2024 ఆర్థిక సంవత్సరంలో భారత్ నికర విదేశీ పోర్ట్ఫోలియో పెట్టుబడులు (ఎఫ్పిఐ) 44.1 బిలియన్ డాలర్లకు చేరుకున్నాయి

వర్ధమాన మార్కెట్ సహచరుల్లో అతి తక్కువ అస్థిర కరెన్సీగా రూపాయి ఆవిర్భవించింది

మార్చి 2023తో పోలిస్తే ఇండియన్ రెసిడెంట్స్ ఓవర్సీస్ ఫైనాన్షియల్ ఆస్తుల విలువ, 109.7 బిలియన్ డాలర్లు (11.9 శాతం) పెరిగి 2024 మార్చి నాటికి 1,028.3 బిలియన్ డాలర్లుగా ఉన్నాయి

2023 మార్చి చివరి నాటికి ఉన్నజీడీపీ, విదేశీ రుణాల నిష్పత్తి 19.0 శాతం నుంచి 2024 మార్చి చివరి నాటికి 18.7 శాతానికి తగ్గింది.

సేవల ఎగుమతులు మంచి పనితీరును కొనసాగిస్తున్న స్థితిలో ప్రస్తుత భౌగోళిక రాజకీయ ప్రతికూలతల మధ్య భారత విదేశీ రంగం బలంగా ఉంది. మొత్తం వాణిజ్య లోటు 2023 ఆర్థిక సంవత్సరంలో 121.6 బిలియన్ డాలర్ల నుంచి 2024 ఆర్థిక సంవత్సరంలో 78.1 బిలియన్ డాలర్లకు తగ్గింది. కేంద్ర ఆర్థిక, కార్పొరేట్ వ్యవహారాల శాఖ మంత్రి శ్రీమతి నిర్మలా సీతారామన్ ఈ రోజు పార్లమెంటులో ప్రవేశపెట్టిన 2023-24 ఆర్థిక సర్వేలో ఈ విషయం వెల్లడైంది.

సేవల వాణిజ్యం

ప్రపంచ సేవల ఎగుమతుల్లో భారత సేవల ఎగుమతుల వాటా 1993లో 0.5 శాతం నుంచి 2022 నాటికి 4.3 శాతానికి గణనీయంగా పెరిగిందని ఆర్థిక సర్వే పేర్కొంది. 2001లో 24వ స్థానంలో ఉన్న భారత్ గణనీయంగా ఎదిగి ఇప్పుడు ప్రపంచవ్యాప్తంగా ఏడో అతిపెద్ద సేవల ఎగుమతి దేశంగా అవతరించింది.

సేవల ఎగుమతుల్లో సాఫ్ట్ వేర్ /ఐటీ సేవలు, వ్యాపార సేవల ఎగుమతులు పెరిగాయి. గ్లోబల్ కేపబిలిటిటీ సెంటర్స్ (జీసీసీ)లకు భారత్ హబ్ గా అవతరించడం ఇందుకు దోహదపడింది. టెలికమ్యూనికేషన్, కంప్యూటర్ మరియు సమాచార సేవల ఎగుమతుల్లో భారతదేశం ప్రపంచంలో 2 వ స్థానంలో, వ్యక్తిగత, సాంస్కృతిక మరియు వినోద సేవల ఎగుమతుల్లో 6 వ స్థానంలో మరియు ఇతర వాణిజ్య సేవల ఎగుమతుల్లో 8 వ స్థానంలో ఉంది.

గ్లోబల్ కెపాసిటీ సెంటర్స్ (జిసిసి) పెరుగుదల సేవల బిఒపిలో ప్రతిబింబిస్తుంది, 2024 ఆర్థిక సంవత్సరంలో సేవల ఎగుమతుల్లో 'ఇతర వ్యాపార సేవలు' 26% వాటాతో రెండవ అతిపెద్ద కంట్రిబ్యూటర్ గా ఉంది. 2012 లో భారతదేశం వెలుపల సుమారు 760 జిసిసిలు పనిచేస్తుండగా, మార్చి 2023 నాటికి భారతదేశంలో 1,600 పైగా జిసిసిలు ఉన్నాయి.

సరుకుల వాణిజ్యం

2023 ఆర్థిక సంవత్సరంలో ప్రపంచ డిమాండ్ తగ్గినప్పటికీ ఎగుమతులు 776 బిలియన్ డాలర్లు, దిగుమతులు 898 బిలియన్ డాలర్లకు చేరుకోవడంతో సరుకు వాణిజ్యంలో భారత్ మంచి పనితీరు కనబరిచింది. దీంతో వాణిజ్య లోటు గత సంవత్సరంలోని 264.9 బిలియన్ డాలర్ల నుంచి 2024 ఆర్థిక సంవత్సరంలో 238.3 బిలియన్ డాలర్లకు తగ్గింది.

భారతదేశం యొక్క ప్రధాన ఎగుమతి భాగస్వాములలో (ముఖ్యంగా యురోపియన్ యూనియన్, దీని వాస్తవ జిడిపి 2024 లో 3.6 శాతం వృద్ధితో పోలిస్తే 2023 లో కేవలం 0.6 శాతం మాత్రమే పెరిగింది), అలాగే పెరుగుతున్న ద్రవ్యోల్బణాన్ని నియంత్రించడానికి అనేక దేశాలు చేపట్టిన ద్రవ్య కట్టడి చర్యలలో వెనుకబాటుతనం ప్రభావంతో మందగమనం ఉంది.

2023లోని ప్రతికూల వాణిజ్య వాతావరణం ఈ ఏడాది, వచ్చే ఏడాది కొంత తగ్గుముఖం పడుతుందని, 2024, 2025 సంవత్సరాల్లో వస్తువుల వాణిజ్యం పెరుగుతుందని సర్వే పేర్కొంది. వాణిజ్య వస్తువులకు డిమాండ్ పుంజుకోవడంతో 2024, 2025లో ప్రపంచ వాణిజ్య పరిమాణం వరుసగా 2.6 శాతం, 3.3 శాతం పెరుగుతుందని అంచనా.

ప్రతీ సంవత్సరం పెరిగినట్లే ఇంజినీరింగ్ వస్తువులు, ఎలక్ట్రానిక్ వస్తువులు, ఔషధాలు, ఫార్మాస్యూటికల్స్ ఎగుమతులు  2024 ఆర్థిక సంవత్సరంలో పెరిగాయి. ప్రపంచ ఎలక్ట్రానిక్స్ ఎగుమతుల్లో భారత్ వాటా కూడా మెరుగుపడింది. ఔషధాలు, ఫార్మాస్యూటికల్స్ రంగంలో భారత్ బలమైన పట్టును నిలబెట్టుకుంది.

భారత ఆర్థిక వ్యవస్థ సాపేక్షంగా బలమైన వృద్ధి కారణంగా అధిక దేశీయ డిమాండ్ ఉన్నప్పటికీ, వాణిజ్య దిగుమతులు 2023 ఆర్థిక సంవత్సరంలో 716 బిలియన్ డాలర్ల నుండి 2024 ఆర్థిక సంవత్సరంలో 675.4 బిలియన్ డాలర్లకు తగ్గి, 2024 ఆర్థిక సంవత్సరంలో 5.7 శాతం క్షీణించాయి. మూలధన వస్తువుల దిగుమతులు పెరిగాయి, ఇది ఉత్పత్తి ప్రక్రియలలో ఉపయోగించే యంత్రాలు, పరికరాలు మరియు ఇతర మన్నికైన వస్తువులకు పెరిగిన డిమాండ్ ను సూచిస్తుంది, పారిశ్రామిక మౌలిక సదుపాయాలు లేదా సాంకేతిక నవీకరణలలో అవకాశం ఉన్న పెట్టుబడులను సూచిస్తుంది. సరుకుల దిగుమతుల్లో వినియోగ వస్తువుల వాటా స్వల్పంగా పెరగడం ప్రత్యక్ష వినియోగం కోసం తయారైన ఉత్పత్తుల దిగుమతిలో స్థిరమైన, కానీ పరిమిత పెరుగుదలను ప్రతిబింబిస్తుంది.

ప్రభుత్వం లక్ష్యంపై దృష్టి కేంద్రీకరించడం మరియు చేపట్టిన వరుస చర్యల మూలంగా రక్షణ, ఆటబొమ్మలు, పాదరక్షలు, స్మార్ట్ఫోన్లు వంటి రంగాల ఉత్పత్తి-నిర్దిష్ట ఎగుమతుల్లో బలమైన వృద్ధిని సాధించింది. భారతదేశం యొక్క వాణిజ్య ఎగుమతుల్లో ఎలక్ట్రానిక్స్ వస్తువుల వాటా 2019 ఆర్థిక సంవత్సరంలో 2.7 శాతం నుండి 2024 ఆర్థిక సంవత్సరంలో 6.7 శాతానికి పెరిగడంతో ప్రపంచ ఎలక్ట్రానిక్స్ ఎగుమతుల్లో భారత్ 2018 లో 28 వ స్థానం నుండి 2022 లో 24 వ స్థానానికి చేరుకుంది.

ఎగుమతుల విస్తరణకు చర్యలు

ఎగుమతులను ప్రోత్సహించడానికి మరియు అంతర్జాతీయ వాణిజ్యంలో చోటుచేసుకునే లాజిస్టిక్స్ ఖర్చులను తగ్గించడానికి ప్రభుత్వం వివిధ చర్యలను చేపట్టింది, వీటిలో ఎగుమతి లక్ష్యాలను నిర్ణయించడం మరియు వాటి పర్యవేక్షణ, ఎగుమతి క్రెడిట్ బీమా సేవలను అందించడం మరియు సూక్ష్మ, చిన్న మరియు మధ్యతరహా పరిశ్రమల (ఎంఎస్ఎంఇ) ఎగుమతిదారులకు సరసమైన మరియు తగినంత ఎగుమతి రుణాలను అందించడానికి బ్యాంకులను ప్రోత్సహించడం, కొత్త మార్కెట్లను అన్వేషించడానికి మరియు వారి ప్రస్తుత ఉత్పత్తులను వైవిధ్యపరచడం ద్వారా పోటీ పడడానికి  వీలు కల్పిస్తుంది.

సామర్థ్యాన్ని పెంచడానికి మరియు లాజిస్టిక్స్ ఖర్చులను తగ్గించడానికి, ప్రభుత్వం “పిఎం గతిశక్తి నేషనల్ మాస్టర్ ప్లాన్” మరియు “నేషనల్ లాజిస్టిక్స్ పాలసీ” (ఎన్ఎల్పి) లను వరుసగా అక్టోబర్ 2021 మరియు సెప్టెంబర్ 2022 లో ప్రారంభించింది. యూనిఫైడ్ లాజిస్టిక్స్ ఇంటర్ఫేస్ ప్లాట్ఫామ్ (యులిప్) మరియు లాజిస్టిక్స్ డేటా బ్యాంక్ వంటి డిజిటల్ సంస్కరణలు లాజిస్టిక్స్ ను మెరుగుపరచడానికి తీసుకున్న అదనపు చర్యలు.

రైల్వే ట్రాక్ విద్యుదీకరణ, ల్యాండ్ పోర్ట్స్ అథారిటీ ఆఫ్ ఇండియా (ఎల్పీఏఐ)ద్వారా విడుదల సమయాన్ని తగ్గించడం, పోర్టు సంబంధిత లాజిస్టిక్స్ కోసం ఎన్ఎల్పీ మెరైన్ను ప్రారంభించడం వంటి కార్యక్రమాలు చేపట్టారు. ఎన్ఎల్పి ప్రారంభించినప్పటి నుండి, 614 కి పైగా పరిశ్రమ సంస్థలు యులిప్ పై నమోదు చేసుకున్నాయి, 106 ప్రైవేట్ కంపెనీలు నాన్ డిస్క్లోజర్ అగ్రిమెంట్స్ (ఎన్డిఎ) పై సంతకం చేశాయి, 142 కంపెనీలు యులిప్ లో హోస్ట్ చేయడానికి 382 వినియోగ కేసులను సమర్పించాయి మరియు సెప్టెంబర్ 2023 నాటికి 57 యాప్ లుఅందుబాటులోకి వచ్చాయి.

భారతదేశం బహిరంగ, సమ్మిళిత, ఊహించదగిన, వివక్షారహిత మరియు పరస్పర ప్రయోజనకరమైన అంతర్జాతీయ వాణిజ్య కేంద్రంగా నిలబడుతుందని, ఇది ఆర్థిక వృద్ధికి ఉత్తేజాన్ని ఇస్తుందని సర్వే పేర్కొంది. డబ్ల్యూటీవో కేంద్రంగా ఈ లక్షణాలతో కూడిన నియమ ఆధారిత అంతర్జాతీయ వాణిజ్య వ్యవస్థ కోసం భారత్ ప్రతిపాదిస్తోంది. ఈ స్ఫూర్తితో స్వేచ్ఛా వాణిజ్య ఒప్పందాలను (ఎఫ్ టీఏ) వాణిజ్య సరళీకరణ సాధనంగా, డబ్ల్యూటీవో కింద బహుళపక్ష వాణిజ్య వ్యవస్థకు అనుబంధంగా భారత్ భావిస్తోంది. తదనుగుణంగా, దేశం తన ఎగుమతి మార్కెట్లను విస్తరించడానికి అన్ని వాణిజ్య భాగస్వాములు / కూటములతో సత్సంబంధాలను కలిగి ఉంది, అదే సమయంలో దేశీయ డిమాండ్ తీర్చడానికి అవసరమైన దిగుమతులకు ఖర్చును పోల్చుకునే పద్ధతిలో మెరుగైన నిబంధనలను నిర్ధారిస్తుంది.

స్థూల వాణిజ్యంలో జివిసి సంబంధిత వాణిజ్యం వాటా 2019 లో 35.1 శాతం నుండి 2022 నాటికి 40.3 శాతానికి పెరగడంతో భారతదేశం గ్లోబల్ వాల్యూ చైన్స్ (జివిసి) పరంగా ఎదుగుతోందని ఆర్థిక సర్వే హైలైట్ చేసింది. జివిసి భాగస్వామ్యంలో మెరుగుదల అచ్చమైన తిరోగమన జివిసి భాగస్వామ్య పెరుగుదలలో కూడా ప్రతిబింబిస్తుంది.

పీఎల్ఐ, ఎగుమతుల కేంద్రాలుగా జిల్లాలు (డిస్ట్రిక్ట్స్ యాజ్ ఎక్స్పోర్ట్స్ హబ్, డీఈహెచ్) వంటి పథకాల ద్వారా అందించే ప్రోత్సాహకాల కారణంగా భారత జీవీసీ భాగస్వామ్యం అంతర్జాతీయ ఆర్థిక సంక్షోభం అనంతర సంవత్సరాలలో మళ్లీ పుంజుకోవడం ప్రారంభించిందని సర్వే తెలిపింది. భారతదేశంలో ఎలక్ట్రానిక్స్, దుస్తులు మరియు బొమ్మలు, ఆటోమొబైల్స్ మరియు విడిభాగాలు, క్యాపిటల్ గూడ్స్ మరియు సెమీకండక్టర్ తయారీలో పెరిగిన విదేశీ సంస్థల పెట్టుబడులు భారతదేశం యొక్క మెరుగైన గ్లోబల్ సప్లై చైన్ భాగస్వామ్యానికి నిదర్శనమని సర్వే పేర్కొంది.

కరెంట్ అకౌంట్ బ్యాలెన్స్

వాణిజ్య లోటు తగ్గడం, నికర సేవల ఎగుమతులు పెరగడం, చెల్లింపులు పెరగడం వంటి కారణాలతో 2024 ఆర్థిక సంవత్సరంలో భారత కరెంట్ ఖాతా లోటు (సీఏడీ)క్రితం ఏడాది ఉన్న 67 బిలియన్ డాలర్ల (జీడీపీలో 2 శాతం) నుంచి 23.2 బిలియన్ డాలర్లకు (జీడీపీలో 0.7 శాతం) తగ్గిందని ఆర్థిక సర్వే పేర్కొంది.

ప్రధానంగా సాఫ్ట్ వేర్, ట్రావెల్, బిజినెస్ సర్వీసెస్ ఎగుమతులు పెరగడం కారణంగా. 2023 ఆర్థిక సంవత్సరంలో 143.3 బిలియన్ డాలర్లుగా ఉన్న నికర సేవల రాబడులు 2024 ఆర్థిక సంవత్సరంలో 162.8 బిలియన్ డాలర్లకు పెరిగాయి. విదేశాల్లో ఉపాధి పొందుతున్న భారతీయుల రెమిటెన్స్ లు  క్రితం ఏడాది 101.8 బిలియన్ డాలర్లతో పోల్చితే 2024 ఆర్థిక సంవత్సరంలో 106.6 బిలియన్ డాలర్లుగా ఉన్నాయి.

2024 నాటికి భారత్ కు  రెమిటెన్స్ లు 3.7 శాతం పెరిగి 124 బిలియన్ డాలర్లకు, 2025 నాటికి 4 శాతం పెరిగి 129 బిలియన్ డాలర్లకు చేరుకుంటాయని సర్వే పేర్కొంది.

క్యాపిటల్ అకౌంట్ బ్యాలెన్స్

సిఎడికి నిధులు సమకూర్చడంలో స్థిరమైన మూలధన ప్రవాహాల పాత్ర గురించి నొక్కిచెప్పిన సర్వే, 2024 ఆర్థిక సంవత్సరంలో నికర మూలధన ప్రవాహాలు అంతకుముందు సంవత్సరంలో 58.9 బిలియన్ డాలర్ల నుండి 86.3 బిలియన్ డాలర్లవద్ద నిలిచాయని, ప్రధానంగా ఇది ఎఫ్పిఐ పెట్టుబడులు మరియు బ్యాంకింగ్ మూలధనం యొక్క నికర రాబడులతో సాధ్యం అయిందని పేర్కొంది.

బలమైన ఆర్థిక వృద్ధి, స్థిరమైన వ్యాపార వాతావరణం, పెరిగిన పెట్టుబడిదారుల విశ్వాసం మద్దతుతో 2024 ఆర్థిక సంవత్సరంలో భారతదేశం సానుకూల నికర విదేశీ పోర్ట్ఫోలియో పెట్టుబడులు (ఎఫ్పిఐ) 44.1 బిలియన్ డాలర్లకు చేరుకున్నాయని సర్వే నొక్కి చెప్పింది.

2024 ఆర్థిక సంవత్సరంలో వర్ధమాన మార్కెట్ సహచరుల్లో భారతదేశం అత్యధిక ఈక్విటీ పెట్టుబడులను  పొందిందని, ఆర్థిక సేవలు, ఆటోమొబైల్ మరియు ఆటో విడుభాగాలు, ఆరోగ్య సంరక్షణ  మరియు క్యాపిటల్ గూడ్స్ 2024 ఆర్థిక సంవత్సరంలో ఈక్విటీ పెట్టుబడులను ఆకర్షించిన ముఖ్యమైన రంగాలని సర్వే పేర్కొంది.

అంతర్జాతీయంగా ఎఫ్ డి ఐ పెట్టుబడులలో క్షీణత కారణంగా, భారత్ కు నికర విదేశీ ప్రత్యక్ష పెట్టుబడులు(ఎఫ్డిఐ)  2023 ఆర్థిక సంవత్సరంలో 42.0 బిలియన్ డాలర్ల నుండి 2024 ఆర్థిక సంవత్సరంలో 26.5 బిలియన్ డాలర్లకు తగ్గిందని సర్వే పేర్కొంది. స్థూల ఎఫ్ డీఐ పెట్టుబడులు 2023 ఆర్థిక సంవత్సరంలో 71.4 బిలియన్ డాలర్ల నుంచి కేవలం 0.6 శాతం తరుగుదలతో 2024 ఆర్థిక సంవత్సరంలో 71 బిలియన్ డాలర్ల కిందకు తగ్గింది.

పునరుత్పాదక ఇంధనాలు, టెలికమ్యూనికేషన్స్ వంటి డిజిటల్ సేవలు, సాఫ్ట్వేర్, హార్డ్వేర్, కన్సల్టెన్సీ సేవలు వంటి ఎంపిక చేసిన రంగాల్లో ఎఫ్డిఐలను ఆకర్షించడానికి భారతదేశం స్థిరంగా ఏర్పాటు ఐన మౌలిక సదుపాయాలను కలిగి ఉందని ఎత్తిచూపిన ఆర్థిక సర్వే, పెట్టుబడి అవకాశాలు ఎక్కువగా ఉన్న రంగాలను పెట్టుబడులకు మరింత అందుబాటులో ఉంచాలని సూచించింది. అన్ని రంగాల్లో సులభతర వాణిజ్యాన్ని మెరుగుపరచడంపై దృష్టి పెట్టాలని, కేవలం ఎఫ్డీఐలకు ఆకర్షణీయమైన రంగాలను విస్తరించేందుకు జాతీయ, రాష్ట్ర, స్థానిక అన్ని  ప్రభుత్వ స్థాయిల్లో, నియంత్రణ వ్యవస్థల్లో వివరాలను రూపొందించాలని పేర్కొంది.

రాజకీయ సుస్థిరత, విధాన అంచనా మరియు స్థిరత్వం, సహేతుకమైన సుంకాలు మరియు పన్నులు, వివాద పరిష్కార యంత్రాంగాలు మరియు స్వదేశానికి తిరిగి వచ్చే సౌలభ్యంతో పాటు, పరిశోధన & అభివృద్ధి(R&D)తో జతగూడిన  విద్యావంతులైన కార్మికులు మరియు నైపుణ్యం కలిగిన శ్రామిక శక్తి స్థిరమైన పెట్టుబడిదారుల ఆసక్తిని పెంపొందించడానికి ముఖ్యమైన ఆకర్షకాలని సర్వే పేర్కొంది.

2024 ఆర్థిక సంవత్సరంలో భారత విదేశీ మారకద్రవ్య నిల్వలు (ఎఫ్ఈఆర్) 68 బిలియన్ డాలర్లు పెరిగాయని, ఇది ఎక్కువ  విదేశీ మారక నిల్వలు కలిగిన దేశాలలో అత్యధిక పెరుగుదల అని సర్వే పేర్కొంది.

2024 ఆర్థిక సంవత్సరంలో అభివృద్ధి చెందుతున్న మార్కెట్ గల  సహచరదేశాలు  మరియు కొన్ని అభివృద్ధి చెందిన ఆర్థిక వ్యవస్థలలో రూపాయి అతి తక్కువ అస్థిర కరెన్సీగా అవతరించిందని సర్వే పేర్కొంది. పెరుగుతున్న ఎఫ్పిఐ పెట్టుబడులు  2024 ఆర్థిక సంవత్సరంలో భారత రూపాయిని రూ .82 నుండి రూ .83.5 / అమెరికన్ డాలర్ వరకు  నిర్వహించదగిన పరిధిలోనే ఉంచాయని పేర్కొంది.

మార్చి 2024 చివరి నాటికి భారతీయ రెసిడెంట్ల  విదేశీ ఆర్థిక ఆస్తులు 1,028.3 బిలియన్ డాలర్లుగా ఉన్నాయని, ఇది 2023 మార్చి నాటి స్థాయితో పోలిస్తే 109.7 బిలియన్ డాలర్లు లేదా 11.9 శాతం అధికమని ఆర్థిక సర్వే పేర్కొంది. రిజర్వు ఆస్తులు, కరెన్సీ, డిపాజిట్లు, విదేశీ ప్రత్యక్ష పెట్టుబడులు, వాణిజ్య పరపతి, అడ్వాన్సులు, రుణాలు పెరగడం ఇందుకు ప్రధాన కారణం.

బాహ్య ఋణం

విదేశీ రుణం- జీడీపీ నిష్పత్తి 2023 మార్చి చివరి నాటికి 19.0 శాతం నుంచి 2024 మార్చి చివరి నాటికి 18.7 శాతానికి తగ్గింది. 2022 సంవత్సరానికి భారతదేశం యొక్క వివిధ రుణ బలహీనత సూచికలను సహచర  దేశాలతో పోల్చినపుడు మన  స్థూల జాతీయ ఆదాయం (జిఎన్ఐ) లో మొత్తం రుణం, మొత్తం బాహ్య రుణంలో  స్వల్పకాలిక బాహ్య రుణం సాపేక్షంగా తక్కువ శాతంలో ఉండడం,  భారతదేశం మెరుగైన స్థితిని సూచిస్తుందని సర్వే తెలిపింది.

పీఎల్ఐ పథకాన్ని విస్తరించడం, పలు ఉత్పత్తుల కేటగిరీల్లో భారత్ అంతర్జాతీయంగా పోటీపడే తయారీ స్థావరంగా ఏర్పడడంతో భారత వాణిజ్య లోటు మరింత తగ్గే అవకాశం ఉందని ఆర్థిక సర్వే పేర్కొంది. ఇటీవల సంతకం చేసిన ఎఫ్టీఏలు దేశ ఎగుమతుల్లో ప్రపంచ మార్కెట్ వాటాను పెంచుతాయని అంచనా వేసింది. పెరుగుతున్న వాణిజ్య, సేవల ఎగుమతులు, పూర్వస్థితి పొందిన రెమిటెన్స్ ల కారణంగా 2024 ఆర్థిక సంవత్సరానికి జిడిపితో సిఎడి కి నిష్పత్తి ఒక శాతం కంటే తక్కువకు పడిపోతుందని వివిధ అంతర్జాతీయ ఏజెన్సీలు మరియు ఆర్బిఐ అంచనా వేస్తున్నాయని సర్వే పేర్కొంది.

ప్రధాన వాణిజ్య భాగస్వాముల నుంచి డిమాండ్ తగ్గడం, వాణిజ్య వ్యయం పెరగడం, కమోడిటీ ధరల అస్థిరత, వాణిజ్య విధానంలో మార్పులు భారత వాణిజ్య సమతుల్యతకు ప్రధాన సవాళ్లుగా సర్వే పేర్కొంది. భారతదేశ ఎగుమతి బాస్కెట్ యొక్క మారుతున్న కూర్పు, వాణిజ్య సంబంధిత మౌలిక సదుపాయాలలో మెరుగుదల, ప్రైవేట్ రంగంలో మెరుగైన నాణ్యత స్పృహ, ఉత్పత్తి భద్రతా ప్రమాణాలు మరియు స్థిరమైన విధాన వాతావరణం వంటి అంశాలు భారతదేశం వస్తువులు మరియు సేవల ప్రపంచ సరఫరాదారుగా ఎదగడంలో గణనీయమైన పాత్ర పోషిస్తాయని సర్వే సూచించింది.

***