ইকায়খুম্নরবা শক্নাইরবশিং, শক্নাইরবা অতিথিশিং অমসুং ঐগী নুংশিরবা মরুপশিং, অদোমগী মফমদা ঐগী য়াইফ-পাউজেল পীজরি। অহানবা ইন্তরনেসনেল সোলার ফেস্তিবেলদা অদোম তরাম্না ওকপদা ঐ হরাওই। মসিগী অঙকপা থৌরম অসিগীদমক ঐনা ইন্তরনেসনেল সোলার এল্লাইন্স থাগৎপা ফোঙদোকচরি।

মরুপশিং,

বেদাশিং অসি চহি লিশিং কয়াগী মমাংদা ইখিবা লাইরিকশিংনি। বেদাশিংগী মমিং চৎলবা লাইৱাশিংগী মনুংদা নুমিৎকী মরমদা ফোঙদোকপা লাইৱা অমা য়াওরি। ঙসি ভারতমচা মিল্লিয়ন কয়ানা মসি নুমিৎ খুদিংগী থিরি। মখোয় মশা মশাগী ওইবা মওংশিংদা মালেম শীনবা থুংনবগী চৎনবীশিংনা নুমিৎ ইকায়খুম্নবা উৎনরি। মফম অয়াম্বদা নুমিৎকা মরী লৈনবা কুহ্মৈশিং পাংথোক্লি। হন্দক্কী অহানবা ইন্তরনেসনেল সোলার ফেস্তিবেল অসিদা নুমিৎকী কান্নবা হরাওবা ফোঙদোক্নবা মালেম শীনবা থুংনা অমতা ওইনা পুল্লে। মসিগী কুহ্মৈ অসিনা হেন্না ফবা গ্রহ অমা শেমগৎপদা ঐখোয়গী মতেং পাংগনি।

মরুপশিং,

২০১৫ দা, ইন্তরনেসনেল সোলার এল্লাইন্স অপীকপা চারা অমা ওইনা হৌখি, মসি থাজবা অমসুং অনিংবগী মিকুপ অমা ওইখি। ঙসিদি মসি থৌশিল অমসুং থবক্কী অচৌবা উ পাম্বী অমা ওইরে। তেনখ্রবা মতম অসিদা, ইন্তরনেসনেল সোলার এল্লাইন্সকী মেম্বর ওইবা লৈবাক চা কয়া য়ৌরে। মসিগী মথক্তা, মপুংফাবা মেম্বর ওইনবা লৈবাক ১৯না ফ্রেমৱার্ক এগ্রিমেন্ত শেমদোক্লি। লুপ অসি মপাঙ্গল কনখৎলকপা অসি ‘মালেম অমা, নুমিৎ অমা, গ্রিদ অমা’গী মরুওইবা পান্দমনি।

মরুপশিং,

হৌখিবা চহি খর অসিদা, ভারতনা গ্রিন ইনর্জিগী থবক কয়া পায়খৎলে। রিন্যুএবল ইনর্জিদা পেরিসকী ৱাশকশিং ঙাকপা অহানবা জি-২০ লৈবাক ঐখোয়না ওইরে। শিংথানিঙাই ওইনা সোলার ইনর্জি পুথোকপা হেনগৎলকপদগী মসি থবক ওইনা পাংথোকপা ঙম্বনি। হৌখিবা চহি ১০দা ঐখোয়না সোলার ইনর্জি পুথোকপা শরুক ৩২ হেনগৎলে। মসিগী খোঙজেল অমসুং পাক-চাউবা অসিনা ২০৩০ ফাওবগী মনুংদা গিগাৱাত ৫০০ পুথোকপদা ঐখোয়গী মতেং পাংগনি।

মরুপশিং,

নাখৈ শেংবা থৌশিল অমনা মরম ওইদুনা সোলারগী লমদা ভারতনা চাউখৎলকপনি। ভারত নত্ত্রগা মালেম ওইগেরা, সোলার শীজিন্নবা হেনগৎলক্নবা লাইৱাদি মীয়াম ৱাখল তাহনবা, ফংহনবা অমসুং মমল হোংহনবনি। সোলারগী লমদা লৈবাক অসিদা মেনুফেকচরিং পুক্নিং থৌগৎতুনা তুংকোইনা চৎনবা য়াবা ইনর্জি দরকার ওইবগী মতাংদা ৱাখল তাহনবনা ঐখোয়না সোলার ফংহনবা হেনগৎহল্লে। অকক্নবা স্কিমশিং অমসুং মতেং পাংবনা ঐখোয়না সোলারগী পোৎলমশিং মমল হোংদোকহল্লে 

মরুপশিং,

ইন্তরনেসনেল সোলার এল্লাইন্স অসি সোলার শীজিন্নবগী অনৌবা ৱাখল্লোনশিং অমসুং খ্বাইদগী ফবা থবকশিং পীথোক-পীশিন তৌন্নবা অফবা মফম অমনি। ভারতনশু কয়া অমা পীরে। হন্দক থৌশিল অমা চৎনবা হৌখিবগী খুদম অমা ঐ অদোমগী মফমদা পীগে। থা খরগী মমাঙদা, ঐখোয়না পি.এম সুর্য়া ঘর মুফ বিজলি য়োজনা হৌদোক্লে। স্কিম অসিদা ঐখোয়না লুপা বিল্লিয়ন ৭৫০ থাদখ্রে। ঐখোয়গী পান্দমদি মখোয়গী য়ুমথক্তা সোলার পেনেলশিং থম্নবা য়ুমথোং মিল্লিয়ন ১০ মতেং পাংবনি। মীয়ামগী বেঙ্ক একাউন্তশিংদা ঐখোয়না হকথেংননা শেন্থং পীরে। করিগুম্বা অহেনবা শেন্থং দরকার ওইরকপা মতমদা অতাবা শেন্দোয়দা অমসুং গরেন্তি য়াওদবা লোনশিং পীরে। হৌজিক, হায়রিবা য়ুমথোংশিং অসি মখোয় মশাগী দরকার ওইবা ইলেক্ত্রিসিতি পুথোক্লে। মসিগী মথক্তা, মখোয়গী অহেনবা মৈ অদু পৱার গ্রিদতা য়োন্দুনা অহেনবা শেন তাল্লে। মতেং পাংবা অমসুং শেন তাবা য়াবগী খুদোংচাবশিং লৈবদগী, স্কিম অসি মীয়াম্না পাম্নরে। সোলার ইনর্জি অসি মমল হোংবা অমসুং পাম্নবা অমা ওইরে। মসিগা মান্নবা ইনর্জিগী অওনবা পুরক্নবা মখোয়গী থবকশিংগী মমল য়াম্লবা ৱাফমশিং লৈবাক কয়ানা শরুক য়াগনি হায়না ঐনা থাজৈ।

মরুপশিং,

তেনখ্রবা মতম অমদা, ইন্তরনেসনেল সোলার এল্লাইন্স য়াম্না চাউখৎলে। লৈবাক ৪৪ দা, মসিনা ইলেক্ত্রিসিতি গিগাৱাত ১০ রোম পুথোকপা মতেং পাংলে। মালেমগী ওইনা সোলার পম্পশিংগী মমল হন্থহনবদা ইন্তরনেসনেল সোলার এল্লাইন্সনা অচৌবা থৌদাং অমা লৌরে। মরুওইবা অফ্রিকাগী মেম্বর লৈবাকশিংদা লনাই কাংবুনা শেন থাদবা য়াহল্লে। অফ্রিকা, এসিয়া-পেসিফিক অমসুং ভারত্তা সোলার স্তার্দ-অপশিং পুক্নিং থৌগৎলে। মসিগী থবক  অসি লেতিন অমেরিকা অমসুং কেরেব্বিয়ান লৈবাকশিংদা য়ৌরে। হায়রিবা শিংথানিঙাই ওইরবা খোঙথাঙশিং অসি অচুম্বা মাইকৈদা থাংজিল্লি।

মরুপশিং,

ইনর্জিগী অওনবা পুরক্নবা, মালেম অসি অপুনবা ওইনা মরুওইবা ৱাফম খর খন্নবা দরকার ওইরে। গ্রিন ইনর্জিদা শেন থাদবা থোং মান্নদবা লৈরিবা অসি য়েংশিনবা দরকার ওইরে। চাউখৎলক্লিবা লৈবাকশিংদা মতেং পাংনবা মেনুফেকচরিং অমসুং তেক্নোলোজি খুদিংমক্তা ফংহনবা দরকার ওইরে। চাউখৎত্রিবা লৈবাকশিং অমসুং অপীকপা ইথৎ লৈবাকশিং মরুওইবা মীৎয়েং চঙগদবনি। তোল্লবা কাংলুপ, নুপীশিং অমসুং নহারোলশিং শরুক য়াহনবা অসি য়াম্না মরুওই। অসিগুম্বা হিরমশিং ইন্তরনেসনেল সোলার ফেস্তিবেলনা খন্নগনি হায়না ঐনা থাজৈ।

মরুপশিং,

মালেমদা মৈখু চেন্দবা তুংলমচৎ অমা শেমগৎনবা থবক তৌনবা ভারতনা থাজবা পীরে। হৌখিবা চহিগী জি-২০ মনুংদা, ঐখোয়না লুচিংদুনা গ্লোভেল বাইওফুয়েল এল্লাইন্স শেমখ্রে। ঐখোয় ইন্তরনেসনেল সোলার এল্লাইন্সগী ফাউন্দিং মেম্বর অমসুনি। খুদিংমক কোনশিনবা, মৈখু চেন্দবা মালেম অমা শেমগৎনবা থবক খুদিংমক্তা ভারতকী মতেং দরকার ওইগনি।

অমুক হন্না ময়াম পুম্নমক অহানবা ইন্তরনেসনেল সোলার ফেস্তিবেলদা তরাম্না ওকচরি। নুমিৎকী মঙালনা তুংকোইনা চৎনবা য়াবা মালেম অমা শেমগৎপদা লমজিংবা ওইরসনু। অদোম থাগৎচরি। অদোম ঙমখৈ লৈতনা থাগৎচরি।

***