రాష్ట్రంలో సహకార సంఘాల విస్తరణకు సంబంధించిన సమీక్షా సమావేశం కేంద్ర దేశీయ వ్యవహారాలు, సహకార మంత్రి శ్రీ అమిత్ షా అధ్యక్షతన ఛత్తీస్‌గఢ్‌లోని రాయ్‌పూర్‌లో ఈరోజు జరిగింది. ఈ సందర్భంగా ఆయా జిల్లాలలో జల కమిటీలుగా పని చేస్తున్న ప్రైమరీ అగ్రికల్చర్ క్రెడిట్ సొసైటీ (పీఏసీఎస్)లను కూడా శ్రీ అమిత్ షా ప్రారంభించారు. ఛత్తీస్‌గఢ్ ముఖ్యమంత్రి శ్రీ విష్ణు దేవ్ సాయి, కేంద్ర సహకార శాఖ సహాయ మంత్రి శ్రీ మురళీధర్ మోహోల్, ఛత్తీస్‌గఢ్ ఉప ముఖ్యమంత్రి శ్రీ అరుణ్ సావో, కేంద్ర సహకార మంత్రిత్వ శాఖ కార్యదర్శి డాక్టర్ ఆశిష్ కుమార్ భుటానీ సహా పలువురు ప్రముఖులు ఈ కార్యక్రమంలో పాల్గొన్నారు.

'ఏక్ పేడ్ మా కే నామ్' ప్రచారంలో భాగంగా, కేంద్ర దేశీయ వ్యవహారాలు, సహకార శాఖ మంత్రి "పీపల్ ఫర్ పీపుల్" కార్యక్రమం కింద మొక్కలు నాటారు. అలాగే ఛత్తీస్‌గఢ్ ప్రభుత్వానికి చెందిన అనేక అభివృద్ధి పనులను ఆయన ప్రారంభించారు.

సహకార సంఘాల సమీక్షా సమావేశంలో కేంద్ర సహకార మంత్రి ప్రసంగిస్తూ, ప్రధాన మంత్రి శ్రీ నరేంద్ర మోదీ కలలుగన్న “సహకార్ సే సమృద్ధి” సాకారం కోసం దేశంలోని ప్రతి పంచాయతీలో సహకార సంఘాన్ని ఏర్పాటు చేస్తున్నట్లు తెలిపారు. గిరిజనుల అభివృద్ధిని దృష్టిలో ఉంచుకుని ఛత్తీస్‌గఢ్ ప్రభుత్వం కొత్త ప్రజా డెయిరీ పథకాన్ని తీసుకురావాలన్నారు. డెయిరీ, ఫిషరీస్ సహకార సంస్థలుగా సేవలందించటంతో పాటు బహుళ ప్రయోజన యూనిట్‌గా కూడా పీఏసీఎస్‌లు పనిచేసేలా ఈ పథకాన్ని కొనసాగించాలని ఆయన సూచించారు.

ఛత్తీస్‌గఢ్‌లోని మొత్తం 2058 పీఏసీఎస్‌లు మోడల్ బై-లాస్‌ను పెట్టుకున్నాయని కేంద్ర దేశీయ వ్యవహారాలు, సహకార మంత్రి తెలిపారు. ఛత్తీస్‌గఢ్‌లోని డ్రై ఏరియాలను కనుగొనడానికి నేషనల్ కోఆపరేటివ్ డేటాబేస్ ఉపయోగించాలని, ఇది సహకార సంఘాల విస్తరణకు దోహదపడుతుందని ఆయన అన్నారు. కంప్యూటరీకరణ ద్వారా, ప్రతి పీఏసీఎస్‌ను కామన్ సర్వీస్ సెంటర్ (సీఎస్‌సీ)గా మార్చాలని, తద్వారా పీఏసీఎస్ చేపట్టే పలు కార్యక్రమాల ప్రయోజనాలు గ్రామీణ ప్రజలకు అందుతాయని ఆయన పేర్కొన్నారు.