ঙসি নিউ দিল্লিদা ভারতকী রাস্ত্রপতি শ্রীমতি দ্রৌপতি মুর্মুনা ৫শুবা নেসনেল ৱাতর এৱার্দ য়েন্থোকখ্রে।

থৌরম অদুদা ৱা ঙাংবদা, রাস্ত্রপতিনা হায়খি মদুদি ঈশিং অসি তঙাইফদবা অমনি অমসুং মীওই খুদিংমক্কী তঙাইফদবা মীওইবগী হক অমনি। অফবা ঈশিং ফংদনা লু-নানবা অমসুং নুংঙাই-য়াইফবা খুন্নাই অমা শেমগৎপা ঙম্লোই। ঈশিং ফংদবা অমসুং সেনিতেসনগী ফিবম ফত্তবা অসিনা লায়রবশিংগী হকশেল, চীঞ্জাক অমসুং হিংনবদা লম্বী ফংবদা অচৌবা চৈথেং অমা পীরি।

রাস্ত্রপতিনা হায়খি মদুদি মালেম অসিদা অফবা ঈশিং ফংলিবা মফম অসি অকক্নবা খরনি হায়বা ঐখোয়না খঙনরে অমসুং ঐখোয়না ঈশিং তুংশিনবা অমসুং শেন্নবগী থবকশিংদা মীরাইদুনা লৈরি। মীওইবনা থোকহনবা মরম কয়াদগী ঈশিং ফংফমশিং মোৎলে অমসুং ময়েং তারক্লে। ঈশিং তুংশিনবা অমসুং ঈশিং লোকশিনবগী থবকশিং পুক্নিং থৌগৎনবা ভারত সরকারনা থবক কয়া পায়খৎলে।

রাস্ত্রপতিনা হায়খি মদুদি ঈশিং তুংশিনবা অসি ঐখোয়গী চৎনবীগী শরুক অমনি। ঐখোয়গী ইপা-ইপুশিংনা খুঙ্গংশিংগী ময়াম লাইজ ইকোন কয়া তৌরমখি। ঈশিং ফংলক্তবা মতমদা শীজিন্নবা য়ানবা মখোয়না লাইশঙশিং নত্ত্রগা ময়াদা ঈশিং তুংশিনফম কয়া শেমগৎলমখি। মীওই খরনা ঈশিং লৈরিবা মফমশিং মখোয় মশাগী খুদোংচাবা ফংনবা লম খোপচিনখি। মসিনা ইকং মতমদা ঈশিং ফংবদা অৱাবা পীবতা নত্তনা নোং কা হেন্না তারকপা মতমদা ঈশিং ইচাউগুম্বা ফিবমশিং থোকহল্লে।

রাস্ত্রপতিনা হায়খি মদুদি ঈশিং ফংফম ফগৎহনবা অমসুং ঈশিং তুংশিনবা অসি মীওই খুদিংমক্কী অপুনবা থবক্নি। ঐখোয় থৱায় য়াওনা শরুক য়াদনা, ঈশিং মরাংকাইনা ফংবা ভারত অমা শেমগৎপা ওইথোক্তবনি। অপীকপা থবকশিংনা ঐখোয়না য়াম্না চাউনা মতেং পাংবগনি। খুদম ওইনা, ঐখোয়না তোতি ঈশিং থাদোক্তুনা থম্লোইদবনি, মথক্তা থম্লিবা ঈশিং তেঙ্কশিং ঈশিং পাথোকহল্লোইদবনি, য়ুমশিং নোংগী ঈশিং লোকশিনগদবনি অমসুং অপুনবা মহৌশাদগী লৈরক্লবা ঈশিং ফংফমশিং অমুক হন্না শেমগৎকদবনি।

রাস্ত্রপতিনা হায়খি মদুদি মরী লৈনবা থবকশিং অমসুং ঈশিং ফংফমগী থবকশিং য়োকখৎনবা নেসনেল ৱাতর এৱার্দ অসি থাগৎফম থোকপা থবক অমনি। মনা ফংলবশিংগী খ্বাইদগী ফবা থবকশিং থৌরম অসিগী খুৎথাংদা মীয়ামদা য়ৌহনগদবনি।

নেসনেল ৱাতর এৱার্দনা মীয়ামদা ঈশিংগী মরুওইবা অমসুং ঈশিং শীজিন্নবগী খ্বাইদগী ফবা থবকশিং মীয়ামদা পুক্নিং থৌগৎনবা মীয়াম ৱাখল তাহন্নবা পান্দম থম্লি। কাংলুপ মঙাদা ৫শুবা নেসনেল ৱাতর এৱার্দ পীরি- মখোয় অদুদি খ্বাইদগী ফবা রাজ্য, খ্বাইদগী ফবা জিলা, খ্বাইদগী ফবা পঞ্চয়াত, খ্বাইদগী ফবা অর্বান লোকেল বোদি, খ্বাইদগী ফবা স্কুল নত্ত্রগা কলেজ, খ্বাইদগী ফবা ইন্দস্ত্রি, খ্বাইদগী ফবা ঈশিং শীজিন্নবা এসোসিএসন, খ্বাইদগী ফবা ইন্সতিতুসন (স্কুল নত্ত্রগা কলেজগী মথক্তা) অমসুং খ্বাইদগী ফবা সিবিল সোসাইতিনি। 

****