ভারতকী পেরা-এথলেৎশিংনা মালেমগী থাক্তা লৈবাক অসিবু চাউথোকচবা পোকহল্লি। পেরিসতা পাংথোকখিবা মশক থোকপা পরশিংগী মরক্তা মিক্স তীম কম্পাউন্দ ওপন আরচরী ইভেন্ততা ব্রোঞ্জ মেদল ফংখিবা শীতল দেবী অমসুং রাকেশ কুমারসু য়াওখি। মখোয়গী মায় পাকপা অসিনা পেরা-স্পোর্তস্তা ভারতকী চাউখৎলক্লিবা লিগেসীদা চেপ্তর অমগা হাপচিল্লি!

[1]

শীতল দেবীগী খোঙচৎ

জম্মু অমসুং কাশ্মীরগী কিস্তৱারদা জনুৱারী 10, 2007দা পোকখিবা শীতল দেবীনা মহাক্কী থোইদোক হেন্দোকপা খোঙচৎনা মালেম পুম্ববু পুক্নিং চীংশিনখ্রে। মহাক্না খুৎ য়াওদনা পোক্লবসু, ফিজিকেল লিমিতেসনশিংনা শক্নাইরবা অমা ওইবদা অপনবা পীদে হায়বসি মহাক্না উৎখ্রে। মহাক্কী অঙাং ওইরিঙৈগী পুন্সি অসি শীংনবশিংনা থনখি, অদুবু 2019দা ভারতকী লান্মীনা মহাকপু লান্মীগী কেম্প অমদা থেংনখিবা মতম অদুদা মহাক্কী পুন্সিদা অহোংবা লাকখি। মহাক্কী তৌবা ঙম্বশিং খঙলদুনা, মখোয়না মহাকপু মহৈ তম্বদা মতেং পাংখি অমসুং মেদিকেল কিয়র পীখি।

শক্নাইরবা কোচ কুলদীপ ভেদৱানগী মেন্তরশিপকী মখাদা, শীতলনা অকনবা ত্রেনিং রেজিমেন অমা হৌখি অমসুং মসিনা মহাকপু মালেমগী খ্বাইদগী মকোক থোংবা পেরা-আর্চর অমা ওইহনখি। মহাক্কী মায়পাকপশিংনা মশামকপু মশক তাক্লি:  2023 এসিয়ন পেরা গেম্সতা ইন্দিভিজুএল অমসুং মিক্স তীম ইভেন্ত অনিমক্তা গোল্দ মেদল, 2023 ৱর্ল্দ আরচরী পেরা চেম্পিয়নশিপতা সিলভর মেদল অমসুং এসিয়ন পেরা চেম্পিয়নশিপতা মশিং য়াম্লবা মায়পাকপা ফংখি। শীতলগী ৱারী অসি থৌনা, অখাং কনবা অমসুং মহাক্কী তৌবা ঙম্বশিংদা থাজবা থম্বগী ৱারীনি।

[2]

রাকেশ কুমার: অৱাবদগী মায়পাকপা ফংলকপগী খোঙচৎ

জনুৱারী 13, 1985দা জম্মু অমসুং কাশ্মীরগী কত্রাদা পোকখিবা রাকেশ কুমার অসি রেসিলিয়েন্সকী শক্তিগী অতোপ্পা খুদম অমনি। 2010দা থোকখিবা নুংঙাইতবা থৌদোক অমনা রাকেশপু খ্বাংগী মখা থংবা শরুকশিং পেরালাইস ওইদুনাৱিলচরদা লৈবা তাহনখি। মদুগী মতুং তারকপা চহিশিং অদু নীংঙমদবনা মপুং ওইখি। অদুম ওইনমক, মহাক্না শ্রী মাতা বৈষ্ণো দেবী শ্রাইন বোর্দ স্পোর্তস কমপ্লেক্সতা আরচরী শান্নবা হৌরকপদগী মহাক্কী পুন্সিদা অনৌবা মায়কৈ অমা লাকখি।

কোচ কুলদীপ কুমারগী লমজিং-লমতাকপগা লোয়ননা, রাকেশনা আরচরীদা অনৌবা ইনোৎ অমা ফংখি। শেল-থুমগী অৱাবা লৈরবসু, মহাক্না মশামকপু শান্ন-খোৎনবদা পুক্নিং চংখি, ভারতকী শক্নাইরবা পেরা-আর্চরশিংগী মরক্তা অমা ওইনবগীদমক্তা য়াম্না থুনা থাক ৱাংখৎখি। মহাক্কী মায় পাকপশিংগী মনুংদা 2023 ৱর্ল্দ আরচরী পেরা চেম্পিয়নশিপতা মিক্স তীম ইভেন্ততা সনাগী তকমান অমা ফংখিবা অমসুং 2023 এসিয়ন পেরা গেম্সতা শীংথানিংঙাই ওইবা পর্ফোমেন্স অমা উৎখিবা য়াওরি। রাকেশকী ৱারী অসি অচৌবা থবক অমা পাংথোক্নবগীদমক্তা অৱাবা কয়া মায়োক্নবগী ৱারীনি।

[3]

পেরিস 2024 পেরালিম্পিক্স

পেরিস 2024  পেরালিম্পিক্সনা শীতল দেবী অমসুং রাকেশ কুমার অনিমক্কী কেরিয়রদা মরুওইবা মাইলস্তোন অমা ওইখি। মিক্স তীম কম্পাউন্দ ওপন আরচরী ইভেন্ততা শরুক য়াদুনা, দ্যুও্ অসিনা মালেমগী খ্বাইদগী ফবা পেরা-আর্চরশিংগী মরক্তগী অকনবা কম্পিতিসন থেংনখি। মখোয়না পোদিয়মদা চংলকপগী খোঙচৎ অসি অচেৎপা ৱাখল্লোন, অখাং কনবা, অমসুং অফবা ওইহন্নবা লেপ্পা লৈতনা হোৎনবা অসিনা মশক তাকই।

শীতল অমসুং রাকেশনা ইতালিগী ইলেওনোরা সরতি অমসুং মেত্তেও বোনাসিনাগা শান্নখিবা মেৎচতা ব্রোঞ্জ মেদল ফংখি। ভারতকী আর্চরশিংনা অকনবা প্রেসরগী মখাদা মশক থোকপা কম্পোজর উৎখি। অরোইবা সেত্তা মখোয়না পর্ফেক্ত 10 মরি লৌদুনা মেদল লৌখি। মখোয়গী পর্ফোমেন্সনা পোদিয়মদা মফম অমা ফংহনবতা নত্তনা পেরালিম্পিক্সকী রেকোর্দ পোইন্ত 156গা মান্নখি, মসিনা মখোয়গী হৈশিংবা অমসুং মীৎয়েং চঙবগী খুদম অমনি।

সরকারগী তেংবাং: মায়পাকপগী মরু ওইবা য়ুম্বী অমা

পেরিস 2024 পেরালিম্পিক্সতা শীতল দেবী অমসুং রাকেশ কুমারগী মায়পাকপা অসি ভারত সরকারনা পীরকপা পাক চাউরবা মতেং য়াওদনা ওইথোকপা ঙম্লোই। শান্নরোই অনিমক্না ত্রেনিং, ইক্বিপমেন্ত প্রোক্যুরমেন্ত, অমসুং ইন্তর্নেস্নেল কম্পিতিসনশিংদা চৎপদা চংগদবা শেলগী তেংবাং ওইরিবা তার্গেৎ ওলিম্পিক পোদিয়ম স্কিম (TOPS) গী মখাদা শেলগী তেংবাং ফংখি। শীতলনা থাইলেন্দ, UAE জেচ রিপব্লিক, চাইনা, অমসুং ফ্রান্সতা ত্রেনিংগীদমক্তা মপান লৈবাক্কী এক্সপোজর তরুক ফংখি, অদুগা রকেশনা অখন্নবা ইক্বিপমেন্ত অমসুং ৱিল চিয়ার ফেসিলিতীশিংগা লোয়ননা সপোর্ত তৌখি। শান্নরোই অনিমক্না ত্রেনিং তৌখিবা SAI সোনিপতকী নেস্নেল কোচিং কেম্পনা মখোয়গী হৈশিংবা হেনগৎহনবদা মরু ওইবা থৌদাং লৌখি।

ইথিল পীরিবা লেগেসী অমা

পেরিস 2024 পেরালিম্পিক্সতা শীতল দেবী অমসুং রাকেশ কুমারনা ব্রোঞ্জ মেদল লৌরকপা অসি ভারতকী মায় পাকপা খক্তা নত্তে, আশা অমসুং অখাং কনবগী শক্তি লৈরবা পাউজেল অমনি। চহি 17 শুরবী শীতলনা ভারতকী খ্বাইদগী নহা ওইরবা পেরালিম্পিক মেদল লৌবা মীওই ওইখি, অদুগা চহি 39 শুরবা রাকেশনা মহাক্কী মায় পাকপগী অচৌবা পরিংদা পেরালিম্পিক মেদল অমা হাপখি। মখোয়গী ৱারীশিং অসি শান্ন-খোৎনবগী মালেমগী ৱাংমদা লৈরি, খুদোংচাদবা মায়োক্নরিবা মীওই খুদিংমক্কী ইথিল পীবা লমজিং মৈরা ওইনা মথৌ তৌরি। মখোয়গী লিগেসী অসিনা শান্নরোয়শিংগী চারোন-শুরোন কয়াদা অচৌবা মঙলান উবা অমসুং ওইথোকপা য়াবশিংবু হেন্না পাকথোক চাউথোকহনবদা ইথিল পীগনি।

রিফরেন্সশিং

ইন্দিয়ন এথলেৎস: পেরিস পেরালিম্পিক্স 2024 pdf

https://olympics.com/en/news/paris-2024-paralympics-india-archery-sheetal-devi-rakesh-kumar-medal

https://pib.gov.in/PressReleaseIframePage.aspx?PRID=2051102

PDF য়েংনবা মসিদা নম্বীয়ু

*****