ସହଯୋଗ ମନ୍ତ୍ରଣାଳୟ
କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ଆଜି ଛତିଶଗଡର ରାୟପୁରଠାରେ ରାଜ୍ୟରେ ସମବାୟ ସମ୍ପ୍ରସାରଣ ସମ୍ପର୍କରେ ଏକ ସମୀକ୍ଷା ବୈଠକ ଅନୁଷ୍ଠିତ
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ 'ସହକାର ସେ ସମୃଦ୍ଧି'ର ସ୍ୱପ୍ନକୁ ସାକାର କରିବା ପାଇଁ ଦେଶର ପ୍ରତ୍ୟେକ ପଞ୍ଚାୟତରେ ଏକ ସମବାୟ ସମିତି ଗଠନ କରାଯାଉଛି
କମ୍ପ୍ୟୁଟରୀକରଣ ପରେ ପ୍ରତ୍ୟେକ ପିଏସିଏସ ଏକ କମନ୍ ସର୍ଭିସ୍ ସେଣ୍ଟର ଭାବରେ କାର୍ଯ୍ୟ କରିବା ଆରମ୍ଭ କରିବା ଉଚିତ, ଯାହାଦ୍ୱାରା ପିଏସିଏସ ମାଧ୍ୟମରେ ବିଭିନ୍ନ କାର୍ଯ୍ୟକଳାପର ଲାଭ ଗ୍ରାମୀଣ ଲୋକଙ୍କ ପାଖରେ ପହଞ୍ଚିପାରିବ
କୃଷି ଜାତ ଦ୍ରବ୍ୟ ବିକ୍ରି ପାଇଁ ନାଫେଡ୍ ଓ ଏନସିସିଏଫ୍ ପୋର୍ଟାଲରେ ପିଏସିଏସ ପକ୍ଷରୁ ଶତ ପ୍ରତିଶତ ପଞ୍ଜୀକରଣ ହେବା ଦରକାର
ସମସ୍ତ ବଜାର, ସମସ୍ତ ପିଏସିଏସ ଓ ସମବାୟ ସମିତିର ପ୍ରତ୍ୟେକ ବ୍ୟବସାୟୀଙ୍କ ଜିଲ୍ଲା ସମବାୟ ବ୍ୟାଙ୍କରେ ଆକାଉଣ୍ଟ ରହିବା ଦରକାରପିଏସିଏସର ସମ୍ପ୍ରସାରଣ ପାଇଁ ଛତିଶଗଡ଼ ସରକାର ୪ଟି ନୂତନ ଜିଲ୍ଲା ସମବାୟ କେନ୍ଦ୍ରୀୟ ବ୍ୟାଙ୍କ ପ୍ରତିଷ୍ଠା କରନ୍ତୁ
ଶ୍ରୀ ଅମିତ ଶାହ ଛତିଶଗଡ଼ର ସମସ୍ତ ୩୩ଟି ଜିଲ୍ଲାରେ ଜଳ କମିଟି ଭାବରେ କାର୍ଯ୍ୟ କରିବା ପାଇଁ ପିଏସିଏସ ର ଶୁଭାରମ୍ଭ କରିଛନ୍ତି
'ଏକ ପେଡ଼ ମା କେ ନାମ' ଅଭିଯାନର ଏକ ଅଂଶ ଭାବରେ ଶ୍ରୀ ଅମିତ ଶାହ "ପିପଲ ଫର ପିପୁଲ" କାର୍ଯ୍ୟକ୍ରମ ଅଧୀନରେ ଚାରା ରୋପଣ କରିବା ସହ ଛତିଶଗଡ଼ ସରକାରଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟର ଉଦଘାଟନ କରିଛନ୍ତି
Posted On:
25 AUG 2024 5:13PM by PIB Bhubaneshwar
କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହା ଆଜି ଛତିଶଗଡ଼ର ରାୟପୁରଠାରେ ରାଜ୍ୟରେ ସମବାୟ ସମ୍ପ୍ରସାରଣ ସମ୍ପର୍କିତ ଏକ ସମୀକ୍ଷା ବୈଠକରେ ଅଧ୍ୟକ୍ଷତା କରିଛନ୍ତି। ଶ୍ରୀ ଅମିତ ଶାହ ନିଜ ନିଜ ଜିଲ୍ଲାରେ ଜଳ କମିଟି ଭାବରେ କାର୍ଯ୍ୟ କରିବା ପାଇଁ ୩୩ ଟି ଜିଲ୍ଲାରେ ପ୍ରାଥମିକ କୃଷି କ୍ରେଡିଟ୍ ସୋସାଇଟି (ପିଏସିଏସ)ର ଶୁଭାରମ୍ଭ କରିଥିଲେ । ଏହି ଅବସରରେ ଛତିଶଗଡ଼ ମୁଖ୍ୟମନ୍ତ୍ରୀ ଶ୍ରୀ ବିଷ୍ଣୁ ଦେଓ ସାଇ, କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ ଶ୍ରୀ ମୁରଲୀଧର ମୋହୋଲ, ଛତିଶଗଡ଼ର ଉପମୁଖ୍ୟମନ୍ତ୍ରୀ ଶ୍ରୀ ଅରୁଣ ସାଓ ଏବଂ କେନ୍ଦ୍ର ସମବାୟ ମନ୍ତ୍ରଣାଳୟର ସଚିବ ଡ. ଆଶିଷ କୁମାର ଭୂଟାନୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।
![](https://static.pib.gov.in/WriteReadData/userfiles/image/c6093a2e-bf31-4cc0-9c44-dad0612cad77R1EO.jpeg)
'ଏକ ପେଡ଼ ମା କେ ନାମ' ଅଭିଯାନର ଏକ ଅଂଶ ଭାବରେ କେନ୍ଦ୍ର ଗୃହମନ୍ତ୍ରୀ ତଥା ସମବାୟ ମନ୍ତ୍ରୀ "ପିପଲ ଫର ପିପୁଲ" କାର୍ଯ୍ୟକ୍ରମ ଅଧୀନରେ ବୃକ୍ଷରୋପଣ କରିବା ସହ ଛତିଶଗଡ଼ ସରକାରଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟର ଶୁଭାରମ୍ଭ କରିଥିଲେ ।
ସମବାୟ ସମୀକ୍ଷା ବୈଠକରେ ଉଦବୋଧନ ଦେଇ କେନ୍ଦ୍ର ସମବାୟ ମନ୍ତ୍ରୀ କହିଥିଲେ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ "ସହକାର ସେ ସମୃଦ୍ଧି" ସ୍ୱପ୍ନକୁ ସାକାର କରିବା ପାଇଁ ଦେଶର ପ୍ରତ୍ୟେକ ପଞ୍ଚାୟତରେ ଏକ ସମବାୟ ସମିତି ଗଠନ କରାଯାଉଛି । ସେ କହିଛନ୍ତି ଯେ ଛତିଶଗଡ଼ ସରକାର ଆଦିବାସୀଙ୍କ ବିକାଶ ଉପରେ ଧ୍ୟାନ ଦେଇ ଏକ ନୂତନ ସାର୍ବଜନୀନ ଦୁଗ୍ଧ ଯୋଜନା ଆଣିବା ଉଚିତ୍ । ସେ କହିଥିଲେ ଯେ ଏହି ଯୋଜନାରେ ପିଏସିଏସ କୁ ଏକ ବହୁମୁଖୀ ୟୁନିଟ୍ ଭଳି କାର୍ଯ୍ୟ କରିବା ପାଇଁ ପରିକଳ୍ପନା କରାଯିବା ଉଚିତ ଯାହା ଦୁଗ୍ଧ ଏବଂ ମତ୍ସ୍ୟ ସମବାୟ ଅନୁଷ୍ଠାନ ଭାବରେ ମଧ୍ୟ କାର୍ଯ୍ୟ କରିବ ।
କେନ୍ଦ୍ର ଗୃହମନ୍ତ୍ରୀ ଏବଂ ସମବାୟ ମନ୍ତ୍ରୀ କହିଛନ୍ତି ଯେ ଛତିଶଗଡ଼ର ସମସ୍ତ ୨୦୫୮ ପିଏସିଏସ ମଡେଲ ବାଇ-ଲ କୁ ଗ୍ରହଣ କରିଛନ୍ତି। ଛତିଶଗଡରେ ଶୁଖିଲା ଅଞ୍ଚଳ ଖୋଜିବା ପାଇଁ ଜାତୀୟ ସମବାୟ ଡାଟାବେସ ବ୍ୟବହାର କରାଯିବା ଉଚିତ ଯାହା ସମବାୟର ସମ୍ପ୍ରସାରଣରେ ସହାୟକ ହେବ ବୋଲି ସେ କହିଛନ୍ତି। କମ୍ପ୍ୟୁଟରୀକରଣ ସହିତ ପ୍ରତ୍ୟେକ ପିଏସିଏସକୁ ଏକ କମନ୍ ସର୍ଭିସ ସେଣ୍ଟର (ସିଏସସି) କରାଯିବା ଉଚିତ ଯାହା ଦ୍ୱାରା ପିଏସିଏସ ଦ୍ୱାରା କରାଯାଉଥିବା ବିଭିନ୍ନ କାର୍ଯ୍ୟକଳାପର ସୁଫଳ ଗ୍ରାମୀଣ ଲୋକଙ୍କ ପାଖରେ ପହଞ୍ଚିପାରିବ ବୋଲି ସେ ଗୁରୁତ୍ୱାରୋପ କରିଥିଲେ ।
ଶ୍ରୀ ଅମିତ ଶାହ କହିଛନ୍ତି ଯେ ଇଥାନଲ ଉତ୍ପାଦନ ପାଇଁ ଏନସିସିଏଫ, ନାଫେଡ ଏବଂ ରାଜ୍ୟ ମଧ୍ୟରେ ଏକ ଚୁକ୍ତି ହେବା ଉଚିତ ଯାହା ଦ୍ୱାରା କୃଷକମାନଙ୍କୁ ମକା ଚାଷ ପ୍ରତି ଉତ୍ସାହିତ କରାଯାଇପାରିବ । ମକା ଚାଷରେ ଖର୍ଚ୍ଚ ମଧ୍ୟ କମ୍ ଏବଂ ଚାଷୀଙ୍କ ସମସ୍ତ ମକା କେନ୍ଦ୍ର ସରକାର ସର୍ବନିମ୍ନ ସହାୟକ ମୂଲ୍ୟରେ କିଣିବେ ବୋଲି ସେ କହିଛନ୍ତି। ଶ୍ରୀ ଶାହ କହିଛନ୍ତି ଯେ କୃଷକଙ୍କ କୃଷି ଜାତ ଦ୍ରବ୍ୟ ବିକ୍ରି ପାଇଁ ପିଏସିଏସ ପକ୍ଷରୁ ନାଫେଡ୍ ଏବଂ ଏନସିସିଏଫ ପୋର୍ଟାଲରେ ଶତ ପ୍ରତିଶତ ପଞ୍ଜୀକରଣ କରାଯିବା ଉଚିତ।
ପ୍ରତ୍ୟେକ ବଜାରର ପ୍ରତ୍ୟେକ ବ୍ୟବସାୟୀ, ପିଏସିଏସ ଏବଂ ସମବାୟ ସମିତି ପାଇଁ ଜିଲ୍ଲା ସମବାୟ କେନ୍ଦ୍ରୀୟ ବ୍ୟାଙ୍କରେ ଖାତା ଖୋଲିବା ବାଧ୍ୟତାମୂଳକ ହେବା ଆବଶ୍ୟକ ବୋଲି କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି। ଛତିଶଗଡ଼ରେ ୪ଟି ସମବାୟ ଚିନି କଳ ଥିବା ବେଳେ ସେଥିମଧ୍ୟରୁ ମାତ୍ର ଗୋଟିଏ ମିଲରେ ଇଥାନଲ ଉତ୍ପାଦନ କାରଖାନା ରହିଛି। ଅବଶିଷ୍ଟ ୩ଟି ସମବାୟ ଚିନି କଳରେ ୬ ମାସ ମଧ୍ୟରେ ମଲ୍ଟି ଫିଡ୍ ଇଥାନଲ ଉତ୍ପାଦନ କାରଖାନା ସ୍ଥାପନ କରାଯାଉ, ଯାହାଦ୍ୱାରା ମକା ଓ ଆଖୁରୁ ଇଥାନଲ ଉତ୍ପାଦନ ହୋଇପାରିବ ବୋଲି ଶ୍ରୀ ଶାହା କହିଛନ୍ତି। ଏଥିପାଇଁ କେନ୍ଦ୍ର ସରକାର ସହାୟତା କରିବେ ବୋଲି ସେ କହିଛନ୍ତି। ଛତିଶଗଡ଼ରେ ମକା ଓ ଡାଲି ଚାଷକୁ ପ୍ରୋତ୍ସାହିତ କରିବାର ଆବଶ୍ୟକତା ରହିଛି ଏବଂ ଏଥିପାଇଁ ରାଜ୍ୟ କୃଷି ବିଭାଗ ପଦକ୍ଷେପ ନେବା ଦରକାର ବୋଲି ସେ କହିଛନ୍ତି।
ଶ୍ରୀ ଅମିତ ଶାହ କହିଥିଲେ ଯେ ବର୍ତ୍ତମାନ ଛତିଶଗଡର ୩୩ଟି ଜିଲ୍ଲାରେ ମୋଟ ୬ଟି ଜିଲ୍ଲା ସମବାୟ କେନ୍ଦ୍ରୀୟ ବ୍ୟାଙ୍କ (ଡିସିସିବି) ରହିଛି ଏବଂ ନିକଟ ଭବିଷ୍ୟତରେ ରାଜ୍ୟରେ ପିଏସିଏସ ର ସମ୍ପ୍ରସାରଣକୁ ଦୃଷ୍ଟିରେ ରଖି ଅତି କମରେ ଆହୁରି ୪ଟି ଡିସିସିବି ପ୍ରତିଷ୍ଠା କରାଯିବା ଉଚିତ । ଛତିଶଗଡର ଗ୍ରାମୀଣ ଓ ଆଦିବାସୀ ଲୋକଙ୍କ ଅର୍ଥନୈତିକ ବିକାଶ ପାଇଁ ରାଜ୍ୟ ସରକାରଙ୍କ ପଶୁପାଳନ, କୃଷି, ଆଦିବାସୀ ବ୍ୟାପାର ଓ ସମବାୟ ବିଭାଗ ମିଳିତ ଭାବେ କାର୍ଯ୍ୟ କରିବା ଉଚିତ ବୋଲି ସେ କହିଥିଲେ ।
BS
(Release ID: 2048803)
Visitor Counter : 9