امور داخلہ اور باہمی تعاون کے مرکزی وزیر جناب امت شاہ نے آج مدھیہ پردیش  کے اندور میں ریاست کے تمام 55 اضلاع میں پردھان منتری کالج آف ایکسی لینس کا افتتاح کیا۔ مدھیہ پردیش کے وزیر اعلیٰ ڈاکٹر موہن یادو اور مرکزی وزیر محترمہ ساوتری ٹھاکر سمیت کئی معززین بھی  اس موقع پر موجود تھے۔

افتتاحی تقریب سے خطاب کرتے ہوئے مرکزی وزیر داخلہ جناب امت شاہ نے کہا کہ وزیر اعظم جناب نریندر مودی نے ایک ایسے ہندوستان کی تعمیر کا ہدف مقرر کیا ہے کہ جب ہم 2047 میں اپنی آزادی کے 100 سال مکمل کریں گے تو ہندوستان دنیا کے ہر میدان میں سرفہرست ہو۔ انہوں نے کہا کہ اگر ایسا ہندوستان بنانا ہے تو یہ تعلیم کی بنیاد کو مضبوط کیے بغیر نہیں ہو سکتا، اس لیے اپنی دور اندیشی کے مطابق مودی جی نے سال 2020 میں نئی ​​تعلیمی پالیسی متعارف کرائی۔ جناب شاہ نے کہا کہ نئی تعلیمی پالیسی اگلے 25 سالوں کے لیے ہماری ضروریات کا تصور کرتے ہوئے لایا گیا ہے۔ نئی تعلیمی پالیسی ہمارے طلبا کو عالمی سطح پر مقابلہ کرنے کے لیے سازگار ماحول فراہم کرے گی، اور ساتھ ہی ساتھ وہ ہماری قدیم ثقافت اور زبانوں سے جڑے رہیں گے۔

مدھیہ پردیش حکومت کو مبارکباد دیتے ہوئے، مرکزی وزیر داخلہ جناب امت شاہ نے کہا کہ مدھیہ پردیش کو نئی تعلیمی پالیسی کو نافذ کرنے والی پہلی ریاست بننے کا اعزاز حاصل ہے۔ انہوں نے کہا کہ ماضی میں بھی مدھیہ پردیش پورے ملک میں واحد ریاست رہی ہے جس نے انجینئرنگ اور میڈیکل سائنس کے نصاب کو ہماری مادری زبان میں ترجمہ کرنے کی پہل کی۔ اس سے بہت سے غریب بچوں کو اپنی مادری زبان میں اعلیٰ تعلیم کے طور پر میڈیکل سائنس اور انجینئرنگ حاصل کرنے میں فائدہ ہوا ہے۔

جناب امت شاہ نے کہا کہ پردھان منتری کالجز آف ایکسی لینس کا آغاز محض ان کالجوں کا نام تبدیل کرنا نہیں ہے۔ انہوں نے کہا کہ کالجوں کو پردھان منتری کالج آف ایکسی لینس کی پہچان حاصل کرنے کے اہل بننے کے لیے طے شدہ پیرامیٹر اور معیارات کے مطابق اپ گریڈ کرنے کے لیے 486 کروڑ روپے کی سرمایہ کاری کی گئی ہے۔ انہوں نے کہا کہ ان کالجوں میں کمپارٹمنٹل تعلیم نہیں ہوگی۔ اگر کوئی طالب علم بی اے کرنا چاہتا ہے اور سائنس کے کسی مضمون میں بھی دلچسپی رکھتا ہے تو وہ بیک وقت اس مضمون میں ڈپلومہ کر سکتا ہے۔ وزیر داخلہ نے مثال دی کہ کامرس کا طالب علم جو آرٹ یا زبان میں دلچسپی رکھتا ہے وہ بیک وقت ان مضامین کا مطالعہ کر سکتا ہے۔ یہاں تک کہ اگر کوئی کامرس کا طالب علم ہے اور اسے ٹیکنالوجی میں دلچسپی ہے، وہ اپنی دلچسپی کے مطابق ڈپلومہ کورس کر سکتا ہے۔

امور داخلہ اور باہمی تعاون کے مرکزی وزیر نے کہا کہ مدھیہ پردیش نے نئی تعلیمی پالیسی کو آج حقیقت بنا کر اس میں ایک اہم باب لکھا ہے۔ انہوں نے کہا کہ تعلیم کا مقصد طالب علم میں موجود تمام طاقتوں کو باہر لانا، انہیں ایک پلیٹ فارم اور بڑھنے کا موقع فراہم کرنا ہے۔ جناب شاہ نے مزید کہا کہ موضوعات اور نصاب کو حفظ کرکے امتحان میں نمبر حاصل کرنا آسان ہے لیکن اندرونی طاقتوں اور صلاحیتوں کو نتیجہ خیز بنانا بہت مشکل ہے۔

جناب امت شاہ نے کہا کہ 55 پردھان منتری کالجزآف ایکسی لینس جن کا آج افتتاح کیا گیا ہے، طلباء کو بہت سے مضامین جیسے بایو ٹیکنالوجی، کمپیوٹر سائنس، ثقافت، آرٹس وغیرہ میں ان کی دلچسپی کے مطابق تعلیم حاصل کرنے کا موقع فراہم کریں گے۔ بی ایس سی ایگریکلچر بھی متعارف کرایا گیا ہے۔ بی ایس سی ایگریکلچر جیسا کورس نوجوانوں کو زراعت سے جوڑے گا اور خود روزگار کے بہت سے نئے مواقع پیدا کرے گا۔ انہوں نے کہا کہ بہت سارے ڈپلومہ کورسز اور سرٹیفکیٹ کورسز کو آئی آئی ٹی دہلی اور کئی دیگر باوقار اداروں کے ساتھ جوڑنے کا کام کیا گیا ہے۔ مدھیہ پردیش ہندی گرنتھ اکیڈمی کے تمام 55 کالجوں میں کتابوں کا مرکز بھی شروع کیا گیا ہے۔

مرکزی وزیر داخلہ نے کہا کہ اندور کو اب تک کپاس کا مرکز اور صفائی کا مرکز سمجھا جاتا تھا، لیکن اب یہ تعلیمی مرکز بننے کی طرف بھی بڑھ رہا ہے۔ انہوں نے کہا کہ اندور دوا سازی ، آٹوموبائل، ٹیکسٹائل، ڈبہ بند خوراک کے شعبوں میں آگے بڑھ رہا ہے۔

جناب امت شاہ نے کہا کہ مدھیہ پردیش میں نئی ​​تعلیمی پالیسی کے تحت اعلیٰ تعلیم کے لیے بہت سے اقدامات کیے گئے ہیں، بہت سے نئے کورسز متعارف کرائے گئے ہیں، کئی یونیورسٹیاں بھی بنائی گئی ہیں۔ جناب شاہ نے کہا کہ وزیر اعظم جناب نریندر مودی نے نوجوانوں کے مستقبل کی تشکیل کے لیے نئی تعلیمی پالیسی تشکیل دی ہے۔ نئی تعلیمی پالیسی کے تحت بچوں کو ' نصاب تعلیم‘ کے ساتھ ساتھ 'نصاب زندگی‘  بھی پڑھایا جائے گا۔ نئی تعلیمی پالیسی کے ذریعہ توجہ مقدار سے معیار کی طرف منتقل کر دی گئی ہے اور نئی تعلیمی پالیسی میں طلباء میں 'قدمت پسند سوچ' کی بجائے 'آؤٹ آف دی باکس' سوچ کی عادت ڈالنے کے لیے بہت سے اقدامات کیے گئے ہیں۔ نئی تعلیمی پالیسی نوجوانوں کو پیشہ ورانہ اور ہنر مندی کی تربیت فراہم کر کے صنعت اور ماہرین تعلیم کے درمیان خلیج کو پر کرنے کی بھی کوشش کرتی ہے۔

امور  داخلہ اور باہمی تعاون کے مرکزی وزیر نے کہا کہ نئی تعلیمی پالیسی کے تحت ہمارا تعلیمی نظام 21ویں صدی کے عالمی معیارات کے برابر آئے گا۔ انہوں نے مزید کہا کہ نئے تعلیمی نظام میں کتابوں کو حفظ کرنے کی بجائے خیال پیدا کرنے پر زور دیا جائے گا۔ انہوں نے کہا کہ طلباء کو صرف ڈگریاں دینے کی بجائے ان کی 360 ڈگری ترقی پر زور دیا جائے گا۔ مرکزی وزیر داخلہ جناب امت شاہ نے نوجوانوں سے اپیل کی کہ وہ اپنے لیے اہداف طے کرنے کی اہمیت کو سیکھیں۔ انہوں نے کہا کہ وقت بے مقصد زندگی کو ختم کر دیتا ہے اور مقصد کا تعین کرنے میں ناکامی مکمل طور پر وقت ضائع کرنے کے مترادف ہے۔ انہوں نے طلباء سے کہا کہ محنت کا کوئی متبادل نہیں ہے اور اب وقت آگیا ہے کہ ہمارے ملک کے نوجوان اپنے لیے ایک ہدف طے کریں اور اسے حاصل کرنے کے لیے سخت محنت کریں۔ انہوں نے کہا کہ تقدیر انہی پر مسکراتی ہے جو محنت سے کامیابی کی بنیاد تیار کرتے ہیں۔ جناب شاہ نے طلباء سے اپیل کی کہ وہ اپنی زندگی کے اہداف طے کریں اور آج سے ہی سخت محنت کریں۔

مرکزی وزیر داخلہ نے کہا کہ آج کی نسل انٹرنیٹ، مصنوعی ذہانت اور ڈیٹا اینالیٹکس کی نسل ہے اور یہی وجہ ہے کہ نئی تعلیمی پالیسی میں پریکٹیکل، ہنر کی ترقی اور پیشہ ورانہ تربیت جیسی دفعات شامل ہیں۔ انہوں نے کہا کہ سال 2047 میں ہندوستان یقینی طور پر دنیا میں پہلے نمبر پر آئے گا۔ انہوں نے کہا کہ وزیر اعظم جناب نریندر مودی نے ہمارے لیے آزادی کا صد سالہ ہدف مقرر کیا ہے۔

جناب امت شاہ نے طلباء سے کہا کہ یہ ہدف ان نوجوان لڑکوں اور لڑکیوں کے لیے ہے جو یہاں موجود ہیں، وہ نوجوان جو کل کے شہری ہوں گے۔ انہوں نے کہا کہ نوجوان وہ دن دیکھیں گے جب ہندوستان پوری دنیا میں ہر میدان میں عظیم ہوگا اور ہماری نئی تعلیمی پالیسی اور آج کا پردھان منتری کالج آف ایکسی لینس اسی مقصد کی بنیاد رکھے گا۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض  ۔ت ع  (

8324