ভারতকী নহারোলশিং থবক তৌহন্নবা অমসুং অনা-লায়েংগী থবকশিং ফগৎহন্নবা, মাই ভারত থৌরাংগী মখাদা য়ুথ এফেয়ার্স অমসুং স্পোর্তস মিনিস্ত্রিগী য়ুথ এফেয়ার্স দিপার্তমেন্তনা “সেবা সে সিখেন” থৌরম হৌদোক্লে। সেপ্তেম্বর ১৭,২০২৪ দা হৌদোকখিবা, মশানা য়ানা মীয়ামগী থবক তৌবগী লৈবাকশীনবা থুংবগী থৌরম অসিনা হোস্পিতালশিংদা লৈরিবা অনাবশিংদা মরুওইবা মতেং কয়া পাংদুনা নহারোলশিং থবক তৌবগী হৈথোই-শিংথোইবা লৌশিং কয়া ফংনবা পান্দম থম্লি।

থৌরম অসিগী মতাংদা ৱা ঙাংবদা, য়ুথ এফেয়ার্স অমসুং স্পোর্তস অমসুং লেবর অমসুং ইমপ্লোইমেন্তগী য়ুনিয়ন মিনিস্তর দোক্তর মনসুখ মন্দাবিয়ানা হায়খি লৈবাক শীনবা থুংবগী অনাবশিংগী দরকার ওইবশিং ফংহন্দুনা মীওইবগী য়াইফনবা থবক তৌবগী চৎনবী অমা য়োকখৎপা হায়বসি ঐখোয়না পায়খৎলিবা থবক অসিনা খুদম ওইরে। সেবা সে সিখেন থৌরমগী খুৎথাংদা, লৈবাক্কী য়াইফনবা থবক পাংথোক্তুনা ঐখোয়গী নহারোল মাই ভারত ভোলুন্তিয়ারশিং মমল নাইদ্রবা লৌশিং কয়া ফংলে।

থৌরম অসিগী শরুক অমা ওইনা, প্রধান মন্ত্রী জন অরোগ্যা য়োজনা(পিএম-জেএৱাই) মখাদা লৈবা শকখঙলবা অমসুং সরকারগী হোস্পিতাল অনিমক য়াওনা, হোস্পিতাল ৭০০ শীনবা থুংনা মাই ভারত ভোলুন্তিয়ার থম্লে। হোস্পিতাল অমমমদা ভোলুন্তিয়ার ১০-২০ থম্বগা লোয়ননা, থবক অসিনা অনাবশিংগী সেবা তৌবা ফগৎহনবগা লোয়ননা প্রধান মন্ত্রী জন অরোগ্যা য়োজনা(পিএম-জেএৱাই)গী মরমদা খঙবা হেনগৎহনবা পান্দম থম্লি। ভোলুন্তিয়ারশিংনা অনাবশিংদা ও.পি.দিদা লায়েংবা, ই-পাউ লৌবা অমসুং প্রধান মন্ত্রী জন অরোগ্যা য়োজনা(পিএম-জেএৱাই)গী চে-চাংগী থবকশিংদা মতেং পাংলি।

সেবা সে সিখন থৌরম হেক হৌদোকপদগী য়াম্না য়াংনা খুমাঙচাউশিল্লে, মাই ভারত পোর্তেলদা হোস্পিতাল ৮৬১ শরুক য়ারে। থৌরম অসিনা এক্সপেরিমেন্তেল লার্নিং প্রোগ্রাম ৩০৪ পাংথোক্লে অমসুং ভোলুন্তিয়ার তৌনবগী খুদোংচাবা ২৬৪৯ ফংহল্লে।

হৌজিক রাজ্য অমসুং য়ু.তি ২৪ দা হোস্পিতাল ৩১৯দা ভোলুন্তিয়ার ১৭৩২ থৱায় য়াওনা থবক তৌরি। গুজরাত্তা হোস্পিতাল ৩৩ দা ভোলুন্তিয়ার ২৭৩ থমদুনা মাঙজিল থারি, মতুংদা রাজস্থান, হরিয়ানা, তামিল নাদু অমসুং উত্তর প্রদেস লৈরি।

অসিগুম্বা কান্নবা থবক্তা নহারোলশিং শরুক য়াহন্দুনা, সেবা সে সিখেন থৌরম্না নহারোলশিংদা থৌনা হাপ্লে অমসুং মীওইবগী অৱাবা খঙবা অমসুং মীয়ামগী থবক তৌবগী চৎনবী হেনগৎহল্লে। লায়রবা মীওইশিং অনা-লায়েংগী খুদোংচাবা ফংবা হেনগৎহন্দুনা, প্রধান মন্ত্রী জন অরোগ্যা য়োজনা(পিএম-জেএৱাই)গী থবকশিং হেনগৎহন্নবা থৌরম অসিনা হোৎনরি। থৌরম অসি মাইপাকপনা তুংকোইনা কান্নবশিং পীগনি, খুন্নাইগী দাইত্ব লৌবা ঙম্বা লুচিংবশিংগী অনৌবা মীরোল অমা শেমগৎকনি অমসুং মীয়ামগী থবক তৌবগী মরুওইবা অদু অমুক হন্না থৌনা পীরগনি।

হেন্না পাক-শন্না য়ৌনবা মাই ভারতনা মখা তানা হোৎনরি অমসুং সেবা সে সিখেন হৌরম চাউখৎলক্লি। অনা-লায়েংগী মতেং পাংবা অমসুং ভারত শীনবা থুংবগী নহারোলশিংগী ফিবম ফগৎহন্নবা অওনবা অমা পুরক্নবা থৌরাং অসিনা পান্দম থম্লি।

***