La pynlong ia ka jingialang hapdeng ka Sorkar bad ki nongialam jong ki Seng Sain Pyrthei hapoh ka jingialam jong u Rajnath Singh, Myntri Sorkar Pdeng ba dei khmih ia ka Tnad Iada Ri, shuwa ban sdang ka Bynta jong ka Mang Tyngka jong ka Parliament, 2024. U Myntri u la pdiang burom ia baroh ki nongialam jong ki Seng Sain Pyrthei na baroh artylli ki Iing Dorbar Thaw Ain jong ka Parliament hadien ka jingwan jong ka Lok Sabha kaba 18. Ha ka jingai jingkren jong u, u Myntri ka Tnad Parliamentary Affairs, Kiren Rijiju u la iathuh ba ka Bynta jong ka Mang Tyngka jong ka Parliament ka sdang ha ka Sngi Nyngkong, ka 22 tarik u Naitung, 2024 bad kan kut ha ka 12 tarik u Nailar, 2024. Yn don 16 tylli ki jingiashong ban iakren shaphang kane ka Mang Tngka ha ki 22 sngi bad u Myntri u la ong ba kane ka Bynta kan long halor ki kam ka kamai kajih kiba iadei bad ka Mang Tyngka jong ka Sorkar Pdeng na ka bynta u snem 2024-25 ia kaba yn rah ha ka Lok Sabha ha ka Sngi Ba Ar, ka 23 tarik u Naitung, 2024. Hynrei yn peit ruh ia katto katne ki kam kiba iadei bad ka jingthaw ain bad kiwei kiwei ki kam ha kane ka Bynta. Yn wanrah ruh ia ka MangTyngka jong ka Sorkar Pdeng na ka bynta ka Union Territory jong ka Jammu and Kashmir na ka bynta u 2024 ha ka 23 tarik u Naitung, 2024. Haduh mynta, la ithuh ia 6 tylli ki kam kiba iadei bad ka ain bad 3 tylli ki kam kiba iadei bad ka kamai kajih ban peit ha kane ka Bynta.

U Myntri ka Tnad Parliamentary Affairs u la ong ba ka Sorkar ka kloi ban iakren ha ka Iing Dorbar Thaw Ain shaphang ki kam kiba long ban iakren hapoh ki kyndon bad ki rukom treikam ba la shah da ki Presiding Officer. U la kyntu ruh ia baroh ki nongialam jong ki seng sain pyrthei ba kin ai ka jingiatreilang bad ka jingkyrshan na ka bynta ka jingiaid beit iaid ryntih jong ki artylli ki Iing Dorbar Thaw Ain jong ka Parliament. Ha kane ka jingialang la wan iashim bynta lang ruh da u Myntri Sorkar Pdeng ba dei khmih ia ka Tnad ka Koit ka Khiah bad ka Tnad Chemicals & Fertilizers, Jagat Prakash Nadda, uba dei ruh u nongialam jong ka Rajya Sabha, u Myntri Khynnah (Independent Charge) jong ka Tnad Law & Justice bad Myntri Khynnah ka Tnad Parliamentary Affairs, Arjun Ram Meghwal bad u Myntri Khynnah ka Tnad Parliamentary Affairs bad Myntri Khynnah ka Tnad Information and Broadcasting, Dr. L. Murugan.

Ha ka jingpynkut ia ka jingialang, u Rajnath Singh, Myntri ka Tnad Iada Ri, u la pynpaw ia ka jingsngewnguh jong u ia baroh ki nongialam jong ki seng sain pyrthei kiba la pyni ia ki kam ba kongsan ha kane ka jingialang. U la ong ruh ba dei ban bat ia ka jingkyntang jong ka Parliament. Ka Sorkar ka kloi ban iakren ha ka Iing Dorbar Thaw Ain shaphang ki kam kiba long ban iakren hapoh ki kyndon bad ki rukom treikam ba la shah da ki Presiding Officer.

Sanphew san ngut ki nongialam na sawphew wei tylli ki seng sain pyrthei ki la wan iashim bynta ha kane ka jingialang.

KI BILL BA LA ANTAD BAN PEIT HA KA BYNTA KABA 2 JONG KA LOK SABHA KABA 18 BAD KA BYNTA KABA 265 JONG KA RAJYA SABHA

I – KI KAM KIBA IADEI BAD KA AIN:-

1. The Finance (No. 2) Bill, 2024
2. The Disaster Management (Amendment) Bill, 2024
3. The Boilers Bill, 2024
4. The BhartiyaVayuyanVidheyak, 2024
5. The Coffee (Promotion and Development) Bill, 2024
6. The Rubber (Promotion and Development) Bill, 2024

II – KI KAM KIBA IADEI BAD KA KAMAI KAJIH:-

1. Ka jingiakren halor ka Mang Tyngka 2024-25 jong ka Sorkar Pdeng
2. Ka jingiakren bad ka Vote halor ki Demands for Grants for 2024-25 bad ka jingwanrah, ka jingpeit, ka jingpyllait/jingpynphai ia ka Appropriation Bill.
3. Ka jingiakren bad Vote halor ka Demands for Grants jong ka Union Territory jong ka Jammu & Kashmir na ka bynta u snem mang tyngka 2024-25 bad ka jingwanrah, jingpeit bad jingpyllait/jingpynphai ia ka Appropriation Bill.

***