U Vice-President, Jagdeep Dhankhar, u la ong mynta ka sngi, “Ka thain shatei lammihngi ka don ha ki kam ka roi ka par jong ka ri.” U la ban jur ba ka thain shatei lammihngi ka nohsynniang ha ka jingiatylli, ka jingkiew ka ioh ka kot bad ka deiriti jong ka ri. Da kaba pdiang ba ka thain shatei lammihngi ka dei ka bynta kaba kongsan bha jong ka ri, u Dhankhar u la iaroh ia ka Look East bad Act East Policy kiba la wanrah ia ka roi ka par ha ki lad iakren, ka leit ka wan bad ka jingtei ia ki kad liengsuin ha ka thain.

Haba pynpaw ia ka jingsngew bynniaw shaphang ki khana kiba ialam bakla, u Vice- President u la kylli hato ka jingwan ki jingtip ki bym don nongrim ka dei mo ban don ha ki rynsan paidbah. U la kylli ruh hato ngi lah ban leh kulmar, da kaba klet ia ki kamram jong ngi na ka bynta ka ri. U la ong ba ka Bharat ka dang kiew shaphrang bad kumta ym dei ban leh ia kine ki kam bad u la ong ba ki samla ki dei ban wad jingtip ba bniah. U Dhankhar u la kyntu ruh ia ki samla bad u la ong ba ki dei kiba nohsynniang bad kiba don ka bynta kaba khraw ha ka jingiaid lynti ka India sha ka jingkylla sha ka ri kaba la kiew shaphrang shuwa u 2047.

Ha ka jingai jingkren ha ka jingbuh maw nongrim ia ka Meghalaya Skill and Innovation Hub ha nongbah Shillong mynta ka sngi, u Vice-President u la ong ba ka jingtbit kam dei kaba shu lap ne kaba shu saindur, hynrei ka dei ka jingpyndonkam kaba seisoh tam ia ka sap ha kano kano ka kam kaba pynbha tam ia ka sap jong ki briew. U la ong ba ka jingpyntbit kam dei tang ka kam, ka dei ka jingdonkam.

U Vice-President u la kren ruh shaphang ka jingwanrah ia ka tnad Skill Development and Entrepreneurship kaba kyrpang bad ka jingbuh kyrpang 60,000 klur na ka bynta ka internship jong 5 lak ngut ki samla ha ki san snem, da kaba bynrap ba ki shnong bad ki jaka khapsor ki dei ban long ki jaka Pdeng jong kine ki jaka ai jingpyntbit.

Ha kaba iadei bad ka jingsngew jong u haba wan sha Meghalaya, u Vice-President u la ong, “Lada ka don ka bneng, ka don ha India, lada ka don ka jinglong na bneng, ka don ha Meghalaya.” U la ong ba ka kam jngoh kai ka lah ban kyntiew bha ia ka ioh ka kot jong ka Meghalaya. U la ong ruh ba ka Mei Mariang ka la ai ka jingitynnad ia ka Meghalaya bad u la kyntu ia ki briew ba kin pyndonkam ia kane da kaba don ki briew kiba la pyntbit ha kane ka kam.

U C.H. Vijayashankar, Lat ka jylla Meghalaya, Conrad K Sangma, Myntri Rangbah ka jylla Meghalaya, Dr. Mazel AmpareenLyngdoh, Cabinet Minister, Bah Donald Phillips Wahlang, Chief Secretary sha ka sorkar Meghalaya bad kiwei kiwei ki kynrem ki lyndan ki la iadonlang ha kane ka sngi.

****