ପ୍ରଧାନମନ୍ତ୍ରୀଙ୍କ ପ୍ୟାକେଜ୍ ର ଏକ ଅଂଶ ଭାବରେ ସରକାର 'ନିଯୁକ୍ତି ସଂଯୁକ୍ତ ପ୍ରୋତ୍ସାହନ' ପାଇଁ ୩ଟି ଯୋଜନା କାର୍ଯ୍ୟକାରୀ କରିବେ। ଇପିଏଫଓରେ ନାମ ପଞ୍ଜୀକରଣ ଏବଂ ପ୍ରଥମ ଥର ପାଇଁ କର୍ମଚାରୀଙ୍କୁ ସ୍ୱୀକୃତି ଦେବା ଏବଂ କର୍ମଚାରୀ ଏବଂ ନିଯୁକ୍ତିଦାତାଙ୍କୁ ସହାୟତା ଉପରେ ଧ୍ୟାନ ଦିଆଯିବ । କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ଶ୍ରୀମତୀ ନିର୍ମଳା ସୀତାରମଣ ଆଜି ସଂସଦରେ ୨୦୨୪-୨୫ ଆର୍ଥିକ ବର୍ଷର ବଜେଟ୍ ଉପସ୍ଥାପନ କରିବା ଅବସରରେ ଏହି ଘୋଷଣା କରିଛନ୍ତି। କାର୍ଯ୍ୟକାରୀ ହେବାକୁ ଥିବା ତିନୋଟି ଯୋଜନାଗୁଡିକ ନିମ୍ନଲିଖିତ:

ସ୍କିମ୍ ଏ: ପ୍ରଥମ ଥର ପ୍ରବେଶକଙ୍କ ପାଇଁ

କେନ୍ଦ୍ର ଅର୍ଥମନ୍ତ୍ରୀ କହିଛନ୍ତି ଯେ ଏହି ଯୋଜନା ଦ୍ୱାରା ସମସ୍ତ ଆନୁଷ୍ଠାନିକ କ୍ଷେତ୍ରରେ ନୂତନ ଭାବେ କାର୍ଯ୍ୟରେ ପ୍ରବେଶ କରୁଥିବା ସମସ୍ତ ବ୍ୟକ୍ତିଙ୍କୁ ଏକ ମାସର ଦରମା ପ୍ରଦାନ କରାଯିବ । ଇପିଏଫଓରେ ପଞ୍ଜୀକୃତ ହୋଇଥିବା ପ୍ରଥମ ଥର କର୍ମଚାରୀଙ୍କୁ ୩ଟି କିସ୍ତିରେ ଏକ ମାସର ଦରମା ସିଧାସଳଖ ୧୫,୦୦୦ ଟଙ୍କା ପର୍ଯ୍ୟନ୍ତ ହସ୍ତାନ୍ତର କରାଯିବ। ଯୋଗ୍ୟତା ସୀମା ମାସିକ ୧ ଲକ୍ଷ ଟଙ୍କା ଦରମା ହେବ। ଏହି ଯୋଜନା ଦ୍ୱାରା ୨୧୦ ଲକ୍ଷ ଯୁବକ ଉପକୃତ ହେବେ ବୋଲି ଆଶା କରାଯାଉଛି।

ସ୍କିମ୍ ବି: ଉତ୍ପାଦନ କ୍ଷେତ୍ରରେ ନିଯୁକ୍ତି ସୃଷ୍ଟି

କେନ୍ଦ୍ର ଅର୍ଥମନ୍ତ୍ରୀ କହିଛନ୍ତି ଯେ ଏହି ଯୋଜନା ଉତ୍ପାଦନ କ୍ଷେତ୍ରରେ ଅତିରିକ୍ତ ନିଯୁକ୍ତିକୁ ପ୍ରୋତ୍ସାହିତ କରିବ, ଯାହା ପ୍ରଥମ ଥର ପାଇଁ କର୍ମଚାରୀଙ୍କ ନିଯୁକ୍ତି ସହିତ ଜଡିତ । ଚାକିରିର ପ୍ରଥମ ୪ ବର୍ଷରେ ଉଭୟ କର୍ମଚାରୀ ଏବଂ ନିଯୁକ୍ତିଦାତାଙ୍କୁ ଇପିଏଫଓ ଯୋଗଦାନ ସମ୍ବନ୍ଧରେ ନିର୍ଦ୍ଦିଷ୍ଟ ସ୍କେଲରେ ସିଧାସଳଖ ପ୍ରୋତ୍ସାହନ ପ୍ରଦାନ କରାଯିବ । ଶ୍ରୀମତୀ ନିର୍ମଳା ସୀତାରମଣ କହିଛନ୍ତି ଯେ ଏହି ଯୋଜନା ଦ୍ୱାରା ନିଯୁକ୍ତି ରେ ପ୍ରବେଶ କରୁଥିବା ୩୦ ଲକ୍ଷ ଯୁବକ ଏବଂ ସେମାନଙ୍କ ନିଯୁକ୍ତିଦାତା ଉପକୃତ ହେବେ ବୋଲି ଆଶା କରାଯାଉଛି ।

ସ୍କିମ୍ ସି: ନିଯୁକ୍ତିଦାତାଙ୍କୁ ସହାୟତା

ନିଯୁକ୍ତିଦାତା ଭିତ୍ତିକ ଏହି ଯୋଜନାରେ ସମସ୍ତ କ୍ଷେତ୍ରରେ ଅତିରିକ୍ତ ନିଯୁକ୍ତି ଅନ୍ତର୍ଭୁକ୍ତ ହେବ ବୋଲି କେନ୍ଦ୍ର ଅର୍ଥମନ୍ତ୍ରୀ କହିଛନ୍ତି। ମାସିକ ୧ ଲକ୍ଷ ଟଙ୍କା ଦରମା ମଧ୍ୟରେ ସମସ୍ତ ଅତିରିକ୍ତ ନିଯୁକ୍ତି ଗଣତି କରାଯିବ। ପ୍ରତ୍ୟେକ ଅତିରିକ୍ତ କର୍ମଚାରୀଙ୍କ ପାଇଁ ଇପିଏଫଓ ଯୋଗଦାନ ବାବଦରେ ସରକାର ୨ ବର୍ଷ ପାଇଁ ମାସିକ ୩୦୦୦ ଟଙ୍କା ପର୍ଯ୍ୟନ୍ତ ନିଯୁକ୍ତିଦାତାଙ୍କୁ କ୍ଷତିପୂରଣ ଦେବେ । ଏହି ଯୋଜନା ୫୦ ଲକ୍ଷ ଲୋକଙ୍କୁ ଅତିରିକ୍ତ ନିଯୁକ୍ତି ପାଇଁ ପ୍ରୋତ୍ସାହିତ କରିବ ବୋଲି ଆଶା କରାଯାଉଛି।

HS