প্রধান মন্ত্রী শ্রী নরেন্দ্র মোদীনা ঙসি উত্তর প্রদেসকী গ্রেতর নোইদাদা ইন্দিয়া এক্সপো মার্ততা সেমিকোন ইন্দিয়া ২০২৪ হৌদোকখ্রে। ‘সেমিকন্দক্তরগী তুংলমচৎ শেম্বা’ হায়বা থিমগা লোয়ননা সেপ্তেম্বর ১১ দগী সেপ্তেম্বর ১৩ ফাওবা সেমিকোন ইন্দিয়া ২০২৪ পাংথোক্কনি। নুমিৎ হুমনিগী মীফম অসিদা ভারত সেমিকন্দক্তরশিংগী মালেমগী মফম অমা ওইহন্নবা পান্দমগা লোয়ননা ভারতকী সেমিকন্দক্তরগী লাল্লোং অমসুং থৌশিল উৎকনি। মালেমগী সেমিকন্দক্তর কম্পেনিশিংগী মকোক থোংবা লুচিংবশিং শরুক য়াদুনা কনফরেন্স অসিদা সেমকিন্দক্তর ইন্দস্ত্রিগী মালেমগী লুচিংবশিং, কম্পেনিশিং অমসুং অখঙ-অহৈশিং পুনগনি। কনফরেন্স অসিদা একজিবিতর ২৫০ অমসুং ৱাঙাংলোয় ১৫০ হেন্না শরুক য়ারি।

সেমিকোন ইন্দিয়া ২০২৪ দা তরাম্না ওকপগীদমক সেমিগী সি.ই.ও শ্রী অজিত মনোচানা থাগৎপা ফোঙদোকখি অমসুং মরুওইবা ৱাহৈ অনি ‘ মমাঙদা অমুক্তা ওইখিদ্রিবা’ অমসুং ‘খোঙজেল য়াংনা চাউখৎপা’ পনখি। মহাক্না হায়খি থৌরম অসিগী পাক-চাউবা মমাংদা অমুক্তা থোকখিদ্রি অমসুং সেমিকন্দক্তরশিংগী অপুনবা ইলেক্ত্রোনিক সপ্লাই চেনগী মহুৎশীন্দুনা মালেম শীনবা থুংবগী সি.ই.ও অমসুং সি.এক্স.ও ১০০ হেন্না পুল্লে। লৈবাক অসিগী, মালেমগী, ইন্দস্ত্রিগী অমসুং মীওইবা খুন্নাইগী কান্নবা ফংনবা সেমিকন্দক্তরগী মফম অমা শেমগৎনবা খোঙচত্তা ভারতকী অচেৎপা মরুপ ওইনবা ইন্দস্ত্রিগী থবকশিংদা মহাক্না থাজবা থম্লি।

প্রধান মন্ত্রী মোদীগী আইন মতুংইন্না ভারত্তা খোঙজেল য়াংনা চাউখৎলকপগী নমুনা পল্লদুনা, শ্রী মনোচানা হায়খি মদুদি মীওইবা খুন্নাইগী হেন্না মরুওইদুনা, সেমিকন্দক্তর ইন্দস্ত্রি অসি মালেম অসিদা ইন্দস্ত্রি খুদিংমক্কী য়ুম্ফমনি। ভারতকী মীওই বিল্লিয়ন ১.৪  অমসুং মালেমগী মীওই বিল্লিয়ন ৮গী থবক তৌবা অসিদা থাজবা থম্লি।

পুৱারি ওইরবা মীফম অসি পাংথোকপগীদমক তাতা ইলেক্ত্রোনিক্সকী প্রসিদেন্ত অমসুং সি.ই.ও, দোক্তর রন্ধির থাকুরনা প্রধান মন্ত্রী থাগৎপা ফোঙদোকখি অমসুং ভারতকী লৈমায়দা সেমিকন্দক্তর ইন্দস্ত্রি পুরক্নবা মহাক্না মঙলান থাগৎপা ফোঙদোকখি। চহি অসিগী মার্চ ১৩ দা অসামগী জাগিরোদতা লৈবাক অসিগী অহানবা ওসাত ফেক্তরি অমসুং ধোলেরাদা ভারতকী অহানবা কম্মর্সিএল ফেব শানবা প্রধান মন্ত্রীনা উরেপ-উয়ুং তমখিবা অদু মহাক্না নিংশিংখি। মহাক্না হায়খি প্রোজেক অনিমক অথুবা মতমদা সরকারদগী অয়াবা ফংলে। খোঙলৈ থুংনা থবক পাংথোক্নবা প্রধান মন্ত্রীগী পাউজেলগা লোয়ননা ইন্দিয়া সেমিকন্দক্তর মিসন্না উৎখিবা মশক থোকপা সে-দু রেসিও অমসুং পুন্না থবক তৌমন্নবা অদু মহাক্না থাগৎপা ফোঙদোকখ্রে। চিপ শানবগী মরুওইবা থবক ১১গী মতাংদা দোক্তর থাকুরনা হায়খি সরকারনা পায়খৎলিবা থবকশিংনা মরম ওইদুনা হায়রিবা থবকশিং অদু সেমিকোন ২০২৪ দা মফম অমা পুল্লে। মখা তানা চাউখৎনবা থবকশিং পাংথোক্লিবা কম্পেনিশিংগা লোয়ননা পুন্না থবক তৌমিন্ননবা ভারতকী সেমিকন্দক্তর মিসন্না হোৎনরিবশিং অমসুং প্রধান মন্ত্রীনা মালেমগী লৈবাকশিংগা পাউ ফাওরিবা অসি মহাক্না থাগৎপা ফোঙদোকখি।

মহাক্না হায়খি মদুদি সেমিকন্দক্তর ইন্দস্ত্রি অসি বিকসিত ভারত ২০৪৭গী মঙলানগী য়ুম্ফম অমা ওইগনি অমসুং মসিনা থবক ফংহন্নবা অচৌবা কান্নবা অমা পীগনি। প্রধান মন্ত্রীনা হায়খিবা ৱাফম, ‘হৌজিক্কী মতম অসি, চপ চারবা মতমনি’ অদু পল্লদুনা মহাক্কী ৱারোল লোইশিনখি অমসুং ভারতকী সেমিকন্দক্তরগী মঙলান মঙফাওনবা ঙম্নবা প্রধান মন্ত্রীগী লুচিংবগী থবক অমসুং পান্দম অদু মহাক্না থাগৎপা ফোঙদোকখি।

সেমিকোন ২০২৪ দা শরুক য়াবদা হরাওবা ফোঙদোক্লদুনা, এন.এক্স.পিগী সি.ই.ও, কুর্ত সিভরসনা হায়খি থৌরম অসি ভারতকী অওনবা পুরক্নবা খোঙচৎ অমনি। মাইপাক্নবগী মরম অহুমদি থাক ৱাংনা ৱাখল খনবা,থাজবা থম্বা অমসুং পুন্না থবক তৌমিন্নবনি। ঙসিগী অসিগুম্বা থৌরম অসি পুন্না থবক তৌমিন্নবগী অহৌবনি। ভারত্তা পাংথোক্লিবা থবক অসি মালেম খক্তগী নত্তনা লৈবাক অসিগীসু পাংথোক্লিবনি।

মহাক্না হায়খি সেমিকন্দক্তর ইন্দস্ত্রিনা অতোপ্পা হিরমশিংদা অচৌবা কান্নবা কয়া পীরি অমসুং মসিনা মথং চহি খরদা ভারত খ্বাইদগী শক্তি লৈবা ইকোনোমি অমা ওইরক্নবা ইনোৎ পীরগনি। এন.এক্স.পিনা দোল্লর বিল্লিয়ন অমা হেনবগী রিছার্স অমসুং দিবলপমেন্তগী থবকশিং শরুক অনি হেনগৎহল্লে। ললোন-ইতিক্কী থবক মতম শাংনা চৎথবদা দরকার ওইরিবা ইন্নোবেসন, গনতন্ত্র অমসুং থাজবা অহুম অসি পুনশিনবগীদমক মহাক্না প্রধান মন্ত্রী থাগৎপা ফোঙদোকখি।

সেমিকোন ইন্দিয়া ২০২৪ দা অসিগুম্বা মাইপাক্লবা অমসুং নিংশিংদুনা লৈহৌরগদবা থৌরম অমা শীনবগীদমক রেনেসাসকী সি.ই.ও, হিদেতোসি সিবাতানা প্রধান মন্ত্রী থাগৎপা ফোঙদোকখি। মহাক্না হায়খি মদুদি গুজরাত্তা লৈবা ভারতকী অহানবা এশেমব্লি অমসুং তেস্তিংগী মফমশিংগী মমিং চৎলবা অমসুং মপুংফারবা ইন্সতিতুসন অমগা থবক তৌমিন্নবা অসি লাইবক ফবা অমনি। পাইলোতলাইন অমা শেমগৎপা হৌরে অমসুং বেঙ্গালোর, হায়দ্রবাদ অমসুং নোইদাদা থবকশিং পাকথোক-চাউথোকপা অমসুং মথৌ পাংথোকপা হৌরে। ভারতকী অমসুং মালেমগী কৈথেলশিংগীদমক অৱাংবা থাক্কী সেমিকন্দক্তর দিজাইনগী থবকশিংগী অহেনবা থবক পাংথোক্নবা ভারতনা থৌরাং তৌবা হৌরে। প্রধান মন্ত্রীগী মঙলান থবক ওইনা পাংথোক্নবা ভারত্তা সেমিকন্দক্তর তেক্নোলোজি পুরকপদা মহাক্না হরাওবা ফোঙদোকখি।

সেমিকোন ২০২৪গীদমক আই.এম.ই.সিগী সি.ই.ও, লুক ভেন দেন হোবনা প্রধান মন্ত্রী থাগৎপা ফোঙদোকখি অমসুং মহাক্না হায়খি মদুদি মহাক্কী পান্দম অমসুং লুচিংবগী থবক্না সেমিকন্দক্তর মেনুফেকচরিং চাউখৎনবা ভারতকী নাখৈ শেংলবা লম্বী অমা শেম্লে। মতম শাংনবা চৎনগদবা রিছার্স অমসুং দিবলপমেন্তগী লাল্লোং অমা শেমগৎনবা অমসুং শেন থাদনবা প্রধান মন্ত্রীগী ফিরেপ পল্লদুনা, হোবনা হায়খি মদুদি মসি ইন্দস্ত্রিগী ওইনা য়াম্না মরুওই। প্রধান মন্ত্রীগী অচৌবা থৌরাংশিং শৌগৎনবা মপাঙ্গল কনবা অমসুং মরুওইবা মরী অমা শেমগৎনবা আই.এম.ই.সিনা থৌরাং তৌরে। ইন্দস্ত্রি অসিগীদমক মতিক চাবা সপ্লাই চেন অমা দরকার ওইরি। মালেমদা খ্বাইদগী চাউবা গনতন্ত্র চৎপা লৈবাক অসিদগী হেন্না ফবা মরুপ কনানা ওইগনি।

****