انڈین پولیس سروس کے 76 آر آر (2023 بیچ) کے زیر تربیت  عملے کے ایک گروپ نے آج (30 ستمبر 2024) راشٹرپتی بھون میں صدر جمہوریہ ہند، محترمہ دروپدی مرمو سے ملاقات کی۔

پروبیشنرز سے خطاب کرتے ہوئے صدر جمہوریہ نے کہا کہ مختلف آل انڈیا سروسز میں انڈین پولیس سروس کی اپنی ایک نمایاں  اہمیت ہے۔نظم و نسق نہ صرف حکمرانی کی بنیاد ہے، بلکہ  یہ جدید  ریاست   کی بھی اساس  ہے۔  آسان الفاظ میں  یہ بھی کہا جا سکتا ہے کہ کئی مقامات  اور بہت سے حالات میں وہ اہل وطن  کے لیے ریاست  کا چہرہ   ہوں گے اور ریاست  کےانتظامی مشینری کے ساتھ ان کا پہلا انٹرفیس ہوگا۔

صدر جمہوریہ نے کہا کہ چونکہ ہندوستان آنے والے برسوں میں نئی ​​بلندیوں کو سر کرنے کا ارادہ رکھتا ہے،ایسے میں آئی پی ایس افسران کا کردار بہت زیادہ اہم ہو جاتا ہے۔ معاشی ترقی اور سماجی ترقی اسی وقت ممکن ہے،  جب  قانون کی بالادستی  برقرار ہو۔ امن و امان قائم  رکھنے، انصاف کو یقینی بنانے اور شہریوں کے حقوق کے تحفظ کے بغیر ترقی  کا تصور ایک بے معنی اصطلاح بن جاتی ہے۔

صدرجمہوریہ  نے حالیہ برسوں میں خواتین آئی پی ایس افسران کی تعداد میں تیزی سے اضافہ کا ذکر کرتے ہوئے خوشی کا اظہارکیا۔ انہوں نے کہا کہ ان کی بڑھتی ہوئی تعداد پولیس عملے کے مجموعی کردار کو بہتر بنا سکتی ہے، پولیس اور کمیونٹی تعلقات کو بہتر بنا سکتی ہے اور قوم کے لیے بھی سودمند ثابت ہو گی۔

صدرجمہوریہ  نے کہا کہ نظم و نسق کی بحالی، جرائم کی روک تھام اور سراغ لگانے کے ساتھ ساتھ پولیسنگ کے دیگر پہلوؤں نے ٹیکنالوجی کی ترقی سے استفادہ کیا ہے۔ تاہم، دوسرا پہلو یہ  بھی ہے کہ مجرموں اور دہشت گردوں نے بھی ٹیکنالوجی کا سہارا لیا ہے۔ جب دنیا بھر میں سائبر کرائمز اور سائبر وارفیئر میں اضافہ ہو رہا ہے، ایسی صورتحال میں آئی پی ایس افسران سے یہی  توقع کی جائے گی کہ وہ ٹیکنالوجی پر دسترس حاصل کریں گے  اور مجرموں سے ایک قدم آگے رہیں گے۔

صدر جمہوریہ نے کہا کہ آئی پی ایس افسران کے کندھوں پر بڑی ذمہ داریاں ڈالی گئی ہیں،  جو کبھی کبھی بہت زیادہ دباؤ کا باعث بھی بن سکتی ہیں۔  اس لیے انہیں اپنی ذہنی صحت کو کبھی نظر انداز نہیں کرنا چاہیے۔ انہو نے زیرتربیت افسران سے کہا کہ یوگا، پرانایام اور آرام کی تکنیک کو اپنے معمول کا حصہ بنائیں۔ صدر جمہوریہ  نے انہیں یہ بھی یاد رکھنے کا مشورہ دیا کہ ’آئی پی ایس‘ میں ’ایس‘ کا مطلب خدمت ہے۔ انہوں نے کہا کہ  ان کا یہ ایک لفظ سب  پر بھاری ہے ، جس کا مطلب ہے کہ ملک اور شہریوں کی  خدمت  کی جائے۔

https://static.pib.gov.in/WriteReadData/specificdocs/documents/2024/sep/doc2024930404701.pdf

***

ش ح۔ ک ا۔ م ش