ముంబయి సమాచార్ ప్రతిక ‘‘200 నాట్ అవుట్’’ డాక్యుమెంటరీని కేంద్ర హోం, సహకార శాఖ మంత్రి శ్రీ అమిత్ షా విడుదల చేశారు. ముంబయి సమాచార్ దినపత్రిక 200 సంవత్సరాలను పూర్తి చేసుకున్న సందర్భంగా ముంబయిలో ఈ రోజు జరిగిన కార్యక్రమంలో హోం మంత్రి పాల్గొన్నారు. ఆయనతోపాటు

మహారాష్ట్ర ముఖ్యమంత్రి శ్రీ ఏక్‌నాథ్ షిండే, పలువురు ప్రముఖులు హాజరయ్యారు.

ఈ సందర్భంగా హోం మంత్రి శ్రీ అమిత్ షా మాట్లాడుతూ ఏ సంస్థనైనా రెండు శతాబ్దాలకు పైగా నిర్వహించడం కష్టమని, స్థానికంగా వార్తాపత్రికల ప్రచురణ మరింత కష్టమని అన్నారు. విశ్వసనీయతకు ముంబయి సమాచార్ ఉదాహరణగా నిలిచిందనీ, ఎవరైనా ఆ నమ్మకాన్ని సంపాదించడానికి చాలా కష్టపడాల్సి ఉంటుందని శ్రీ షా పేర్కొన్నారు. ఏ భావజాలంలేని రాజకీయ నాయకుడు సరిగా పనిచేయలేడు. భావజాలంతో ఉండే పత్రికలు మంచి చేయలేవని ఆయన వ్యాఖ్యానించారు. అయితే, ముంబయి సమాచార్ భావజాలంతో కాకుండా, పాఠకుల కోసం పనిచేసిందని, వారికి వాస్తవాలను తెలియజేస్తూనే ఉంటుందని ఆయన అన్నారు.

ఝాన్సీరాణి ఏ ఉద్దేశంతో ప్రాణత్యాగం చేసిందో, అదే లక్ష్యంతో ఓ గుజరాతీ 2014లో ప్రమాణ స్వీకారం చేశారని, ఈ రెండు వార్తలనూ ప్రచురించిన ఏకైక పత్రిక 'ముంబయి సమాచార్' అని హోం మంత్రి శ్రీ అమిత్ షా అన్నారు. 1857 తిరుగుబాటు, కాంగ్రెస్ స్థాపన, లోకమాన్య బాలగంగాధర తిలక్ ప్రారంభించిన గణేష్ ఉత్సవాలు, గోఖలే-తిలక్ మధ్య పోరాటం, గాంధీజీ ప్రాబల్యం పెరగడం, క్విట్ ఇండియా ఉద్యమం, ఉప్పు సత్యాగ్రహం, స్వాతంత్ర్య దినోత్సవం, 75 ఏళ్ల స్వాతంత్ర్య ఉత్సవాలు తదితర వార్తలను ప్రచురించిన ఏకైక వార్తా పత్రిక ఇదేనని ఆయన చెప్పారు.

దీర్ఘకాలం పాటు పాత్రికేయ విలువలకు కట్టుబడి వార్తాపత్రికను నడపడం చాలా కష్టమైన పని అనీ, దానిని ముంబయి సమాచార్ సాధించిందని శ్రీ అమిత్ షా అన్నారు. దేశం ఒడిదొడుకులకు లోనైన 1962లో భారత్ – చైనా యుద్ధం, కచ్ భూకంపం, స్వాతంత్ర్య ఉద్యమం, ఆత్యయిక స్థితికి వ్యతిరేకంగా ప్రజలు చేసిన పోరాటం తదితర సందర్భాల్లో.. పాత్రికేయ విలువలను ఈ సంస్థ కొనసాగించిందని అన్నారు. పాత్రికేయంలో గుజరాతీ భాషను ఉపయోగిస్తూ, ఆ భాషను వాడుకలో సజీవంగా ఉంచడంలో ముంబయి సమాచార్ కీలకపాత్ర పోషించింది. వార్తా పత్రిక చేసే సేవకూ, పాఠకుల సంఖ్య ప్రామాణికం కాకపోవచ్చు, కానీ ముంబయి సమాచార్ అందించిన సేవలు దాని సర్క్యులేషన్ కంటే చాలా గొప్పవి అని అన్నారు.

మైనారిటీల్లోకెల్లా మైనారిటీ ఎవరైనా ఉంటే, అది పార్శీలేనని కేంద్ర హోం మంత్రి అన్నారు.  మైనార్టీల హక్కుల కోసం పోరాడే వారు పార్శీ సమాజాన్ని చూసి నేర్చుకోవాలని, వారికి చేస్తున్న పని పట్ల తప్ప, మరో ధ్యాస ఉండదనీ, నిస్వార్థంతో ప్రతీ రంగంలోనూ తమ వంతు సేవల్ని అందిస్తున్నారని అన్నారు. దేశంలో  న్యాయరంగం, పారిశ్రామికాభివృద్ధి, ఫిన్‌టెక్ లేదా ఐటీ రంగాల్లో పార్శీ సమాజం ముందంజలో

ఉందన్నారు. పాత్రికేయ రంగంలో ముంబయి సమాచార్ పత్రిక ద్వారా ‘కామా’ కుటుంబం చేసిన సేవలను గుజరాత్, గుజరాతీలు, భారతదేశం ఎన్నటికీ మరువలేవని అన్నారు. బాంబే పేరును ముంబయిగా

మార్చినప్పుడు కోర్టులో సమర్పించిన అతిపెద్ద సాక్ష్యం ముంబయి సమాచార్ పేరేనని అని ఆయన తెలిపారు.

భాషలు భారతదేశ వారసత్వ సంపద అని, ప్రపంచంలోని ఏ దేశంలోనూ ఇన్ని మాండలికాలు, భాషలు లేవని శ్రీ అమిత్ షా అన్నారు. నూతన విద్యా విధానాన్ని తీసుకురావడం ద్వారా మాతృభాషలో ప్రాథమిక విధ్యను ప్రధానమంత్రి నరేంద్రమోదీ తప్పనిసరి చేశారన్నారు. ప్రతి ఒక్కరూ కనీసం ఇంట్లో మాతృభాషలో మాట్లాడాలని హోంమంత్రి  హితవు చెబుతూ, ఇది పిల్లలకు కూడా ఉపయోగపడుతుందని తెలిపారు.  భాషకు దూరమైతే మన సంస్కృతికి కూడా దూరమవుతామని అన్నారు. పిల్లలకు మాతృభాష నేర్పించడం, తర్వాతి తరానికి మన భాషను అందించడం మన బాధ్యతేనని అన్నారు.

భాషను పరిరక్షించడం, పోషించడం, మరింత అర్థవంతంగా, అనువైనదిగా మార్చడం, సోదర భాషల్లోని  పదజాలాన్ని చేర్చడం ద్వారా మన భాష సుసంపన్నమవుతుందని కేంద్ర హోంమంత్రి అన్నారు. కేంద్ర హోం వ్యవహారాల మంత్రిత్వ శాఖ ఈ అంశంపై పని చేసిందనీ, హిందీ నిఘంటువును విస్తరించిందనీ తెలిపారు. దేశవ్యాప్తంగా ఉన్న ప్రాంతీయ భాషల్లోని 22,831 పదాలను తీసుకురావడం ద్వారా హిందీని సంపూర్ణ భాషగా మార్చేందుకు కృషి చేశామని శ్రీ అమిత్ షా తెలిపారు. మాతృభాష కోసం ప్రతి ఒక్కరూ కృషి చేయాలని అన్నారు.

ముంబయి సమచార్ ఆసియాలోనే అతి ప్రాచీన ప్రతిక అనీ, ప్రపంచంలో మూడో ప్రాచీన పత్రిక అని అమిత్ షా తెలిపారు. ప్రపంచంలోనే విశ్వసనీయతను నిలబెట్టుకున్న ఏకైక దినపత్రిక కూడా ఇదేని ఆయన చెప్పారు.  భారత్ చరిత్రలో గత 200 ఏళ్లలో ఎన్నో ఒడిదొడుకులు ఉన్నాయని శ్రీ షా పేర్కొన్నారు. స్వాతంత్య్రం వచ్చిన 75 ఏళ్ల తర్వాత, ప్రస్తుతం మన ముందున్న మార్గం స్పష్టంగా, సుగమంగా, గొప్పగా ఉందని, కానీ గతంలో 125 ఏళ్లు ఒడిదొడుకులతోనే సాగిందని, ఈ సమయంలో ముంబయి సమాచార్‌ ఏనాడూ లాభాల గురించి పట్టించుకోలేదని, పాత్రికేయ స్ఫూర్తిని పెంపొందించేందుకు నిరంతరం కృషి చేసిందన్నారు.

50 నిమిషాల నిడివి ఉన్న ఈ డాక్యుమెంటరీని యథాతథంగా హిందీ, ఇంగ్లిషుల్లో కూడా అందించాలని కేంద్ర హోంమంత్రి అన్నారు. రెండు శతాబ్దాల తర్వాత కూడా ఈ స్థానిక భాషా దినపత్రిక నిరాటంకంగా కొనసాగుతుందని, మూడో శతాబ్దిని పూర్తి చేసేందుకు సిద్ధంగా ఉందని, ఈ డాక్యుమెంటరీ ద్వారా ముంబయి సమాచార్ గురించి దేశం మొత్తానికి తెలుస్తుందని ఆయన అన్నారు.

ప్రధానమంత్రి శ్రీ నరేంద్రమోదీ నాయకత్వంలో దేశం శరవేగంగా అభివృద్ధి చెందుతోందని, ప్రపంచంలో పదకొండో స్థానం నుంచి ఐదో అతి పెద్ద ఆర్థిక వ్యవస్థగా అవతరించామని శ్రీ అమిత్ షా అన్నారు. నేడు ప్రపంచం మొత్తం భారత్‌ను ఒక వెలుగు రేఖగా చూస్తోందని, ప్రస్తుతం జి-20 దేశాల్లో భారత్ అత్యధిక వృద్ధి రేటు కలిగి ఉందని, త్వరలో మనం ప్రపంచంలో మూడో అతిపెద్ద ఆర్థిక వ్యవస్థగా అవతరించబోతున్నామని శ్రీ షా తెలిపారు. స్వాతంత్ర్యం సిద్ధించిన 75 నుంచి 100 ఏళ్ల మధ్య కాలాన్ని అమృత కాలంగా ప్రధానమంత్రి అభివర్ణించారని, ఈ ప్రయాణం ప్రపంచంలోని ప్రతి రంగంలోనూ భారతదేశాన్ని సరికొత్త శిఖరాలకు తీసుకెళ్తుందని అన్నారు. 2047 ఆగస్టు 15న ప్రపంచంలోని ప్రతి రంగంలోనూ భారతదేశం ప్రథమ స్థానంలో ఉండాలన్న మోదీ తీర్మానాన్ని దేశంలోని 140 కోట్ల మంది పౌరులు ఆమోదించారని హోంమంత్రి తెలిపారు.