উপ্প রাস্ত্রপতি শ্রী জগদীপ ধঙ্করনা ঙসি খুঙ্গংগী মফমশিংদা সাইবর ক্রাইম ভিক্তিমশিংদা আইনগী মতেং পীবগী খুদক্কী ওইবা তঙাইফদবগী মতাংদা ঙাংখি। লৈবাক অসিদা দিজিতেল পেনেত্রেসন হেনগৎলকপগা লোইননা সাইবর ক্রাইম হেনগৎলকপদা নুংনাংবা ফোঙদোক্লদুনা মহাক্না হায়খি মদুদি হৌজিক্কী মতম অসি এজেন্সীশিং, ইনভেস্তিগেতরশিং, রিগুলেতরশিং অমসুং লিগেল ফ্রেতর্নিতীশিংগী ওইনদি য়াম্না নুংনাংনিংঙাই ওইবা মতম্নি, অমসুং মসিদগী ঙাকথোক্নবা তেক্নিকেল অমসুং খঙ হৈবা মীওইশিং শেমগৎপগী তঙাইফদবা লৈ হায়খি।

গ্লোবেল কাউন্তর তেরোরিজম কাউন্সিল (জি.সি.তি.সি.)না নৈ দিল্লীগী ভিগ্যান ভাবনদা ঙসি পাঙথোকপা ৩শুবা সাইবর সেক্যুরিতী কনফরেন্সকী লোইশিল্লকপগী সেসন্দা ৱা ঙাংলদুনা উপ্প রাস্ত্রপতিনা হায়খি মদুদি ইচম চমজবা মীওই কয়াবু শাশিন্নবা থবক কয়ানা অৱাফমদা তাহল্লি, অমসুং লৈবাক অসিগী খ্বাইদগী লাপ্না লৈবা মফমশিংদা দেতা ঙাক্তুনা থম্বগী তঙাইফদবগী মতাংদা ফোঙদোকখি।

মালেমগী থাক্তা লৈবা খ্বাইদগী চাউবা দিজিতেল সোসাইতীশিংগী মরক্তা লৈরিবা ভারতকী ফিভমগী মতাংদা পল্লদুনা শ্রী ধঙ্করনা হায়খি মদুদি ভারতনা এক্তিব ইন্তর্নেত য়ুজর মিলিয়ন ৮২০গী মথক্তা লৈ অমসুং লন্নাই মীওই মিলিয়ন ৫০০ হেনববু বেঙ্কিং ইনক্লুজন্দা পুশিনখ্রে। মহাক্না মসিমসু পনখি মদুদি লৈবাক অসিদা চহি ২০২৩দা মালেমগী দিজিতেল ত্রাঞ্জেক্সন ৫০% গী চাংদা তৌখি।

ভারতকী তেক্নোলোজী পেনেত্রেসন্দা মায় পাকপা কয়াগী মতাংদা থাগৎলদুনা উপ্প রাস্ত্রপতিনা হায়খি মদুদি ঙসিগী মালেম অসিনা ভারত্তা সর্ভিস পীনবা খুঙ্গংগী থাক্তগী হৌদুনা হোৎনবদা চাউনা তেক্নোলোজী শীজিন্নবা উবদা অঙকপা পোক্নরি। "তেক্নোলোজী হায়বসি ইচম চম্বা মীওই অমগীসু হেক্তমক মচীন্দগী থোকপা ৱাহৈ অমা ওইরক্লে" হায়না মহাক্না হায়খি।

দিসরপ্তিব তেক্নোলোজীদা লৈরিবা শাথিরবা শক্তিগী মতাংদা পল্লদুনা উপ্প রাস্ত্রপতিনা অসিগুম্বা তেক্নোলোজী অসিনা শেন্মিৎলোন, লল্লোন ইতীক, নৎত্রগা লনাই মীওইদতা কায়হনবদা নত্তনা জাতিগী শান্তি রক্সাদসু অকায়বা পীরি হায়না ফোঙদোকখি। হৌরক্লিবা অসিগুম্বা তেক্নোলোজীশিং অসিনা পীরিবা শীংনবশিং অসি খুদোংচাবা ওইনা ওন্থোক্কদবনি হায়রদুনা শ্রী ধঙ্করনা মখোয়গী অফবা শক্তি অদু পুথোক্নবা সিস্তেম অপদেত তৌনবা ফোংদোকখি। মহাক্না হায়রিবা খুমাং চাউশিনবশিং অসিবু লৈবাক অসিগী কান্ননবগীদমক পউনশিনবগী তঙাইফদবগী মতাংদসু ফোংদোকখি।

হৌজিক মতমগী লানগী শক্তম অসিদা লাক্লিবা অহোংবা মতৌ অসিগী মতাংদা পল্লদুনা শ্রী ধঙ্করনা লান অসি মহৌশাগী ঙমখৈদগী লান্থোক্তুনা কংফাল, মালং অমসুং শমুদ্রদগী অনৌবা তেক্নোলোজীগী মালং অমদা পাকথোক চাউথোকখ্রে। উপ্প রাস্ত্রপতিনা হায়খি মদুদি লৈবাক অমগী এদভান্স তেক্নোলোজীদা শেম শাবনা মখোয়গী মালেমদা শক্লিবা ৱাশক অমসুং স্ত্রেতেজিক ওইবা পাঙ্গল অদুদা মরুওইবা ওইগনি। মহাক্না ফোঙদোকখি মদুদি অথোৎপা দিপ্লোমেতিক্কী শক্তিনা হৌজিক্তি তেক্নোলোজীগী শক্তিদা মরুওইবা পীরি।

লৈঙাক অসিনা ভারতকী দিজিতেল দিফেন্সতা শেম্লিবা লানবনগী থৌরাংশিংগী মতাংদা পল্লদুনা শ্রী ধঙ্করনা হায়খি মদুদি নেসনেল সাইবর সেক্যুরিতী পোলিসী য়াওনা ইন্দিয়ন কম্প্যুতর এমর্জেন্সী রেস্পোন্স তীম, অমসুং ইনফোর্মেসন তেক্নোলোজী এক্ত ২০০০ অপদেত তৌবনচিংবা মরুওইবা থৌরাংশিং পনখি। হায়রিবা থৌরাংশিং অসিনা পব্লিক প্রাইবেত পার্তনর্শিপ ফগৎহনবদা নত্তনা, লৈবাক অসিগী দিজিতেল ইনফ্রাস্ত্রকচর ঙাকশেনবদসু মরুওইবা থৌদাং লৌরি হায়না উপ্প রাস্ত্রপতিনা হায়খি।

প্রোফেসর, ভি.এম. বন্সল, এদভাইজর, GCTC, Lt .জেনরেল . K.J. সিংহ অমসুং শ্রীমতি নীরু এব্রোল, একজিক্যুতিব কাউন্সিল মেম্বরশিং, GCTC অমসুং অতৈ শক্নাইরবা মীওইশিংনা থৌরম অদুদা শরুক য়াখি।

মপুং ফাবা ৱারোল পাবীয়ু : https://pib.gov.in/PressReleasePage.aspx?PRID=2033016

***************