U Myntri Kam Pohiing jong ka Sorkar Pdeng, Amit Shah u la pyniaid ia ka jingialang bad ki heh duh jong ki kynhun Security bad ki kynhun kiba pyntreikam ia ka ain ban peit bniah ia ka jingtreikam jong ka Multi Agency Centre (MAC) jong ka IB, kaba dei peit ban weng ia ki jingeh ba iadei bad ka jingshngain ha ka ri, ha New Delhi mynta ka sngi. Ha ka jingai jingkren ha ka jingialang u Myntri Kam Pohiing u la bthah ia ki heh duh bapher bapher jong ki kynhun Security na kylleng ka ri bad kiwei kiwei ki kynhun kiba iadei bad ka jingtip bad ka jingpyntreikam ia ka ain ban pdiang ia ka rukom treikam ba pura jong ka Sorkar na ka bynta ka jingshngain jong ka ri. U la ban jur ia ka jingiatreilang hapdeng baroh ki kynhun ban weng ia ki rynsan kam pyntriem bad ki jingkyrshan ia ki, ban peit ia ka kam ai jingshngain kaba dang kylla ha ka ri.

Ha ka jingpeit bniah ia ka jinglong ka jingshngain hapoh ri bad ka jingiakhun pyrshah ia ki kam pyntriem; u Myntri Kam Pohiing u la bthah ia baroh ki nongiashim bynta ban kyntiew ia ka jingiatreilang bad ka Multi Agency Centre bad pynlong ia ka kum ka rynsan kaba wanrah lang ia baroh ki kynhun kiba pyntreikam ai ka ain, ki kynhun kiba ialeh pyrshah ia ki drok bad ki kynhun wad jingtip khnang ban ioh shim ia ki sienjam kiba sted.

U Myntri Kam Pohiing u la ban jur ba ka MAC ka la ioh ka jingshaniah jong baroh kiba iatreikam hapoh jong ka bad kadei ban bteng ban trei baroh arphew saw kynta kum ka rynsan na ka bynta ka jingiasam ia ki jingtip hapdeng kito kiba iadon bynta ha kane ka kam ba kynthup ruh ia kito kiba don ha ki jaka kiba jngai.

Ha ka jingialang, u Myntri Kam Pohiing u la ban jur halor ka jingthung ia ka kynhun jong ki samla, ki ophisar ba tbit ha ki kam teknikal na baroh ki kynhun ba don bynta ha ka jingshngain jong ka ri ban pyndonkam ia ka Big Data bad ka analytics ba don nongrim ha ka AI/ML bad ki jingjam shaphrang ha ka teknoloji ban weng ia ki kam pyntriem. U la ong ba hapdeng ki jingeh kiba thymmai, ngi dei beit ban long kiba la kham pynkhreh ha ki rukom pynbeit jong ngi.

U Myntri Kam Pohiing u la pyntip ruh ba hapoh ka jingialam jong u Myntri Rangbah duh, Narendra Modi, yn don ka jingpynkylla ia ka rukom treikam ka MAC khnang ban pyniar bad pynseisoh shuh shuh ia ki kam. U la kyntu ia baroh kito kiba don bynta ha kane ka kam ban pynkhlain shuh shuh ia kine ki sienjam lyngba ki sienjam kiba sted bad ka jingbuddien ia ki jingioh jingtip.

****