়া অমদশু শোকহল্লে। মহাক্না হায়খি মদুদি করিগুম্বা আইন শেম্বা মতমদা লেজিসলেতিবকী থৌওংশিং নিংথিনা খঙদনা দ্রাফতিং তৌরবদি, আইনশিং অদুগী পাম্লিবা পান্দমশিং অদু কৈদৌনুংদা ফংবা ঙম্লোই। কেবিনেত নোত অমবু বিল অমদা ওন্থোকপগী থৌদাং অসি লেজিসলেতিব দিপার্তমেন্ততা লৈ, মসিনা তুংদা আইন শেম্মি। শ্রী শাহনা হায়খি মদুদি “লেজিসলেতিব দ্রাফতিং” তৌবগী থৌওং অদু সাইন্তিফিক ওইবা মওং অমদা মপুং ফানা শেমদ্রবদি, দেমোক্রেসীনা মাইপাকপা হায়বসি ওইথোকপা ঙম্লোই।

কেন্দ্রগী য়ুম্লৈ-কৈরৈ মন্ত্রীনা হায়খি মদুদি করিগুম্বা মালেম অসিদা “লেজিসলেতিব দ্রাফতিং” তৌবগীদমক্তা মীয়াম্না খ্বাইদগী মপুং ফাবনি হায়না খন্নবা অমা লৈরদি, মদু ভারতকী কনস্তিত্যশন শেম্বা অদুনা ওইগদৌরিবনি। মহাক্না হায়খি মদুদি ভারতকী কনস্তিত্যুশন শেম্বাদগী হেন্না চাউবা থৌওং অমত্তা লৈতে। মহাক্না য়াম্না মরু ওইনা পনখি মদুদি ময়েক শেংবা হায়বা অসিনা “লেজিসলেতিব দ্রাফতিং” তৌবগী কলা অসিগী খ্বাইদগী মরু ওইবা মশক অদুনি। লেজিসলেতরশিং অদুনা মখোয়গী পান্দমশিং অদুবু আইন ওইনা ওন্থোকপদা ময়েক শেংলিবমখৈ, চমম্নবা লৈরিবা শরুক অদু হন্থরক্কদৌরিবনি; অমসুং চমম্নবা লৈরিবা শরুক অদুনা য়ামদ্রিবমখৈ, ৱায়েল-বিচার তৌবশু হন্থগদৌরিবনি। শ্রী শাহনা পনখি মদুদি ৱায়েলগী মথৌ তাবা হায়বসি আইনগী ওইবা ৱাহন্থোকশিং অদুনা ময়েক শেংদদুনা চমম্নবা শরুক অমা য়াওরকপা মতমদা থোকই; মরম অদুনা আইনশিং অসি য়াম্না ময়েক শেংগদবনি।

কেন্দ্রগী য়ুম্লৈ-কৈরৈ মন্ত্রীনা হায়খি মদুদি আর্তিকল ৩৭০, খুদম ওইনা, মসি কনস্তিত্যুশনগী দ্রাফতিং কমিতীনা য়াম্না ময়েক শেংনা দ্রাফ তৌখি। মহাক্না হায়খি, “তেমপোররী প্রোভিজন্স ওফ দ কনস্তিত্যুশন” হায়রিবা তার্ম অসি য়াম্না মরু ওই, মসিগী ৱাহন্থোক্তি মসি “পার্মনেন্ত প্রোভিজন” নত্তে হায়বনি, অমসুং মসি লৌথোকপদা কনস্তিত্যুশনদা এমেন্দমেন্ত অমগী মথৌ তাদে। মদুদা পনখি মদুদি লোক সভা অমসুং রাজ্য সভা অনিমক্তা সিমপল মেজোরিতী ওইবা অমনা ভেলিদেত তৌরগা রাস্ত্রপতিনা মতম অমা হেক্তদা আর্তিকল ৩৭০ লৌথোক্নবা কনস্তিত্যুশনগী ওইবা ওর্দর অমা থোকপা য়াই। মহাক্না হায়খি মদুদি করিগুম্বা আর্তিকল ৩৭০ অসি মতম অদুদা প্রোভিজনেল কনস্তিত্যুত অমা ওইনা তারবদি, লৌথোক্নবগীদমক্তা শরুক অহুমগী মনুংদা শরুক অনি মেজোরিতী ওইবা মথৌ তাই। তৌইগুম্বশুং, লেজিসলেতরশিং অদুনা তেমপোররী প্রোভিজন অসি ঙাইহাক্কী য়ানবা শিনখিবা অমনি হায়বসি য়াম্না মমুৎ শেংনা খঙই, অমসুং মরম অদুনা, মসি লৌথোকপগী রিফরেন্স অদু আর্তিকল ৩৭০(৩)দা থম্লিবনি।

শ্রী অমিত শাহনা লেজিসলেতরশিং অমসুং MPশিংদা লেজিসলেতিব দ্রাফতিং ৱিংগা লেপ্তনা পাউ ফাওননবা অমসুং মখোয়গা লেপ্তনা খন্ন-নৈনমিন্ননবা আপীল তৌখি। মহক্না পনখি মদুদি প্রধান মন্ত্রী, শ্রী নরেন্দ্র মোদীনা ২০১৯দা পার্লিয়ামেন্ত হাউসকী মনুংদা “লেজিসলেতিব দ্রাফতিং”গীদমক্তা ত্রেনিং স্কুল অমা লিংখৎখি। মহাক্না পনখি মদুদি নিংথিনা খঙলবা পোলিতিসিয়ন অমনা আইনগী মতাংদা মখোয়না খঙলিবশিং অদুগী খুত্থাংদা য়াম্না অচৌবা অহোংবা অমা পুরকপা ঙম্মি। জি.ভি. মাভালঙ্কারবু খুদম অমা ওইনা পল্লদুনা, শ্রী শাহনা হায়খি মদুদি ওপোজিশন লৈজরবশু মহাক্না রিফোর্ম ১৬কী প্রোপোজল থাংগৎলকখি, হায়রিবা ১৬তুমক রুলিং পার্তী অদুনা য়াবা তাখি মরমদি মখোয় পুম্নমক রিফোর্মগীদমক্তা য়াম্না নিংথিনা খন্থরবা প্রোপোজলশিং ওইখি। মহাক্না য়াম্না মরু ওইনা পনখি মদুদি লেজিসলেতিব দ্রাফতিং তৌবদা য়াওরিবশিং অদুনা ফিলোসোফর অমগী মতিক-মগুন লৈগদবনি, পুৱারিগী ওইবা অশেংবা ৱাফমশিংগী মতাংদা খঙগদবনি, অমসুং লোলগী মতাংদা নিংথিনা খঙবা ওইগদবনি।

***