ভারতকী রাস্ত্রপতি শ্রীমতী দ্রৌপদি মুর্মুনা ঙসি (২০২৪গী ওক্তোবর ৯) নই দিল্লীদা ওল ইন্দিয়া ইন্সতিত্যুত ওফ অয়ুর্বেদ (এ.আই.আই.এ.)গী ৭শুবা ফাউন্দেসন দেদা শরুক য়াখ্রে। 

থৌরমদুদা ৱা ঙাংলদুনা রাস্ত্রপতিনা হায়খি মদুদি অয়ুর্বেদ অসি মালেমদা খ্বাইদগী লীরবা মেদিকেল সিস্তেমশিংগী মনুংদা অমনি। মসি মালেমদা ভারতকী মমল নাইদ্রবা খুদোলনি। অয়ুর্বেদনা পুক্নিং, হকচাক অমসুং আত্মগী মরক্তা থাক ঙাক্তুনা থমদুনা হোলিস্তিক হেল্থ মেনেজমেন্তদা শাহৌ পীরি।

রাস্ত্রপতিনা হায়খি মদুদি ঐখোয়না মতম পুম্নমক্তা ঐখোয়গী মনাক নকপদা লৈরিবা উ অমসুং পাম্বীশিংগী মেদিসিনেল ভেল্যুগী মরমদা খংনা মদু শিজিন্নদুনা লাক্লি। ত্রাইবেল সোসাইতীদা হর্বশিং অমসুং মেদিসিনেল পাম্বীশিংগী খংবগী ত্রেদিসন হেনলি। অদুবু সমাজনা আধুনিক ওইবগী লম্বীদা চংশিল্লকখি অমসুং মহৌশাদগী লাপথোরকখি, ঐখোয়না ত্রেদিসনগী ওইবা গ্যান অদু শিজিন্নবা তোকখি। হোম রেমেদিশিং এদোপ্ত তৌবদগী দোক্তর অমদগী হিদাক লাংথক ফংবনা হেন্না অরাইবা ওইরকলি। হৌজিক মীয়ামগী মরক্তা এৱার্নেস হেনগৎলক্লি। ঙসিদি ইন্তেগ্রেতিব সিস্তেম ওফ মেদিসিনগী ৱাখল্লোন অসি মালেম পুম্বদা পোপুলর ওইরক্লি।

রাস্ত্রপতিনা হায়খি মদুদি য়াম্না শাংলবা মতমদগী অয়ুর্বেদতা ঐখোয়গী লেংদ্রবা থাজবা লৈরক্লি। মীওই খরনা থাজবা অসিগী কানবা লৌদুনা ইচম চমজবা মীওইশিংবু লৌনম তৌরি। মখোয়না চম্নবা ইনফোর্মেশনশিং শন্দোক্লি অমসুং লান্না ক্লেম তৌরি, মদুনা মীয়ামগী শেন অমসুং হকশেল মাংহনবতা নত্তনা অয়ুর্বেদপুসু মশেং মরাংহল্লি। মহাক্না হায়খি মদুদি মীয়াম্না মহৈগী মশিং হৈতবা দোক্তরশিংগী মনাক্তা চৎতনবগীদমক মতিকচাবা দোক্তরশিং হেন্না হেন্না মথৌ তাই। হৌখিবা চহি খরদা অয়ুর্বেদকী কোলেজশিং অমসুং মহৈরোইশিংগী মশিং শিংথানিংঙাই ওইনা হেনগৎলক্লে খংবদা মহাক্না নুংঙাইবা ফোংদোকখি। মহাক্না থাজবা থমখি মদুদি লাক্কদৌরিবা মতমশিংদা মতিক চাবা দোক্তরশিংগী মশিং মখা তানা হেনগৎলক্লগনি।

রাস্ত্রপতিনা হায়খি মদুদি অয়ুর্বেদকী দেবেলপমেন্তনা মীওইশিংদা কানহনবা খক্তা নত্তনা শা-শ্নশিং অমসুং মহৌশাগী ফিভমদসু কানহনগনি। উ অমসুং পাম্বী কয়া ঐখোয়না মখোয়গী য়ুতিলিতী অদু খংদবনা মরম ওইদুনা মাংশিলক্লি। মখোয়গী মরুওইবা অদু খংলবা মতমদা ঐখোয়না মখোয়বু য়োকখৎতুনা থমগনি।  

রাস্ত্রপতিনা হায়খি মদুদি মেদিসিনগী তোঙান তোঙানবা সিস্তেমশিংগা মরী লৈনবা মীওইশিংনা মখোয়গী সিস্তেম অসি খ্বাইদগী ফবনি হায়না তোনা হায়রি। মখোয়গী মরক্তা হকশেল ফনা চাংদম্নবা অসি অফবা অমনি অদুবু অমনা অমবু হুন্দুনা ঙাংলোইদবনি। মেদিসিনগী তোঙান তোঙানবা সিস্তেমশিংগা মরী লৈনবা মীওইশিংগী মরক্তা তেংবা পীনবগী ৱাখল্লোন লৈগদবনি। পুম্নমক্কী পান্দমদি অনাবশিংবু ফহনদুনা হ্যুমেনিতীদা অফবা তৌবনি। ঐখোয় পুম্নমক্না খুরুমদরি ‘সর্বে সন্তু নিরমায়ে’ – মীপুম খুদিংমক লাইনা-লায়োং লৈতবা ওইরসনু।

রাস্ত্রপতিনা হায়খি মদুদি ঐখোয়না রিসর্স অমসুং অয়ুর্বেদকা মরী লৈনবশিং শোইহন্দনবা হিদাকশিংগী ক্বালিতীদা মখা তানা ফগৎহন্নবদা মীৎয়েম থমগদবনি। ঐখোয়না অয়ুর্বেদ এজুকেসন ইন্সতিত্যুসনশিং শক্তি লৈহনবসু মথৌ তাই। ওল ইন্দিয়া ইন্সতিত্যুত ওউ অয়ুর্বেদনা ত্রেদিস্নেল এজুকেসনবু মোদর্ন তেক্নোলোজীগা পুন্সিন্দুনা য়াম্না তেনবা মতমগী মনুংদা অয়ুর্বেদিক মেদিসিন, এজুকেসন, রিসর্স অমসুং ওলওবর হেল্থকেয়রদা মসিনা মরুওইবা মফম অমা কন্দুনা থমলে খংবদা মহাক্না নুংঙাইবা ফোংদোকখি।

রাস্ত্রপতিগী ৱারোল য়েংনবগীদমক মসিদা ক্লিক তৌবীয়ু

*******