শক্নাইরবা মীথুংলেনশিং,

সাইন্তিস্ত অমসুং ইন্নোভেতর, ইন্দস্ত্রীগী লুচিংবা, অমসুং ঐহাক্কী নুংশিরবা মরুপশিং, ঐহাক্না পুম্নমক্কী মফমদা য়াইফ পাউজেল পীজরি। গ্রীন হাইদ্রোজেনগী মতাংদা পাংথোক্লিবা 2শুবা ইন্তর্নেস্নেল কনফরেন্স অসিদা ঐহাক্না অদোম পুম্নমকপু  তরাম্না ওকচরি।

মরুপশিং, মালেম অসি য়াম্না চাউবা অহোংবা অমা লাক্লি। ক্লাইমেত চেঞ্জ হায়বসি তুংদা লাক্কদবা শিংনবা অমা ওইদ্রে হায়বা মীয়াম্না খঙবা হৌনরক্লে। ক্লাইমেত চেঞ্জকী শাফু অসি হৌজিক অমসুং ইশাগী মফমদা থেংনবা হৌরবনি। ইনর্জী ত্রাঞ্জিসন অমসুং সস্তেনেবিলিতী অসি মালেমগী থৌশিল থৌরাং খন্নবদা ময়োলদা লৈবা ৱাফম অমস ওইরে।

মরুপশিং, ভারতবা হেন্না শংবা অমসুং লু নানবা গ্রহ অমা শেম্নবা খোঙফম চেৎলি। গ্রীন ইনর্জীগী মতাংদা থমখিবা পেরিস কম্মিতমেন্ত মপুং ফানা পাংথোকপা জি-20গী লৈবাক অসি ঐখোয়না অহানবনি। ৱারেপশিং অসি ঐখোয়না পান্দম ওইরিবা ইং 2030গী চহি 9গী মমাংদা ঐখোয়না থবক্তা ওন্থোকখ্রবনি। ভারতকী ইন্সতোল্দ নন-ফোসিল ফুএল কেপাসিতী অসি মমাংগী চহি 10দা চাউরাক্না 300% হেনগৎখ্রবনি। চপ মান্নবা মতম অসিদা ঐখোয়গী সোলার ইনর্জী কেপাসিতীশু 3000% হেন্না হেনগৎখ্রবনি। অদুবু ঐখোয়না মায় পাকপা অসিদা লেপথোকপা নত্তে। হৌজিক লৈরিবা সোল্যুসনশিংগী মপাঙ্গল অমুক্কা হেন্না হেনগৎহন্নবা ঐখোয়না খোঙফম চেৎলি। ঐখোয়না অনৌবা অমসুং ইন্নোভেতিব ওইবা লম কয়াদশু মিৎয়েং চঙলি। গ্রীন হাইদ্রোজেনগী মরু ওইবা লাক্লিবা অসিদি মতাং অসিদনি।

মরুপশিং, গ্রীন হাইদ্রোজেন হায়বসি মালেমগী ইনর্জী লেন্দস্কেপ্তা হাপচিনবা য়াবা কান্নবা হীরম অমনি। মসিনা ইলেক্ত্রিফাই তোবদা লুবা ইন্দস্ত্রীশিংবু দিকার্বনাইজ তৌবদা মতেং পাংবা ঙমগনি। রিফাইনরী, হার, স্তীল, হেবী দ্যুতী ত্রান্সপোর্তেসন – মসিগুম্বা সেক্তর কয়ানা গ্রীন হাইদ্রোজেনগী কান্নবা ফংগনি। মসিগী মরমদি, গ্রীন হাইদ্রোজেন হায়বসি সর্প্লস রিন্যুএবল ইনর্জীগী স্তোরেজ সোল্যুসন ওইনা শিজিন্নবা য়াবগীনি। ভারতনা ইং 2023দা নেস্নেল গ্রীন হাইদ্রোজেন মিসন হান্ননা হৌদোকখ্রবনি।

ঐখোয়না ভারতপু গ্রীন হাইদ্রোজেন পুথোকপা, শিজিন্নবা অমসুং এক্সপোর্ত তৌবগী হব অমা ওইহনবা পাম্মি। নেস্নেল গ্রীন হাইদ্রোজেন মিসন্না ইন্নোভেসন, ইনফ্রাস্ত্রকচর, ইন্দস্ত্রী অমসুং ইনভেস্তমেন্ততা শাফু পীরি। ঐখোয়না কতিং এজ রিসর্চ অমসুং দিভেলপমেন্ততা ইনভেস্ত তৌরি। ইন্দস্ত্রী অমসুং একাদমিয়াগী পার্ত্নরশিপ কয়াশু শেম্লি। দোমেন অসিদা থবক তৌরিবা স্তার্তঅপ অমসুং ওন্তোপ্রিনরশিংবু পুক্নিং থৌগৎলি। গ্রীন জোব ইকোসীস্তেম চাউখৎহনবগী চাউরবা মতিক অমসু হীরম অসিদা লৈরি। মসি য়াহন্নবগীদমক্তা ঐখোয়না সেক্তর অসিদা নহাশিংগী স্কিল পীনবা থবক পায়খৎলি।

মরুপশিং, ক্লাইমেত চেঞ্জ অমসুং ইনর্জী ত্রাঞ্জিসন অসিদা মালেম্না মিৎয়েং চঙনরি। ঐখোয়গী পাউখুম খুদিংশু মালেম্না য়াগদবা পাউখুম ওইবগী মথৌ তাই। গ্রীন হাইদ্রোজেন্না দিকার্বনাইজেসন্দা শাফু পীবগী থৌওং খুমাং হেন্না চাউশিলহন্নবা ইন্তর্নেস্নেল পার্ত্নরশিপকী মথৌ তাবা লৈ। প্রদক্সন হেনগৎহনবা, অচঙবা শেল হন্থহনবা অমসুং ইনফ্রাস্ত্রকচর শেমগৎপগী থৌওং অসি তেংবাংনদুনা খোঙজেল য়াঙহনবা য়াগনি। তেক্নোলোজী অসিবু হেন্না চাউখৎহন্নবা ঐখোয়না রিসর্চ অমসুং ইন্নোভেসন্দা পুন্না থবক তৌমিন্নবা তাবনি। সেপ্তেম্বর 2023দা ভারত্তা জি-20 সম্মিত পাংথোকখি। সম্মিত অসিদা গ্রীন হাইদ্রোজেন্দ অহেনবা মিৎয়েং থমখি। ন্যু দিল্লী জি-20 লীদর্স দিক্লারেসন্না হাইদ্রোজেনগী মতাংদা অৱাংবা থাক্কী ৱারোল মঙাগী য়ানবা পুরকখি। ৱারোলশিং অসিনা অপুনবা রোদমেপ অমস শেম্বদা ঐখোয়দা তেংবাংলি। ঐখোয় পুম্নমক্না নীংশিংগদবদি – ঐখোয়না হৌজিক লৌরিবা ৱারেপ অসিনা তুংগী চারোন-শুরোনগী পুন্সি লেপকদৌরিবনি।

মরুপশিং, মসিগুম্বা মরু ওইবা সেক্তর অসিদা, দোমেন এক্সপর্তশিংনা লমজিংদুনা পুন্না থবক তৌমিন্নবগী মরু ওইবা য়াম্না লৈ। মালেমগী সাইন্তিস্তশিংনা অমত্তা ওইনা পুন্দুনা হীরম কয়া খঙদোক্নবা হোৎনবীয়ু হায়না ঐহাক্না অখন্নবা ওইনা হায়জরি। গ্রীন হাইদ্রোজেন সেক্তরদা তেংবাংনবা পব্লিক পোলিসীশিংদা অহোংবা পুহল্লক্নবা সাইন্তিস্ত অমসুং ইন্নোভেতরশিংনা পাউতাক পীবা য়াই। সাইন্তিফিক কম্ম্যুনিতীশিংনা মিৎয়েং চঙবা য়াবা ৱাহং কয়া অমশু লৈরি। গ্রীন হাইদ্রোজেন পুথোকপদা ঐখোয়না ইলেক্ত্রোলাইজর অমসুং অতোপ্পা কম্পোনেন্তশিংগী মথৌ তৌবগী চাং ঐখোয়না হেনগৎহনবা য়াবরা? ঐখোয়না মসিগী প্রদক্সনগীদমক্তা সমুদ্রগী ঈশিং অমসুং ম্যুনিসিপালগী অমোৎ অকায়শিং শিজিন্নবা য়াবরা? ঐখোয়না গ্রীন হাইদ্রোজেনবু পব্লিক ত্রান্সপোর্ত, শিপ্পিং অমসুং ইনলেন্দ ৱাতরৱেজ কয়াদা করম্না শিজিন্নবা য়াহনগনি? মসিগুম্বা হীরম কয়াবু অমত্তা ওইনা থিদোকমিন্নবনা মালেম পুম্বদা গ্রীন হাইদ্রোজেন শিজিন্নবদা য়াম্না তেংবাংগনি। কনফরেন্স অসিনা মসিগুম্বা ৱাখল্লোন কয়াগী মতাংদা খন্ন নৈনবদা মশক থোক্না তেংবাংগনি হায়না ঐহাক্না থাজৈ।

মরুপশিং, মীওইবা খুন্নাইনা মমাংগী মতমশিংদা শিংনবা কয়া মাইয়োক্নখ্রে। পুন্না পুরকপা অমসুং ইন্নোভেতিব ওইবা ৱারোইশিন কয়া শিজিন্নদুনা ঐখোয়না মতাং খুদিংদা মায় পাকপা ঙমদুনা লাকখিবনি। সস্তেনেবল ফ্যুচর অমগীদমক্তা লমজিংগদৌরিবা অসিশু মসিগা চপ মান্নবা ৱাখল্লোন অমসুং থৌওংশিংনি। ঐখোয়না পুন্না হোৎনবা মতমদা হীরম খুদিংমক ফংগনি। গ্রীন হাইদ্রোজেন পুথোকপা অমসুং শিজিন্নবগী থৌওং খোঙজেল য়াঙখৎহন্নবা ঐখোয়না পুন্না হোৎনমিন্নরসি।

গ্রীন হাইদ্রোজেনগী 2শুবা ইন্তর্নেস্নেল কনফরেন্স অসিদা শরুক য়ারিবা মীপুম খুদিংবু ঐহাক্না অমুক্কা হন্না য়াইফ পাউজেল পীজরি।

থাগৎচরি।

***