ঙসি প্রধান মন্ত্রী শ্রী নরেন্দ্র মোদীনা কাজান্দা ১৬শুবা ব্রিক্স মীফম নাকলদা ইরানগী রাস্ত্রপতি দোক্তর মসৌদ পেজেসকিয়ান উনখ্রে।

ইরানগী ৯শুবা রাস্ত্রপতি ওইনা মহাক খল্লকপদা প্রধান মন্ত্রীনা দোক্তর মসৌদ পেজেসকিয়ান থাগৎপা ফোঙদোকখি। মহাক্না ব্রিক্স ইমুং-মনুংদা ইরান তরাম্না ওকখি। লুচিংবা অনিনা লৈবাক অনিগী মরীশিং হন্না য়েংশিনখি অমসুং তোঙান-তোঙানবা হিরমশিংদা মতেং পাংনরিবা অসি হেন্না মপাঙ্গল কনখৎহন্নবা লম্বীশিং খন্নখি। চাবাহার হিথাংফমগী মতম শাংনা চৎনগদবা কন্ত্রেক অমা খুৎয়েক পীনখিবা অসি লৈবাক অনিগী মরীশিংগী মরুওইবা মাইপাকপা অমনি হায়খিবগা লোয়ননা, অফগানিস্থান অমুক হন্না শেমগৎপা অমসুং চাউখৎহনবগী মরুওইবা অদু লুচিংবা অনিনা অমুক হন্না থমখি অমসুং সেন্ত্রেল এসিয়াগা ললোন-ইতিক অমসুং শেন-থুমগী মরীশিং ফগৎহনবগী মতাংদা খন্নখি।

নোংচুপ এসিয়াগী ফিবম য়াওনা লমদম অসিদা ওইরক্লিবা ফিবমশিংগী মতাংদা লুচিংবশিংনা মখোয়গী ওইবা ৱাখল্লোনশিং ফোঙদোক্নখি। মুক্নবা পাকথোক-চাউথোরকপদা প্রধান মন্ত্রীনা নুঙনাংবা ফোঙদোকখি অমসুং মুক্নরিবা অসি হন্থহন্নবা ভারতনা তকশিনবা অদু অমুক হন্না থমখি। মীচম মীয়ামগী পুন্সি ঙাক-শেন্নবা অমসুং মুক্নবা অসি ৱারোইশিন পুরক্নবা হোৎনবদা কুতনিতিগী থৌদাংগী মতাংদা প্রধান মন্ত্রীনা ফোঙদোকখি।

ব্রিক্স অমসুং এস.সি.ও য়াওনা তোঙান-তোঙানবা মালেমগী লুপশিংদা মখোয় মখা তানা মতেং পাংন্নবা লুচিংবশিংনা য়ানখ্রে। অথুবা মতমদা ভারত্তা লাক্নবা প্রধান মন্ত্রীনা রাস্ত্রপতি পেজেসকিয়ানদা চেবাউ পীখ্রে। রাস্ত্রপতি পেজেসকিয়ান্না চেবাউ অদু অয়াবা পীখ্রে।

***