ਨੀਤੀ ਆਯੋਗ ਨੇ ਅੱਜ 'ਸੰਪੂਰਨਤਾ ਅਭਿਆਨ' ਦੀ ਸ਼ੁਰੂਆਤ ਕੀਤੀ, ਜਿਸ ਵਿੱਚ ਦੇਸ਼ ਭਰ ਦੇ ਨਾਗਰਿਕਾਂ ਦੀ ਵੱਡੀ ਭਾਗੀਦਾਰੀ ਦੇਖੀ ਗਈ। ਇਹ ਸ਼ੁਰੂਆਤੀ ਸਮਾਗਮ ਸਾਰੇ 112 ਅਭਿਲਾਸ਼ੀ ਜ਼ਿਲ੍ਹਿਆਂ ਅਤੇ 500 ਅਭਿਲਾਸ਼ੀ ਬਲਾਕਾਂ ਵਿੱਚ ਆਯੋਜਿਤ ਕੀਤੇ ਗਏ ਸਨ। 4 ਜੁਲਾਈ ਤੋਂ 30 ਸਤੰਬਰ 2024 ਤੱਕ ਚੱਲਣ ਵਾਲੀ ਇਸ ਵਿਆਪਕ ਤਿੰਨ-ਮਹੀਨੇ ਦੀ ਮੁਹਿੰਮ ਦਾ ਉਦੇਸ਼ ਸਾਰੇ ਅਭਿਲਾਸ਼ੀ ਜ਼ਿਲ੍ਹਿਆਂ ਅਤੇ ਬਲਾਕਾਂ ਵਿੱਚ 12 ਮੁੱਖ ਸਮਾਜਿਕ ਖੇਤਰ ਸੂਚਕਾਂ ਦੀ 100% ਸੰਤ੍ਰਿਪਤਾ ਪ੍ਰਾਪਤ ਕਰਨਾ ਹੈ। ਮੁਹਿੰਮ ਦੇ ਪਹਿਲੇ ਦਿਨ ਜੰਮੂ ਅਤੇ ਕਸ਼ਮੀਰ ਤੋਂ ਅੰਡਮਾਨ ਅਤੇ ਨਿਕੋਬਾਰ ਟਾਪੂਆਂ ਤੱਕ ਲੱਖਾਂ ਜ਼ਿਲ੍ਹਾ ਅਤੇ ਬਲਾਕ-ਪੱਧਰੀ ਅਧਿਕਾਰੀਆਂ, ਫਰੰਟਲਾਈਨ ਵਰਕਰਾਂ, ਕਮਿਊਨਿਟੀ ਲੀਡਰਾਂ, ਸਥਾਨਕ ਕਲਾਕਾਰਾਂ, ਵਿਦਿਆਰਥੀਆਂ ਅਤੇ ਸਥਾਨਕ ਨੁਮਾਇੰਦਿਆਂ (ਬਲਾਕ ਪ੍ਰਧਾਨਾਂ/ਸਰਪੰਚਾਂ) ਦੀ ਉਤਸ਼ਾਹੀ ਸ਼ਮੂਲੀਅਤ ਦੇਖੀ ਗਈ।

ਅਭਿਲਾਸ਼ੀ ਜ਼ਿਲ੍ਹਿਆਂ ਅਤੇ ਬਲਾਕਾਂ ਨੇ 'ਸੰਪੂਰਨਤਾ ਅਭਿਆਨ' ਲਈ ਆਪਣੀ ਵਚਨਬੱਧਤਾ ਨੂੰ 'ਸੰਪੂਰਨਤਾ ਅਭਿਆਨ' ਦੁਆਰਾ ਆਪਣੇ ਸਿਧਾਂਤਾਂ ਨੂੰ ਦੁਹਰਾਉਂਦੇ ਹੋਏ ਮੁਹਿੰਮ ਦੇ ਟੀਚਿਆਂ ਨੂੰ ਪੂਰਾ ਕਰਨ ਅਤੇ ਪਛਾਣੇ ਗਏ ਸੂਚਕਾਂ ਦੀ ਪੂਰੀ ਸੰਤ੍ਰਿਪਤਾ ਵੱਲ ਤਰੱਕੀ ਨੂੰ ਤੇਜ਼ ਕਰਨ ਲਈ ਵਚਨਬੱਧਤਾ ਦਾ ਵਾਅਦਾ ਕੀਤਾ। ਪ੍ਰੋਗਰਾਮ ਵਿੱਚ ਮੱਧ ਪ੍ਰਦੇਸ਼ ਵਿੱਚ ਰਤਲਾਮ ਅਤੇ ਸਿੰਗਰੌਲੀ ਵਾਂਗ ਮੁਹਿੰਮ ਦੇ ਮੁੱਖ ਸੰਕੇਤਾਂ 'ਤੇ ਜ਼ੋਰ ਦੇਣ ਵਾਲੇ ਕੈਂਪਾਂ ਦਾ ਆਯੋਜਨ ਕਰਨਾ ਵੀ ਸ਼ਾਮਲ ਹੈ। ਇਸੇ ਤਰ੍ਹਾਂ ਇਹ ਪ੍ਰੋਗਰਾਮ ਊਧਮ ਸਿੰਘ ਨਗਰ, ਉੱਤਰਾਖੰਡ ਅਤੇ ਨੂਹ, ਹਰਿਆਣਾ ਦੇ ਜ਼ਿਲ੍ਹਾ ਹੈੱਡਕੁਆਰਟਰ ਵਿਖੇ ਧੂਮ-ਧਾਮ ਅਤੇ ਸਥਾਨਕ ਭਾਗੀਦਾਰੀ ਨਾਲ ਸ਼ੁਰੂ ਕੀਤਾ ਗਿਆ।

ਆਂਧਰ ਪ੍ਰਦੇਸ਼ ਦੇ ਅੰਨਾਮਈਆ ਜਿਲ੍ਹੇ ਕੁਰਬਲਕੋਟਾ ਮੰਡਲ ਵਿਖੇ ਲਗਾਏ ਗਏ ਸਿਹਤ ਕੈਂਪ ਦਾ ਸਥਾਨਕ ਲੋਕਾਂ ਵੱਲੋਂ ਭਾਰੀ ਉਤਸ਼ਾਹ ਨਾਲ ਸਵਾਗਤ ਕੀਤਾ ਗਿਆ। ਸੈਂਕੜੇ ਆਸ਼ਾ ਅਤੇ ਆਂਗਣਵਾੜੀ ਵਰਕਰ ਉੱਤਰ ਪ੍ਰਦੇਸ਼ ਦੇ ਗੋਰਖਪੁਰ ਜ਼ਿਲ੍ਹੇ ਦੇ ਬਾਂਸਗਾਂਵ ਬਲਾਕ ਅਤੇ ਕੁੱਲੂ ਜ਼ਿਲ੍ਹੇ, ਹਿਮਾਚਲ ਪ੍ਰਦੇਸ਼ ਦੇ ਨਿਰਮਲ ਬਲਾਕ ਵਿਖੇ ਗਰਭਵਤੀ ਔਰਤਾਂ ਅਤੇ ਛੋਟੇ ਬੱਚਿਆਂ ਲਈ ਖੇਤਰੀ ਭੋਜਨ ਦੀਆਂ ਪੌਸ਼ਟਿਕ ਕਿਸਮਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਇਕੱਠੇ ਹੋਏ। 'ਸੰਪੂਰਨਤਾ ਅਭਿਆਨ' ਮਨਾਉਣ ਵਾਲੇ ਸਮਰਪਿਤ ਸੈਲਫੀ ਬੂਥਾਂ 'ਤੇ ਫੋਟੋਆਂ ਕਲਿੱਕ ਕਰਦੇ ਲੋਕ ਦੇਖੇ ਗਏ। ਕੁਝ ਥਾਵਾਂ 'ਤੇ ਸੰਪੂਰਨਤਾ ਅਭਿਆਨ ਦੇ ਮੁੱਖ ਪ੍ਰਦਰਸ਼ਨ ਸੂਚਕਾਂ ਅਤੇ ਟੀਚਿਆਂ ਬਾਰੇ ਜਾਗਰੂਕਤਾ ਪੈਦਾ ਕਰਨ ਲਈ ਸੰਪੂਰਨਤਾ ਯਾਤਰਾਵਾਂ ਆਯੋਜਿਤ ਕੀਤੀਆਂ ਗਈਆਂ। ਸਕੂਲੀ ਬੱਚੇ ਅਤੇ ਐੱਨਸੀਸੀ ਕੈਡਿਟ ਆਂਧਰ ਪ੍ਰਦੇਸ਼ ਦੇ ਪਾਰਵਤੀਪੁਰਮ ਮਨਯਮ ਦੇ ਭਾਮਿਨੀ ਬਲਾਕ ਵਿੱਚ ਇੱਕ ਅਜਿਹੀ ਸੰਪੂਰਨਤਾ ਯਾਤਰਾ ਵਿੱਚ ਇਕੱਠੇ ਹੋਏ। ਬਲਾਕ ਬਧਰਾ, ਜ਼ਿਲ੍ਹਾ ਚਰਖੀ ਦਾਦਰੀ, ਹਰਿਆਣਾ ਦੇ ਪੇਂਟਿੰਗ ਮੁਕਾਬਲਿਆਂ ਵਿੱਚ ਵੀ ਬੱਚਿਆਂ ਨੇ ਹਿੱਸਾ ਲੈ ਕੇ ਇਸ ਵਿਲੱਖਣ ਪ੍ਰੋਗਰਾਮ ਨੂੰ ਸਮਰਥਨ ਦਿੱਤਾ। ਲਾਂਚ ਦੇ ਹੋਰ ਪਹਿਲੂਆਂ ਵਿੱਚ ਸੱਭਿਆਚਾਰਕ ਪ੍ਰੋਗਰਾਮ, ਨੁੱਕੜ ਨਾਟਕ, ਪ੍ਰਦਰਸ਼ਨੀ ਸਟਾਲ, ਭੂਮੀ ਸਿਹਤ ਕਾਰਡਾਂ ਦੀ ਵੰਡ ਆਦਿ ਸ਼ਾਮਲ ਸਨ।

ਉੱਤਰ-ਪੂਰਬੀ ਰਾਜਾਂ ਨੇ ਵੀ ਪੂਰੇ ਉਤਸ਼ਾਹ ਨਾਲ ਹਿੱਸਾ ਲਿਆ। ਅਰੁਣਾਚਲ ਪ੍ਰਦੇਸ਼ ਦੇ ਉਪ ਮੁੱਖ ਮੰਤਰੀ ਸ਼੍ਰੀ ਚੋਵਨਾ ਮੇਨ ਨੇ ਅਰੁਣਾਚਲ ਪ੍ਰਦੇਸ਼ ਦੇ ਨਮਸਾਈ ਜ਼ਿਲੇ ਦੇ ਚੌਖਮ ਬਲਾਕ ਵਿਖੇ ਸੰਪੂਰਨਤਾ ਅਭਿਆਨ ਦੀ ਸ਼ੁਰੂਆਤ ਕੀਤੀ। ਕਿਫਿਰੇ, ਨਾਗਾਲੈਂਡ ਵਿਖੇ ਲਾਂਚ ਈਵੈਂਟ ਨੂੰ ਵਿਧਾਨ ਸਭਾ ਮੈਂਬਰ ਸ਼੍ਰੀ ਸੀ ਕਿਪਿਲੀ ਸੰਗਤਮ ਨੇ ਸੰਬੋਧਿਤ ਕੀਤਾ ਅਤੇ ਸ਼ੁਰੂਆਤ ਕੀਤੀ। ਇਸੇ ਤਰ੍ਹਾਂ ਚੂਰਾਚਾਂਦਪੁਰ ਜ਼ਿਲੇ ਦੇ ਲਮਕਾ ਦੱਖਣੀ ਬਲਾਕ, ਮਣੀਪੁਰ ਨੇ ਲਾਂਚ ਪ੍ਰੋਗਰਾਮ ਲਈ ਸ਼ੂਗਰ ਅਤੇ ਹਾਈਪਰਟੈਨਸ਼ਨ 'ਤੇ ਮੁਫਤ ਸਿਹਤ ਕੈਂਪ ਲਗਾਇਆ।

3 ਮਹੀਨੇ ਚੱਲਣ ਵਾਲੀ 'ਸੰਪੂਰਨਤਾ ਅਭਿਆਨ' ਮੁਹਿੰਮ ਦੇ ਹਿੱਸੇ ਵਜੋਂ, ਚੁਣੇ ਹੋਏ ਲੋਕ ਨੁਮਾਇੰਦਿਆਂ ਦੇ ਨਾਲ 100% ਸੰਤ੍ਰਿਪਤਾ ਲਈ ਪਛਾਣੇ ਗਏ 12 ਵਿਸ਼ਿਆਂ ਦੇ ਆਲੇ-ਦੁਆਲੇ ਜ਼ਿਲ੍ਹਾ ਅਤੇ ਬਲਾਕ ਅਧਿਕਾਰੀ ਗ੍ਰਾਮ ਸਭਾਵਾਂ, ਨੁੱਕੜ ਨਾਟਕ, ਪੌਸ਼ਟਿਕ ਅਹਾਰ ਮੇਲਾ, ਸਿਹਤ ਕੈਂਪ, ਆਈਸੀਡੀਐਸ ਕੈਂਪ, ਜਾਗਰੂਕਤਾ ਮਾਰਚ ਅਤੇ ਰੈਲੀਆਂ, ਪ੍ਰਦਰਸ਼ਨੀਆਂ, ਪੋਸਟਰ ਮੇਕਿੰਗ ਅਤੇ ਕਵਿਤਾ ਮੁਕਾਬਲੇ ਵਰਗੀਆਂ ਜਾਗਰੂਕਤਾ ਗਤੀਵਿਧੀਆਂ ਦਾ ਸਾਰੇ ਅਭਿਲਾਸ਼ੀ ਬਲਾਕਾਂ ਅਤੇ ਜ਼ਿਲ੍ਹਿਆਂ ਵਿੱਚ ਆਯੋਜਨ ਕਰਨਗੇ। 

ਨੀਤੀ ਆਯੋਗ ਦੇ ਅਧਿਕਾਰੀ ਅਤੇ ਨੌਜਵਾਨ ਪੇਸ਼ੇਵਰ 300 ਜ਼ਿਲ੍ਹਿਆਂ ਵਿੱਚ ਵਿਅਕਤੀਗਤ ਤੌਰ 'ਤੇ ਸ਼ੁਰੂਆਤੀ ਸਮਾਗਮਾਂ ਵਿੱਚ ਹਿੱਸਾ ਲੈ ਰਹੇ ਹਨ ਤਾਂ ਜੋ ਮੁਹਿੰਮ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਆਯੋਜਿਤ ਕਰਨ ਅਤੇ ਚਲਾਉਣ ਵਿੱਚ ਸਥਾਨਕ ਪ੍ਰਸ਼ਾਸਨ ਨੂੰ ਮਾਰਗਦਰਸ਼ਨ ਅਤੇ ਸਮਰਥਨ ਦਿੱਤਾ ਜਾ ਸਕੇ। ਸਬੰਧਤ ਕੇਂਦਰੀ ਮੰਤਰਾਲਿਆਂ ਅਤੇ ਵਿਭਾਗਾਂ, ਅਤੇ ਰਾਜ ਅਤੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਦੀਆਂ ਸਰਕਾਰਾਂ ਨਾਲ ਸਹਿਯੋਗ ਨਾ ਸਿਰਫ਼ ਮੁਹਿੰਮ ਦੇ ਉਦੇਸ਼ਾਂ ਨੂੰ ਪ੍ਰਾਪਤ ਕਰਨ ਦੇ ਯਤਨਾਂ ਨੂੰ ਹੁਲਾਰਾ ਦੇਵੇਗਾ, ਸਗੋਂ ਦੂਰ-ਦੁਰਾਡੇ ਦੇ ਸਮਾਜਿਕ-ਆਰਥਿਕ ਵਿਕਾਸ ਨੂੰ ਯਕੀਨੀ ਬਣਾਉਣ ਲਈ ਪ੍ਰਤੀਯੋਗੀ ਅਤੇ ਸਹਿਕਾਰੀ ਸੰਘਵਾਦ ਦੀ ਭਾਵਨਾ ਨੂੰ ਵੀ ਮਜ਼ਬੂਤ ​​ਕਰੇਗਾ।

'ਸੰਪੂਰਨਤਾ ਅਭਿਆਨ' ਦੇ ਫੋਕਸ ਖੇਤਰ:

ਅਭਿਲਾਸ਼ੀ ਬਲਾਕ ਕੇਪੀਆਈਜ਼ :

1. ਪਹਿਲੀ ਤਿਮਾਹੀ ਦੇ ਅੰਦਰ ਜਨਮ ਤੋਂ ਪਹਿਲਾਂ ਦੀ ਦੇਖਭਾਲ (ਏਐੱਨਸੀ) ਲਈ ਰਜਿਸਟਰਡ ਗਰਭਵਤੀ ਔਰਤਾਂ ਦੀ ਪ੍ਰਤੀਸ਼ਤ;

2. ਬਲਾਕ ਵਿੱਚ ਨਿਯਤ ਆਬਾਦੀ ਦੇ ਵਿਰੁੱਧ ਡਾਇਬੀਟੀਜ਼ ਲਈ ਸਕ੍ਰੀਨ ਕੀਤੇ ਗਏ ਵਿਅਕਤੀਆਂ ਦੀ ਪ੍ਰਤੀਸ਼ਤ;

3. ਬਲਾਕ ਵਿੱਚ ਨਿਯਤ ਆਬਾਦੀ ਦੇ ਵਿਰੁੱਧ ਹਾਈਪਰਟੈਨਸ਼ਨ ਲਈ ਸਕ੍ਰੀਨ ਕੀਤੇ ਗਏ ਵਿਅਕਤੀਆਂ ਦੀ ਪ੍ਰਤੀਸ਼ਤ;

4. ਆਈਸੀਡੀਐੱਸ ਪ੍ਰੋਗਰਾਮ ਦੇ ਤਹਿਤ ਨਿਯਮਿਤ ਤੌਰ 'ਤੇ ਪੂਰਕ ਪੋਸ਼ਣ ਲੈਣ ਵਾਲੀਆਂ ਗਰਭਵਤੀ ਔਰਤਾਂ ਦੀ ਪ੍ਰਤੀਸ਼ਤ;

5. ਮਿੱਟੀ ਦੇ ਨਮੂਨੇ ਇਕੱਤਰ ਕਰਨ ਦੇ ਟੀਚੇ ਦੇ ਵਿਰੁੱਧ ਤਿਆਰ ਕੀਤੇ ਭੂਮੀ ਸਿਹਤ ਕਾਰਡਾਂ ਦੀ ਪ੍ਰਤੀਸ਼ਤਤਾ; ਅਤੇ

6. ਬਲਾਕ ਵਿੱਚ ਕੁੱਲ ਐੱਸਐੱਚਜੀ ਦੇ ਮੁਕਾਬਲੇ ਰਿਵਾਲਵਿੰਗ ਫੰਡ ਪ੍ਰਾਪਤ ਕਰਨ ਵਾਲੇ ਐੱਸਐੱਚਜੀ ਦਾ ਪ੍ਰਤੀਸ਼ਤ

ਅਭਿਲਾਸ਼ੀ ਜ਼ਿਲ੍ਹੇ ਕੇਪੀਆਈਜ਼ :

1. ਪਹਿਲੀ ਤਿਮਾਹੀ ਦੇ ਅੰਦਰ ਜਨਮ ਤੋਂ ਪਹਿਲਾਂ ਦੀ ਦੇਖਭਾਲ (ਏਐੱਨਸੀ) ਲਈ ਰਜਿਸਟਰਡ ਗਰਭਵਤੀ ਔਰਤਾਂ ਦਾ ਪ੍ਰਤੀਸ਼ਤ;

2. ਆਈਸੀਡੀਐੱਸ ਪ੍ਰੋਗਰਾਮ ਦੇ ਤਹਿਤ ਨਿਯਮਿਤ ਤੌਰ 'ਤੇ ਪੂਰਕ ਪੋਸ਼ਣ ਲੈਣ ਵਾਲੀਆਂ ਗਰਭਵਤੀ ਔਰਤਾਂ ਦਾ ਪ੍ਰਤੀਸ਼ਤ;

3. ਪੂਰੀ ਤਰ੍ਹਾਂ ਟੀਕਾਕਰਨ ਵਾਲੇ ਬੱਚਿਆਂ ਦੀ ਪ੍ਰਤੀਸ਼ਤ (9-11 ਮਹੀਨੇ) (ਬੀਸੀਜੀ+ਡੀਪੀਟੀ3+ਓਪੀਵੀ3+ਮੀਜ਼ਲਜ਼ 1);

4. ਵੰਡੇ ਗਏ ਭੂਮੀ ਸਿਹਤ ਕਾਰਡਾਂ ਦੀ ਗਿਣਤੀ;

5. ਸੈਕੰਡਰੀ ਪੱਧਰ 'ਤੇ ਕਾਰਜਸ਼ੀਲ ਬਿਜਲੀ ਵਾਲੇ ਸਕੂਲਾਂ ਦਾ ਪ੍ਰਤੀਸ਼ਤ; ਅਤੇ

6. ਅਕਾਦਮਿਕ ਸੈਸ਼ਨ ਸ਼ੁਰੂ ਹੋਣ ਦੇ 1 ਮਹੀਨੇ ਦੇ ਅੰਦਰ ਬੱਚਿਆਂ ਨੂੰ ਪਾਠ ਪੁਸਤਕਾਂ ਪ੍ਰਦਾਨ ਕਰਨ ਵਾਲੇ ਸਕੂਲਾਂ ਦਾ ਪ੍ਰਤੀਸ਼ਤ

******

ਡੀਐੱਸ/ਐੱਸਆਰ/ਬੀਐੱਮ