হৌদোকপগী ৱারোল

মোনা অগর্ৱালা হৌজিক্তি পেরা শুতিংদা মীথোই মীহেন ওইরক্লিবা মিং অমা ওইরক্লি। মহাক্না পেরালিম্পিক্স ২০২৪দা আর২ নুপীগী ১০ মিতর এয়র রাইফল এস.ঐচ.১দা  শেঞ্জেংগী তক্মান অমা লৌদুনা মালেমগী শান্নখোৎনবগী হীরমদা মহাক্কী হৈশিংবা শাফোংলক্লি। মোনানা মহাক্কী পুন্সিগী অঙনবা শরুক্তা থেংনখিবা অৱাবা কয়া মায়থিবা পীদুনা শান্নখোৎনবদা মীথোই মীহেনবা ওইরকপনা মহাক্কী অচেৎপা ফিরেপ উৎলি।

পুন্সিগী অঙনবা শরুক অমসুং মহৈ মশিং

নবেম্বর ৮, ১৯৮৭ দা রাজস্থানগী সিকারদা পোকখিবা মোনানা থা মাপন খক্তা ঙারিঙৈ মতমদা পোলিওনা নাদুনা মহাক্কী খোং অনিমক্কী ফিভম শোক্তুনা পুন্সিগী অঙনবা শরুক্তা অৱাবা কয়া মাইয়োক্নখি। অসুম তৌদুনসু মহাক্না অচেৎপা ফিরেপকা লোইননা মহাক্কী মহৈ মশিং মখা চত্থদুনা আর্তসতা দিগ্রী লোইশিনখি অমসুং হৌজিক হৌজিক সাইকোলোজীদা দিস্তেন্স লর্নিং প্রোগ্রামগী খুত্থাংদা মাস্তর তম্লি।

অচেৎপা ফিরেপকা লোইননা চঙশিনখিবা খোঙচৎ

চহি ২৩ শুরকপদা মোনানা য়ুম থাদোক্তুনা মহাক্কী ওইবা পুন্সি অমা শেমজনবা চাউরবা ৱারেপ অমা লৌখি। মহাক্না ঐচ.আর. অমসুং মার্কেতিং রোলদা মাংজিল থাদুনা হকচাংগী ফিভম কয়া মাইয়োক্নদুনা হোৎনখি। ২০১৬ দা মহাক্না পেরা এথলেতিক্সতা মায় ওনশিনখি, মসিদা মহাক্না থ্রো ইভেন্ততা রাজ্যগী থাক্তা থোকপা হৌদুনা কাংলুপ অহুম্মক্তা শনাগী তক্মনা লৌখি। মহাক্না স্তেত লেভেল পেরা পাৱরলিফতিংতা অথোই অহেন তান্নবা য়াওদুনা তোঙান-তোঙানবা তক্মান লৌখি।

ভারত্তা সিত্তিং ভোল্লিবোলগী লমজিংলকখিবা

মহাক্কী এথলেতিক্কী ওইবা মায় পাকপদগী হেন্দোক্তুনা মোনানা ভারত্তা নুপীগী সিত্তিং ভোল্লিবোলদা মাংজিল থাখি। কেপ্তেন অমা ওইনা মহাক্না রাজস্থানগী রাজ্যগী তিম্বু ২০১৯ দা পাঙথোকখিবা নুপীগী ইহান হানবা নেসনেল সিত্তিং ভোল্লিবোল চেম্পিয়নশিপতা লুচিংখি। মহাকপু ইন্তর্নেসনেল তোর্নমেন্ত অমগীদমক খনবা তারবসু মহাক্না মীরোনবনা মরম ওইদুনা শরুক য়াবা ঙমখিদে।

রাইফল শুতিংদা মায় ওনশিল্লকখিবা

দিসেম্বর ২০২১দা, মোনানা ইন্দিভিজ্বেল স্পোর্তসতা মায় ওনশিল্লক্তুনা রাইফল শুতিং খনখি। মহাক্কী পোকপদগী য়াওজরকপা তেলেন্ত অসি হেক হৌবদগী হৌনা ২০২২ দা নেসনেল সিলভর মেদাল অমা লৌদুনা উবা ফংখি। ২০২৩গী ময়াই ওইরকপা মতমদা মহাক্না মহাক্কী অহানবা ইন্তর্নেসনেল ৱার্ল্দ কপতা মিক্স তীম ইভেন্ততা শেঞ্জেংগী তক্মান অমা লৌখি অমসুং ৪শুবা এসিয়ন পেরা গেম্সতা ৬ শুবা মফম কন্দুনা লোইশিনখি। মোনাগী খাঙবা কনবগী ইহুল অসি মহাক্কী মরিশুবা ইন্তর্নেসনেল ইভেন্ততা মহৈ য়ানখি, মসিদা মহাক্না শনাগী তক্মান অমা ফংখি অমসুং পেরালিম্পিক্কী মফম অমা কনখি অমসুং এসিয়ন রেকোর্দ অমা থমখি। অসিগুম্বা মশক নাইবা মায় পাকপা অসিনা মহাক্কী পেরা শুতিংদা মালেমগী থাক্তা মকোক থোংবা কন্তেন্দর অমগী মফম হেন্না চেৎশিলহনখি।

ত্রেনিং অমসুং সপ্পোর্ত

ভারত সরকারনা মোনা অগর্ৱালগে পেরা শুতিংদা মায় পাকপগী খোঙচৎতা চাউনা শৌগৎখি। মোনানা মহাক্কী ত্রেনিং অমসুং কম্পিতিসনদা চঙবা তঙাইফদবা শেলগী মতেং অসি খেলো ইন্দিয়া স্কিম অমসুং নেসনেল সেন্তর ফোর এক্সিলেন্স (এন.সি.ও.ই.) প্রোগ্রামগুম্বা থৌরাংশিংদগী ফংখি। হায়রিবা থৌরাংশিং অসিনা মহাকপু মালেমগী থাক্তা লৈবা খুদোংচাবশিং, নৈ দিল্লীগী দা. কর্নি সিংহ শুতিং রেঞ্জদা বোর্দিং অমসুং লোদজিং পীবা অমসুং তঙাইফদবা শান্নখোৎনবগী খুৎলাই অমসুং এক্সেসোরিশিং পীবা য়াওনা ফংখি। অসিগুম্বা মপুং ওইবা সপ্পোর্ত সিস্তেম সইনা মোনাবু মহাক্কী স্কিলশিং শেমগৎপদা মতেং পাংখি অমসুং মহাক্না মঙজরিবা পেরালিম্পিক্সতা ভারতকী মহুৎ শিন্দুনা শান্নবগী মঙলান মঙফাওনখি।

ৱারোইশিন

মোনা অগর্ৱালগী খোঙচৎ অসি য়াম্না ইনোৎ হাপ্নিংঙাই ওইবা খাঙবা কনবা অমসুং মায় পাকপগী ৱারী অমনি। মহাক্না পেরিস ২০২৪ পেরালিম্পিক্সতা ভারতকী মহুত শিন্দুনা মহাক্কী মায় পাকপনা মফম খুদিংমক্তা শান্নখোৎনবা পামজবশিংদা আসা অমসুং ইনোৎ হাপ্লি।

রিফরেন্স

ইন্দিয়ন এথলেতঃ পেরিস পেরালিম্পিক্স ২০২৪ পি.দি.এফ.

https://pib.gov.in/PressReleaseIframePage.aspx?PRID=2050108

মোনা অগর্ৱালনা শেঞ্জেংগী তক্মান লৌখ্রে!

***************