প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা নিউ দিল্লিদা দিস্ত্রিক জুদিসিয়ারিগী নেসনেল কনফরেন্স হৌদোকখ্রে
ভারতকী সুপ্রিম কোর্ত লিংখৎখিবা চহি ৭৫ মপুংফারকপগী স্তাম্প অমসুং নিংশিং শেনয়েক হাংদোকখ্রে
“সুপ্রিম কোর্ত চহি ৭৫ মপুংফারকপা- মসি ভারতকী সংবিধান অমসুং লৈবাক অসিগী সংবিধানগী গুনশিংগী খোঙচৎনি! মসি ভারতনা গনতন্ত্র চৎপা লৈবাক অমা ওইরকপগী খোঙচৎনি”
“সুপ্রিম কোর্তনা চহি ৭৫ মপুংফারকপা অসিনা গনতন্ত্রগী হৌরকফম ওইনা ভারতকী মিংচৎ মখা তানা হেনগৎহল্লে”
“অজাদি কা অমৃত কালদা ভারতমচা করোর ১৪০গী মঙ অমা খক লৈরি- বিকসিত ভারত, অনৌবা ভারত”
“ভারতিয়া ন্যায় সনহিতাগী ৱাখল্লোন্দি ‘মীয়াম্না অহানবা, ইকায়খুম্নবনা অহানবা অমসুং অচুম্বনা অহানবা’ হায়বনি”
Posted On:
31 AUG 2024 12:39PM by PIB Imphal
ঙসি নিউ দিল্লিগী ভারত মন্দাপমদা প্রধান মন্ত্রী শ্রী নরেন্দ্র মোদীনা দিস্ত্রিক জুদিসিয়ারিগী নেসনেল কনফরেন্স হৌদোকখ্রে। প্রধান মন্ত্রীনা ভারতকী সুপ্রিম কোর্ত লিংখৎখিবা চহি ৭৫ মপুংফারকপগী স্তাম্প অমসুং নিংশিং শেনয়েকশু হাংদোকখ্রে। ভারতকী সুপ্রিম কোর্তনা শীনবা নুমিৎ নিনীগী মীফম অসিদা দিস্ত্রিক জুদিসিয়ারিগা মরী লৈনবা ৱাফমশিং হায়বদি ইনফ্রাস্ত্রকচর অমসুং হুমেন রিছোর্সশিং, কোর্তরুমশিং, জুদিসিয়েল সেকুরিতি অমসুং জুদিসিএল ৱেলনেস, কেস মেনেজমেন্ত অমসুং জুদিসিয়েল ত্রেনিংগা মরী লৈনবা হিরমশিং খন্ননবা সেসন মঙা লৈগনি।
নুমিৎ খরনিগী মমাঙদা রাজস্থান হায় কোর্তকী প্লেতিনম জুব্লি থৌরম শরুক য়াখিবা মহাক্কী খোঙচৎ অদু নিংশিংদুনা প্রধান মন্ত্রীনা মহাক্কী ৱা ঙাংবা হৌদোকখি অমসুং ভারতকী সুপ্রিম কোর্ত লিংখৎখিবা চহি ৭৫ মপুংফারকপগী থৌরমশিংগী শরুক অমা ওইনা দিস্ত্রিক জুদিসিয়ারিগী নেসনেল কনফরেন্স শরুক য়াবদা তৌবীমল খঙবা উৎখি। শ্রী মোদীনা হায়খি ভারতকী সুপ্রিম কোর্তকী চহি ৭৫গী খোঙচৎ অসি লোয়শঙ অমগী ইচম চম্বা খোঙচৎ অমা নত্তে, মসি মসি ভারতকী সংবিধান অমসুং লৈবাক অসিগী সংবিধানগী গুনশিংগী খোঙচৎনি! মসি ভারতনা গনতন্ত্র চৎপা লৈবাক অমা ওইরকপগী খোঙচৎনি।
প্রধান মন্ত্রীনা হায়খি খোঙচৎ অসিদা সংবিধান শেমখিবা লুচিংবশিং অমসুং অপুনবা জুদিসিয়েলশিংগী থবক্না মরুওইবা থৌদাং লৌখি। মসিগী ৱায়েন-কাংলোনগী থবক অসিদা ভারতমচা করোর কয়াগী থৌদাং য়াওরে। ভারতকী মীয়াম্না কৈদৌঙৈদা ভারতকী সুপ্রিম কোর্ত নত্ত্রগা জুদিসিয়ারিদা থাজদবা অমতা উত্তে। মরম অদুনা সুপ্রিম কোর্তনা চহি ৭৫ মপুংফারকপা অসিনা গনতন্ত্রগী হৌরকফম ওইনা ভারতকী মিংচৎ মখা তানা হেনগৎহল্লে। মসিনা সত্য মেভ জয়াতে, নানরিতমগী নাতকী ওইবা খোল্লাউ হেন্না মপাঙ্গল কনখৎহল্লে।
লৈবাক অসিনা নিংতম্বা চহি ৭৫ মপুংফারকপা অমসুং সংবিধান চহি ৭৫ মপুংফারকপা অসি পল্লদুনা, প্রধান মন্ত্রীনা হায়খি থৌরম অসি চাউথোকচবা অমসুং ইথিলনা পীক থল্লে। থৌরম অসিদা মহাক্না ৱায়েন-কাংলোনগী লমদা থবক তৌরিবা মীওইশিং অমসুং ভারতকী মীয়াম থাগৎপা ফোঙদোকখি অমসুং দিস্ত্রিক জুদিসিয়ারগী নেসনেল কনফরেন্স শরুক য়ারিবশিংদা মহাক্কী মাইকৈদগী য়াইফ-পাউজেল পীখি।
প্রধান মন্ত্রীনা হায়খি জুদিসিয়ারি অসি ঐখোয়গী গনতন্ত্রগী মমা-মপানি। জুদিসিয়ারি মশামক্না অচৌবা থৌদাং অমা লৌজরি। মাইকৈ অসিদা সুপ্রিম কোর্তনা মসিগী থৌদাংশিং মপুংফানা পাংথোক্লে। নিংতম্বা হেক ফংবদগী জুদিসিয়ারিনা মসিগী থৌনা হিংহন্দুনা লাক্লি অমসুং ইমর্জেন্সিগী অৱাবা মতম মনুংদা ফাওবা সংবিধান ঙাক-শেন্নবা জুদিসিয়ারিনা মরুওইবা থৌদাং অমা লৌখি। ফংফম থোকপা হকশিংদা শিংনরকপশিং সুপ্রিম কোর্তনা ঙাকথোকখি অমসুং লৈবাক্কী থবক্না হেন্না লুম্না লৌদুনা ভারতকী অপুনবা অমসুং ঙমখৈগী অপুনবা শক্তমদা শিংনরকপা মতমদা জুদিসিয়ারিনা ঙাকথোকখি। হায়রিবা মাইপাকপশিং অসিগীদমক চহি ৭৫গী নিংশিংনিঙাই ওইরবা খোঙচৎ অসিদা জুদিসিয়ারিগী শক্নাইরবা মীওইশিং থাগৎপা ফোঙদোকচরি।
অচুম্বা ৱায়েন ফংহন্নবা হৌখিবা চহি ১০ দা পায়খৎখিবা থবকশিং পল্লদুনা, প্রধান মন্ত্রীনা হায়খি মিসনগী থাক্তা কোর্তশিং মতমগা চুনবা মওংদা শেমগৎনবা থবক পায়খৎলে অমসুং মসিদা সুপ্রিম কোর্ত অমসুং জুদিসিয়ারিনা মতেং পাংলি। দিস্ত্রিক জুদিসিয়ারিগী নেসনেল কনফরেন্স অসি থবক অসিগী খুদম অমনি অমসুং সুপ্রিম কোর্ত অমসুং গুজরাত হায় কোর্তনা শীন্দুনা ভারত পুম্নমক্কী দিস্ত্রিক কোর্ত জজশিংগী কনফরেন্স পাংথোকখ্রে। অচুম্বা ৱায়েন ফংহনবা লাইহন্নবগীদমক অসিগুম্বা থৌরমশিং অসি য়াম্না মরুওই। মথং নুমিৎ নিনীদা পন্দুনা লৈরিবা কেসশিং লোইশিনবা, হুমেন রিছোর্স অমসুং লিগেলগী লমদা থবক তৌরিবা মীওইশিংগী ফিবম ফগৎহন্নবগী মতাংদা খন্নগনি।
প্রধান মন্ত্রীনা হায়খি মথং নুমিৎ নিনীদা জুদিসিয়েল ৱেলনেসকী সেসন অমা পাংথোক্কদৌরিবা অসিদা হরাওবা ফাওই। খুন্নাই অমা নুংঙাইবদা লনাই নুংঙাইবা অসি য়াম্না মরুওই। মসিনা ঐখোয়গী থবক শুবগী চৎনবীদা হকশেল মরুওইনা লৌবদা ঐখোয়গী মতেং পাংগনি। অজাদি কা অমৃত কালদা ভারতমচা করোর ১৪০গী মঙ অমা খক লৈরি- বিকসিত ভারত, অনৌবা ভারত। অনৌবা ভারত হায়বদি ৱাখল্লোন অমসুং অচেৎপা ফিরেপকা লোয়ননা অনৌবা ভারত হায়বনি। শ্রী মোদীনা হায়খি মসিগী পান্দম অসিদা জুদিসিয়ারি অকনবা য়ুম্বী অমনি অমসুং মরুওইনা দিস্ত্রিক জুদিসিয়ারি অসি ঐখোয়গী ভারতকী ৱায়েন-কাংলোনগী য়ুম্ফমনি। দিস্ত্রিক জুদিসিয়ারি অসি ভারতকী মীওই অমনা অচুম্বা ৱায়েন ফংনবা অহানবা ওইনা থুংলফমনি। মরম অদুনা অচুম্বা ৱায়েনগী অহানবা মফমশিং মরুওইনা লৌগদবনি অমসুং মসি হিরম খুদিংমক্তা মতমগা চুনবা মওংদা শেমগৎকদবনি। নেসনেল কনফরেন্স অমসুং খন্ন-নৈনবশিং অসিনা লৈবাক অসিগী অনিংবা অমশুং অপাম্বশিং ফংহনবদা মতেং পাংগনি।
প্রধান মন্ত্রীনা হায়খি মীচম মীয়ামগী হিংবগী থাক অসি লাইনা হিংবনা লেপ্পা অসি লৈবাক অমা হেক্তা চাউখৎনবগী খ্বাইদগী মরুওইবা নাপচৈ অমনি। চম্না অমসুং য়াম্না লাইনা অচুম্বা ৱায়েন ফংহনবা হায়বসি হিংবদা লাইহনবদা য়াম্না মরুওই। মসি দিস্ত্রিক কোর্তশিং অনৌবা ইনফ্রাস্ত্রকচর অমসুং তেক্নোলোজি লৈহনবা মতম খক্তা ওইথোকপা ঙমগনি। দিস্ত্রিক কোর্তশিংদা হৌজিক কেস করোর ৪.৫ রোম পন্দুনা লৈরি। অচুম্বা ৱায়েন ফংহনবদা থেংথবা অসি কোকহন্নবা হৌখিবা চহি ১০ দা তোঙান-তোঙানবা থাকশিংদা থবক পায়খৎলে। জুদিসিয়েল ইনফ্রাস্ত্রকচর শেমগৎনবা লৈবাক অসিনা লুপা করোর ৮,০০০ চাদিং তৌখ্রে। হৌখিবা চহি ৩৫ দা জুদিসিয়েল ইনফ্রাস্ত্রকচরগী শীজিন্নবা শেনফমগী চাদা ৭৫ হৌখিবা চহি ১০ খক্তদা শীজিন্নখি। হৌখিবা চহি ১০ অসিদা, দিস্ত্রিক জুদিসিয়ারিগী কোর্ত হোল লিশিং ৭.৫ অমসুং লৈনবা য়ুম লিশিং ১১ শাখ্রে। ই-কোর্তশিংগী মরুওইবা পল্লদুনা, শ্রী মোদীনা হায়খি তেক্নোলোজি শীজিন্নবনা ৱায়েনবগী থবক য়াংশিনহনবা খক নত্তনা উকিলশিংদগী হৌরগা ৱাকৎলিবা মীওইশিং ফাওবগী অৱাবশিং হন্থহল্লি। লৈবাক অসিদা কোর্তশিং দিজিতাইজ তৌরে অমসুং হায়রিবা থবকশিং অসিদা সুপ্রিম কোর্তকী ই-কম্মিতিনা মরুওইবা থৌদাং অমা লৌরি।
প্রধান মন্ত্রীনা হায়খি ২০২৩ দা ই-কোর্ত প্রোজেক্কী অহুমশুবা তাঙ্কক অয়াবা পীখ্রে। নৌনা থোকলক্লিবা তেক্নোলোজিশিং হায়বদি আর্তিফিসিএল ইন্তিলিজেন্স অমসুং ওপ্তিকেল করেক্তর রিককনিসনগুম্বা য়াওরবা অপুনবা তেক্নোলোজি প্লেতফোর্ম অমা শেমগৎনবা ভারতনা থবক পায়খৎলে। অসিগুম্বা তেক্নোলোজিগী প্লেতফোর্ম অসিনা পন্দুনা লৈরিবা কেসশিং নৈনবদা মতেং পাংগনি অমসুং তুংদা লাক্কদবা কেসশিংগী মরমদশু খঙবা ঙমগনি। তেক্নোলোজিনা পুলিস, ফোরেন্সিক, জেল অমসুং কোর্তগুম্বা তোঙান-তোঙানবা দিপার্তমেন্তশিংগী থবকশিং পুনশিনগনি অমসুং য়াংখৎহনগনি। তুংগীদমক মপুংফানা থৌরাং তৌরবা ৱায়েন-কাংলোনগী থবক অমগী মাইকৈদা ঐখোয় চঙশিল্লি।
প্রধান মন্ত্রীনা হায়খি লৈবাক অসিদা অওনবা পুরকপদা ইনফ্রাস্ত্রকচর অমসুং তেক্নোলোজিগী মাইপাকপশিংগা লোয়ননা থৌশিলশিং অমসুং আইনশিংনা মরুওইবা থৌদাং অমা লৌরি। নিংতম্বা ফংলবা চহি ৭০গী মতুংদা অহানবা ওইনা লৈবাক অসিনা আইনগী ঙাক্লৌদা অচৌবা অমসুং মরুওইবা অহোংবা পুরক্লে। ভারতিয়া ন্যায় সনহিতাগী মওংদা ভারতকী অনৌবা ৱায়েন-কাংলোন অসিগী ৱাখল্লোন্দি মীয়াম্না অহানবা, ইকায়খুম্নবনা অহানবা অমসুং অচুম্বনা অহানবা’ হায়বনি। ভারতকী ক্রিমিনেলগী লোশিং অসি লোয়লম লৈঙাক্কী লৈঙাকপশিং অমসুং মীনাইশিংগী ৱাখল্লোনদগী মনিংতম্লে। সেদিসনগুম্বা লোয়লম লৈঙাক মতমগী লো শেমদোক্লে।
প্রধান মন্ত্রীনা হায়খি ন্যায় সনহিতা অসি মীয়াম চৈরাক পীনবা নত্তে, মসি মীয়াম ঙাক-শেন্নবনি। নুপীশিং অমসুং অঙাংশিংগী মথক্তা চৎথবা মীওৎ-মীনৈ লাকশিন্নবা অকনবা লোশিং চৎনরে অমসুং অহানবা ওইনা অপীকপা ক্রাইম তৌবশিং লৈকায়গী থবক শুনবগী চৈরাক পীনবা প্রোবিজনশিং য়াওরে। ভারতিয়া সক্ষ্যা অধিনিয়মগী মখাদা ইলেক্ত্রোনিক অমসুং দিজিতেল রেকোর্দশিং প্রমান ওইনা শীজিন্নবা য়ারে। ভারতিয়া নাগরিক সুরক্ষা সনহিতাগী মখাদা জুদিয়ারিদা কেসশিং পন্দুনা লৈবগী খুদোংচাদবশিং কোকহন্নবা ইলেক্ত্রোনিক্কী মওংদা সমোনশিং থাবা য়ারে। সুপ্রিম কোর্তকী লমজিং মখাদা অনৌবা থবকশিং অসি দিস্ত্রিক জুদিসিয়ারিদা ত্রেনিং পীনবা দরকার ওইবা থবকশিং পায়খৎকদবনি। জজশিং অমসুং উকিলশিং খোঙজং অসিদা শরুক য়াগদবনি। অনৌবা থবক অসি মীয়াম খঙনবা ঐখোয়গী উকিলশিং অমসুং বার এসোসিএলশিংনা মরুওইবা থৌদাং অমা লৌগদবনি।
প্রধান মন্ত্রীনা হায়খি ঙসিগী খুন্নাই অসিদা নুপীশিং অমসুং অঙাংশিংগী মথক্তা মীওৎ-মীনৈ চৎথবা অসি য়াম্না নুংনাংবা ৱাফম অমা ওইরে। লৈবাক অসিদা নুপীশিং অশোই-অঙাম থোকহন্দনবা অকনবা আইন কয়া লৈরে। ২০১৯ দা সরকারনা ফাস্ত-ত্রেক কোর্তশিং লিংখৎনবা থৌরাং তৌখি। ফাস্ত-ত্রেক স্পিসিএল কোর্তশিংদা মরুওইবা শাখিশিং থম্নবা মফম অমা শেমগৎনবা থৌরাং লৈরে। ফাস্ত-ত্রেক স্পিসিএল কোর্তশিং, দিস্ত্রিক জজ, দিস্ত্রিক মেজিস্ত্রেত অমসুং পুলিস সুপরিনতেন্দেন্তগী দিস্ত্রিক মোনিতরিং কম্মিতিশিংগী মরুওইবা থৌদাং লৈরি। ৱায়েন-কাংলোনগী তোঙান-তোঙানবা থবকশিংগী মরক্তা পুন্না চৎমিন্নবদা কম্মিতিনা মরুওইবা থৌদাং লৌরি। হায়রিবা কম্মিতিশিং অসি থৱায় য়াওনা থবক তৌহনবা দরকার ওই। নুপীশিংগী মথক্তা চৎথবা ক্রাইমশিংগা মরী লৈনবা কেসশিংদা অথুবা মতমদা ৱারেপশিং লৌবনা লৈবাক অসিগী অপুনবা মীশিংগী তঙ্খায় অমদা অশোই-অঙাম থোকহল্লোই।
লোইশিল্লকপগী ৱারোলদা, প্রধান মন্ত্রীনা হায়খি খন্ন-নৈনবশিং অসিদগী লৈবাক্কী মরুওইবা পাম্বৈশিং পুথোকপা ঙমগনি হায়বগী থাজবা থম্লি অমসুং মীওই খুদিংমক্তা অচুম্বা ৱায়েন ফংহনবগী লম্বী ফগৎহনগনি।
থৌরম অদুদা শরুক য়াখিবশিংগী মনুংদা ভারতকী চীফ জজতিস, জজতিস দি ৱাই চান্দ্রচুর, সুপ্রিম কোর্তকী জজশিং, জজতিস সঞ্জিব খন্না অমসুং জজতিস বি আর গাবাই, লো অমসুং জজতিসগী রাজ্য মন্ত্রী(মনিংতম্বা) শ্রী অর্জুন রাম মেঘাৱাল, ভারতকী এত্তোর্নি জেনেরেল শ্রী আর ভেনকাতারমনি, সুপ্রিম কোর্ত বার এসোসিএসনগী প্রসিদেন্ত শ্রী কপিল সিব্বাল অমসুং বার কাউন্সিল ওফ ইন্দিয়াগী চিয়ারমেন শ্রী মনান কুমার মিশ্রা য়াওখি।
***
(Release ID: 2050423)
Visitor Counter : 22