ପ୍ରଧାନମନ୍ତ୍ରୀଙ୍କ ଅଭିଭାଷଣର ମୁଖ୍ୟାଂଶଗୁଡ଼ିକ ନିମ୍ନରେ ଦିଆଗଲା :

1. ସାଧାରଣ

• ଆମର କେବଳ ଗୋଟିଏ ସଂକଳ୍ପ ଅଛି- ରାଷ୍ଟ୍ର ପ୍ରଥମ । ଆମ ପାଇଁ ଜାତୀୟ ସ୍ୱାର୍ଥ ସର୍ବୋଚ୍ଚ।
• ବିଶ୍ୱସ୍ତରରେ ଭାରତର ଖ୍ୟାତି ବୃଦ୍ଧି ପାଇଛି ଏବଂ ଭାରତ ପ୍ରତି ବିଶ୍ୱର ଧାରଣା ବଦଳିଯାଇଛି ।
• ଯଦି ମୋ ଦେଶର ୧୪୦ କୋଟି ନାଗରିକ, ମୋ ପରିବାରର ୧୪୦ କୋଟି ସଦସ୍ୟ ସଂକଳ୍ପ ନେଇ ଆଗେଇ ଆସିବେ, ଏକ ଦିଗ ନିର୍ଦ୍ଧାରଣ କରି କାନ୍ଧରେ କାନ୍ଧ ମିଳାଇ ଆଗକୁ ବଢ଼ିପାରିବେ, ତା’ହେଲେ ଯେତେ ବଡ଼ ଆହ୍ୱାନ, ଅଭାବ କିମ୍ବା ସମ୍ବଳ ପାଇଁ ସଂଘର୍ଷ ହେଉ ନା କାହିଁକି, ଆମେ ପ୍ରତ୍ୟେକ ଆହ୍ୱାନକୁ ଅତିକ୍ରମ କରି ଏକ ସମୃଦ୍ଧ ଭାରତ ଗଠନ କରିପାରିବା ଏବଂ ୨୦୪୭ ସୁଦ୍ଧା ‘ବିକଶିତ ଭାରତ’ର ଲକ୍ଷ୍ୟ ହାସଲ କରିପାରିବା।
• ଦେଶ ପାଇଁ ବଞ୍ଚିବାର ପ୍ରତିବଦ୍ଧତା ଏକ ବିକଶିତ ଭାରତ ସୃଷ୍ଟି କରିପାରିବ ।
• ପ୍ରତ୍ୟେକ ନାଗରିକଙ୍କ ସ୍ୱପ୍ନ ଓ ସଂକଳ୍ପ ବିକଶିତ ଭାରତ ୨୦୪୭ର ପ୍ରତିବଦ୍ଧତାରୁ ସ୍ପଷ୍ଟ ଜଣାପଡୁଛି ।
• ଆଜିର ଭାରତରେ ମାଇ-ବାପ (ଗୋଲାମୀ) ସଂସ୍କୃତି ପାଇଁ କୌଣସି ସ୍ଥାନ ନାହିଁ।
• ଯେତେବେଳେ ଏହି ଦେଶର ଲୋକମାନଙ୍କର ଏତେ ବ୍ୟାପକ ଚିନ୍ତାଧାରା ଓ ମହାନ ସ୍ୱପ୍ନ ଥାଏ, ଯେତେବେଳେ ସେମାନଙ୍କ ସଂକଳ୍ପ ଏହି ଶବ୍ଦରେ ପ୍ରତିଫଳିତ ହୁଏ, ସେତେବେଳେ ଏହା ଆମ ଭିତରେ ଏକ ନୂତନ ସଂକଳ୍ପକୁ ସୁଦୃଢ଼ କରିଥାଏ ।
• ଜାତୀୟ ପ୍ରତିରକ୍ଷା ଏବଂ ରାଷ୍ଟ୍ର ନିର୍ମାଣ ପାଇଁ ସମ୍ପୂର୍ଣ୍ଣ ନିଷ୍ଠା ଏବଂ ପ୍ରତିବଦ୍ଧତା ସହିତ ଦେଶର ସୁରକ୍ଷା କରୁଥିବା ମହାନ ବ୍ୟକ୍ତିମାନଙ୍କୁ ମୁଁ ଗଭୀର ସମ୍ମାନ ଜଣାଉଛି ।
• ଗଣତନ୍ତ୍ର ପ୍ରତି ଆମର ଦେଶାତ୍ମବୋଧ ଓ ବିଶ୍ୱାସ ବିଶ୍ୱ ପାଇଁ ପ୍ରେରଣା ପାଲଟିଛି।
• ଅତୀତର ସ୍ଥିତାବସ୍ଥା ମାନସିକତାରୁ ଅଭିବୃଦ୍ଧି ଓ ସଂସ୍କାର କୁ ଆମେ ଆଗେଇ ଆସିଛୁ।
• ଆମର ସଂସ୍କାର ପଥ ଅଭିବୃଦ୍ଧିର ବ୍ଲୁ-ପ୍ରିଣ୍ଟ ରେ ପରିଣତ ହୋଇଛି ।
• ବିଶ୍ଵରେ ଶୋଚନୀୟ ପରିସ୍ଥିତି ସତ୍ତ୍ୱେ ସୁଯୋଗ ଦୃଷ୍ଟିରୁ ଏହା ହେଉଛି ‘ଭାରତ ପାଇଁ ସୁବର୍ଣ୍ଣ ଯୁଗ’।
• ଆମେ ଏହି ସୁଯୋଗକୁ ହାତଛଡ଼ା ହେବାକୁ ଦେବା ଉଚିତ୍ ନୁହେଁ। ଯଦି ଆମେ ଏହି ମୁହୂର୍ତ୍ତକୁ ଉପଯୋଗ କରି ନିଜ ସ୍ୱପ୍ନ ଓ ସଂକଳ୍ପ ନେଇ ଆଗକୁ ବଢ଼ିବୁ, ତେବେ ଆମେ ‘ସ୍ୱର୍ଣ୍ଣିମ ଭାରତ’ ପାଇଁ ଦେଶର ଆକାଂକ୍ଷା ପୂରଣ କରିବୁ ଏବଂ ୨୦୪୭ ସୁଦ୍ଧା ଏକ ବିକଶିତ ଭାରତର ଲକ୍ଷ୍ୟ ହାସଲ କରିବୁ।
• ପର୍ଯ୍ୟଟନ କ୍ଷେତ୍ର ହେଉ, ଏମ୍ଏସ୍ଏମ୍ଇ, ଶିକ୍ଷା, ସ୍ୱାସ୍ଥ୍ୟସେବା, ପରିବହନ, ଚାଷ ହେଉ କିମ୍ବା କୃଷି କ୍ଷେତ୍ର ହେଉ, ସବୁ କ୍ଷେତ୍ରରେ ଏକ ନୂତନ ଓ ଆଧୁନିକ ବ୍ୟବସ୍ଥା ପ୍ରତିଷ୍ଠା କରାଯାଉଛି।
• ସମଗ୍ର ବିଶ୍ୱର ସର୍ବୋତ୍ତମ ଅଭ୍ୟାସ ଗ୍ରହଣ କରିବା ସହିତ ଆମ ଦେଶର ଅନନ୍ୟ ପରିସ୍ଥିତି ସହିତ ଆଗକୁ ବଢ଼ିବାକୁ ଆମେ ଲକ୍ଷ୍ୟ ରଖିଛୁ ।
• ପ୍ରଯୁକ୍ତି ବିଦ୍ୟାକୁ ସମନ୍ୱିତ କରିବା ଉପରେ ଗୁରୁତ୍ୱ ଦେବା ସହିତ ପ୍ରତ୍ୟେକ କ୍ଷେତ୍ରରେ ଆଧୁନିକୀକରଣ ଏବଂ ଅଭିନବତାର ଆବଶ୍ୟକତା ରହିଛି ।
• ସାଧାରଣ ନାଗରିକଙ୍କ ଜୀବନରେ କମ୍ ସରକାରୀ ହସ୍ତକ୍ଷେପ ହେଉଛି ବିକଶିତ ଭାରତ -୨୦୪୭ ପାଇଁ ଆମ ଦୃଷ୍ଟିକୋଣର ଏକ ଗୁରୁତ୍ୱପୂର୍ଣ୍ଣ ଅଂଶ ।
• ସାରା ଦେଶରେ କାର୍ଯ୍ୟ କରୁଥିବା ୩ ଲକ୍ଷ ଅନୁଷ୍ଠାନରେ ଅତି କମରେ ଦୁଇଟି ବାର୍ଷିକ ସଂସ୍କାର ବାଧ୍ୟତାମୂଳକ, ତେବେ ଏହା ଦ୍ୱାରା ବାର୍ଷିକ ପ୍ରାୟ ୨୫-୩୦ ଲକ୍ଷ ସଂସ୍କାର ହୋଇପାରିବ ଯାହା ଦ୍ୱାରା ସାଧାରଣ ଲୋକଙ୍କ ଆତ୍ମବିଶ୍ୱାସ ବୃଦ୍ଧି ପାଇବ ।
• ତିନୋଟି ପ୍ରମୁଖ କ୍ଷେତ୍ର ଉପରେ ଧ୍ୟାନ ଦେଇ ପ୍ରତ୍ୟେକ କ୍ଷେତ୍ରରେ ଅଗ୍ରଗତିକୁ ତ୍ୱରାନ୍ୱିତ କରିବା ଆମର ଲକ୍ଷ୍ୟ । ପ୍ରଥମତଃ ଆମକୁ ସବୁ କ୍ଷେତ୍ରରେ ନୂଆ ସୁଯୋଗ ସୃଷ୍ଟି କରିବାକୁ ପଡ଼ିବ। ଦ୍ୱିତୀୟତଃ, ବିକଶିତ ବ୍ୟବସ୍ଥା ପାଇଁ ଆବଶ୍ୟକ ଭିତ୍ତିଭୂମିକୁ ସୁଦୃଢ଼ କରିବା ଦିଗରେ ଆମେ କାର୍ଯ୍ୟ କରିବା ଉଚିତ। ଏବଂ ତୃତୀୟତଃ, ଆମେ ଆମର ନାଗରିକମାନଙ୍କ ପାଇଁ ମୌଳିକ ସୁବିଧାଗୁଡ଼ିକୁ ପ୍ରାଥମିକତା ଦେବା ଏବଂ ବୃଦ୍ଧି କରିବା ଉଚିତ୍ ।
• ପ୍ରାକୃତିକ ବିପର୍ଯ୍ୟୟ ଆମ ପାଇଁ ଚିନ୍ତାର କାରଣ ପାଲଟିଛି।
• ସାମ୍ପ୍ରତିକ ପ୍ରାକୃତିକ ବିପର୍ଯ୍ୟୟ ଦ୍ୱାରା ପ୍ରଭାବିତ ହୋଇଥିବା ସମସ୍ତଙ୍କ ପ୍ରତି ମୁଁ ଗଭୀର ସମବେଦନା ଜଣାଉଛି ଏବଂ ଆଶ୍ୱାସନା ଦେଉଛି ଯେ ଏହି ସଙ୍କଟ ସମୟରେ ଦେଶ ସେମାନଙ୍କ ସହିତ ଛିଡ଼ା ହୋଇଛି ।
• କରୁଣା ହେଉଛି ଆମ ଆଭିମୁଖ୍ୟର କେନ୍ଦ୍ରବିନ୍ଦୁ । ଆମେ ଆମ କାର୍ଯ୍ୟର ମୂଳରେ ଉଭୟ ସମାନତା ଏବଂ କରୁଣା ସହିତ ଆଗକୁ ବଢ଼ୁଛୁ ।
• ଆମେ ଏଠାରେ ଆପଣମାନଙ୍କ ମଧ୍ୟରୁ ପ୍ରତ୍ୟେକଙ୍କୁ, ପ୍ରତ୍ୟେକ ପରିବାର ଏବଂ ପ୍ରତ୍ୟେକ ଅଞ୍ଚଳର ସେବା କରିବାକୁ ଆସିଛୁ ।
• ଏକ ବିକଶିତ ଭାରତର ସ୍ୱପ୍ନକୁ ସାକାର କରିବା ପାଇଁ ଆଜି ଲାଲକିଲ୍ଲା ପ୍ରାଚୀରରୁ ମୁଁ କୃତଜ୍ଞତାରେ ମୁଣ୍ଡ ନୁଆଁଇଛି ଏବଂ କୋଟି କୋଟି ଦେଶବାସୀଙ୍କୁ ଧନ୍ୟବାଦ ଜଣାଉଛି ଯେ ସେମାନେ ଆମକୁ ଆଶୀର୍ବାଦ ଦେଇଛନ୍ତି ଓ ଆମକୁ ଦେଶର ସେବା ପାଇଁ ଚୟନ କରିଛନ୍ତି।
• ମୁଁ ଆପଣ ସମସ୍ତଙ୍କୁ ଆଶ୍ୱାସନା ଦେଉଛି ଯେ ଆମକୁ ଏକ ନୂତନ ଉତ୍ସାହ ସହିତ, ନୂତନ ଉଚ୍ଚତା ଆଡ଼କୁ ଆଗେଇ ଯିବାକୁ ପଡିବ।
• ଆମେ ସେମାନଙ୍କ ମଧ୍ୟରେ ନାହୁଁ ଯେଉଁମାନେ ଆଂଶିକ ଭାବେ ଦେଖୁଛନ୍ତି ଏବଂ ଛୋଟ ଛୋଟ ସଫଳତାର ଗୌରବକୁ ଉପଭୋଗ କରୁଛନ୍ତି ।
• ଆମେ ନୂତନ ଜ୍ଞାନ ଏବଂ ସ୍ଥିରତା ଖୋଜୁଥିବା ଲୋକଙ୍କ ସଂସ୍କୃତିରୁ ଆସିଛୁ; ଯେଉଁମାନେ ନିରନ୍ତର ଉଚ୍ଚ ସଫଳତା ପାଇଁ ଇଚ୍ଛା କରନ୍ତି ।
• ଆମେ ବିକାଶର ନୂତନ ଶିଖର ଛୁଇଁବାକୁ ଚାହୁଁଛୁ ଏବଂ ଆମେ ଆମ ନାଗରିକମାନଙ୍କ ମଧ୍ୟରେ ଏହି ଅଭ୍ୟାସ ସୃଷ୍ଟି କରିବାକୁ ଚାହୁଁଛୁ।
• ଏପରି ଏକ ନିର୍ଦ୍ଦିଷ୍ଟ ବର୍ଗର ଲୋକ ଅଛନ୍ତି ଯେଉଁମାନେ ନିଜ କଲ୍ୟାଣ ବାହାରେ ଚିନ୍ତା କରିପାରନ୍ତି ନାହିଁ ଏବଂ ଅନ୍ୟମାନଙ୍କ କଲ୍ୟାଣ ବିଷୟରେ ଚିନ୍ତା କରନ୍ତି ନାହିଁ । ଏଭଳି ବ୍ୟକ୍ତିମାନେ ନିଜର ବିକୃତ ମାନସିକତା ସହ ଚିନ୍ତାର କାରଣ ପାଲଟିଛନ୍ତି। ନିରାଶାରେ ବୁଡ଼ି ରହିଥିବା ଏହି ଲୋକମାନଙ୍କୁ ଦେଶ ଏଡ଼ାଇବା ଦରକାର।
• ଏହି ନିରାଶାବାଦୀ ତତ୍ତ୍ୱ କେବଳ ନିରାଶାଜନକ ନୁହେଁ; ସେମାନେ ଏକ ନକାରାତ୍ମକ ମାନସିକତା ପୋଷଣ କରୁଛନ୍ତି ଯାହା ବିନାଶର ସ୍ୱପ୍ନ ଦେଖାଉଛି । ଏହା ଆମର ସାମୂହିକ ପ୍ରଗତିକୁ ଦୁର୍ବଳ କରିବାକୁ ଚେଷ୍ଟା କରୁଛି। ଏହି ବିପଦକୁ ଦେଶ ସ୍ୱୀକାର କରିବା ଦରକାର।
• ମୁଁ ମୋର ଦେଶବାସୀଙ୍କୁ ଆଶ୍ୱାସନା ଦେବାକୁ ଚାହୁଁଛି ଯେ ଆମର ମହତ ଉଦ୍ଦେଶ୍ୟ, ସଚ୍ଚୋଟତା ଏବଂ ଦେଶ ପ୍ରତି ସମର୍ପଣ ଦ୍ୱାରା ଆମକୁ ବିରୋଧ କରୁଥିବା ଲୋକଙ୍କ ଉପରେ ମଧ୍ୟ ଆମେ ବିଜୟ ଲାଭ କରିବୁ ।
• ଆମର ପ୍ରତିଶ୍ରୁତି ପୂରଣ କରିବା, ୧୪୦ କୋଟି ନାଗରିକଙ୍କ ଭାଗ୍ୟ ବଦଳାଇବା, ସେମାନଙ୍କ ଭବିଷ୍ୟତକୁ ସୁରକ୍ଷିତ କରିବା ଏବଂ ଦେଶର ସ୍ୱପ୍ନକୁ ସାକାର କରିବାରେ ଆମେ କୌଣସି କସରତ ଛାଡିବୁ ନାହିଁ ।
• ସବୁ ସ୍ତରରେ ଦୁର୍ନୀତି ସାଧାରଣ ଲୋକଙ୍କର ବ୍ୟବସ୍ଥା ପ୍ରତି ରହିଥିବା ଆସ୍ଥାକୁ ଭାଙ୍ଗି ଦେଇଛି।
• ମୁଁ ଦୁର୍ନୀତିଗ୍ରସ୍ତଙ୍କ ପାଇଁ ଭୟର ବାତାବରଣ ସୃଷ୍ଟି କରିବାକୁ ଚାହୁଁଛି, ତେଣୁ ସାଧାରଣ ନାଗରିକଙ୍କୁ ଲୁଟ୍ କରିବାର ପରମ୍ପରା ଶେଷ ହେବାକୁ ଯାଉଛି।
• ସମାଜରେ ଏଭଳି ବିହନ ବୁଣିବାର ପ୍ରୟାସ, ଦୁର୍ନୀତିର ମହିମା ଏବଂ ଦୁର୍ନୀତିଗ୍ରସ୍ତଙ୍କ ଗ୍ରହଣୀୟତା ବୃଦ୍ଧି ପାଇଁ ନିରନ୍ତର ପ୍ରୟାସ ଏକ ସୁସ୍ଥ ସମାଜ ପାଇଁ ଏକ ଗୁରୁତ୍ୱପୂର୍ଣ୍ଣ ଆହ୍ୱାନ ଏବଂ ଅତ୍ୟନ୍ତ ଚିନ୍ତାର ବିଷୟ ପାଲଟିଛି ।
• ଗତ ୭୫ ବର୍ଷ ଧରି ଭାରତର ଗଣତନ୍ତ୍ରକୁ ସୁଦୃଢ଼ କରିବାରେ ସମ୍ବିଧାନ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଏହା ଆମ ଦଳିତ, ଶୋଷିତ, ଅବହେଳିତ ଏବଂ ସମାଜର ବଞ୍ଚିତ ବର୍ଗଙ୍କ ଅଧିକାରକୁ ସୁରକ୍ଷିତ ରଖିଛି।
• ଆମେ ସମ୍ବିଧାନର ୭୫ ବର୍ଷ ପୂର୍ତ୍ତି ପାଳନ କରୁଥିବାବେଳେ ନାଗରିକମାନେ ସମ୍ବିଧାନରେ ଥିବା କର୍ତ୍ତବ୍ୟ ଉପରେ ଧ୍ୟାନ ଦେବା ଜରୁରୀ ।
• କର୍ତ୍ତବ୍ୟ ପାଳନ କରିବାର ଦାୟିତ୍ୱ କେବଳ ନାଗରିକଙ୍କ ଠାରୁ ଆରମ୍ଭ କରି ଦେଶର ବିଭିନ୍ନ ଅନୁଷ୍ଠାନ ପର୍ଯ୍ୟନ୍ତ ବ୍ୟାପିଛି ।
• ଯେତେବେଳେ ଆମେ ସମସ୍ତେ ମିଳିତ ଭାବରେ ନିଜର ଦାୟିତ୍ୱ ନିର୍ବାହ କରିଥାଉ, ଆମେ ସ୍ୱାଭାବିକ ଭାବରେ ପରସ୍ପରର ଅଧିକାର ରକ୍ଷକ ହୋଇଥାଉ ।
• ଆମର କର୍ତ୍ତବ୍ୟ ପାଳନ କରି, ଆମେ କୌଣସି ଅତିରିକ୍ତ ପ୍ରୟାସର ଆବଶ୍ୟକତା ନଥାଇ ସ୍ୱାଭାବିକ ଭାବରେ ଏହି ଅଧିକାରଗୁଡ଼ିକୁ ସୁରକ୍ଷା ଦେଇଥାଉ ।
• ବଂଶବାଦ ଓ ଜାତିବାଦ ଭାରତର ଗଣତନ୍ତ୍ରକୁ ଯଥେଷ୍ଟ କ୍ଷତି ପହଞ୍ଚାଉଛି।
• ଏକବିଂଶ ଶତାବ୍ଦୀ ଯେପରି ଭାରତର ଶତାବ୍ଦୀ ହେବାକୁ ଯାଉଛି, ତାହାକୁ ‘ସ୍ୱର୍ଣ୍ଣିମ ଭାରତ’ରେ ପରିଣତ କରିବା ଏବଂ ଏହି ଶତାବ୍ଦୀରେ ‘ବିକଶିତ ଭାରତ’ରେ ପରିଣତ କରିବା ତଥା ସେହି ସ୍ୱପ୍ନକୁ ପୂରଣ କରିବା ଦିଗରେ ଅଗ୍ରସର ହେବା ପାଇଁ ଆମକୁ ଆମର ଆକାଂକ୍ଷା ଓ ଆମର ପ୍ରୟାସକୁ ଏକାଠି କରିବାକୁ ହେବ ।
• ମୁଁ ଆପଣମାନଙ୍କ ପାଇଁ, ଆପଣଙ୍କ ଭବିଷ୍ୟତ ପାଇଁ ଏବଂ ଭାରତ ମାତାର ଉଜ୍ଜ୍ୱଳ ଭବିଷ୍ୟତ ପାଇଁ ଜୀବନକୁ ସମର୍ପି ଦେଇଛି ।

2. ପ୍ରତିରକ୍ଷା ମନ୍ତ୍ରଣାଳୟ

• ପ୍ରତିରକ୍ଷା କ୍ଷେତ୍ରରେ ଆମେ ଆତ୍ମନିର୍ଭରଶୀଳ ହେଉଛୁ।
• ଭାରତ ଧୀରେ ଧୀରେ ବିଭିନ୍ନ ପ୍ରତିରକ୍ଷା ଉପକରଣର ରପ୍ତାନିକାରୀ ଏବଂ ଉତ୍ପାଦନକାରୀ ଭାବରେ ନିଜକୁ ପ୍ରତିଷ୍ଠିତ କରୁଛି ।
• ଯେତେବେଳେ ଆମ ସଶସ୍ତ୍ର ବାହିନୀ ସର୍ଜିକାଲ ଷ୍ଟ୍ରାଇକ୍ କରିଥାଏ, ସେତେବେଳେ ଆମ ହୃଦୟ ଗର୍ବରେ ଭରିଯାଏ ଏବଂ ଆମର ମୁଣ୍ଡ ଉଚ୍ଚ ହୋଇଯାଏ ।
• ୧୪୦ କୋଟି ଭାରତୀୟ ଆଜି ଆମ ସଶସ୍ତ୍ର ବାହିନୀର ବୀରତ୍ୱ କୁ ନେଇ ଗର୍ବ ଅନୁଭବ କରୁଛନ୍ତି ।

3. ଅର୍ଥ ମନ୍ତ୍ରଣାଳୟ

• ‘ଫିନଟେକ୍’ କ୍ଷେତ୍ରରେ ସଫଳତା ପାଇଁ ଭାରତ ଗର୍ବିତ।
• ଆମେ ସଫଳତାର ସହ ବ୍ୟକ୍ତିବିଶେଷଙ୍କ ମୁଣ୍ଡପିଛା ଆୟକୁ ଦ୍ୱିଗୁଣିତ କରିଛୁ ।
• ନିଯୁକ୍ତି ଓ ସ୍ୱରୋଜଗାର କ୍ଷେତ୍ରରେ ନୂଆ ରେକର୍ଡ ସ୍ଥାପନ କରିବା ଦିଗରେ ଆମେ ଉଲ୍ଲେଖନୀୟ ଅଗ୍ରଗତି କରିଛୁ
• ବ୍ୟାଙ୍କିଙ୍ଗ୍ କ୍ଷେତ୍ରକୁ ସୁଦୃଢ଼ କରିବା ପାଇଁ ଏକାଧିକ ସଂସ୍କାର କାର୍ଯ୍ୟକାରୀ କରାଯାଇଥିଲା। ଆଉ ଆଜି, ଆମର ବ୍ୟାଙ୍କଗୁଡିକ ବିଶ୍ୱର ବଛା ବଛା ଶକ୍ତିଶାଳୀ ବ୍ୟାଙ୍କଗୁଡିକ ମଧ୍ୟରେ ନିଜର ସ୍ଥାନ ସୁରକ୍ଷିତ କରିଛନ୍ତି ।
• ସାଧାରଣ ଗରିବ, ବିଶେଷ କରି ମଧ୍ୟବିତ୍ତ ପରିବାରର ଆବଶ୍ୟକତା ପୂରଣ ପାଇଁ ସୁଦୃଢ଼ ବ୍ୟାଙ୍କିଙ୍ଗ୍ ବ୍ୟବସ୍ଥା ସବୁଠାରୁ ବଡ଼ ଶକ୍ତି ପାଲଟିଛି ।
• ବ୍ୟାଙ୍କ ଗୁଡ଼ିକ ଆମର ଏମ୍.ଏସ୍.ଏମ୍.ଇ ଗୁଡ଼ିକ ପାଇଁ ସବୁଠାରୁ ବଡ଼ ସହାୟକ ପାଲଟିଛନ୍ତି।
• ସମାଜର ବିଭିନ୍ନ ଅବହେଳିତ ବର୍ଗ ଯଥା ଗୋପାଳକ, ମତ୍ସ୍ୟଜୀବୀ, ରାସ୍ତାକଡ଼ ଦୋକାନୀମାନେ ଏବେ ବ୍ୟାଙ୍କ ସହ ଯୋଡ଼ି ହୋଇ ନୂଆ ଉଚ୍ଚତା ହାସଲ କରିବା ସହ ବିକାଶ ପଥରେ ସହଭାଗୀ ହେଉଛନ୍ତି।
• ଦେଶକୁ ଆଗେଇ ନେବା ପାଇଁ କ୍ରମାଗତ ଭାବେ ଅନେକ ଆର୍ଥିକ ନୀତି ବିକଶିତ କରାଯାଉଛି ଏବଂ ଏହି ନୂତନ ବ୍ୟବସ୍ଥା ଉପରେ ଦେଶର ବିଶ୍ୱାସ କ୍ରମାଗତ ଭାବରେ ବୃଦ୍ଧି ପାଉଛି ।
• ବିଶ୍ୱ କରୋନା ମହାମାରୀ ମଧ୍ୟରେ ଯଦି କୌଣସି ଦେଶ ନିଜର ଅର୍ଥବ୍ୟବସ୍ଥାରେ ଦ୍ରୁତ ଉନ୍ନତି ଆଣିଛି, ସେ ଦେଶ ହେଉଛି ଭାରତ।
• ଆମର ଆର୍ଥିକ ଅଭିବୃଦ୍ଧି ଓ ବିକାଶକୁ ତ୍ୱରାନ୍ୱିତ କରିବା ପାଇଁ ଆଧୁନିକ ଭିତ୍ତିଭୂମି ଏବଂ ସହଜ ଜୀବନଧାରଣର ବିକାଶ ଉପରେ ଧ୍ୟାନ ଦିଆଯିବା ଉଚିତ୍ ।
• ବିଗତ ଦଶନ୍ଧି ମଧ୍ୟରେ ଆମେ ଅତ୍ୟାଧୁନିକ ରେଳପଥ, ବିମାନବନ୍ଦର, ବନ୍ଦର ଏବଂ ସରକାରୀ ଯୋଗାଯୋଗ ସୁନିଶ୍ଚିତ କରିବା ପାଇଁ ମଜବୁତ ସଡ଼କ ପଥ ନେଟୱାର୍କ ପ୍ରଦାନ କରି ବ୍ୟାପକ ଭିତ୍ତିଭୂମି ବିକାଶ ଦେଖିଛୁ ।
• ଦଳ କିମ୍ବା ରାଜ୍ୟ ନିର୍ବିଶେଷରେ ସମସ୍ତ ନିର୍ବାଚିତ ପ୍ରତିନିଧିଙ୍କୁ ପଦକ୍ଷେପ ନେବାକୁ ମୁଁ ଅନୁରୋଧ କରୁଛି

ସହଜ ଜୀବନଧାରଣ ସୁନିଶ୍ଚିତ କରିବା ପାଇଁ ମିଶନ ଆଭିମୁଖ୍ୟ

• ମୋର ତୃତୀୟ ପାଳିରେ ଭାରତ ତୃତୀୟ ବୃହତ୍ତମ ଅର୍ଥବ୍ୟବସ୍ଥାରେ ପରିଣତ ହେବାକୁ ଯାଉଛି ଏବଂ ମୁଁ ତିନି ଗୁଣ ଅଧିକ ପରିଶ୍ରମ କରିବି, ତିନି ଗୁଣ ବେଗରେ ଏବଂ ତିନି ଗୁଣ ବ୍ୟାପକତା ସହିତ ଯେପରି ଦେଶ ପାଇଁ ଆମର ସ୍ୱପ୍ନ ଶୀଘ୍ର ସାକାର ହେବ ସେଥିପାଇଁ ପ୍ରୟାସ କରିବି।

4. କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ

• କୃଷି କ୍ଷେତ୍ରରେ ପରିବର୍ତ୍ତନ ସମୟର ଗୁରୁତ୍ୱପୂର୍ଣ୍ଣ ଆବଶ୍ୟକତା ।
• ମୁଁ ସମସ୍ତ କୃଷକଙ୍କୁ ଧନ୍ୟବାଦ ଜଣାଉଛି ଯେଉଁମାନେ ପ୍ରାକୃତିକ ଚାଷର ମାର୍ଗ ବାଛିଛନ୍ତି ଏବଂ ଆମ ପୃଥିବୀ ମାତାଙ୍କ ସେବା କରିବାକୁ ସଂକଳ୍ପ ନେଇଛନ୍ତି ।
• ଜୈବିକ କୃଷିକୁ ପ୍ରୋତ୍ସାହନ ଓ ସମର୍ଥନ ଦେବା ପାଇଁ ଚଳିତ ବର୍ଷ ବଜେଟରେ ଗୁରୁତ୍ୱପୂର୍ଣ୍ଣ ବ୍ୟବସ୍ଥା ସହ ଯଥେଷ୍ଟ ଯୋଜନା ପ୍ରଣୟନ କରାଯାଇଥିଲା।
• ଆମେ ବିଶ୍ୱର ପୋଷଣକୁ ସୁଦୃଢ଼ କରିବା ସହ ଭାରତର କ୍ଷୁଦ୍ର ଚାଷୀମାନଙ୍କୁ ମଧ୍ୟ ସମର୍ଥନ କରିବା ଦରକାର ।
• ଭାରତ ଏବଂ ତା’ର କୃଷକମାନେ ଜୈବିକ ଖାଦ୍ୟର ଏକ ବିଶ୍ୱସ୍ତରୀୟ ଖାଦ୍ୟ ବାସ୍କେଟ୍ ସୃଷ୍ଟି କରିବାର ସାମର୍ଥ୍ୟ ରଖିଛନ୍ତି ।
• ୬୦ ହଜାର ‘ଅମୃତ ସରୋବର’ (ପୋଖରୀ)ର ପୁନରୁଦ୍ଧାର ଓ ପୁନନିର୍ମାଣ କରାଯାଇଛି।

5. ବୈଦେଶିକ ବ୍ୟାପାର ମନ୍ତ୍ରଣାଳୟ

• ଜି-୨୦ ପୂର୍ବରୁ କେବେ ବି ଏତେ ଭବ୍ୟ ଢଙ୍ଗରେ ଆୟୋଜନ ହୋଇନଥିଲା।
• ଭାରତରେ ପ୍ରମୁଖ ଅନ୍ତର୍ଜାତୀୟ କାର୍ଯ୍ୟକ୍ରମ ଆୟୋଜନ କରିବାର ସାମର୍ଥ୍ୟ ରହିଛି ଏବଂ ଅତୁଳନୀୟ ଆତିଥେୟତା ରହିଛି ।
• ବାହ୍ୟ ଆହ୍ୱାନ ବିଶେଷ ଭାବେ ବଢ଼ିବାର ସମ୍ଭାବନା ରହିଛି।
• ମୁଁ ଏଭଳି ଶକ୍ତିମାନଙ୍କୁ ଜଣାଇବାକୁ ଚାହୁଁଛି ଯେ ଭାରତର ବିକାଶ କାହା ପାଇଁ ବିପଦ ନୁହେଁ ।
• ଆମେ ବୁଦ୍ଧଙ୍କ ଦେଶ ଏବଂ ଯୁଦ୍ଧ ଆମର ମାର୍ଗ ନୁହେଁ । ତେଣୁ ବିଶ୍ୱକୁ ଚିନ୍ତା କରିବାର ଆବଶ୍ୟକତା ନାହିଁ।
• ବିଶେଷ କରି ପଡ଼ୋଶୀ ଦେଶ ଭାବେ ଆମର ଘନିଷ୍ଠତାକୁ ଦୃଷ୍ଟିରେ ରଖି ବାଂଲାଦେଶର ସ୍ଥିତି ଖୁବ୍ ଶୀଘ୍ର ସ୍ୱାଭାବିକ ହେବ ବୋଲି ମୁଁ ଆଶା କରୁଛି।
• ଆମର ୧୪୦ କୋଟି ନାଗରିକଙ୍କ ପ୍ରାଥମିକ ଚିନ୍ତା ହେଉଛି ବାଂଲାଦେଶରେ ହିନ୍ଦୁ, ସଂଖ୍ୟାଲଘୁଙ୍କ ସୁରକ୍ଷା ସୁନିଶ୍ଚିତ କରିବା ।
• ଭାରତ ସର୍ବଦା ଚାହୁଁଛି ଯେ ଆମ ପଡ଼ୋଶୀ ଦେଶମାନେ ସନ୍ତୋଷ ଓ ଶାନ୍ତିର ମାର୍ଗ ଆପଣାନ୍ତୁ।
• ଶାନ୍ତି ପ୍ରତି ଆମର ପ୍ରତିବଦ୍ଧତା ଆମ ସଂସ୍କୃତିରେ ଗଭୀର ଭାବରେ ଜଡ଼ିତ ।

6. ଯୋଗାଯୋଗ ମନ୍ତ୍ରଣାଳୟ

• ଦୁଇ ଲକ୍ଷ ପଞ୍ଚାୟତରେ ଅପ୍ଟିକାଲ ଫାଇବର ନେଟୱାର୍କ ସ୍ଥାପନ କରାଯାଇଛି ।
• ଭାରତ ୬-ଜି ପାଇଁ ମିଶନ ମୋଡରେ କାମ କରୁଛି ଏବଂ ଆମେ ଆମର ପ୍ରଗତି ଦ୍ୱାରା ବିଶ୍ୱକୁ ଆଶ୍ଚର୍ଯ୍ୟ କରିବୁ ।

7. ମହାକାଶ ବିଭାଗ

• ମହାକାଶ କ୍ଷେତ୍ର ଆମ ପାଇଁ ଏକ ନୂଆ ଭବିଷ୍ୟତ ଖୋଲିଛି।
• ଭାରତରେ ମହାକାଶ କ୍ଷେତ୍ରରେ ଷ୍ଟାର୍ଟଅପ୍ ବୃଦ୍ଧି ପାଉଛି।
• ଆଜି ଆମ ନିଜ ଦେଶରେ ଘରୋଇ ଉପଗ୍ରହ ଓ ରକେଟ୍ ଉତକ୍ଷେପଣ କରାଯାଉଛି।
• ଚନ୍ଦ୍ରଯାନ ଅଭିଯାନର ସଫଳତା ଆମ ସ୍କୁଲ ଓ କଲେଜରେ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ପ୍ରତି ଆଗ୍ରହର ଏକ ନୂତନ ବାତାବରଣ ସୃଷ୍ଟି କରିଛି ।

8. ସାମାଜିକ ନ୍ୟାୟ ଓ ସଶକ୍ତୀକରଣ ମନ୍ତ୍ରଣାଳୟ

• ଗରିବ, ମଧ୍ୟବିତ୍ତ, ଅବହେଳିତଙ୍କ ସମେତ ଆମର ବଢ଼ୁଥିବା ସହରାଞ୍ଚଳ ଜନସଂଖ୍ୟା, ଯୁବବର୍ଗଙ୍କ ସ୍ୱପ୍ନ ଓ ସଂକଳ୍ପ ତଥା ସେମାନଙ୍କ ଆକାଂକ୍ଷାରେ ପରିବର୍ତ୍ତନ ଆଣିବା ପାଇଁ ଆମେ ସଂସ୍କାରର ମାର୍ଗ ବାଛିଥିଲୁ ।
• ଯେତେବେଳେ ରାଜନୈତିକ ନେତୃତ୍ୱ ସଶକ୍ତୀକରଣ ଆଣିବା ପାଇଁ ସଂକଳ୍ପବଦ୍ଧ ଏବଂ ବିକାଶ ଦିଗରେ ଦୃଢ଼ ଅଟନ୍ତି, ସେତେବେଳେ ସରକାରୀ କଳ ମଧ୍ୟ ସୁଦୃଢ଼ ରୂପାୟନକୁ ସକ୍ଷମ ଏବଂ ସୁନିଶ୍ଚିତ କରିବା ଆରମ୍ଭ କରିଦିଏ ।
• ଯେତେବେଳେ ପ୍ରତ୍ୟେକ ନାଗରିକ ସଶକ୍ତୀକରଣ ଏବଂ ବିକାଶ ସୁନିଶ୍ଚିତ କରିବା ଦିଗରେ ସକ୍ରିୟ ଭାବରେ ଅଂଶଗ୍ରହଣ କରିବା ଆରମ୍ଭ କରନ୍ତି, ତେବେ ଏହାର ଫଳାଫଳ ଦେଶ ପାଇଁ ମୂଲ୍ୟବାନ ହେବା ନିଶ୍ଚିତ ।
• ଆୟୁଷ୍ମାନ ଭାରତ ଯୋଜନା ମାଧ୍ୟମରେ ପଛୁଆ ଲୋକଙ୍କୁ ସୁଲଭ ମୂଲ୍ୟରେ ସ୍ୱାସ୍ଥ୍ୟସେବା ଯୋଗାଇବା ପାଇଁ ପ୍ରତ୍ୟେକ ଗାଁକୁ ସ୍କୁଲ, ଆଧୁନିକ ଡାକ୍ତରଖାନା ଏବଂ ଆରୋଗ୍ୟ ମନ୍ଦିର ନିର୍ମାଣ କରିବା ସୁନିଶ୍ଚିତ କରିଛି ।
• ସାଚୁରେସନ୍ ର ମନ୍ତ୍ରକୁ ଗ୍ରହଣ କରାଗଲେ ‘ସବ୍ କା ସାଥ, ସବକା ବିକାଶ’ର ପ୍ରକୃତ ସାର ଅନୁଭବ ହୋଇଥାଏ।
• ଯେତେବେଳେ ଆମେ ୨୫ କୋଟି ଲୋକଙ୍କୁ ଦାରିଦ୍ର୍ୟରୁ ବାହାର କଲୁ, ଏହା ଆମର ବିଶ୍ୱାସକୁ ଦୃଢ଼ କଲା ଯେ ଆମେ ଆମର ଗତି ବଜାୟ ରଖିଛୁ ଏବଂ ଆମର ସ୍ୱପ୍ନ ଖୁବ ଶୀଘ୍ର ପୂରଣ ହେବ ।
• ଯେତେବେଳେ ମୋର ଦିବ୍ୟାଙ୍ଗ ଭାଇ ଭଉଣୀମାନେ ଭାରତୀୟ ସାଙ୍କେତିକ ଭାଷାରେ ଯୋଗାଯୋଗ କରିବା ଆରମ୍ଭ କରୁଛନ୍ତି, କିମ୍ବା ସୁଗମ୍ୟ ଭାରତ ମାଧ୍ୟମରେ ଅନ୍ତର୍ଭୁକ୍ତ ଏବଂ ସୁଲଭ ରାଷ୍ଟ୍ରର ଅଭିଯାନରୁ ଉପକୃତ ହେଉଛନ୍ତି, ସେତେବେଳେ ସେ ଦେଶର ନାଗରିକ ଭାବରେ ସମ୍ମାନିତ ଅନୁଭବ କରନ୍ତି ଏବଂ ସମ୍ମାନ ଲାଭ କରିଥା’ନ୍ତି ।
• ପାରା ଅଲିମ୍ପିକ୍ସରେ ଆମର କ୍ରୀଡ଼ାବିତମାନେ ତ୍ରିରଙ୍ଗାର ବାନା ଉଡ଼ାଇବା ବେଶ୍‌ ଉତ୍ସାହପ୍ରଦ।
• ପୂର୍ବରୁ ପ୍ରତ୍ୟାଖ୍ୟାତ କିନ୍ନର ସମାଜ ପ୍ରତି ଉଚ୍ଚ ସମ୍ବେଦନଶୀଳତା ପ୍ରଦର୍ଶନ ସହିତ ସମାନତାପୂର୍ଣ୍ଣ ନିଷ୍ପତ୍ତି ନିଆଯାଇଥିଲା । ଆଇନଗତ ସଂଶୋଧନ ଆଣି ସେମାନଙ୍କୁ ମୁଖ୍ୟ ସ୍ରୋତରେ ସାମିଲ କରିବା ପାଇଁ ନୂତନ ଆଇନ ପ୍ରଣୟନ କରାଯାଇଥିଲା ଏବଂ ସମସ୍ତଙ୍କ ପାଇଁ ସମ୍ମାନ, ସମ୍ମାନ ଓ ସମାନତା ସୁନିଶ୍ଚିତ କରାଯାଇଥିଲା ।
• ଆମେ ‘ତ୍ରିବିଧ ମାର୍ଗ’ (ତ୍ରିମୁଖୀ ମାର୍ଗ)କୁ ଯାଇଛୁ ଏବଂ ସମସ୍ତଙ୍କ ସେବା ଭାବନାର ସିଧାସଳଖ ଲାଭ ଦେଖୁଛୁ ।
• ଅବହେଳିତ ଅଞ୍ଚଳ, ଅବହେଳିତ ସମ୍ପ୍ରଦାୟ, ଜଙ୍ଗଲରେ ଥିବା ଆଦିବାସୀ ଭାଇ ଭଉଣୀ, ଆମର ମା’ ଭଉଣୀ, ଆମର ଶ୍ରମିକ ଏବଂ ଆମର ଶ୍ରମିକମାନଙ୍କୁ ଅନ୍ତର୍ଭୁକ୍ତ କରିବା ପାଇଁ ଯଥାସମ୍ଭବ ପ୍ରୟାସ କରିବା ଆମର କର୍ତ୍ତବ୍ୟ।

9. ଶିକ୍ଷା ମନ୍ତ୍ରଣାଳୟ

• ଆସନ୍ତା ୫ ବର୍ଷ ମଧ୍ୟରେ ମେଡିକାଲ କ୍ଷେତ୍ରରେ ୭୫ ହଜାର ନୂଆ ସିଟ୍ ସୃଷ୍ଟି କରାଯିବ।
• ନୂଆ ଶିକ୍ଷାନୀତି ମାଧ୍ୟମରେ ଆମେ ଏକବିଂଶ ଶତାବ୍ଦୀର ଆବଶ୍ୟକତା ଅନୁଯାୟୀ ବର୍ତ୍ତମାନର ଶିକ୍ଷା ବ୍ୟବସ୍ଥାରେ ପରିବର୍ତ୍ତନ ଆଣିବାକୁ ଚାହୁଁଛୁ ।
• ଉଚ୍ଚଶିକ୍ଷା ଓ ଗବେଷଣାକୁ ପ୍ରୋତ୍ସାହିତ କରି ଭାରତକୁ ଏକ ବିଶ୍ୱ ଶିକ୍ଷା କେନ୍ଦ୍ର ଭାବରେ ସ୍ଥାନିତ କରି ଆମେ ପ୍ରାଚୀନ ନାଳନ୍ଦା ବିଶ୍ୱବିଦ୍ୟାଳୟର ଭାବନାକୁ ପୁନର୍ଜୀବିତ କରିବୁ ।
• ଦ୍ରୁତ ବିକାଶର ଆଶା ପୂରଣ କରିବା ପାଇଁ ଆମକୁ ଭାରତରେ ଭବିଷ୍ୟତ ପାଇଁ ପ୍ରସ୍ତୁତ କୁଶଳୀ ମାନବସମ୍ବଳ ପ୍ରସ୍ତୁତ କରିବାକୁ ପଡିବ ।
• ଆମେ ଏକ ଶିକ୍ଷା ବ୍ୟବସ୍ଥାର ବିକାଶ କରିବାକୁ ଚାହୁଁଛୁ ଯାହାଦ୍ୱାରା ଆମ ଦେଶର ଯୁବକମାନଙ୍କୁ ବିଦେଶ ଯିବାର ଆବଶ୍ୟକତା ନାହିଁ । ଆମର ମଧ୍ୟବିତ୍ତ ପରିବାରକୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡ଼ିବ ନାହିଁ। ଖାଲି ସେତିକି ନୁହେଁ, ଆମେ ଏପରି ଅନୁଷ୍ଠାନ ମଧ୍ୟ ସୃଷ୍ଟି କରିବାକୁ ଚାହୁଁଛୁ ଯାହା ବିଦେଶରୁ ଲୋକଙ୍କୁ ଅଧ୍ୟୟନ ପାଇଁ ଭାରତ ଆସିବା କୁ ଆକୃଷ୍ଟ କରିବ।
• ଭାଷା କାରଣରୁ ଭାରତର ପ୍ରତିଭା ବାଧାର ସମ୍ମୁଖିନ ହେବା ଉଚିତ ନୁହେଁ। ମାତୃଭାଷାର ଶକ୍ତି ଆମ ଦେଶର ଗରିବ ପିଲାଙ୍କୁ ମଧ୍ୟ ସେମାନଙ୍କ ସ୍ୱପ୍ନ ପୂରଣ କରିବାକୁ ସଶକ୍ତ କରିଥାଏ ।
• ‘ନ୍ୟାସନାଲ ରିସର୍ଚ୍ଚ ଫାଉଣ୍ଡେସନ’ ଗଠନ କରାଯାଇଛି, ଯାହା ଗବେଷଣାକୁ ନିରନ୍ତର ସୁଦୃଢ଼ କରିବା ପାଇଁ ଏକ ସ୍ଥାୟୀ ବ୍ୟବସ୍ଥା ବିକଶିତ କରିବା ଲାଗି ଏକ ଆଇନଗତ ଢାଞ୍ଚା ପ୍ରଦାନ କରିଛି ।
• ଏହା ଅତ୍ୟନ୍ତ ଗର୍ବର ବିଷୟ ଯେ ଆମେ ବଜେଟରେ ଗବେଷଣା ଏବଂ ଉଦ୍ଭାବନ ପାଇଁ ଏକ ଲକ୍ଷ କୋଟି ଟଙ୍କା ଆବଣ୍ଟନ କରିବାକୁ ନିଷ୍ପତ୍ତି ନେଇଛୁ ଯାହା ଦ୍ୱାରା ଆମ ଦେଶର ଯୁବବର୍ଗଙ୍କ ଚିନ୍ତାଧାରା ସାକାର ହୋଇପାରିବ ।

10. ଆଦିବାସୀ ବ୍ୟାପାର ମନ୍ତ୍ରଣାଳୟ

• ଯୁବକ, କୃଷକ, ମହିଳା ଓ ଆଦିବାସୀ ସମସ୍ତେ ଦାସତ୍ୱ ବିରୋଧରେ ନିରନ୍ତର ଲଢ଼େଇ କରିଥିଲେ।
• ଗ୍ରାମ, ପାହାଡ଼ ଓ ଜଙ୍ଗଲର ବିଭିନ୍ନ ଦୁର୍ଗମ ବସ୍ତିରେ ପ୍ରଧାନମନ୍ତ୍ରୀ ଜନମାନ ଯୋଜନାର ଲାଭ ଯେପରି ପ୍ରତ୍ୟେକ ଆଦିବାସୀ ଭାଇଙ୍କ ପାଖରେ ପହଞ୍ଚିପାରିବ ସେଥିପାଇଁ ଆମେ କୌଣସି କସରତ ଛାଡୁନାହୁଁ ।
• ଭଗବାନ ବିର୍ସା ମୁଣ୍ଡାଙ୍କ ୧୫୦ତମ ଜୟନ୍ତୀ ପାଖେଇ ଆସୁଥିବା ବେଳେ ଆସନ୍ତୁ ତାଙ୍କ ପରମ୍ପରାରୁ ପ୍ରେରଣା ନେବା।

11. ମହିଳା ଓ ଶିଶୁ ବିକାଶ ମନ୍ତ୍ରଣାଳୟ

• ଆମେ ବିକଶିତ ଭାରତର ପ୍ରଥମ ପିଢ଼ି ଉପରେ ବିଶେଷ ଧ୍ୟାନ ଦେଇ ଜାତୀୟ ପୋଷଣ ମିଶନ ଆରମ୍ଭ କରିଛୁ ।
• ଗତ ଦଶନ୍ଧି ମଧ୍ୟରେ ୧୦ କୋଟି ମହିଳା ମହିଳା ସ୍ୱୟଂ ସହାୟକ ଗୋଷ୍ଠୀର ଅଂଶବିଶେଷ ପାଲଟିଛନ୍ତି ।
• ଆର୍ଥିକ ଭାବେ ସଶକ୍ତ ହେଲେ ମହିଳାମାନେ ସାମାଜିକ ପରିବର୍ତ୍ତନର ଗ୍ୟାରେଣ୍ଟର ଓ ରକ୍ଷକ ହୋଇଯାଆନ୍ତି।
• ୧ କୋଟି ମା’ ଭଉଣୀ ମହିଳା ସ୍ୱୟଂ ସହାୟକ ଗୋଷ୍ଠୀରେ ସାମିଲ ହୋଇ ‘ଲକ୍ଷପତି ଦିଦି’ ହେଉଛନ୍ତି।
• ମହିଳା ସ୍ୱୟଂ ସହାୟକ ଗୋଷ୍ଠୀ ପାଇଁ ଆବଣ୍ଟିତ ପାଣ୍ଠିକୁ ୧୦ ଲକ୍ଷରୁ ୨୦ ଲକ୍ଷକୁ ବୃଦ୍ଧି କରାଯିବ।
• ବର୍ତ୍ତମାନ ସୁଦ୍ଧା ଏହି ସ୍ୱୟଂ ସହାୟକ ଗୋଷ୍ଠୀଗୁଡ଼ିକୁ ବ୍ୟାଙ୍କ ଜରିଆରେ ମୋଟ ୯ ଲକ୍ଷ କୋଟି ଟଙ୍କାର ପାଣ୍ଠି ପଠାଯାଇଛି।
• ଆମ ସରକାର କର୍ମଜୀବୀ ମହିଳାମାନଙ୍କ ପାଇଁ ସବୈତନିକ ମାତୃତ୍ୱ ଛୁଟିକୁ ୧୨ ସପ୍ତାହରୁ ୨୬ ସପ୍ତାହକୁ ବୃଦ୍ଧି କରିଥିଲେ ।
• ମହିଳାମାନେ ନେତୃତ୍ୱ ନେଉଛନ୍ତି। ଆଜି ପ୍ରତିରକ୍ଷା କ୍ଷେତ୍ର ହେଉ, ବାୟୁସେନା, ସ୍ଥଳସେନା, ନୌସେନା ହେଉ କିମ୍ବା ମହାକାଶ କ୍ଷେତ୍ର ହେଉ, ଅନେକ କ୍ଷେତ୍ରରେ ଆମେ ମହିଳାଙ୍କ ଶକ୍ତି ଓ ସାମର୍ଥ୍ୟ ଦେଖୁଛୁ।
• ଏକ ସମାଜ ଭାବରେ ଆମେ ଆମ ମାଆ, ଭଉଣୀ ଓ ଝିଅମାନଙ୍କ ପ୍ରତି ହେଉଥିବା ଅତ୍ୟାଚାର ଉପରେ ଗମ୍ଭୀରତାର ସହ ଧ୍ୟାନ ଦେବା ଉଚିତ୍ ।
• ମହିଳାଙ୍କ ବିରୋଧରେ ହେଉଥିବା ଅପରାଧର ତଦନ୍ତ ବିନା ବିଳମ୍ବରେ ହେବା ଦରକାର। ସରକାର, ନ୍ୟାୟପାଳିକା ଓ ନାଗରିକ ସମାଜ ଉପରେ ବିଶ୍ୱାସ ଫେରାଇ ଆଣିବା ପାଇଁ ଏଭଳି ରାକ୍ଷସୀ କାର୍ଯ୍ୟ କରୁଥିବା ବ୍ୟକ୍ତିଙ୍କ ବିରୋଧରେ ପ୍ରାଥମିକ ଦୃଷ୍ଟିରୁ ମାମଲା ରୁଜୁ ହେବା ଦରକାର।
• ସମୟର ଆବଶ୍ୟକତା ହେଉଛି ଦଣ୍ଡ ପାଇଥିବା ଅପରାଧୀଙ୍କ ବିଷୟରେ ବ୍ୟାପକ ଆଲୋଚନା ହେବା ଉଚିତ ଯାହାଦ୍ୱାରା ଯେଉଁମାନେ ଏପରି ପାପ କରିବାକୁ ଯିବେ ସେମାନେ ମଧ୍ୟ ଫାଶୀ ସମେତ ଦଣ୍ଡକୁ ଭୟ କରିବେ । ମୁଁ ଅନୁଭବ କରେ ଯେ ଏହି ଭୟ ସୃଷ୍ଟି କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।

12. ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ

• ଭାରତକୁ ‘ସୁସ୍ଥ ଭାରତ’ ମାର୍ଗରେ ଚାଲିବାକୁ ପଡ଼ିବ।
• କୋଟି କୋଟି ଜନସଂଖ୍ୟାକୁ ନେଇ ଭାରତ କୋଭିଡ୍ ବିରୋଧରେ ଦ୍ରୁତତମ ଟିକାକରଣ ଅଭିଯାନ ହାସଲ କରିଛି ।

13. ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ

• ଭାରତର ଧ୍ୟାନ ଏବେ ସବୁଜ ଅଭିବୃଦ୍ଧି ଏବଂ ସବୁଜ ନିଯୁକ୍ତି ଉପରେ ରହିଛି।
• ଜଳବାୟୁ ପରିବର୍ତ୍ତନର ମୁକାବିଲା ପାଇଁ ଭାରତର ପ୍ରୟାସରେ ସବୁଜ ନିଯୁକ୍ତି ଜରୁରୀ ।
• ସବୁଜ ହାଇଡ୍ରୋଜେନ୍ ମିଶନ ମାଧ୍ୟମରେ ଭାରତ ଏକ ବିଶ୍ୱ ସ୍ତରୀୟ କେନ୍ଦ୍ରରେ ପରିଣତ ହେବାକୁ ପ୍ରତିଶ୍ରୁତିବଦ୍ଧ ।
• ଏକକ ବ୍ୟବହୃତ ପ୍ଲାଷ୍ଟିକକୁ ନିଷିଦ୍ଧ କରିବା ଏବଂ ଆମର ଅକ୍ଷୟ ଶକ୍ତି ପ୍ରୟାସକୁ ଯଥେଷ୍ଟ ଅଗ୍ରଗତି କରିବାରେ ଭାରତ ଅଗ୍ରଣୀ ଥିଲା ।
• ଜି-୨୦ ରାଷ୍ଟ୍ରମାନଙ୍କ ମଧ୍ୟରେ ଭାରତ ହେଉଛି ଏକମାତ୍ର ଦେଶ ଯିଏକି ପ୍ୟାରିସ୍ ଚୁକ୍ତି ଲକ୍ଷ୍ୟ ହାସଲ କରିଛି।
• ଆମେ ଆମର ଅକ୍ଷୟ ଶକ୍ତି ଲକ୍ଷ୍ୟ ପୂରଣ କରିଛୁ ଏବଂ ୨୦୩୦ ସୁଦ୍ଧା ୫୦୦ ଗିଗାୱାଟ ଅକ୍ଷୟ ଶକ୍ତି ଲକ୍ଷ୍ୟ ହାସଲ କରିବା ଦିଗରେ ମହତ୍ୱାକାଂକ୍ଷୀ ଭାବରେ କାର୍ଯ୍ୟ କରୁଛୁ ।

14. ବାଣିଜ୍ୟ ଓ ଶିଳ୍ପ ମନ୍ତ୍ରଣାଳୟ

• ଆର୍ଥିକ ବିକାଶ ପାଇଁ ‘ଭୋକାଲ୍ ଫର୍ ଲୋକାଲ’ ଏକ ନୂଆ ମନ୍ତ୍ର ପାଲଟିଛି।
• ‘ଗୋଟିଏ ଜିଲ୍ଲା ଗୋଟିଏ ଉତ୍ପାଦ’ ଏବେ ନୂଆ ଲହର ପାଲଟିଛି ।
• ଭାରତ ଏକ ଶିଳ୍ପ ଉତ୍ପାଦନ କେନ୍ଦ୍ରରେ ପରିଣତ ହେବ ଏବଂ ବିଶ୍ୱ ଏହା ଉପରେ ନଜର ରଖିବ ।
• ଆମକୁ ‘‘ଡିଜାଇନ୍ ଇନ୍ ଇଣ୍ଡିଆ’’ର ଆହ୍ୱାନକୁ ଗ୍ରହଣ କରିବାକୁ ହେବ ଏବଂ ‘‘ଭାରତରେ ଡିଜାଇନ୍ ଏବଂ ବିଶ୍ୱ ପାଇଁ ଡିଜାଇନ୍’’ ସ୍ୱପ୍ନକୁ ନେଇ ଆଗକୁ ବଢ଼ିବାକୁ ହେବ ।
• ପୁଞ୍ଜିନିବେଶ ଆକୃଷ୍ଟ କରିବା, ସୁଶାସନର ପ୍ରତିଶ୍ରୁତି ଦେବା ଏବଂ ଆଇନଶୃଙ୍ଖଳା ପରିସ୍ଥିତି ଉପରେ ବିଶ୍ୱାସ ସୁନିଶ୍ଚିତ କରିବା ପାଇଁ ରାଜ୍ୟ ସରକାରମାନେ ସ୍ପଷ୍ଟ ନୀତି ପ୍ରଣୟନ କରିବା ଉଚିତ୍ ।
• ସେମିକଣ୍ଡକ୍ଟର ଉତ୍ପାଦନରେ ବିଶ୍ୱସ୍ତରରେ ଅଗ୍ରଣୀ ହେବା ପାଇଁ ଭାରତର ପ୍ରତିଶ୍ରୁତିବଦ୍ଧ
• ଭାରତ ତା’ର ସମୃଦ୍ଧ ପ୍ରାଚୀନ ପରମ୍ପରା ଏବଂ ସାହିତ୍ୟର ଉପଯୋଗ କରି ମେଡ୍ ଇନ୍ ଇଣ୍ଡିଆ ଗେମିଂ ଉତ୍ପାଦ ପ୍ରସ୍ତୁତ କରିବା ଆବଶ୍ୟକ ।
• ଭାରତୀୟ ପେସାଦାରମାନେ କେବଳ ଖେଳିବାରେ ନୁହେଁ ବରଂ ଖେଳ ଉତ୍ପାଦନରେ ମଧ୍ୟ ବିଶ୍ୱ ଗେମିଂ ବଜାରର ନେତୃତ୍ୱ ନେବା ଆବଶ୍ୟକ ।
• ଭାରତୀୟ ମାନକ ଅନ୍ତର୍ଜାତୀୟ ମାନଦଣ୍ଡରେ ପରିଣତ ହେବାର ଇଚ୍ଛା ରଖିବା ଉଚିତ୍ ।
• ବିଶ୍ୱ ଅଭିବୃଦ୍ଧିରେ ଭାରତର ଅବଦାନ ଯଥେଷ୍ଟ, ଆମର ରପ୍ତାନି କ୍ରମାଗତ ଭାବେ ବୃଦ୍ଧି ପାଉଛି, ଆମର ବୈଦେଶିକ ମୁଦ୍ରା ଭଣ୍ଡାର ଦ୍ୱିଗୁଣିତ ହୋଇଛି ଏବଂ ବୈଶ୍ୱିକ ଅନୁଷ୍ଠାନଗୁଡିକ ଭାରତ ଉପରେ ସେମାନଙ୍କର ବିଶ୍ୱାସ ବୃଦ୍ଧି କରିଛନ୍ତି ।
• ଆମେ ଗର୍ବିତ ଯେ ଆମର ଖେଳନା ଶିଳ୍ପ ମଧ୍ୟ ବିଶ୍ୱ ବଜାରରେ ଏକ ପରିଚିତ ନାମ ପାଲଟିଛି । ଆମେ ଖେଳନା ରପ୍ତାନି ଆରମ୍ଭ କରିଛୁ।
• ଏକ ସମୟ ଥିଲା ଯେତେବେଳେ ମୋବାଇଲ୍ ଫୋନ୍ ଆମଦାନୀ ହେଉଥିଲା, କିନ୍ତୁ ଆଜି ଭାରତରେ ମୋବାଇଲ୍ ଫୋନ୍ ଉତ୍ପାଦନ ଇକୋସିଷ୍ଟମର ଏକ ବୃହତ୍ କେନ୍ଦ୍ର ରହିଛି ଏବଂ ଆମେ ଏହାକୁ ସମଗ୍ର ବିଶ୍ୱରେ ରପ୍ତାନି କରିବା ଆରମ୍ଭ କରିଛୁ। ଭାରତର ଏଭଳି ଦକ୍ଷତା ରହିଛି।

15. ରେଳ ମନ୍ତ୍ରଣାଳୟ

• ୨୦୩୦ ସୁଦ୍ଧା ରେଳବାଇକୁ ନିଟ୍ ଶୂନ୍ୟ କାର୍ବନ ନିର୍ଗମନକାରୀରେ ପରିଣତ କରିବାକୁ ସରକାର ପ୍ରତିଶ୍ରୁତିବଦ୍ଧ।

16. ଜଳ ଶକ୍ତି ମନ୍ତ୍ରଣାଳୟ

• ପ୍ରତ୍ୟେକ ପରିବାର ଆଜି ସ୍ୱଚ୍ଛ ବାତାବରଣ ଗ୍ରହଣ କରୁଛନ୍ତି ଏବଂ ସ୍ୱଚ୍ଛତା ଉପରେ ଆଲୋଚନାକୁ ପ୍ରୋତ୍ସାହିତ କରୁଛନ୍ତି ।
• ସ୍ୱଚ୍ଛ ଅଭ୍ୟାସ ଓ ପରିବେଶ ପ୍ରତି ସାମାଜିକ ପରିବର୍ତ୍ତନ ସୁନିଶ୍ଚିତ କରିବା ପାଇଁ ପ୍ରତ୍ୟେକ ନାଗରିକ ଦାୟିତ୍ୱପୂର୍ଣ୍ଣ ଆଚରଣ କରୁଛନ୍ତି ଏବଂ ପରସ୍ପରକୁ ଯାଞ୍ଚ କରୁଛନ୍ତି।
• ଆଜି ଜଳ ଜୀବନ ମିଶନ ଜରିଆରେ ୧୨ କୋଟି ପରିବାରକୁ ଅଳ୍ପ ସମୟ ମଧ୍ୟରେ ସ୍ୱଚ୍ଛ ଟ୍ୟାପ୍ ଜଳ ଯୋଗାଣ କରାଯାଉଛି।

17. ଗୃହ ନିର୍ମାଣ ଓ ସହରାଞ୍ଚଳ ବ୍ୟାପାର ମନ୍ତ୍ରଣାଳୟ

● ୪ କୋଟି ପକ୍କା ଘର ଗରିବଙ୍କୁ ନୂଆ ଜୀବନ ଦେଇଛି।

● ଏହି ଜାତୀୟ ଏଜେଣ୍ଡାକୁ ଆଗକୁ ବଢ଼ାଇବା ପାଇଁ ୩ କୋଟି ନୂଆ ଘର ଦେବାକୁ ପ୍ରତିଶ୍ରୁତି ଦିଆଯାଇଛି।

18. ପ୍ରାଣୀସମ୍ପଦ ମନ୍ତ୍ରଣାଳୟ

• ବ୍ୟାପକ ବିକାଶ ପାଇଁ ପ୍ରୟାସ କରିବା ସହିତ ମତ୍ସ୍ୟଜୀବୀ ଓ ପଶୁସମ୍ପଦ ରକ୍ଷକମାନଙ୍କ ଆବଶ୍ୟକତା ଓ ଆକାଂକ୍ଷା ପୂରଣ କରିବା ଆମ ନୀତି, ଆମର ଉଦ୍ଦେଶ୍ୟ, ଆମ ସଂସ୍କାର, ଆମ କାର୍ଯ୍ୟକ୍ରମ ଏବଂ ଆମର କାର୍ଯ୍ୟଶୈଳୀର ଏକ ଅଂଶ ହୋଇଛି ।

19. ସଂସ୍କୃତି ମନ୍ତ୍ରଣାଳୟ

• ଆଜି ଆମେ ଦେଶର ସ୍ୱାଧୀନତା ପାଇଁ ସଂଗ୍ରାମ କରିଥିବା ବୀର ସ୍ୱାଧୀନତା ସଂଗ୍ରାମୀମାନଙ୍କୁ ସମ୍ମାନିତ କରୁଛୁ । ସେମାନଙ୍କ ତ୍ୟାଗ ଓ ସେବା ପାଇଁ ଆମ ଦେଶ ସର୍ବଦା ଋଣୀ ରହିଛି।
• ସ୍ୱାଧୀନତା ଦିବସ ହେଉଛି ସେମାନଙ୍କ ସାହସ, ସଂକଳ୍ପ ଏବଂ ଦେଶାତ୍ମବୋଧ ଗୁଣକୁ ସ୍ମରଣ କରିବାର ଏକ ପର୍ବ । ଏହି ବୀରମାନଙ୍କ ଯୋଗୁଁ ହିଁ ସ୍ୱାଧୀନତାର ଏହି ପର୍ବରେ ମୁକ୍ତ ଭାବରେ ନିଶ୍ୱାସ ନେବାର ସୌଭାଗ୍ୟ ଆମକୁ ମିଳିଛି । ଏ ଦେଶ ସେମାନଙ୍କ ନିକଟରେ ଚିର ଋଣୀ।
• ଆଜି ସମଗ୍ର ଦେଶ ତ୍ରିରଙ୍ଗା ତଳେ ଏକାଠି ହୋଇଛି - ପ୍ରତ୍ୟେକ ଘର ଏଥିରେ ସଜ୍ଜିତ, ଜାତି, ବର୍ଣ୍ଣ, ଉଚ୍ଚବର୍ଗ କିମ୍ବା ନିମ୍ନଶ୍ରେଣୀର କୌଣସି ଭେଦଭାବ ନାହିଁ; ଆମେ ସମସ୍ତେ ଭାରତୀୟ । ଏହି ଏକତା ଆମ ଦିଗର ଶକ୍ତିର ପ୍ରମାଣ ।

20. ନୂତନ ଏବଂ ଅକ୍ଷୟ ଶକ୍ତି ମନ୍ତ୍ରଣାଳୟ

• ଭାରତ ଅକ୍ଷୟ ଶକ୍ତି କ୍ଷେତ୍ରରେ ଜି-୨୦ ରାଷ୍ଟ୍ର ତୁଳନାରେ ଅଧିକ ସଫଳତା ହାସଲ କରିଛି।
• ଶକ୍ତି କ୍ଷେତ୍ରରେ ଆତ୍ମନିର୍ଭରଶୀଳ ହେବା ପାଇଁ ଭାରତ କଠିନ ପରିଶ୍ରମ କରୁଛି।
• ପିଏମ ସୂର୍ଯ୍ୟ ଘର ମାଗଣା ବିଜୁଳି ଯୋଜନା ନୂତନ ଶକ୍ତି ପ୍ରଦାନ କରିବାକୁ ଯାଉଛି ଏବଂ ଏହାର ଲାଭ ଆମ ଦେଶର ସାଧାରଣ ପରିବାର, ବିଶେଷ କରି ମଧ୍ୟବିତ୍ତ ମାନେ ଅନୁଭବ କରିବେ ଯେତେବେଳେ ସେମାନଙ୍କର ବିଜୁଳି ବିଲ୍ ସମ୍ପୂର୍ଣ୍ଣ ମୁକ୍ତ ହେବ । ଯେଉଁମାନେ ପିଏମ୍ ସୂର୍ଯ୍ୟ ଘର ଯୋଜନା ଅଧୀନରେ ସୌର ଶକ୍ତିରୁ ବିଦ୍ୟୁତ୍ ଉତ୍ପାଦନ କରିବେ, ସେମାନେ ମଧ୍ୟ ସେମାନଙ୍କ ଇନ୍ଧନ ଖର୍ଚ୍ଚ ହ୍ରାସ କରିପାରିବେ।
• ବୈଦ୍ୟୁତିକ ଯାନର ଚାହିଦା ବଢ଼ିବାରେ ଲାଗିଛି।

21. ଶକ୍ତି ମନ୍ତ୍ରଣାଳୟ

• ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଭାରତର ୧୮ ହଜାର ଗାଁକୁ ବିଜୁଳି ଯୋଗାଇ ଦିଆଯିବ ବୋଲି ଯେତେବେଳେ ଲାଲକିଲ୍ଲା ପ୍ରାଚୀରରୁ ଘୋଷଣା କରାଯାଏ ଏବଂ ଏହି ଘୋଷଣା ବାସ୍ତବରେ ସାକାର ହୁଏ ସେତେବେଳେ ସାଧାରଣ ଜନତାଙ୍କ ଆତ୍ମବିଶ୍ୱାସ ବୃଦ୍ଧି ପାଇଥାଏ।
• ଏବେ ବି ୨.୫ କୋଟି ଭାରତୀୟ ପରିବାର ବିଜୁଳି ବିନା ଅନ୍ଧାରରେ ରହୁଛନ୍ତି।

22. ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟ

• ଏହି ଅଞ୍ଚଳଗୁଡ଼ିକୁ ମୁଖ୍ୟ ସ୍ରୋତକୁ ଆଣିବା ପାଇଁ ଆମେ ଦୁର୍ଗମ ଗ୍ରାମ ଏବଂ ସୀମାକୁ ସଂଯୋଗ କରୁଥିବା ରାସ୍ତା ନିର୍ମାଣ କରିଛୁ ।
• ଏହି ସୁଦୃଢ଼ ଭିତ୍ତିଭୂମି ନେଟୱର୍କ ମାଧ୍ୟମରେ ଆମେ ଦଳିତ, ପୀଡ଼ିତ, ଶୋଷିତ, ବଞ୍ଚିତ, ପଛୁଆ, ଆଦିବାସୀ, ଆଦିମ ଅଧିବାସୀ, ମୂଳନିବାସୀ, ସ୍ୱଦେଶୀ ଏବଂ ଜଙ୍ଗଲ ଓ ପାହାଡ଼ ଏବଂ ଦୂର ସୀମାବର୍ତ୍ତୀ ଅଞ୍ଚଳର ବାସିନ୍ଦାଙ୍କ ଆବଶ୍ୟକତା ପୂରଣ କରିବାରେ ସକ୍ଷମ ହୋଇଛୁ ।

23. ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ

• ଭାରତର ଯୁବପିଢ଼ିଙ୍କୁ ପ୍ରଶିକ୍ଷଣ ଦେବା ଏବଂ ଦେଶକୁ ବିଶ୍ୱର ଦକ୍ଷତା ବିକାଶ ରାଜଧାନୀ ବା ସ୍କିଲ୍‌ କ୍ୟାପିଟାଲରେ ପରିଣତ କରିବା ଏହାର ଉଦ୍ଦେଶ୍ୟ।
• ୧ ଲକ୍ଷ ଯୁବବର୍ଗଙ୍କୁ ରାଜନୀତି କ୍ଷେତ୍ରରେ ସାମିଲ କରାଯିବା ଆବଶ୍ୟକ। ବିଶେଷ କରି ଯେଉଁମାନଙ୍କ ପରିବାରରେ ରାଜନୀତିର କୌଣସି ଇତିହାସ ନାହିଁ, ସେମାନଙ୍କୁ ରାଜନୈତିକ ବ୍ୟବସ୍ଥାରେ ସାମିଲ କରାଯିବା ଉଚିତ।
• ଛୋଟ ଛୋଟ ଜମିରେ ପୂରା ପରିବାର ଚଳାଇବାର ଆହ୍ୱାନକୁ ଦୃଷ୍ଟିରେ ରଖି ଆମେ ଯୁବପିଢ଼ିଙ୍କୁ ନୂତନ ନିଯୁକ୍ତି ଏବଂ ଅତିରିକ୍ତ ଆୟର ଉତ୍ସ ସୃଷ୍ଟି କରିବା ପାଇଁ ଆବଶ୍ୟକ ଦକ୍ଷତା ତାଲିମ୍‌ ପ୍ରଦାନ କରିବା ପାଇଁ ବ୍ୟାପକ ପ୍ରୟାସ କରୁଛୁ ।
• ୧୪୦ କୋଟି ଦେଶବାସୀଙ୍କ ତରଫରୁ ପ୍ୟାରିସ୍ ଅଲିମ୍ପିକ୍ସରେ ଭାରତର ପ୍ରତିନିଧିତ୍ୱ କରିଥିବା ଆମ ଦେଶର ସମସ୍ତ ଆଥଲେଟ୍ ଓ ଖେଳାଳିଙ୍କୁ ମୁଁ ଅଭିନନ୍ଦନ ଜଣାଉଛି।
• ମୁଁ ଆମର ସମସ୍ତ ପାରାଲିମ୍ପିକ୍ ଆଥଲେମାନଙ୍କୁ ମଧ୍ୟ ହାର୍ଦ୍ଦିକ ଶୁଭେଚ୍ଛା ଜଣାଉଛି।
• ୨୦୩୬ ଅଲିମ୍ପିକ୍ସକୁ ଭାରତ ମାଟିରେ ଆୟୋଜନ କରିବା ଆମର ଲକ୍ଷ୍ୟ ସ୍ପଷ୍ଟ। ଆମେ ଏଥିପାଇଁ ପ୍ରସ୍ତୁତି କରୁଛୁ ଏବଂ ଏ ଦିଗରେ ଗୁରୁତ୍ୱପୂର୍ଣ୍ଣ ଅଗ୍ରଗତି କରୁଛୁ ।

24. ଉତ୍ତର ପୂର୍ବ ବିକାଶ ମନ୍ତ୍ରଣାଳୟ

• ଉତ୍ତର ପୂର୍ବ ଭାରତ ବର୍ତ୍ତମାନ ଚିକିତ୍ସା ଭିତ୍ତିଭୂମିର ଏକ କେନ୍ଦ୍ର ପାଲଟିଛି ଏବଂ ଏହି ପରିବର୍ତ୍ତନ ଆମକୁ ଶେଷ ମାଇଲ୍ ପର୍ଯ୍ୟନ୍ତ ସୁଲଭ ସ୍ୱାସ୍ଥ୍ୟସେବା ପ୍ରଦାନ କରି ଜୀବନକୁ ସ୍ପର୍ଶ କରିବାରେ ସାହାଯ୍ୟ କରିଛି ।

25. ଦକ୍ଷତା ବିକାଶ ମନ୍ତ୍ରଣାଳୟ

• ଯୁବପିଢ଼ିଙ୍କ ଦକ୍ଷତା ବିକାଶ ପାଇଁ ସରକାର ସକ୍ରିୟ ଭାବେ ପଦକ୍ଷେପ ନେଉଛନ୍ତି।
• ସ୍କିଲ୍ ଇଣ୍ଡିଆ କାର୍ଯ୍ୟକ୍ରମ ପାଇଁ ଚଳିତ ବର୍ଷର ବଜେଟରେ ଆମେ ବିପୁଳ ପରିମାଣର ପାଣ୍ଠି ବ୍ୟବସ୍ଥା କରିଛୁ।
• ଏହି ବଜେଟରେ ଯୁବବର୍ଗଙ୍କ ପାଇଁ ଇଣ୍ଟର୍ଣ୍ଣସିପ୍ ଉପରେ ଗୁରୁତ୍ୱ ଦିଆଯାଇଛି, ଯାହା ଅଭିଜ୍ଞତା ହାସଲ କରିବା, ସେମାନଙ୍କ ଦକ୍ଷତା ବୃଦ୍ଧି କରିବା ଏବଂ ବଜାରରେ ସେମାନଙ୍କ ଦକ୍ଷତା ପ୍ରଦର୍ଶନ କରିବାରେ ସାହାଯ୍ୟ କରେ।
• ଭାରତର ଦକ୍ଷ ମାନବ ସମ୍ବଳ ବିଶ୍ୱ ନିଯୁକ୍ତି ବଜାରରେ ନିଜର ପରିଚୟ ସୃଷ୍ଟି କରିବ । ସେହି ସ୍ୱପ୍ନକୁ ନେଇ ଆମେ ଆଗକୁ ବଢ଼ୁଛୁ।

26. ଆଇନ ଓ ନ୍ୟାୟ ମନ୍ତ୍ରଣାଳୟ

• ବର୍ତ୍ତମାନର ନାଗରିକ ସଂହିତା ଏକ ସାମ୍ପ୍ରଦାୟିକ ନାଗରିକ ସଂହିତା ଭଳି, ଯାହା ଅତ୍ୟନ୍ତ ଭେଦଭାବପୂର୍ଣ୍ଣ ।
• ଧର୍ମ ଆଧାରରେ ଆମ ଦେଶକୁ ବିଭାଜନ କରୁଥିବା ଏବଂ ଭେଦଭାବକୁ ପ୍ରୋତ୍ସାହନ ଦେଉଥିବା ଆଇନର ଆଧୁନିକ ସମାଜରେ କୌଣସି ସ୍ଥାନ ନାହିଁ ।
• ସାମ୍ପ୍ରଦାୟିକ ନାଗରିକ ସଂହିତାର ୭୫ ବର୍ଷ ପରେ ଏବେ ଧର୍ମନିରପେକ୍ଷ ନାଗରିକ ସଂହିତା ଆଡକୁ ଯିବା ନିହାତି ଜରୁରୀ ।
• ସମ୍ବିଧାନ ନିର୍ମାତାଙ୍‌କ ସ୍ୱପ୍ନକୁ ସାକାର କରିବା ଆମର ସାମୂହିକ ଦାୟିତ୍ୱ ।
• ଧର୍ମନିରପେକ୍ଷ ନାଗରିକ ସଂହିତା ସମ୍ପର୍କରେ ବିଭିନ୍ନ ମତ ଓ ଦୃଷ୍ଟିକୋଣକୁ ଆମେ ସ୍ୱାଗତ କରିବା ଉଚିତ୍ ।
• ଭାରତ ‘ଏକ ଦେଶ ଏକ ନିର୍ବାଚନ'ର ଧାରଣାକୁ ଗ୍ରହଣ କରିବାକୁ ଆଗେଇ ଆସିବା ଉଚିତ।
• ନାଗରିକମାନେ ଯେପରି ଆଇନଗତ ଜଟିଳତାର ଜାଲରେ ଫସି ନ ରହିବେ ସେଥିପାଇଁ ୧୫୦୦ରୁ ଅଧିକ ଆଇନକୁ ଉଚ୍ଛେଦ କରାଯାଇଛି।
• ଶହ ଶହ ବର୍ଷ ପୁରୁଣା ଅପରାଧିକ ଆଇନ ବଦଳରେ ଆମେ ଭାରତୀୟ ନ୍ୟାୟ ସଂହିତା ନାମରେ ପରିଚିତ ନୂତନ ଅପରାଧିକ ଆଇନ ପ୍ରଣୟନ କରିଛୁ, ଯାହାର ମୂଳ ଉଦ୍ଦେଶ୍ୟ ହେଉଛି ଦଣ୍ଡ ଦେବା ଭଳି ବ୍ରିଟିଶ ବିଚାରଧାରା ବଦଳରେ ନାଗରିକମାନଙ୍କୁ ନ୍ୟାୟ ସୁନିଶ୍ଚିତ କରିବା ।

********

PS ​