ভারত অমসুং US অপুন্বা অসি মালেমদা ইং-তপ্পা, নুংঙাই য়াইফবা অমসুং মরা চেৎপা ফীভম পুরকপা ঙমগদবা অকন্বা ফোর্স অমনি‍। ৱাফম অসি ঙাকশেল মন্ত্রী শ্রী রাজনাথ সিংহনা নুমিৎ মরিনিগী US খোঙচত্তা ওগস্ত ২২, ২০২৪দা ৱাসিংতন্দা থুংলবা মতুংদা ইন্দিয়ন দাইস্পোরাশিংগী ৱারী শানবদা ফোঙদোকখিবনি‍। ঙাকশেল মন্ত্রীনা ভারত অমসুং US অনি অসি মপাঙ্গল কন্বা খোঙবু ওইগদবা মহৌশাগী ওইবা খোঙলোয়শিংনি অমসুং খুৎশম্ননা চৎলিবা অসি মখা তানা হেনগৎলক্লি হায়খি‍।

শ্রী রাজনাথ সিংহনা প্রধান মন্ত্রী শ্রী নরেন্দ্র মোদীগী ইচঙ থৌরবা লুচিং মখাদা ভারতকী থাক মালেমগী ফম্পাক্তা হেনগৎলক্লে হায়বা ৱাফম অমুক হন্না থমখি‍। “মমাঙদা, মালেমগী ফোরমশিংদা ভারতকী ৱাফমশিং থৌৱা শানরমদে; অদুবু ঙসিদি, মালেম পুম্বনা চেকশিন্না তারি,” হায়না মহাক্না হায়খি‍।

ঙাকশেল মন্ত্রীনা, ২০১৪ মমাঙদা ভারত অসি ইনভেস্তমেন্ত ফর্ম মোর্গন স্তেনলীনা হায়বদা ‘ফ্রেজাইল ফাইব’ লৈবাকশিংগী মনুংদা চল্লম্মি, অদুগা ঙসিনা লৈবাকসসিনা মালেমগী ‘ফেবলস ফাইব’ শেন্মিৎলোনশিংগী মরক্তা তিল্লরি হায়বা ৱাফম থমখি‍। ভারতনা ২০২৭ ফাওবদা অহুমশুবা খ্বায়দগী চাউবা শেন্মিৎলোন ওইরক্লগনি হায়খিবা ফর্ম অসিগী কুইদ্রিবা রিপোর্তপু মহাক্না পনখি‍। কোবিদ-১৯ লাইচত্তা লৈঙাক্না পায়খৎখিবা থৌরাংশিংনা ভারতকী শেন্মিৎলোন অতৈ লৈবাকশিংগা চাংদম্নবদা কা হেন্না শোকহনখিদবনি হায়বা ৱাফমসু মহাক্না ফোঙদোকখি‍।

লৈঙাক অসিনা মীওই করোর ২৫বু লায়রবগী পনখৈগী মথক্তা মায় পুক্না পুখৎলক্লে হায়বা ৱাফম শ্রী রাজনাথ সিংহনা ফোঙদোকখি‍। খ্বায়দগী নৌবা দেতাগী মতুং ইন্না, রিতেল ইনফ্লেসন ৩.৫৪%দা চহি মঙাদা খ্বায়দগী নেম্বা ওইখি অমসুং ফোরেন এক্সচেঞ্জ রিজর্বসু $৬৭৫ বিলিয়ন য়ৌদুনা হৌজিক ফাওবগী খ্বায়দগী ৱাংবা ওইরি হায়না মহাক্না মখা তাখি‍।

ঙাকশেল মন্ত্রীনা পোৎলম ৫,০০০ হেন্না য়াওবা পোজিতিব ইন্দিজিনাইজেসন লিস্তকী নোতিফিকেসন থোকখিবগা লোয়ননা দিফেন্সকী লমদা ‘আত্মনিরভর্তা’ ফংবা ঙম্নবা লৈঙাক্না লৌখৎলিবা খোঙথাঙশিং মচা খায়না থমখি‍। লমদমসিগী কম্পেনীশিংনা ভারতকী লৈহাউদা স্তেত-ওফ-দি-আর্ত দিফেন্স পোৎলমশিং পুথোকহন্নবা লেপ্পা লৈতনা থৌরাং কয়া পায়খৎলি হায়বা ৱাফমসু মহাক্না ফোঙদোকখি‍।

শ্রী রাজনাথ সিংহনা, হৌজিক পাল্লিবা লৈঙাক অসি লাক্ত্রিঙৈদা লুপা করোর ৬০০ ওইরম্বা দিফেন্স এক্সপোর্ত, হৌজিক্তী মশক থোক্না লুপা করোর ২১,০০০দা হেনগৎলে হায়বা ৱাফম ময়ামদা থমখি‍। ইনোভেসন য়োকখৎনবা খোঙথাঙশিংনা মরম ওইরগা লৈবাকসিগী স্তার্ত-অপ মশিংসু ২০১৪ মমাঙদা ৪০০ রোম ওইরম্বদগী লাখ ১.২০দা খোঙলৈ থুনা হেনগৎলক্লে হায়না মহাক্না মখা তাখি‍। অসিগুম্বা মায় পাকপশিং অসি লৈঙাক্কী চপ য়ুংনা লেপ্পা লোয়ননা পোলিসী অমসুং প্লান্নিংনা ওইবা ঙমহনবনি হায়না মহাক্না হায়খি‍। প্রধান মন্ত্রীগী মঙলানবু পুথোক্লদুনা, “ঐখোয়না ভারতপু মপাঙ্গল কনবা, সিক্যুর ওইবা অমসুং নুংঙাই য়াইফবা লৈবাক অমা ওইনা শেমগৎপা পাম্মি” হায়না মহাক্না হায়খি‍।

US তা থবক তৌরিবা ভারতকী মীওইশিংগী মফমদা ‘বসুদৈব কুতুম্বকম’ (মালেম অসি ইমুং অমনি) হায়বা ৱাখল পরিংদা পুকচেল শেংনা অমসুং কত্থোকপগা লোয়ননা থবক তৌনবা ৱাফম থম্লদুনা ঙাকশেল মন্ত্রীনা মহাক্কী ৱারোল লোইশিনখি‍।

রাজনাথ সিংহনা য়ৌরকপগা চাননা, নাকল অনিগী মকোক থোংবা দিফেন্স ওফিসিএলশিংনা সিক্যুরিতী ওফ সপ্লাইজ এরেঞ্জমেন্ত (SOSA) অমসুং মেমোরেন্দম ওফ এগ্রীমেন্ত রিগার্দিং দি এসাইনমেন্ত ওফ লিএজন ওফিসর্স – হায়রিবা অচৌবা য়ানচে অনি অসি খুৎয়েক পীনখি‍।

মহাক্কী US খোঙচৎ মনুংদা, ঙাকশেল মন্ত্রীনা US সেক্রেতরী ওফ দিফেন্স মিস্তর লোইদ ওসস্তিনগা নাকল অনিগী ওইবা মীফম অমা পাঙথোক্কনি‍। মহাক্না US এসিস্তেন্ত তু দি প্রেসিদেন্ত ফোর নেস্নেল সিক্যুরিতী এফ্যার্স মিস্তর জেক সুলিভানগসু উনগনি‍। মদুগী মথক্তা, মহাক্না US দিফেন্স ইন্দস্ত্রীগা হৌজিক লৈরিবা অমসুং তুংদা লাক্কদবা দিফেন্স কোলাবোরেসনগী মতাঙদা রাউন্দ তেবল মীফম অমসু পাঙথোক্কনি‍। খোঙচৎ অসিনা ইন্দিয়া-US গ্লোবেল স্ত্রেতেজিক পার্ত্নরসিপ হেন্না চেৎশিনহনগনি অমসুং পাকথোক চাউথোকহনগগনি হায়না পারি‍।

***