ప్రధానమంత్రి శ్రీ నరేంద్ర మోదీ, మహారాష్ట్ర వాషింలో అక్టోబర్ 5న ‘ప్రధానమంత్రి కిసాన్ సమ్మాన్ నిధి’ (‘పీఎం-కిసాన్’) 18వ విడత నిధులను విడుదల చేస్తారు. మధ్యవర్తుల ప్రమేయం లేకుండా, సుమారు 20,000 కోట్ల రూపాయల సొమ్ము,  నేరుగా రైతుల ఖాతాల్లోకి జమ చేసే ఈ ప్రత్యక్ష నగదు బదిలీ పథకం వల్ల, దేశంలోని 9.4 కోట్ల రైతులు లబ్ధి పొందుతారు.

కార్యక్రమానికి మహారాష్ట్ర గవర్నర్ శ్రీ సీ పీ రాధాకృష్ణన్, కేంద్ర వ్యవసాయ శాఖ మంత్రి శ్రీ శివరాజ్ సింగ్ చౌహాన్, కేంద్ర మత్స్య, పశు సంవర్ధక, పాడిపరిశ్రమ శాఖ మంత్రి శ్రీ రాజీవ్ రంజన్ సింగ్, మహారాష్ట్ర ముఖ్యమంత్రి శ్రీ ఏక్ నాథ్ షిండే, ఉప ముఖ్యమంత్రులు శ్రీ అజిత్ పవార్, శ్రీ దేవేంద్ర ఫడ్నవీస్ సహా ఇతర ప్రముఖులు పాల్గొంటారు. రాష్ట్ర మృత్తిక, జల సంరక్షణ శాఖ మంత్రి వాషిం, యవత్మల్ జిల్లాల ఇన్ఛార్జి మంత్రి కూడా అయిన  శ్రీ సంజయ్ రాథోడ్ కూడా కార్యక్రమంలో పాల్గొంటారు. 732 ‘కృషి విజ్ఞాన్ కేంద్రాల’ రైతులు సహా దాదాపు 2.5 కోట్ల రైతన్నలు, ఒక లక్ష ప్రాథమిక వ్యవసాయ సహకార సంఘాలు, 5 లక్షల సాధారణ సేవల కేంద్రాలు (కామన్ సర్వీస్ సెంటర్లు)  వెబ్ కాస్ట్ పద్ధతి ద్వారా ఈ కార్యక్రమంలో పాల్గొంటారు. నిధుల విడుదలను పురస్కరించుకుని, ‘పీఎం-కిసాన్ ఉత్సవ్ దివస్’ పేరిట వివిధ రాష్ట్రాలూ కేంద్రపాలిత ప్రాంతాల్లో ప్రత్యేక కార్యక్రమాలు ఏర్పాటు అవుతున్నాయి.

2019 ఫిబ్రవరి 24న ప్రారంభమైన ‘పీఎం-కిసాన్’ పథకం సొంత భూమి ఉన్న రైతులకు మూడు సమాన వాయిదాల్లో దాదాపు 6,000 రూపాయలను అందిస్తోంది. అక్టోబర్ 5న ప్రధానమంత్రి ‘పీఎం-కిసాన్’ 18వ విడత నిధులను విడుదల చేస్తారు. ఈ 18వ కోటా నిధుల విడుదలతో మొత్తం పంపిణీ సొమ్ము 3.45 లక్షల కోట్లకు చేరుకుంటుంది. 11 కోట్ల వ్యవసాయదారులు పథకం వల్ల లబ్ధి పొందుతున్నారు. గ్రామీణాభివృద్ధి, వ్యవసాయరంగ సుసంపన్నం పట్ల ప్రభుత్వానికి గల నిబద్ధతకు ఈ పథకం అద్దం పడుతోంది.

పథకం కింద మహారాష్ట్రలోని 1.20 కోట్ల రైతన్నలకు 17 వాయిదాల్లో 32,000 కోట్ల రూపాయల సొమ్ము అందింది. పెద్దమొత్తంలో సొమ్ము అందుకున్న రాష్ట్రంగా మహారాష్ట్ర రెండో స్థానంలో నిలిచింది. 18 వ విడత నిధుల విడుదల వల్ల మొత్తం రూ.1900 కోట్ల సొమ్మును 91.51 లక్షల రైతులకు పంపిణీ చేస్తారు.

రాష్ట్ర రైతులకు మరింత లబ్ధి చేకూరేలా ‘పీఎం-కిసాన్’ నిధుల విడుదల సహా ‘నమో షెట్కారీ మహాసమ్మాన్ నిధి యోజన’ పథకం 5వ విడత తాలూకు 2,000 కోట్ల రూపాయలను కూడా ప్రధాని విడుదల చేస్తారు.

వ్యవసాయ మౌలిక వసతులను మెరుగుపరిచే లక్ష్యంగా, నూతన ప్రభుత్వం తొలి వంద రోజుల్లో, అగ్రికల్చర్ ఇన్ఫ్రాస్ట్రక్చర్ ఫండ్ – ‘ఏఐఎఫ్’ కింద అభివృద్ధి పరచిన వివిధ ప్రాజెక్టులను ప్రధాని జాతికి అంకితం చేస్తారు. 2020లో ప్రారంభించిన ‘ఏఐఎఫ్’ నిధి, పంటకాలం పూర్తయ్యాక అవసరమైన నిల్వ, మార్కెటింగ్ తదితర సౌకర్యాల మెరుగుదల, వ్యవసాయ ఆస్తుల నిర్వహణను మరింత సమర్ధవంతంగా చేసేందుకు అవసరమైన మధ్యకాలిక, దీర్ఘకాలిక రుణాలను అందిస్తుంది. ఈ పథకం కింద అర్హులైన లబ్ధిదారులకు లక్ష కోట్ల రూపాయల వరకూ రుణ సదుపాయం సహా రుణ గ్యారంటీ, వడ్డీ సొమ్ముపై 3% వరకూ ప్రభుత్వ సహాయం లభ్యమవుతాయి. గత 100 రోజుల్లో, 6,541కోట్ల రూపాయల మేర, 10,066 వ్యవసాయ మౌలిక వ్యవస్థల ప్రాజెక్టులు మంజూరయ్యాయి. వీటిలో 97.67 కోట్ల రూపాయల నిధులు 101 ఎఫ్పీఓలకు మంజూరయ్యాయి. 1,929 కోట్ల రూపాయల ఖర్చుతో చేపట్టిన 7,516 ప్రాజెక్టులు పూర్తయ్యాయి, ఇందులో 13.82 కోట్ల విలువైన 35 ఎఫ్పీఓలను రేపు జాతికి అంకితం చేస్తారు. ఈ ప్రాజెక్టులన్నీ వ్యవసాయ రంగంలోని నిల్వ సామర్థ్య పెంపు, ఆహారశుద్ధి, మార్కెట్ రవాణా తదితర మౌలిక వ్యవస్థలను బలోపేతం చేస్తూ ఎఫ్పీఓల స్థాయిని పెంచుతున్నాయి. తద్వారా రైతులు, వ్యవసాయ రంగం లాభపడుతోంది.

బలమైన రవాణా వ్యవస్థను ఏర్పరిచి, భూమిలేని, చిన్న సన్నకారు రైతులకు అండగా నిలవాలన్న ఆశయంతో, దేశంలోని అన్ని బ్లాకుల్లో 10,000 ఎఫ్పీఓల ప్రారంభం కోసం, ప్రభుత్వం కేంద్రీయ రంగ పథకం – ‘సీఎస్ఎస్’ ను ప్రారంభించింది. ఇప్పటి వరకూ ఏర్పడ్డ 9,200 ఎఫ్పీఓల ద్వారా,  8.3 లక్షల మంది మహిళలు, 5.77 లక్షల షెడ్యూల్డ్ కులాలు, తరగతుల వారు సహా 24 లక్షల మంది రైతులు లబ్ధి పొందారు. ప్రస్తుతం, ఈ ఎఫ్పీఓల మొత్తం వార్షిక ఆదాయం 1,300 కోట్లకు చేరుకుంది. కార్యక్రమం సందర్భంగా ప్రధాని ఈ ఎఫ్పీఓలను కూడా జాతికి అంకితమిస్తారు.

ప్రధానమంత్రి ఆశయాలైన ‘మేకిన్ ఇండియా’, ‘ఆత్మనిర్భర్’ సాకారం దిశగా, ఇదే కార్యక్రమంలో, పశువుల పునరుత్పత్తి ప్రక్రియకు సంబంధించిన స్వదేశీ ‘లింగ-నిర్ధారణ వీర్య సాంకేతికత’ను ప్రారంభిస్తారు. అందుబాటు ధరలో ఉండే ఈ సాంకేతికత, పాడి రైతులకు లాభసాటిగా ఉండే  పశువుల జననంలో ఉపకరించడమే కాక, డోసుకు రెండు వందల రూపాయల మేర ఖర్చుని కూడా తగ్గిస్తుంది. పశుసంవర్ధక, పాడి పరిశ్రమ విభాగం-‘డీఏహెచ్డీ’ అభివృద్ధి పరిచిన ‘ఏకీకృత జీనోమిక్ చిప్’ ను కూడా శ్రీ మోదీ ప్రారంభిస్తారు. ఇందులో ‘గౌ’ చిప్ ఆవులకు, ‘మహిష్’ చిప్ గేదెల కోసం నిర్దేశించినవి. భారతీయ పశు జాతులను దృష్టిలో పెట్టుకుని అభివృద్ధి పరిచిన ఈ సాంకేతికత, పాడి రైతుల అవసరాలకు తగ్గ పశువులను ఎంపిక చేసుకోవడంలో, మేటి ఎద్దులను చిన్న వయసులోనే గుర్తించి, వాటిని తదనుగుణంగా పాడిలో వినియోగించుకోవడంలో సహాయకారిగా ఉంటుంది.

సౌరశక్తి  ప్రాజెక్టులు ‘కుసుమ్-సీ’, ‘ఎంఎస్కేవీవై 2.0’ పథకాలకు సంబంధించి 3,000 మెగావాట్ల ప్రాజెక్టులకు పురస్కార పత్రాల ప్రదాన కార్యక్రమ ప్రారంభం, గ్రామ పంచాయితీలకు సామాజిక అభివృద్ధి నిధుల విడుదలను వీడియో మాధ్యమం ద్వారా శ్రీ మోదీ ప్రారంభిస్తారు. ‘ఎంఎస్కేవీవై 2.0’ పథకంలో భాగమైన 19 మెగావాట్ల ఐదు సౌరశక్తి పార్కులను ప్రధానమంత్రి జాతికి అంకితం చేస్తారు. దాంతో, పర్యావరణ-హిత, అందుబాటు ధరల్లో విద్యుత్తు లభించడమే కాక, రైతులకు పగటిపూట కూడా విద్యుత్తు అందుబాటులోకి వస్తుంది, తమ భూములను లీజుకి ఇవ్వడం ద్వారా అదనపు ఆదాయాన్ని వారు సమకూర్చుకోగలుగుతారు.

అయిదు సౌరశక్తి పార్కుల వివరాలు:

(i) ధొండాల్ గావ్, ఛత్రపతి శంభాజీ నగర్ – 3 మెగావాట్లు  

(ii) బమ్నీ బీకే, నాందేడ్ – 5 మెగావాట్లు  

(iii) కొండ్గిరి, కొల్హాపూర్ – 3  మెగావాట్లు  

(iv) జలాలాబాద్, అకోలా – 3 మెగావాట్లు  

(v) పల్షీ బీకే, బుల్ధానా - 5మెగావాట్లు  

***