ಗೌರವಾನ್ವಿತ ಸಭಾಪತಿಗಳೆ,

ರಾಷ್ಟ್ರಪತಿಗಳ ಸ್ಫೂರ್ತಿದಾಯಕ ಮತ್ತು ಉತ್ತೇಜನಪೂರ್ವಕ ಭಾಷಣಕ್ಕಾಗಿ ನನ್ನ ಕೃತಜ್ಞತೆ ಸಲ್ಲಿಸಲು ನಾನು ಈ ಚರ್ಚೆಯಲ್ಲಿ ಸೇರಿಕೊಂಡಿದ್ದೇನೆ. ರಾಷ್ಟ್ರಪತಿ ಅವರ ಮಾತುಗಳು ದೇಶವಾಸಿಗಳಿಗೆ ಪ್ರೇರಣೆಯ ಮೂಲವಾಗುವ ಜತೆಗೆ, ಸತ್ಯದ ವಿಜಯಕ್ಕೆ ಸಾಕ್ಷಿಯಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಕಳೆದ ಎರಡೂವರೆ ದಿನಗಳಲ್ಲಿ ಸುಮಾರು 70 ಗೌರವಾನ್ವಿತ ಸಂಸದರು ಈ ಚರ್ಚೆಯಲ್ಲಿ ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ರಾಷ್ಟ್ರಪತಿಗಳ ಭಾಷಣಕ್ಕೆ ಇರುವ ನಮ್ಮ ವ್ಯಾಖ್ಯಾನವನ್ನು ಪುಷ್ಟೀಕರಿಸಿದ ನಿಮ್ಮೆಲ್ಲರ ಅಮೂಲ್ಯ ಕೊಡುಗೆಗಳಿಗಾಗಿ ನಾನು ನಿಮ್ಮೆಲ್ಲರಿಗೂ ನನ್ನ ಕೃತಜ್ಞತೆ ಸಲ್ಲಿಸುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ಭಾರತದ ಸ್ವಾತಂತ್ರ್ಯ ಮತ್ತು ನಮ್ಮ ಸಂಸದೀಯ ಪ್ರಜಾಸತ್ತಾತ್ಮಕ ಪ್ರಯಾಣ ಇತಿಹಾಸದಲ್ಲಿ, ಈ ದೇಶದ ಜನರು ಹಲವು ದಶಕಗಳ ನಂತರ ಸತತ 3ನೇ ಅವಧಿಗೆ ಸರ್ಕಾರಕ್ಕೆ ಸೇವೆ ಸಲ್ಲಿಸುವ ಉದಾರ ಅವಕಾಶ ನೀಡಿದ್ದಾರೆ. 60 ವರ್ಷಗಳ ನಂತರ ಮೊದಲ ಬಾರಿಗೆ, 10 ವರ್ಷಗಳ ಕಾಲ ಸೇವೆ ಸಲ್ಲಿಸಿದ ನಂತರ ಸರ್ಕಾರವು ಮತ್ತೆ ಅಧಿಕಾರಕ್ಕೆ ಬಂದಿದೆ. 6 ದಶಕಗಳ ಭಾರತೀಯ ಪ್ರಜಾಪ್ರಭುತ್ವದ ನಂತರ ಸಂಭವಿಸಿದ ಈ ಘಟನೆ ನಿಜಕ್ಕೂ ಅಸಾಧಾರಣ. ಆದರೆ, ಕೆಲವರು ಇದನ್ನು ಉದ್ದೇಶಪೂರ್ವಕವಾಗಿ ನಿರ್ಲಕ್ಷಿಸಿದ್ದಾರೆ, ಕೆಲವರು ಅದನ್ನು ಅರ್ಥ ಮಾಡಿಕೊಳ್ಳಲು ವಿಫಲರಾಗಿದ್ದಾರೆ. ಅರ್ಥ ಮಾಡಿಕೊಂಡವರು ಗದ್ದಲ ಸೃಷ್ಟಿಸುವ ಮೂಲಕ ಜನರ ಬುದ್ಧಿವಂತಿಕೆ ಮತ್ತು ಈ ಮಹತ್ವದ ನಿರ್ಧಾರವನ್ನು ದುರ್ಬಲಗೊಳಿಸುವ ಪ್ರಯತ್ನ ಮಾಡಿದ್ದಾರೆ. ಕಳೆದ 2 ದಿನಗಳಿಂದ ಅವರು ತಮ್ಮ ಸೋಲು ಮತ್ತು ನಮ್ಮ ಗೆಲುವನ್ನು ಭಾರವಾದ ಹೃದಯದಿಂದ ಮತ್ತು ದುರ್ಬಲ ಮನೋಭಾವದಿಂದ ಒಪ್ಪಿಕೊಂಡಿರುವುದನ್ನು ನಾನು ಗಮನಿಸಿದ್ದೇನೆ.

ಗೌರವಾನ್ವಿತ ಸಭಾಪತಿಗಳೆ,

ಕಾಂಗ್ರೆಸ್‌ನ ನಮ್ಮ ಕೆಲವು ಸ್ನೇಹಿತರಿಗೆ ನನ್ನ ಹೃತ್ಪೂರ್ವಕ ಧನ್ಯವಾದಗಳನ್ನು ಸಲ್ಲಿಸಲು ಬಯಸುತ್ತೇನೆ. ಫಲಿತಾಂಶಗಳು ಬಂದಾಗಿನಿಂದ, ಪಕ್ಷದ ಬೆಂಬಲದ ಕೊರತೆಯ ಹೊರತಾಗಿಯೂ, ನಮ್ಮ ಸ್ನೇಹಿತರೊಬ್ಬರು ಒಬ್ಬರೇ ದೃಢವಾಗಿ ನಿಂತು ಅವರ ಪಕ್ಷದ ಧ್ವಜವನ್ನು ಮಾತ್ರ ಹಿಡಿದಿರುವುದನ್ನು ನಾನು ಗಮನಿಸಿದ್ದೇನೆ. ಅವರ ಕಾರ್ಯಗಳು ಪ್ರತಿಕೂಲವಾಗಿ ತೋರುತ್ತಿದ್ದರೂ, ಯಾವುದೋ ರೂಪದ ಆಶೀರ್ವಾದ ಎಂದು ನಾನು ನಂಬುತ್ತೇನೆ. ನಾನು ಇದನ್ನು ಏಕೆ ಹೇಳುತ್ತಿದ್ದೇನೆ? ಏಕೆಂದರೆ ಅವರು 'ಮೂರನೇ ಒಂದು ಭಾಗದ ಸರ್ಕಾರ' ಎಂಬ ಪರಿಕಲ್ಪನೆಯನ್ನು ಪದೇಪದೆ ಒತ್ತಿ ಹೇಳಿದರು. ಇದಕ್ಕಿಂತ ದೊಡ್ಡ ಸತ್ಯ ಇನ್ನೇನಿದೆ? ನಾವು 10 ವರ್ಷಗಳನ್ನು ಪೂರ್ಣಗೊಳಿಸಿದ್ದೇವೆ, ಇನ್ನೂ 20 ವರ್ಷಗಳು ಮುಂದೆ ಬರಲಿವೆ. ಮೂರನೇ ಒಂದು ಭಾಗವನ್ನು ಸಾಧಿಸಲಾಗಿದೆ ಮತ್ತು 3ನೇ 2ರಷ್ಟು ಇನ್ನೂ ಮಾಡಬೇಕಿದೆ. ಅವರ ಭವಿಷ್ಯವಾಣಿಗೆ ನಾನು ನಿಜಕ್ಕೂ ಕೃತಜ್ಞನಾಗಿದ್ದೇನೆ.

ಗೌರವಾನ್ವಿತ ಸಭಾಪತಿಗಳೆ,

ಕಳೆದ 10 ವರ್ಷಗಳಿಂದ ಅಚಲವಾದ ಸಮರ್ಪಣಾ ಭಾವ ಮತ್ತು ನಿರಂತರ ಸೇವೆಯಿಂದ ಮಾಡಿದ ಕೆಲಸವನ್ನು ಈ ನಾಡಿನ ಜನತೆ ತುಂಬು ಹೃದಯದಿಂದ ಬೆಂಬಲಿಸಿದ್ದಾರೆ. ಪ್ರಜೆಗಳು ನಮಗೆ ಆಶೀರ್ವಾದ ಮಾಡಿದ್ದಾರೆ. ಗೌರವಾನ್ವಿತ ಸಭಾಪತಿಗಳೆ, ಈ ಚುನಾವಣೆಯಲ್ಲಿ ದೇಶದ ಜನತೆ ಸುಳ್ಳು, ಅಪಪ್ರಚಾರವನ್ನು ಸೋಲಿಸಿ, ಅವರು ಪ್ರದರ್ಶಿಸಿದ ಬುದ್ಧಿವಂತಿಕೆಗೆ ನಾವು ಹೆಮ್ಮೆ ಪಡುತ್ತೇವೆ. ಜನರು 'ಭ್ರಮೆಯ ರಾಜಕೀಯ'ಕ್ಕಿಂತ ಕಾರ್ಯಕ್ಷಮತೆಗೆ ಆದ್ಯತೆ ನೀಡಿದರು ಮತ್ತು 'ವಿಶ್ವಾಸಾರ್ಹ ರಾಜಕೀಯ'ವನ್ನು ಅನುಮೋದಿಸಿದರು.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಸಂವಿಧಾನ ಜಾರಿಯಾದ 75ನೇ ವರ್ಷಕ್ಕೆ ಕಾಲಿಡುತ್ತಿದ್ದೇವೆ. ಈ ಮೈಲಿಗಲ್ಲು ಈ ಸದನಕ್ಕೂ ಮಹತ್ವದ್ದಾಗಿದೆ, ಏಕೆಂದರೆ ಇದು ಅದರ 75 ನೇ ವಾರ್ಷಿಕೋತ್ಸವದೊಂದಿಗೆ ಹೊಂದಿಕೆಯಾಗುತ್ತದೆ, ಇದು ನಿಜವಾಗಿಯೂ ಅದ್ಭುತವಾದ ಕಾಕತಾಳೀಯವಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಈ ದೇಶದ ಸಾರ್ವಜನಿಕ ಜೀವನದಲ್ಲಿ ನನ್ನಂತಹ ಅನೇಕ ಜನರಿದ್ದಾರೆ, ಅವರ ಕುಟುಂಬದ ಹಿರಿಯರು ಅಥವಾ ಸದಸ್ಯರು ಯಾವುದೇ ರಾಜಕೀಯ ಸ್ಥಾನ ಹೊಂದಿರಲಿಲ್ಲ, ಗ್ರಾಮ ಸರಪಂಚರರಾಗಲಿ ಅಥವಾ ಗ್ರಾಮ ಮುಖ್ಯಸ್ಥರೇ ಆಗಲಿ, ಯಾವುದೇ ಸ್ಥಾನ ಅಲಂಕರಿಸಿರಲಿಲ್ಲ. ಯಾವುದೇ ರಾಜಕೀಯ ಸಂಪರ್ಕವಿಲ್ಲದಿದ್ದರೂ, ಇಂದು ನಾವು ಮಹತ್ವದ ಸ್ಥಾನಗಳಲ್ಲಿ ಇದ್ದುಕೊಂಡು ದೇಶಕ್ಕೆ ಸೇವೆ ಸಲ್ಲಿಸುತ್ತಿದ್ದೇವೆ. ಇದಕ್ಕೆ ಕಾರಣ ಬಾಬಾ ಸಾಹೇಬ್ ಅಂಬೇಡ್ಕರ್ ಅವರು ನಮಗೆ ಸಂವಿಧಾನದಲ್ಲಿ ನೀಡಿರುವ ಅವಕಾಶಗಳು. ಈ ಸಂವಿಧಾನದಿಂದಾಗಿ ನನ್ನಂತಹ ಅನೇಕ ಜನರು ಈ ಸ್ಥಾನಗಳನ್ನು ತಲುಪಿದ್ದಾರೆ, ಸಾರ್ವಜನಿಕರು ಅದನ್ನು ಅನುಮೋದಿಸಿದ್ದಾರೆ, ನಮಗೆ 3ನೇ ಬಾರಿ ಸೇವೆ ಮಾಡುವ ಅವಕಾಶ ನೀಡಿದ್ದಾರೆ.

ಗೌರವಾನ್ವಿತ ಸಭಾಪತಿ ಅವರೆ,

ನಮಗೆ, ಸಂವಿಧಾನವು ಕೇವಲ ಲೇಖನಗಳ ಸಂಕಲನವಲ್ಲ. ಅದರ ಆತ್ಮ ಮತ್ತು ಮಾತುಗಳು ನಮಗೆ ಅಪಾರ ಮೌಲ್ಯಯುತವಾಗಿವೆ. ಸಂವಿಧಾನವು ಯಾವುದೇ ಸರ್ಕಾರದ ನೀತಿ-ನಿರೂಪಣೆ ಮತ್ತು ಚಟುವಟಿಕೆಗಳಿಗೆ ಮಾರ್ಗದರ್ಶನ ನೀಡುವ ದೀಪಸ್ತಂಭ ಮತ್ತು ದಿಕ್ಸೂಚಿಯಾಗಿ ಕಾರ್ಯ ನಿರ್ವಹಿಸುತ್ತದೆ ಎಂದು ನಾವು ನಂಬುತ್ತೇವೆ.

ಗೌರವಾನ್ವಿತ ಸಭಾಪತಿ ಅವರೆ,

ನವೆಂಬರ್ 26 ಅನ್ನು ಸಂವಿಧಾನ ದಿನವನ್ನಾಗಿ ಆಚರಿಸುವುದಾಗಿ ನಮ್ಮ ಸರ್ಕಾರ ಲೋಕಸಭೆಯಲ್ಲಿ ಘೋಷಿಸಿದ್ದು ನನಗೆ ಇನ್ನೂ ನೆನಪಿದೆ. ಈಗಾಗಲೇ ಜನವರಿ 26 ಇರುವಾಗ ನಮಗೆ ಸಂವಿಧಾನ ದಿನ ಏಕೆ ಬೇಕು ಎಂದು ಪ್ರಶ್ನಿಸಿ, ಸಂವಿಧಾನದ ಪ್ರತಿಗಳನ್ನು 'ಬೀಸುವ' ಜನರು ಈ ಕಲ್ಪನೆಯನ್ನು ವಿರೋಧಿಸುತ್ತಿದ್ದಾರೆ ಎಂದು ತಿಳಿದು ನನಗೆ ಆಶ್ಚರ್ಯವಾಯಿತು. ಸಂವಿಧಾನ ದಿನದ ಮೂಲಕ, ದೇಶಾದ್ಯಂತ ಶಾಲೆಗಳು ಮತ್ತು ಕಾಲೇಜುಗಳಲ್ಲಿ ಸಂವಿಧಾನದ ಚೈತನ್ಯ ತುಂಬುವ ಗುರಿಯನ್ನು ನಾವು ಹೊಂದಿದ್ದೇವೆ. ಸಂವಿಧಾನ ರಚಿಸುವಲ್ಲಿ ರಾಷ್ಟ್ರದ ಗಣ್ಯ ವ್ಯಕ್ತಿಗಳು ವಹಿಸಿದ ಪಾತ್ರವನ್ನು ವಿದ್ಯಾರ್ಥಿಗಳು ಅರ್ಥ ಮಾಡಿಕೊಳ್ಳಬೇಕೆಂದು ನಾವು ಬಯಸುತ್ತೇವೆ. ಕೆಲವು ನಿರ್ಧಾರಗಳನ್ನು ಏಕೆ ತೆಗೆದುಕೊಳ್ಳಲಾಗಿದೆ ಅಥವಾ ಬಿಟ್ಟುಬಿಡಲಾಗಿದೆ. ಇಂತಹ ವಿಷಯಗಳ ಕುರಿತು ವಿವರವಾದ ಚರ್ಚೆಗಳಲ್ಲಿ ತೊಡಗಿಸಿಕೊಳ್ಳಬೇಕು. ನಾವು ಪ್ರಬಂಧ ಸ್ಪರ್ಧೆಗಳು, ಚರ್ಚಾ ಸಭೆಗಳು ಮತ್ತು ಸಂವಿಧಾನದ ವ್ಯಾಪಕ ಮೆಚ್ಚುಗೆ ಮತ್ತು ತಿಳುವಳಿಕೆಯನ್ನು ಪ್ರೋತ್ಸಾಹಿಸುತ್ತೇವೆ. ಮುಂಬರುವ ಅವಧಿಯಲ್ಲಿ ಸಂವಿಧಾನವು ನಮ್ಮ ಬಹುದೊಡ್ಡ ಸ್ಫೂರ್ತಿಯಾಗುವುದನ್ನು ಖಚಿತಪಡಿಸಲು ನಾವು ಶ್ರಮಿಸುತ್ತೇವೆ. ನಾವು ಭಾರತದ ಸಂವಿಧಾನ ಹುಟ್ಟಿಗೆ 75ನೇ ವರ್ಷಕ್ಕೆ ಕಾಲಿಡುತ್ತಿರುವಾಗ, ನಾವು ಇದನ್ನು ರಾಷ್ಟ್ರವ್ಯಾಪಿ ಸಾರ್ವಜನಿಕ ಉತ್ಸವವಾಗಿ ಆಚರಿಸಲು ನಿರ್ಧರಿಸಿದ್ದೇವೆ. ಈ ಮೂಲಕ ದೇಶದ ಮೂಲೆ ಮೂಲೆಯಲ್ಲಿ ಸಂವಿಧಾನದ ಆಶಯ ಮತ್ತು ಉದ್ದೇಶಗಳ ಬಗ್ಗೆ ಜಾಗೃತಿ ಮೂಡಿಸುವ ಗುರಿ ಹೊಂದಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಈ ದೇಶದ ಜನರು 3ನೇ ಬಾರಿಗೆ ಸೇವೆ ಮಾಡಲು ನಮಗೆ ಅವಕಾಶ ನೀಡಿದ್ದಾರೆ. ಈ ಅವಕಾಶವು ಅಭಿವೃದ್ಧಿ ಹೊಂದಿದ ಮತ್ತು ಸ್ವಾವಲಂಬಿ ಭಾರತದತ್ತ ಪ್ರಯಾಣ ಬಲಪಡಿಸಲು ನಮಗೆ ಅನುವು ಮಾಡಿಕೊಡುತ್ತದೆ. ಈ ಸಂಕಲ್ಪವನ್ನು ಈಡೇರಿಸಲು ಕೋಟ್ಯಂತರ ಜನರು ನಮಗೆ ಆಶೀರ್ವಾದ ಮಾಡಿದ್ದಾರೆ.

ಗೌರವಾನ್ವಿತ ಸಭಾಪತಿಗಳೆ,

ಈ ಚುನಾವಣೆಯು ಕಳೆದ 10 ವರ್ಷಗಳಲ್ಲಿ ನಮ್ಮ ಸಾಧನೆಗಳಿಗೆ ಅನುಮೋದನೆ ನೀಡಿರುವುದು ಮಾತ್ರವಲ್ಲದೆ, ನಮ್ಮ ಭವಿಷ್ಯದ ಯೋಜನೆಗಳು ಮತ್ತು ನಿರ್ಣಯಗಳಿಗೆ ನೀಡಿರುವ ವಿಶ್ವಾಸದ ಮತವಾಗಿದೆ. ದೇಶದ ಜನರು ನಮ್ಮ ಮೇಲೆ ವಿಶ್ವಾಸವಿಟ್ಟು, ನಮ್ಮ ಕನಸು ಮತ್ತು ಆಕಾಂಕ್ಷೆಗಳನ್ನು ಈಡೇರಿಸಿಕೊಳ್ಳುವ ಅವಕಾಶ ನೀಡಿದ್ದಾರೆ.

ಗೌರವಾನ್ವಿತ ಸಭಾಪತಿಗಳೆ,

ಕಳೆದ 10 ವರ್ಷಗಳಲ್ಲಿ ನಾವು ನಮ್ಮ ಆರ್ಥಿಕತೆಯನ್ನು 10ನೇ ಸ್ಥಾನದಿಂದ ವಿಶ್ವದ ಅಗ್ರ 5ನೇ ಸ್ಥಾನಕ್ಕೆ ಯಶಸ್ವಿಯಾಗಿ ಏರಿಸಿದ್ದೇವೆ ಎಂಬುದು ದೇಶಕ್ಕೆ ಚೆನ್ನಾಗಿ ತಿಳಿದಿದೆ. ನಾವು ಉನ್ನತ ಶ್ರೇಣಿಯನ್ನು ಗುರಿಯಾಗಿಸಿಕೊಂಡಂತೆ, ಸವಾಲುಗಳು ಸಹ ಹೆಚ್ಚಾಗುತ್ತವೆ. ಕೊರೊನಾ ಸಾಂಕ್ರಾಮಿಕ, ಜಾಗತಿಕ ಸಂಘರ್ಷಗಳು ಮತ್ತು ಉದ್ವಿಗ್ನತೆಯ ಕಠಿಣ ಅವಧಿಯ ಹೊರತಾಗಿಯೂ, ನಾವು 5ನೇ ಅತಿದೊಡ್ಡ ಆರ್ಥಿಕತೆಯ ಮೈಲಿಗಲ್ಲು ಸಾಧಿಸುವಲ್ಲಿ ಯಶಸ್ವಿಯಾಗಿದ್ದೇವೆ. 5ನೇ ಸ್ಥಾನದಿಂದ 3ನೇ ಅತಿದೊಡ್ಡ ಆರ್ಥಿಕತೆಗೆ ಮುನ್ನಡೆಯಲು ಜನರು ಈಗ ನಮಗೆ ಜನಾದೇಶ ನೀಡಿದ್ದಾರೆ, ನಾವು ಈ ಗುರಿ ಸಾಧಿಸುತ್ತೇವೆ ಎಂಬ ವಿಶ್ವಾಸ ನನಗಿದೆ. ಕೆಲವು 'ವಿದ್ವಾಂಸರು' ಇದು ಪ್ರಯತ್ನವಿಲ್ಲದೆ ಸ್ವಯಂಚಾಲಿತವಾಗಿ ಸಂಭವಿಸುತ್ತದೆ ಎಂದು ಹೇಳಿರುವುದನ್ನು ನಾನು ಅರ್ಥ ಮಾಡಿಕೊಂಡಿದ್ದೇನೆ. ಇವರು ಸ್ವಯಂ-ಪೈಲಟ್ ಅಥವಾ ರಿಮೋಟ್ ಕಂಟ್ರೋಲ್‌ನಲ್ಲಿ ಸರ್ಕಾರವನ್ನು ನಡೆಸಲು ಒಗ್ಗಿಕೊಂಡಿರುವ ಜನರಾಗಿದ್ದಾರೆ. ಅವರು ಪೂರ್ವಭಾವಿ ಕ್ರಮಗಳನ್ನು ತೆಗೆದುಕೊಳ್ಳುವುದನ್ನು ನಂಬುವುದಿಲ್ಲ, ಬದಲಿಗೆ ಕಾಯುತ್ತಾ ಕೂರುತ್ತಾರೆ. ಆದಾಗ್ಯೂ, ನಾವು ನಮ್ಮ ಪ್ರಯತ್ನಗಳಿಗೆ ಬದ್ಧರಾಗಿದ್ದೇವೆ. ಮುಂಬರುವ ವರ್ಷಗಳಲ್ಲಿ, ಕಳೆದ 10 ವರ್ಷಗಳಲ್ಲಿ ನಾವು ಮಾಡಿರುವ ಪ್ರಗತಿಯನ್ನು ನಾವು ವೇಗಗೊಳಿಸುತ್ತೇವೆ, ನಮ್ಮ ಸಾಧನೆಗಳನ್ನು ವಿಸ್ತರಿಸುತ್ತೇವೆ ಮತ್ತು ಈ ನಿರ್ಣಯವನ್ನು ಪೂರೈಸಲು ಹೊಸ ಎತ್ತರ ಮತ್ತು ಆಳಗಳನ್ನು ತಲುಪುತ್ತೇವೆ.

ಗೌರವಾನ್ವಿತ ಸಭಾಪತಿಗಳೆ,

ಚುನಾವಣೆ ಸಮಯದಲ್ಲಿ ನಾನು ಕಳೆದ 10 ವರ್ಷಗಳಲ್ಲಿ ನಾವು ಮಾಡಿದ ಕೆಲಸ ಕೇವಲ ಜೀರ್ಣಕಾರಕ(ಅಪೆಟೈಸರ್)ವಷ್ಟೆ ಎಂದು ದೇಶವಾಸಿಗಳಿಗೆ ಹೇಳುತ್ತಿದ್ದೆ. ಆದರೆ ಮುಖ್ಯ ಕೆಲಸ ಈಗಷ್ಟೇ ಆರಂಭವಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಮುಂಬರುವ 5 ವರ್ಷಗಳು ಮೂಲಸೌಕರ್ಯಗಳ ಅಭಿವೃದ್ಧಿ ಖಚಿತಪಡಿಸಲು ಮೀಸಲಾಗಿವೆ. ಈ ಅವಧಿಯನ್ನು ಪ್ರತಿ ನಾಗರಿಕರಿಗೂ ಗೌರವಯುತ ಜೀವನ ನಡೆಸಲು ಅಗತ್ಯವಾದ ಸೌಲಭ್ಯಗಳು ಮತ್ತು ಆಡಳಿತ ಪ್ರವೇಶವನ್ನು ಹೊಂದಿರುವ ಯುಗವಾಗಿ ಪರಿವರ್ತಿಸುವ ಗುರಿಯನ್ನು ನಾವು ಹೊಂದಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಮುಂದಿನ 5 ವರ್ಷಗಳು ಬಡತನದ ವಿರುದ್ಧ ನಿರ್ಣಾಯಕ ಯುದ್ಧವಾಗಲಿದೆ. ಈ ಅವಧಿಯು ಬಡತನದ ವಿರುದ್ಧ ಬಡವರ ಹೋರಾಟಕ್ಕೆ ಸಾಕ್ಷಿಯಾಗಲಿದೆ. ಬಡವರು ಒಗ್ಗಟ್ಟಾಗಿ ಮತ್ತು ದೃಢಸಂಕಲ್ಪದಿಂದ ನಿಂತಾಗ ಅವರ ಹೋರಾಟವು ಯಶಸ್ಸಿಗೆ ಕಾರಣವಾಗುತ್ತದೆ ಎಂದು ನಾನು ನಂಬುತ್ತೇನೆ. ಆದ್ದರಿಂದ, ಈ 5 ವರ್ಷಗಳು ಬಡತನದ ವಿರುದ್ಧದ ಹೋರಾಟದಲ್ಲಿ ನಿರ್ಣಾಯಕವಾಗಿದ್ದು, ನಮ್ಮ ದೇಶವು ವಿಜಯಶಾಲಿಯಾಗಲಿದೆ ಎಂಬ ವಿಶ್ವಾಸ ನನಗಿದೆ. ಈ ವಿಶ್ವಾಸವು ಕಳೆದ 10 ವರ್ಷಗಳ ಅನುಭವಗಳು ಮತ್ತು ಸಾಧನೆಗಳನ್ನು ಆಧರಿಸಿದೆ.

ಗೌರವಾನ್ವಿತ ಸಭಾಪತಿಗಳೆ,

ದೇಶವು ವಿಶ್ವದ 3ನೇ ಅತಿದೊಡ್ಡ ಆರ್ಥಿಕತೆಯಾದಾಗ, ಅದರ ಪ್ರಯೋಜನಗಳು ಮತ್ತು ಪರಿಣಾಮವು ಜೀವನದ ಪ್ರತಿಯೊಂದು ಕ್ಷೇತ್ರದಲ್ಲೂ ಕಂಡುಬರುತ್ತದೆ. ಅಭಿವೃದ್ಧಿ ಮತ್ತು ವಿಸ್ತರಣೆಗೆ ಹಲವಾರು ಅವಕಾಶಗಳು ಉದ್ಭವಿಸುತ್ತವೆ. ಆದ್ದರಿಂದ ನಾವು ವಿಶ್ವದ 3ನೇ ಅತಿದೊಡ್ಡ ಆರ್ಥಿಕತೆಯಾದಾಗ, ಈ ಸಾಧನೆಯು ಭಾರತದ ಪ್ರತಿಯೊಂದು ಹಂತದ ಮೇಲೆ ಸಕಾರಾತ್ಮಕ ಪ್ರಭಾವ ಬೀರುತ್ತದೆ, ಜಾಗತಿಕ ವೇದಿಕೆಯ ಮೇಲೆ ಅಭೂತಪೂರ್ವ ಪ್ರಭಾವ ಉಂಟುಮಾಡುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ಮುಂದಿನ ದಿನಗಳಲ್ಲಿ ಹೊಸ ಸ್ಟಾರ್ಟಪ್‌ಗಳು ಮತ್ತು ಕಂಪನಿಗಳ ಜಾಗತಿಕ ಏರಿಕೆಗೆ ನಾವು ಸಾಕ್ಷಿಯಾಗಲಿದ್ದೇವೆ. ನಮ್ಮ ಶ್ರೇಣಿ-2 ಮತ್ತು ಶ್ರೇಣಿ-3 ನಗರಗಳು ದೇಶದ ಭವಿಷ್ಯದಲ್ಲಿ ಬೆಳವಣಿಗೆಯ ಎಂಜಿನ್‌ಗಳಾಗಿ ಮಹತ್ವದ ಪಾತ್ರ ವಹಿಸುತ್ತವೆ ಎಂದು ನಾನು ನಿರೀಕ್ಷಿಸುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ಈ ಶತಮಾನವು ತಂತ್ರಜ್ಞಾನ-ಚಾಲಿತವಾಗಿದೆ. ಹಾಗಾಗಿ, ನಾವು ನಿಸ್ಸಂದೇಹವಾಗಿ ಅನೇಕ ಕ್ಷೇತ್ರಗಳಲ್ಲಿ ಹೊಸ ಪ್ರಗತಿ ನೋಡುತ್ತೇವೆ.

ಗೌರವಾನ್ವಿತ ಸಭಾಪತಿಗಳೆ,

ಮುಂದಿನ 5 ವರ್ಷಗಳಲ್ಲಿ ಸಾರ್ವಜನಿಕ ಸಾರಿಗೆಯಲ್ಲಿ ತ್ವರಿತ ಬದಲಾವಣೆಗಳನ್ನು ನಾವು ನಿರೀಕ್ಷಿಸುತ್ತೇವೆ. ಕೋಟಿಗಟ್ಟಲೆ ಭಾರತೀಯರು ಆದಷ್ಟು ಬೇಗ ಪ್ರಯೋಜನ ಪಡೆಯುವಂತಾಗಲು ನಾವು ಈ ದಿಕ್ಕಿನಲ್ಲಿ ಮುನ್ನಡೆಯಲು ಬದ್ಧರಾಗಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಭಾರತದ ಅಭಿವೃದ್ಧಿ ಪಯಣದಲ್ಲಿ ನಮ್ಮ ಚಿಕ್ಕ ನಗರಗಳು ನಿರ್ಣಾಯಕ ಪಾತ್ರ ವಹಿಸಲಿವೆ. ಕ್ರೀಡೆ, ಶಿಕ್ಷಣ, ನಾವೀನ್ಯತೆ ಅಥವಾ ಪೇಟೆಂಟ್ ನೋಂದಣಿಯಾಗಿರಲಿ, ಈ ಸಾವಿರಾರು ನಗರಗಳು ಭಾರತದಲ್ಲಿ ಅಭಿವೃದ್ಧಿಯ ಹೊಸ ಇತಿಹಾಸ ಸೃಷ್ಟಿಸುವುದನ್ನು ನಾನು ಸ್ಪಷ್ಟವಾಗಿ ನೋಡುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ನಾನು ಮೊದಲೇ ಹೇಳಿದಂತೆ, ಭಾರತದ ಅಭಿವೃದ್ಧಿ ಪಯಣದ 4 ಪ್ರಮುಖ ಆಧಾರಸ್ತಂಭಗಳ ಸಬಲೀಕರಣ ಮತ್ತು ನಾಗರಿಕರಿಗೆ ಒದಗಿಸಲಾದ ಅವಕಾಶಗಳು, ಅದು ಅವರಿಗೆ ಅಪಾರ ಶಕ್ತಿ ನೀಡುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಅಭಿವೃದ್ಧಿಯ ಪ್ರಯತ್ನಗಳ ಕೇಂದ್ರ ಬಿಂದು ಅಥವಾ ಆಧಾರಸ್ತಂಭಗಳಾಗಿ ನಾವು ನಮ್ಮ ದೇಶದ ರೈತರು, ಬಡವರು, ಯುವಕರು ಮತ್ತು ಮಹಿಳೆಯರಿಗೆ ಬಲವಾದ ಒತ್ತು ನೀಡಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಅನೇಕ ಸ್ನೇಹಿತರು ಇಲ್ಲಿ ಕೃಷಿ ಮತ್ತು ರೈತರ ಬಗ್ಗೆ ತಮ್ಮ ವಿವರವಾದ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ, ಅನೇಕ ಸಕಾರಾತ್ಮಕ ಒಳನೋಟಗಳನ್ನು ವ್ಯಕ್ತಪಡಿಸಿದ್ದಾರೆ. ನಾನು ಎಲ್ಲ ಸದಸ್ಯರನ್ನು ಮತ್ತು ರೈತರ ಬಗ್ಗೆ ಹೊಂದಿರುವ ಅವರ ಭಾವನೆಗಳನ್ನು ಗೌರವಿಸುತ್ತೇನೆ. ಕಳೆದ 10 ವರ್ಷಗಳಲ್ಲಿ ನಾವು ವಿವಿಧ ಯೋಜನೆಗಳ ಮೂಲಕ ಕೃಷಿಯನ್ನು ಲಾಭದಾಯಕ ಮತ್ತು ರೈತರಿಗೆ ಲಾಭದಾಯಕವಾಗಿಸುವತ್ತ ಗಮನ ಹರಿಸಿದ್ದೇವೆ. ರೈತರು ಬೆಳೆಗಳಿಗೆ ಮತ್ತು ಹೊಸ ಬೀಜಗಳಿಗೆ ಸಾಲ ಪಡೆಯಲು ನಿರಂತರ ಪ್ರವೇಶವನ್ನು ನಾವು ಖಚಿತಪಡಿಸಿದ್ದೇವೆ. ನಾವು ನ್ಯಾಯಯುತ ಬೆಲೆಗೆ ವ್ಯವಸ್ಥೆ ಮಾಡಿದ್ದೇವೆ. ಹಿಂದಿನ ಅಡೆತಡೆಗಳನ್ನು ನಿವಾರಿಸಿ ಬೆಳೆ ವಿಮೆ ಸುಲಭವಾಗಿ ತಲುಪುವಂತೆ ಮಾಡಿದ್ದೇವೆ. ಕನಿಷ್ಠ ಬೆಂಬಲ ಬೆಲೆಯಲ್ಲಿ ಆಹಾರ ಧಾನ್ಯಗಳ ದಾಸ್ತಾನು ಮಾಡುವಲ್ಲಿ ನಾವು ಎಲ್ಲಾ ಹಳೆಯ ದಾಖಲೆಗಳನ್ನು ಮುರಿದಿದ್ದೇವೆ. ರೈತರಿಗೆ ಹೆಚ್ಚಿನ ಪ್ರಯೋಜನ ನೀಡಿದ್ದೇವೆ. ಬೀಜದಿಂದ ಮಾರುಕಟ್ಟೆಯವರೆಗೆ, ರೈತರಿಗೆ ನಿಖರವಾದ ಯೋಜನೆಯೊಂದಿಗೆ ಪ್ರತಿಯೊಂದು ವ್ಯವಸ್ಥೆ ಬಲಪಡಿಸಲು ನಾವು ಎಲ್ಲ ಪ್ರಯತ್ನಗಳನ್ನು ಮಾಡಿದ್ದೇವೆ. ಲೋಪಕ್ಕೆ ಆಸ್ಪದವಾಗದಂತೆ ಸಮಗ್ರ ವ್ಯವಸ್ಥೆಯನ್ನು ಖಚಿತಪಡಿಸಿದ್ದೇವೆ.

ಸನ್ಮಾನ್ಯ ಸಭಾಪತಿಗಳೆ,

ಹಿಂದೆ, ಸಣ್ಣ ಹಿಡುಳಿದಾರರು ಹೆಚ್ಚಿನ ಸಂಖ್ಯೆಯಲ್ಲಿದ್ದರೂ ಕಿಸಾನ್ ಕ್ರೆಡಿಟ್ ಕಾರ್ಡ್ ಅಥವಾ ಸಾಲ ಪಡೆಯುವುದು ಅಸಾಧ್ಯವಾಗಿತ್ತು. ಇಂದು ನಮ್ಮ ನೀತಿಗಳು ಮತ್ತು ಕಿಸಾನ್ ಕ್ರೆಡಿಟ್ ಕಾರ್ಡ್‌ನ ವಿಸ್ತರಣೆಯಿಂದಾಗಿ ಗಮನಾರ್ಹವಾಗಿ ಬದಲಾಗಿದೆ.

ಸನ್ಮಾನ್ಯ ಸಭಾಪತಿಗಳೆ,

ಹೈನುಗಾರರು ಮತ್ತು ಮೀನುಗಾರರಿಗೆ ಕಿಸಾನ್ ಕ್ರೆಡಿಟ್ ಕಾರ್ಡ್‌ ಪ್ರಯೋಜನಗಳನ್ನು ವಿಸ್ತರಿಸುವ ಮೂಲಕ ನಾವು ಕೃಷಿಗೆ ಸಮಗ್ರ ವಿಧಾನ ಅಳವಡಿಸಿಕೊಂಡಿದ್ದೇವೆ. ಇದು ಕೃಷಿ ಕ್ಷೇತ್ರವನ್ನು ಬಲಪಡಿಸುವುದಲ್ಲದೆ. ಅದರ ವ್ಯಾಪ್ತಿಯನ್ನು ವಿಸ್ತರಿಸಿದೆ.

ಸನ್ಮಾನ್ಯ ಸಭಾಪತಿಗಳೆ,

ಕಾಂಗ್ರೆಸ್ ಅಧಿಕಾರಾವಧಿಯಲ್ಲಿ ರೈತರ ಸಾಲ ಮನ್ನಾ ಕುರಿತು ಉತ್ಪ್ರೇಕ್ಷಿತ ಹೇಳಿಕೆ ನೀಡಿ ಅವರನ್ನು ದಾರಿ ತಪ್ಪಿಸುವ ಕುರಿತು ಸಾಕಷ್ಟು ಸದ್ದು ಮಾಡಿತ್ತು. 60,000 ಕೋಟಿ ರೂ. ಸಾಲ ಮನ್ನಾಕ್ಕೆ ಹೆಚ್ಚಿನ ಗಮನ ನೀಡಲಾಯಿತು, ಆದರೆ ಕೇವಲ 3 ಕೋಟಿ ರೈತರು ಮಾತ್ರ ಅದರ ಲಾಭ ಪಡೆದಿದ್ದಾರೆ ಎಂದು ಅಂದಾಜಿಸಲಾಗಿದೆ. ಯೋಜನೆಯು ಹೆಚ್ಚಿನ ಬೆಂಬಲದ ಅಗತ್ಯವಿರುವ ಸಣ್ಣ ಮತ್ತು ಬಡ ರೈತರ ಅಗತ್ಯಗಳನ್ನು ಪರಿಹರಿಸಲಿಲ್ಲ, ಯೋಜನೆಯ ಪ್ರಯೋಜನಗಳು ಅವರನ್ನು ತಲುಪಲೇ ಇಲ್ಲ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಸರ್ಕಾರದ ಕಾರ್ಯಸೂಚಿಯಲ್ಲಿ ಕೃಷಿಕರ ರೈತ ಕಲ್ಯಾಣವೇ ಮುಖ್ಯವಾದಾಗ ನೀತಿಗಳನ್ನು ಹೇಗೆ ರಚಿಸಲಾಗುತ್ತದೆ, ಕಲ್ಯಾಣವನ್ನು ಹೇಗೆ ಸಾಧಿಸಲಾಗುತ್ತದೆ ಮತ್ತು ಪ್ರಯೋಜನಗಳನ್ನು ಹೇಗೆ ತಲುಪಿಸಲಾಗುತ್ತದೆ ಎಂಬುದನ್ನು ನಾನು ವಿವರಿಸಲು ಬಯಸುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ನಾವು ಪ್ರಧಾನ ಮಂತ್ರಿ ಕಿಸಾನ್ ಸಮ್ಮಾನ್ ಯೋಜನೆ ಪ್ರಾರಂಭಿಸಿದ್ದೇವೆ, ಇದು 10 ಕೋಟಿ ರೈತರಿಗೆ ಪ್ರಯೋಜನವನ್ನು ನೀಡುತ್ತದೆ. ಕಳೆದ 6 ವರ್ಷಗಳಲ್ಲಿ ಈ ಯೋಜನೆಯಡಿ ರೈತರಿಗೆ 3 ಲಕ್ಷ ಕೋಟಿ ರೂ. ಒದಗಿಸಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಸುಳ್ಳು ಪ್ರಚಾರ ಮಾಡುವವರಿಗೆ ಸತ್ಯವನ್ನು ಕೇಳುವ ತಾಕತ್ತು ಇಲ್ಲ ಎನ್ನುವುದನ್ನು ರಾಷ್ಟ್ರ ಸೂಕ್ಷ್ಮವಾಗಿ ಗಮನಿಸುತ್ತಿದೆ. ಸತ್ಯ ಎದುರಿಸಲು ಇಚ್ಛಿಸದವರಲ್ಲಿ ಅವರು ಎತ್ತುವ ಪ್ರಶ್ನೆಗಳಿಗೆ ಉತ್ತರಗಳನ್ನು ಕೇಳಲು ಮತ್ತು ವಿಸ್ತೃತ ಚರ್ಚೆಯ ನಂತರ ಕುಳಿತುಕೊಳ್ಳುವ ಧೈರ್ಯದ ಕೊರತೆಯಿದೆ. ಅವರ ಆ ಎಲ್ಲಾ ವರ್ತನೆಗಳು ಮೇಲ್ಮನೆಗೆ ಅಗೌರವ ಮತ್ತು ಸದನದ ಗೌರವಾನ್ವಿತ ಸಂಪ್ರದಾಯಗಳಿಗೆ ಅಗೌರವ ತಂದಿದೆ.

ಗೌರವಾನ್ವಿತ ಸಭಾಪತಿಗಳೆ,

ಈ ದೇಶದ ಜನರು ಅವರನ್ನು ನಿರ್ಣಾಯಕವಾಗಿ ಸೋಲಿಸಿದ್ದಾರೆ. ಅವರಿಗೆ ಎದುರುನೋಡಲು ಬೀದಿ ಪ್ರತಿಭಟನೆಗಳನ್ನು ಬಿಟ್ಟು ಬೇರೇನೂ ಇಲ್ಲ. ಘೋಷಣೆಗಳನ್ನು ಕೂಗುವುದು, ಕಲಾಪಕ್ಕೆ ಅಡ್ಡಿಪಡಿಸುವುದು ಮತ್ತು ಜವಾಬ್ದಾರಿಗಳಿಂದ ನುಳುಚಿಕೊಳ್ಳುವುದು ಅವರ ಅನಿವಾರ್ಯ ಹಣೆಬರಹವೆಂದು ತೋರುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ಅವರ ಹತಾಶೆ ನನಗೆ ಅರ್ಥವಾಗುತ್ತದೆ. 140 ಕೋಟಿ ದೇಶವಾಸಿಗಳ ನಿರ್ಧಾರ ಮತ್ತು ಆದೇಶವನ್ನು ಒಪ್ಪಿಕೊಳ್ಳಲು ಅವರಿಗೆ ಸಾಧ್ಯವಾಗುತ್ತಿಲ್ಲ. ನಿನ್ನೆ, ಅವರ ಎಲ್ಲಾ ಪ್ರಯತ್ನಗಳು ವಿಫಲವಾದವು; ಆದ್ದರಿಂದ ಇಂದು ಅವರು ಹೋರಾಟ ಮುಂದುವರಿಸಲು ಧೈರ್ಯ ಹೊಂದಿಲ್ಲ, ಬದಲಿಗೆ ಸದನವನ್ನು ತೊರೆಯಲು ನಿರ್ಧರಿಸಿದ್ದಾರೆ.

ಗೌರವಾನ್ವಿತ ಸಭಾಪತಿಗಳೆ,

ನಾನು ಇಲ್ಲಿ ಕರ್ತವ್ಯ ಪ್ರಜ್ಞೆಯಿಂದ ಬಂದಿದ್ದೇನೆಯೇ ಹೊರತು ಚರ್ಚೆಗಳನ್ನು ಗೆಲ್ಲಲು ಅಲ್ಲ. ದೇಶದ ಸೇವಕನಾಗಿ, ನನ್ನ ದೇಶದ ಜನರಿಗೆ ನಾನು ಜವಾಬ್ದಾರನಾಗಿರುತ್ತೇನೆ. ನಮ್ಮ ರಾಷ್ಟ್ರದ ನಾಗರಿಕರಿಗೆ ಪ್ರತಿ ಕ್ಷಣವನ್ನು ಲೆಕ್ಕ ಹಾಕುವುದು ನನ್ನ ಜವಾಬ್ದಾರಿಯಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಜಾಗತಿಕ ಪರಿಸ್ಥಿತಿಗಳಿಂದಾಗಿ, ತೀವ್ರ ರಸಗೊಬ್ಬರ ಬಿಕ್ಕಟ್ಟು ಹೊರಹೊಮ್ಮಿತು. ನಮ್ಮ ರೈತರಿಗೆ ತೊಂದರೆಯಾಗದಂತೆ ಗೊಬ್ಬರ ಪೂರೈಕೆಯನ್ನು ನಾವು ಖಚಿತಪಡಿಸಿಕೊಂಡಿದ್ದೇವೆ, ಸುಮಾರು 12 ಲಕ್ಷ ಕೋಟಿ ರೂ. ಮೊತ್ತದ ರಸಗೊಬ್ಬರಗಳ ದಾಖಲೆಯ ಸಬ್ಸಿಡಿ ಒದಗಿಸಿದ್ದೇವೆ. ಇದು ಸ್ವತಂತ್ರ ಭಾರತದ ಇತಿಹಾಸದಲ್ಲೇ ಅತ್ಯಧಿಕವಾಗಿದೆ. ಈ ಪೂರ್ವಭಾವಿ ಕ್ರಮವು ನಮ್ಮ ರೈತರನ್ನು ಅಂತಹ ದೊಡ್ಡ ಹೊರೆಯಿಂದ ಮುಕ್ತಗೊಳಿಸಿತು, ಬದಲಿಗೆ ಸರ್ಕಾರವೇ ಅದನ್ನು ಭರಿಸಿತು.

ಗೌರವಾನ್ವಿತ ಸಭಾಪತಿಗಳೆ,

ನಾವು ಕನಿಷ್ಟ ಬೆಂಬಲ ಬೆಲೆಗಳಲ್ಲಿ (ಎಂಎಸ್ಪಿ) ದಾಖಲೆಯ ಏರಿಕೆ ಸಾಧಿಸಿದ್ದೇವೆ. ಇದಲ್ಲದೆ, ನಾವು ದಾಸ್ತಾನು ಅಥವಾ ಸಂಗ್ರಹಣೆಯಲ್ಲೂ ಹೊಸ ದಾಖಲೆಗಳನ್ನು ನಿರ್ಮಿಸಿದ್ದೇವೆ. ಹಿಂದೆ, ಎಂಎಸ್ಪಿ ಪ್ರಕಟಣೆಗಳು ಕೇವಲ ಸಾಂಕೇತಿಕವಾಗಿದ್ದವು, ಯಾವುದೇ ಖರೀದಿಗಳನ್ನು ಮಾಡದ ಕಾರಣ ರೈತರಿಗೆ ಸ್ವಲ್ಪ ಪ್ರಾಯೋಗಿಕ ಪ್ರಯೋಜನ ನೀಡುತ್ತವೆ. ಮೊದಲಿಗಿಂತ ಗಣನೀಯವಾಗಿ ಹೆಚ್ಚಿನ ಆಹಾರ ಧಾನ್ಯಗಳನ್ನು ಸಂಗ್ರಹಿಸುವ ಮೂಲಕ, ನಾವು ರೈತರನ್ನು ಸಬಲೀಕರಣಗೊಳಿಸುವ ಗುರಿ ಹೊಂದಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಕಳೆದ 1 ದಶಕದಲ್ಲಿ ನಾವು ಕಾಂಗ್ರೆಸ್ ಸರ್ಕಾರಕ್ಕೆ ಹೋಲಿಸಿದರೆ ಗೋಧಿ ಮತ್ತು ಭತ್ತ ಬೆಳೆಗಾರರಿಗೆ 2.5 ಪಟ್ಟು ಹೆಚ್ಚು ಆರ್ಥಿಕ ನೆರವು ನೀಡಿದ್ದೇವೆ. ಮುಂಬರುವ 5 ವರ್ಷಗಳಲ್ಲಿ ನಾವು ಈ ಹೆಚ್ಚುತ್ತಿರುವ ಬೆಳವಣಿಗೆ ಮುಂದುವರಿಸುವ ಜತೆಗೆ, ಹೊಸ ಕ್ಷೇತ್ರಗಳಲ್ಲಿನ ಸವಾಲುಗಳನ್ನು ಎದುರಿಸುವ ಗುರಿ ಹೊಂದಿದ್ದೇವೆ. ಇದನ್ನು ಸಾಧಿಸಲು, ನಾವು ಆಹಾರ ಧಾನ್ಯ ಸಂಗ್ರಹಣೆಗಾಗಿ ವಿಶ್ವದ ಅತಿ ದೊಡ್ಡ ಅಭಿಯಾನ ಪ್ರಾರಂಭಿಸಿದ್ದೇವೆ. ಲಕ್ಷಗಳಲ್ಲಿ ವಿಕೇಂದ್ರೀಕೃತ ಶೇಖರಣಾ ಅಥವಾ ದಾಸ್ತಾನು ಸೌಲಭ್ಯಗಳನ್ನು ಸ್ಥಾಪಿಸುವ ಕೆಲಸ ಪ್ರಾರಂಭಿಸಿದ್ದೇವೆ. 'ಹಣ್ಣುಗಳು ಮತ್ತು ತರಕಾರಿಗಳು' ಅಂತಹ ಒಂದು ಕ್ಷೇತ್ರವಾಗಿದೆ. ರೈತರು ಆ ದಿಕ್ಕಿನಲ್ಲಿ ಸಾಗಬೇಕೆಂದು ನಾವು ಬಯಸುತ್ತೇವೆ. ಅವುಗಳ ಶೇಖರಣೆಗಾಗಿ ಸಮಗ್ರ ಮೂಲಸೌಕರ್ಯ ನಿರ್ಮಿಸಲು ನಾವು ಕೆಲಸ ಮಾಡುತ್ತಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

'ಸಬ್ಕಾ ಸಾಥ್, ಸಬ್ಕಾ ವಿಕಾಸ್' ಎಂಬ ಧ್ಯೇಯವಾಕ್ಯದ ಅಡಿ, ನಾವು ರಾಷ್ಟ್ರ ಸೇವೆಗಾಗಿ ನಮ್ಮ ಪ್ರಯತ್ನಗಳನ್ನು ನಿರಂತರವಾಗಿ ವಿಸ್ತರಿಸಿದ್ದೇವೆ. ಎಲ್ಲಾ ನಾಗರಿಕರಿಗೆ ಗೌರವಯುತ ಜೀವನ ಕಲ್ಪಿಸುವುದು ನಮ್ಮ ಪ್ರಮುಖ ಆದ್ಯತೆಯಾಗಿದೆ. ಸ್ವಾತಂತ್ರ್ಯಾ ನಂತರ ದಶಕಗಳಿಂದ ನಿರ್ಲಕ್ಷಿಸಲ್ಪಟ್ಟವರನ್ನು ಈಗ ನನ್ನ ಸರ್ಕಾರವು ಕಾಳಜಿ ವಹಿಸಿ, ಗೌರವಿಸುತ್ತಿದೆ. ಸೂಕ್ಷ್ಮ ಮಟ್ಟದಲ್ಲಿ ನಮ್ಮ ದಿವ್ಯಾಂಗ ಸಹೋದರರು ಮತ್ತು ಸಹೋದರಿಯರು ಎದುರಿಸುತ್ತಿರುವ ಸವಾಲುಗಳನ್ನು ಅರ್ಥ ಮಾಡಿಕೊಳ್ಳಲು ಮತ್ತು ಪರಿಹರಿಸಲು ನಾವು ಕಾರ್ಯಾಚರಣೆ ಮಾದರಿಯಲ್ಲಿ ಕೆಲಸ ಮಾಡುತ್ತಿದ್ದೇವೆ. ಬಾಹ್ಯ ಸಹಾಯದ ಮೇಲಿನ ಅವರ ಅವಲಂಬನೆ ಕಡಿಮೆ ಮಾಡಲು ಮತ್ತು ಗೌರವಯುತ ಜೀವನ ನಡೆಸಲು ಅವರಿಗೆ ಅನುವು ಮಾಡಿಕೊಡುವ ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸುತ್ತಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಸಮಾಜದಲ್ಲಿ, ಮಂಗಳಮುಖಿಯರು ಅಥವಾ ತೃತೀಯ ಲಿಂಗಿಗಳ ಸಮುದಾಯವು ಐತಿಹಾಸಿಕವಾಗಿ ನಿರ್ಲಕ್ಷ್ಯ ಮತ್ತು ಕಿರುಕುಳ ಎದುರಿಸುತ್ತಿದೆ. ನಮ್ಮ ಸರ್ಕಾರ ಅವರ ಕಲ್ಯಾಣಕ್ಕಾಗಿ ಕಾನೂನುಗಳನ್ನು ಜಾರಿಗೆ ತಂದಿದೆ. ಭಾರತದ ಪ್ರಗತಿಪರ ನಿಲುವಿಗೆ ಪಾಶ್ಚಿಮಾತ್ಯ ರಾಷ್ಟ್ರಗಳಿಂದಲೂ ಪ್ರಶಂಸೆ ವ್ಯಕ್ತವಾಗಿದೆ. ಭಾರತವನ್ನು ಬಹಳ ಹೆಮ್ಮೆಯಿಂದ ನೋಡಲಾಗುತ್ತಿದೆ. ಪದ್ಮ ಪ್ರಶಸ್ತಿಗಳಲ್ಲಿ ಮಂಗಳಮುಖಿಯರನ್ನು ಸೇರಿಸುವ ನಮ್ಮ ಸರ್ಕಾರದ ನಿರ್ಧಾರದಿಂದ ನಾವು ಅವರನ್ನು ಸಮಾಜದ ಮುಖ್ಯವಾಹಿನಿಗೆ ಸಂಯೋಜಿಸುವ ಪ್ರಯತ್ನಗಳನ್ನು ಪ್ರಾರಂಭಿಸಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಬಂಜಾರ ಕುಟುಂಬದಂತಹ ನಮ್ಮ ಅಲೆಮಾರಿ ಬುಡಕಟ್ಟು ಸಮುದಾಯಗಳಿಗೆ, ಅವರ ವಿಶಿಷ್ಟ ಅಗತ್ಯಗಳನ್ನು ಪರಿಹರಿಸಲು ನಾವು ಪ್ರತ್ಯೇಕ ಕಲ್ಯಾಣ ಮಂಡಳಿ ಸ್ಥಾಪಿಸಿದ್ದೇವೆ. ಅವರು ಸ್ಥಿರ, ಸುರಕ್ಷಿತ ಮತ್ತು ಭರವಸೆಯ ಜೀವನ ನಡೆಸುತ್ತಾರೆ ಎಂದು ಖಚಿತಪಡಿಸುವುದು ನಮ್ಮ ಗುರಿಯಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ನಾವು ಸಾಮಾನ್ಯವಾಗಿ ಪಿವಿಟಿಜಿ(ನಿರ್ದಿಷ್ಟವಾಗಿ ದುರ್ಬಲ ಬುಡಕಟ್ಟು ಗುಂಪು) ಎಂಬ ಪದವನ್ನು ನಮ್ಮ ಬುಡಕಟ್ಟು ಸಮುದಾಯಗಳಲ್ಲಿ ಅತ್ಯಂತ ನಿರ್ಲಕ್ಷ್ಯಕ್ಕೆ ಒಳಗಾದವರನ್ನು ಉಲ್ಲೇಖಿಸುತ್ತೇವೆ. ಸ್ವಾತಂತ್ರ್ಯ ಬಂದು ಇಷ್ಟು ವರ್ಷಗಳು ಕಳೆದರೂ ಅವರ ಜೀವನ ಪರಿಸ್ಥಿತಿಗಳು ಹೀನಾಯವಾಗಿವೆ ಮತ್ತು ನಿರ್ಲಕ್ಷ್ಯಕ್ಕೆ ಒಳಗಾಗಿವೆ. ಪ್ರಧಾನಮಂತ್ರಿ ಜನ್ಮ ಯೋಜನೆಯಡಿ 34,000 ಕೋಟಿ ರೂ. ಹಂಚಿಕೆ ಸೇರಿದಂತೆ ವಿಶೇಷ ನಿಬಂಧನೆಗಳನ್ನು ಜಾರಿಗೊಳಿಸಿದ್ದೇವೆ. ಈ ಸಮುದಾಯವು ಚದುರಿಹೋಗಿದೆ ಮತ್ತು ನಿರ್ಲಕ್ಷಿಸಲ್ಪಟ್ಟಿದೆ. ಹಾಗಾಗಿ ಈ ಹಿಂದುಳಿದ ಸಮುದಾಯದ ಬಗ್ಗೆ ಯಾರಿಗೂ ಕಾಳಜಿ ಇರಲಿಲ್ಲ. ಸಾಮಾನ್ಯವಾಗಿ, ರಾಜಕೀಯ ಗಮನವು ಮತದಾನದ ಶಕ್ತಿ ಹೊಂದಿರುವ ಸಮುದಾಯಗಳ ಮೇಲೆ ಕೇಂದ್ರೀಕೃತವಾಗಿದೆ. ಆದರೆ ನಮ್ಮ ಸರ್ಕಾರವು ಚುನಾವಣಾ ಪ್ರಭಾವ ಲೆಕ್ಕಿಸದೆ ಎಲ್ಲರ ಅಭಿವೃದ್ಧಿಗೆ ಆದ್ಯತೆ ನೀಡುತ್ತಿದೆ. ಏಕೆಂದರೆ ನಾವು ಮತ ಗಳಿಕೆ ರಾಜಕೀಯದಲ್ಲಿ ಆಸಕ್ತಿ ಹೊಂದಿಲ್ಲ, ನಮ್ಮ ಗಮನವು ಅಭಿವೃದ್ಧಿ ರಾಜಕೀಯದ ಮೇಲಿದೆ.

ಗೌರವಾನ್ವಿತ ಸಭಾಪತಿಗಳೆ,

ಸಾಂಪ್ರದಾಯಿಕ ಕೌಟುಂಬಿಕ ಕೌಶಲ್ಯಗಳು ಭಾರತದ ಅಭಿವೃದ್ಧಿ ಪಯಣ ಮತ್ತು ಸಾಮಾಜಿಕ ರಚನೆಗೆ ಬಹಳ ಹಿಂದಿನಿಂದಲೂ ಅವಿಭಾಜ್ಯ ಅಂಗವಾಗಿದೆ. ವಿಶ್ವಕರ್ಮ ಸಮುದಾಯವು ಈ ಕೌಶಲ್ಯಗಳನ್ನು ಹೊಂದಿದೆ, ಆದರೂ ಅವುಗಳನ್ನು ಬಹು ದಿನಗಳಿಂದ ಕಡೆಗಣಿಸಲಾಗಿದೆ. ವಿಶ್ವಕರ್ಮ ಸಮುದಾಯವನ್ನು ಆಧುನೀಕರಣಗೊಳಿಸಲು ಮತ್ತು ವೃತ್ತಿಪರಗೊಳಿಸಲು ನಾವು ಸುಮಾರು 13,000 ಕೋಟಿ ರೂ. ಯೋಜನೆ ಪ್ರಾರಂಭಿಸಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಬಡವರಿಗೆ ನೆರವು ನೀಡುವ ಭರವಸೆಯೊಂದಿಗೆ ಬ್ಯಾಂಕ್‌ಗಳನ್ನು ರಾಷ್ಟ್ರೀಕರಣಗೊಳಿಸಿದಾಗ, ನಮ್ಮ ದೇಶದ ಬೀದಿ ವ್ಯಾಪಾರಿಗಳನ್ನು ಸಂಪರ್ಕಿಸಲು ಎಂದಿಗೂ ಧೈರ್ಯ ಮಾಡಲಿಲ್ಲ. ಮೊದಲ ಬಾರಿಗೆ, ಪ್ರಧಾನ ಮಂತ್ರಿ ಸ್ವನಿಧಿ ಯೋಜನೆಯು ಬೀದಿ ವ್ಯಾಪಾರಿಗಳಿಗೆ ಬೆಂಬಲ ವಿಸ್ತರಿಸಿದೆ, ಇದು ಹೆಚ್ಚಿನ ಬಡ್ಡಿದರದ ಸಾಲದ ವಿಷಚಕ್ರದಿಂದ ಮುಕ್ತರಾಗಲು ಅನುವು ಮಾಡಿಕೊಡುತ್ತದೆ. ಇಂದು ತಮ್ಮ ಶ್ರದ್ಧೆ ಮತ್ತು ಪ್ರಾಮಾಣಿಕತೆಯಿಂದ ಬೀದಿಬದಿ ವ್ಯಾಪಾರಿಗಳು ಬ್ಯಾಂಕ್ ಸಾಲ ಪಡೆಯುತ್ತಿದ್ದಾರೆ. ಈ ಪರಿವರ್ತನೆಯು ಬ್ಯಾಂಕರ್‌ಗಳು ಮತ್ತು ಸಾಲಗಾರರಿಗೆ ಸಂತೋಷ ತಂದಿದೆ. ಹಿಂದೆ ತಮ್ಮ ಗಾಡಿಗಳೊಂದಿಗೆ ಫುಟ್‌ಪಾತ್‌ಗಳಲ್ಲಿ ಇರುತ್ತಿದ್ದ ಹಿಂದಿನ ಮಾರಾಟಗಾರರು ಈಗ ಸಣ್ಣ ಅಂಗಡಿಗಳನ್ನು ಸ್ಥಾಪಿಸುವತ್ತ ಸಾಗುತ್ತಿದ್ದಾರೆ, ಜತೆಗೆ, ಹಿಂದಿನ ಕಾರ್ಮಿಕರು ಈಗ ಉದ್ಯೋಗದಾತರಾಗುತ್ತಿದ್ದಾರೆ, ಇತರರಿಗೆ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತಿದ್ದಾರೆ. ಎಲ್ಲರನ್ನೂ ಒಳಗೊಂಡ ಅಭಿವೃದ್ಧಿಯ ಈ ವಿಧಾನವು ಬಡವರು, ದಲಿತರು, ಹಿಂದುಳಿದ ವರ್ಗಗಳು, ಆದಿವಾಸಿಗಳು ಮತ್ತು ಮಹಿಳೆಯರಿಂದ ಗಣನೀಯ ಬೆಂಬಲ ಗಳಿಸುವಲ್ಲಿ ನಮಗೆ ಸಹಾಯ ಮಾಡಿದೆ.

ಗೌರವಾನ್ವಿತ ಸಭಾಪತಿಗಳೆ,

ನಾವು ಮಹಿಳಾ ನೇತೃತ್ವದ ಅಭಿವೃದ್ಧಿ ಚರ್ಚಿಸುವಾಗ, ಇದು ಪ್ರಗತಿಶೀಲ ಸಮಾಜಗಳಲ್ಲಿ ಸ್ವಾಭಾವಿಕ ಅಥವಾ ನೈಸರ್ಗಿಕ ಪ್ರಗತಿ ಎಂದು ಜಾಗತಿಕವಾಗಿ ಗುರುತಿಸಲ್ಪಟ್ಟಿದೆ. ಆದಾಗ್ಯೂ, ಮಹಿಳಾ ನೇತೃತ್ವದ ಅಭಿವೃದ್ಧಿಯ ಉತ್ಸಾಹವು ಅಲ್ಲಿಯೂ ಸಹ ಕೊರತೆ ತೋರುತ್ತದೆ. ಅಂತಹ ಸನ್ನಿವೇಶದಲ್ಲಿ, ಭಾರತದಲ್ಲಿ ನಾವು ಕೇವಲ ಘೋಷಣೆಗಳಲ್ಲದೆ, ನಿಜವಾದ ಬದ್ಧತೆಯಿಂದ ಮಹಿಳಾ ಸಬಲೀಕರಣದತ್ತ ಸಂಕೀರ್ಣ ಹೆಜ್ಜೆಗಳನ್ನು ಇಟ್ಟಿದ್ದೇವೆ. ಈ ಸಬಲೀಕರಣದ ಪ್ರಯೋಜನಗಳು ಪ್ರತಿಯೊಂದು ವಲಯದಾದ್ಯಂತ ಸ್ಪಷ್ಟವಾಗಿ ಗೋಚರಿಸುತ್ತಿವೆ. ಇದು ಭಾರತದ ಅಭಿವೃದ್ಧಿಯ ಪಯಣಕ್ಕೆ ಗಣನೀಯವಾಗಿ ಕೊಡುಗೆ ನೀಡುತ್ತಿದೆ. ನಿನ್ನೆಯ ಚರ್ಚೆಯಲ್ಲಿ ಮಹಿಳಾ ಆರೋಗ್ಯದ ಪ್ರಮುಖ ವಿಷಯಕ್ಕೆ ಒತ್ತು ನೀಡಿದ ಗೌರವಾನ್ವಿತ ಸಂಸದೆ ಸುಧಾಮೂರ್ತಿ ಜಿ ಅವರಿಗೆ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ. ತಾಯಿಯ ನಷ್ಟ ಭರಿಸಲಾಗದು ಎಂದು ಒತ್ತಿಹೇಳುತ್ತಾ ಅವರು, ಈ ಸಮಸ್ಯೆಯ ಮಹತ್ವ ಮತ್ತು ತುರ್ತುಸ್ಥಿತಿಯನ್ನು ಉತ್ಸಾಹದಿಂದ ಎತ್ತಿ ತೋರಿಸಿದರು. ತುಂಬ ಭಾವುಕರಾಗಿ ಈ ಮಾತನ್ನು ಹೇಳಿದರು. ಕಳೆದ ದಶಕದಲ್ಲಿ, ನಾವು ಮಹಿಳೆಯರ ಆರೋಗ್ಯ, ನೈರ್ಮಲ್ಯ ಮತ್ತು ಯೋಗಕ್ಷೇಮ ಕ್ಷೇತ್ರಗಳಿಗೆ ಆದ್ಯತೆ ನೀಡಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ರಾಷ್ಟ್ರಾದ್ಯಂತ ಅಸಂಖ್ಯಾತ ತಾಯಂದಿರು ಮತ್ತು ಸಹೋದರಿಯರಿಗೆ ಅನುಕೂಲವಾಗುವಂತೆ ಶೌಚಾಲಯಗಳು, ನೈರ್ಮಲ್ಯ ಪ್ಯಾಡ್‌ಗಳು, ಗ್ಯಾಸ್ ಸಂಪರ್ಕಗಳು ಮತ್ತು ಗರ್ಭಾವಸ್ಥೆಯ ಲಸಿಕೆ ಸೇವೆ ಒದಗಿಸುವುದನ್ನು ನಾವು ಖಚಿತಪಡಿಸಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಆರೋಗ್ಯ ಉಪಕ್ರಮಗಳ ಜತೆಗೆ, ಮಹಿಳೆಯರ ಸ್ವಾವಲಂಬನೆ ಉತ್ತೇಜಿಸುವಲ್ಲಿ ನಾವು ದೃಢವಾಗಿರುತ್ತೇವೆ. ಇತ್ತೀಚಿನ ವರ್ಷಗಳಲ್ಲಿ ನಿರ್ಮಾಣವಾಗಿರುವ 4 ಕೋಟಿ ಮನೆಗಳಲ್ಲಿ ಹೆಚ್ಚಿನವು ಮಹಿಳೆಯರ ಹೆಸರಿನಲ್ಲಿವೆ. ಬ್ಯಾಂಕ್ ಖಾತೆಗಳನ್ನು ತೆರೆಯುವಂತಹ ಉಪಕ್ರಮಗಳು, ಮುದ್ರಾ ಮತ್ತು ಸುಕನ್ಯಾ ಸಮೃದ್ಧಿಯಂತಹ ಯೋಜನೆಗಳು ಮಹಿಳೆಯರನ್ನು ಆರ್ಥಿಕವಾಗಿ ಸಬಲಗೊಳಿಸಿವೆ. ಅವರ ಕುಟುಂಬದೊಳಗೆ ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಗಳಲ್ಲಿ ಅವರ ಭಾಗವಹಿಸುವಿಕೆಯನ್ನು ಹೆಚ್ಚಿಸಿವೆ.

ಗೌರವಾನ್ವಿತ ಸಭಾಪತಿಗಳೆ,

ಮಹಿಳಾ ಸ್ವಸಹಾಯ ಸಂಘಗಳಲ್ಲಿ ತೊಡಗಿಸಿಕೊಂಡಿರುವ 10 ಕೋಟಿ ಸಹೋದರಿಯರು ತಮ್ಮ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿರುವುದು ಮಾತ್ರವಲ್ಲದೆ, ತಮ್ಮ ಆದಾಯವನ್ನೂ ಹೆಚ್ಚಿಸಿಕೊಂಡಿದ್ದಾರೆ. ಇಲ್ಲಿಯವರೆಗೆ ಈ ಗುಂಪುಗಳಲ್ಲಿ ತೊಡಗಿರುವ 1 ಕೋಟಿ ಸಹೋದರಿಯರು ಒಟ್ಟಾಗಿ ವ್ಯಾಪಾರದಲ್ಲಿ ತೊಡಗಿರುವ ಯಶಸ್ವಿ ಉದ್ಯಮಿಗಳಾಗಿದ್ದಾರೆ. ಹಿಂದೆ ಹಳ್ಳಿಗರೂ ಇವರನ್ನು ನಿರ್ಲಕ್ಷಿಸುತ್ತಿದ್ದರು. ಈ ಒಂದು ಕೋಟಿ ಸಹೋದರಿಯರು 'ಲಖಪತಿ(ಲಕ್ಷಾಧಿಪತಿ) ದೀದಿಗಳು' ಆಗಿದ್ದಾರೆ ಎಂದು ಇಂದು ನಾನು ಹೆಮ್ಮೆಯಿಂದ ಘೋಷಿಸುತ್ತೇನೆ. ಮುಂದೆ ಸಾಗುತ್ತಾ, ನಾವು ಈ ಸಂಖ್ಯೆಯನ್ನು 3 ಕೋಟಿಗೆ ಹೆಚ್ಚಿಸುವ ಗುರಿ ಹೊಂದಿದ್ದೇವೆ. ರಾಷ್ಟ್ರಾದ್ಯಂತ ಮಹಿಳೆಯರ ಸಬಲೀಕರಣಕ್ಕೆನಾವು ಹೊಂದಿರುವ ಬದ್ಧತೆಯನ್ನು ಮುಂದುವರಿಸುತ್ತೇವೆ.

ಗೌರವಾನ್ವಿತ ಸಭಾಪತಿಗಳೆ,

ಪ್ರತಿಯೊಂದು ಹೊಸ ಕ್ಷೇತ್ರದಲ್ಲೂ ಮಹಿಳೆಯರು ಮುನ್ನಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಸರ್ಕಾರ ಬದ್ಧವಾಗಿದೆ. ಹೊಸ ತಂತ್ರಜ್ಞಾನಗಳಲ್ಲಿ ಮಹಿಳೆಯರಿಗೆ ಮೊದಲ ಅವಕಾಶಗಳನ್ನು ಒದಗಿಸುವುದು ನಮ್ಮ ಗುರಿಯಾಗಿದೆ. ಇದರಿಂದ ಅವರು ಮುನ್ನಡೆ ಸಾಧಿಸಬಹುದು. ಈ ದಿಕ್ಕಿನಲ್ಲಿ ಒಂದು ಯಶಸ್ವಿ ಉಪಕ್ರಮವೆಂದರೆ "ನಮೋ ಡ್ರೋನ್ ದೀದಿ" ಅಭಿಯಾನ, ಇದು ತಂತ್ರಜ್ಞಾನವನ್ನು ಬಳಸಿಕೊಂಡು ರೈತರಿಗೆ ಸಹಾಯ ಮಾಡಲು ಗ್ರಾಮೀಣ ಮಹಿಳೆಯರಿಗೆ ಅಧಿಕಾರ ನೀಡಿದೆ. ನನ್ನ ಸಂವಾದ ಸಮಯದಲ್ಲಿ, ಈ ಮಹಿಳೆಯರು ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ, "ಸರ್, ನಮಗೆ ಸೈಕಲ್ ಓಡಿಸಲು ತಿಳಿದಿರಲಿಲ್ಲ, ಈಗ ನೀವು ನಮ್ಮನ್ನು ಪೈಲಟ್‌ಗಳನ್ನಾಗಿ ಮಾಡಿದ್ದೀರಿ. ಇಡೀ ಹಳ್ಳಿಯು ನಮ್ಮನ್ನು 'ಪೈಲಟ್ ದೀದಿ' ಎಂದು ಕರೆಯುತ್ತದೆ." ಈ ಹೊಸ ಘನತೆಯು ಅವರನ್ನು ಸಶಕ್ತಗೊಳಿಸುತ್ತದೆ, ಅವರ ಜೀವನದಲ್ಲಿ ಮಹತ್ವದ ಪ್ರೇರಕಶಕ್ತಿಯಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಇಂತಹ ಸೂಕ್ಷ್ಮ ವಿಷಯಗಳಲ್ಲೂ ರಾಜಕೀಯ ಮೇಲಾಟವೇ ಪ್ರಾಧಾನ್ಯತೆ ಪಡೆದು ನಾಗರಿಕರಿಗೆ ಅದರಲ್ಲೂ ಮಹಿಳೆಯರಿಗೆ ಊಹೆಗೂ ನಿಲುಕದ ಸಂಕಟ ಉಂಟು ಮಾಡುತ್ತಿರುವುದು ವಿಷಾದನೀಯ. ಮಹಿಳೆಯರ ಮೇಲಿನ ದೌರ್ಜನ್ಯಗಳನ್ನು ಪರಿಹರಿಸಲು ವಿರೋಧ ಪಕ್ಷದ ಆಯ್ದ ವಿಧಾನವು ಗಾಢವಾಗಿ ಸಂಬಂಧಿಸಿದೆ.

ಗೌರವಾನ್ವಿತ ಸಭಾಪತಿಗಳೆ,

ನಿಮ್ಮ ಮೂಲಕ, ನಾನು ಯಾವುದೇ ನಿರ್ದಿಷ್ಟ ರಾಜ್ಯ ಗುರಿಯಾಗಿಸಿಕೊಳ್ಳದೆ ಅಥವಾ ರಾಜಕೀಯ ಲಾಭ ಬಯಸದೆ ರಾಷ್ಟ್ರವನ್ನು ಉದ್ದೇಶಿಸಿ ಮಾತನಾಡಲು ಬಯಸುತ್ತೇನೆ. ಇತ್ತೀಚೆಗೆ, ನಾನು ಪಶ್ಚಿಮ ಬಂಗಾಳದ ಸಾಮಾಜಿಕ ಮಾಧ್ಯಮದಲ್ಲಿ ಗೊಂದಲದ ಚಿತ್ರಗಳು ಮತ್ತು ವೀಡಿಯೊಗಳನ್ನು ನೋಡಿದೆ. ರಸ್ತೆಯಲ್ಲಿ ಮಹಿಳೆಯೊಬ್ಬರು ಸಾರ್ವಜನಿಕವಾಗಿ ಹಲ್ಲೆ ನಡೆಸುತ್ತಿರುವುದನ್ನು ಅವರು ಚಿತ್ರಿಸಿದ್ದಾರೆ, ಆದರೆ ಸಾರ್ವಜನಿಕರು ಮಧ್ಯಪ್ರವೇಶಿಸುವ ಬದಲು ವೀಡಿಯೊಗಳನ್ನು ರೆಕಾರ್ಡ್ ಮಾಡಿದ್ದಾರೆ. ಸಂದೇಶಖಾಲಿಯಲ್ಲಿ ನಡೆದ ಈ ಘಟನೆ ಭಯಾನಕವಾಗಿದೆ. ನಾನು ನಿನ್ನೆಯಿಂದ ಕೆಲವು ಪ್ರಮುಖ ನಾಯಕರ ಮಾತುಗಳನ್ನು ಕೇಳುತ್ತಿದ್ದೇನೆ, ಆದರೆ ಈ ಘಟನೆಯ ನೋವು ಅವರ ಮಾತಿನಲ್ಲಿ ಪ್ರತಿಫಲಿಸಲಿಲ್ಲ. ಪ್ರಗತಿಪರ ಮಹಿಳಾ ನಾಯಕಿಯರೆಂದು ಕರೆಸಿಕೊಳ್ಳುವವರೂ ಮೌನ ವಹಿಸಿರುವುದು ಬೇಸರ ತಂದಿದೆ. ಬಹುಶಃ ಕೆಲವು ಪಕ್ಷಗಳು ಅಥವಾ ರಾಜ್ಯದೊಂದಿಗೆ ಅವರು ಹೊಂದಿರುವ ಸಂಪರ್ಕದಿಂದಾಗಿ. ಮಹಿಳೆಯರ ಸಂಕಟದ ಮುಂದೆ ಇಂತಹ ಮೌನವು, ಅವರ ನಾಯಕತ್ವದ ಮೇಲೆ ಅವಮಾನಕರ ಪ್ರತಿಬಿಂಬವಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಪ್ರಮುಖ ವ್ಯಕ್ತಿಗಳು ಸಹ ಇಂತಹ ಸಮಸ್ಯೆಗಳನ್ನು ನಿರ್ಲಕ್ಷಿಸುವುದರಿಂದ ದೇಶಕ್ಕೆ, ನಮ್ಮ ತಾಯಂದಿರಿಗೆ ಮತ್ತು ಸಹೋದರಿಯರಿಗೆ ಅಪಾರ ನೋವು ಉಂಟಾಗುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ರಾಜಕೀಯವೇ ಹೆಚ್ಚು ಆಯ್ಕೆಯಾಗಿದೆ. ಕೆಲವು ರಾಜಕೀಯ ಅಜೆಂಡಾಗಳಿಗೆ ವಿಷಯಗಳು ಹೊಂದಿಕೆಯಾಗದಿದ್ದಾಗ ಅವರು ಕೋಪಗೊಳ್ಳುತ್ತಾರೆ ಮತ್ತು ಅಹಿತಕರವಾಗಿರುತ್ತಾರೆ. ಇದು ಅತ್ಯಂತ ಕಳವಳಕಾರಿ ವಿಷಯ.

ಗೌರವಾನ್ವಿತ ಸಭಾಪತಿಗಳೆ,

3ನೇ ಬಾರಿಗೆ ಪೂರ್ಣ ಬಹುಮತದೊಂದಿಗೆ ಸ್ಥಿರ ಸರ್ಕಾರ ಆಯ್ಕೆ ಮಾಡುವ ಮೂಲಕ, ಭಾರತದ ಜನರು ದೇಶದಲ್ಲಿ ಸ್ಥಿರತೆ ಮತ್ತು ನಿರಂತರತೆ ಖಾತ್ರಿಪಡಿಸಿದ್ದಾರೆ. ಮಾತ್ರವಲ್ಲದೆ, ಈ ಚುನಾವಣಾ ಫಲಿತಾಂಶ ಇಡೀ ಜಗತ್ತಿಗೆ ಭರವಸೆ ತಂದಿದೆ. ಭಾರತ ಈಗ ವಿಶ್ವಾದ್ಯಂತ ಹೂಡಿಕೆದಾರರಿಗೆ ಪ್ರಮುಖ ಆಕರ್ಷಣೆ ತಾಣವಾಗಿ ಹೊರಹೊಮ್ಮುತ್ತಿದೆ. ಅನಿಶ್ಚಯಗಳ ಸಮಯ ಮುಗಿದಿದೆ. ಭಾರತದಲ್ಲಿ ವಿದೇಶಿ ಹೂಡಿಕೆಗಳು ಯುವಜನರಿಗೆ ಹೊಸ ಉದ್ಯೋಗಾವಕಾಶಗಳನ್ನು ತರುತ್ತಿವೆ, ಜಾಗತಿಕ ವೇದಿಕೆಯಲ್ಲಿ ತಮ್ಮ ಪ್ರತಿಭೆ ಪ್ರದರ್ಶಿಸಲು ಅನುವು ಮಾಡಿಕೊಡುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ಭಾರತಕ್ಕೆ ಈ ಗೆಲುವು ಜಾಗತಿಕ ಆರ್ಥಿಕತೆಯಲ್ಲಿ ಸಮತೋಲನ ಪ್ರತಿಪಾದಿಸುವವರಿಗೆ ದೊಡ್ಡ ಭರವಸೆ ನೀಡುತ್ತದೆ. ಇಂದು, ಪಾರದರ್ಶಕತೆ ಎಂಬುದು ವಿಶ್ವಾದ್ಯಂತ ಮೌಲ್ಯಯುತವಾಗಿದೆ, ಭಾರತವು ಹೆಚ್ಚು ಫಲವತ್ತಾದ ನೆಲವಾಗಿ ಕಂಡುಬರುತ್ತಿದೆ.

ಗೌರವಾನ್ವಿತ ಸಭಾಪತಿಗಳೆ,

ಚುನಾವಣಾ ಫಲಿತಾಂಶಗಳ ನಂತರ ಬಂಡವಾಳ ಮಾರುಕಟ್ಟೆಯು ಉತ್ಕರ್ಷ ಅನುಭವಿಸುತ್ತಿದೆ, ಆದರೂ ಜಾಗತಿಕವಾಗಿ ಪ್ರತಿಧ್ವನಿಸುತ್ತಿರುವ ಸಾಕಷ್ಟು ಉತ್ಸಾಹ ಮತ್ತು ಸಂತೋಷವಿದೆ. ವೈಯಕ್ತಿಕ ಅವಲೋಕನದಿಂದ ಹೇಳುವುದಾದರೆ, ಇದರ ನಡುವೆ ನಮ್ಮ ಕಾಂಗ್ರೆಸ್ ಪಕ್ಷದವರೂ ಸಂಭ್ರಮಿಸುತ್ತಿದ್ದಾರೆ. ಆದಾಗ್ಯೂ, ಅವರ ಸಂತೋಷದ ಕಾರಣವನ್ನು ನಾನು ಗ್ರಹಿಸಲು ವಿಫಲನಾಗಿದ್ದೇನೆ. ಹಲವಾರು ಪ್ರಶ್ನೆಗಳು ಉದ್ಭವಿಸುತ್ತವೆ: ಈ ಸಂತೋಷವು ಹ್ಯಾಟ್ರಿಕ್ ಸೋಲುಗಳಿಂದಾಗಿಯೇ? 90ರ ದಶಕಕ್ಕೆ ಶರಣಾಗುವುದೇ ಇದಕ್ಕೆ ಕಾರಣವೇ? ಅಥವಾ ಇನ್ನೊಂದು ವಿಫಲ ಉಡಾವಣೆ ಕಾರಣವೇ?

ಸನ್ಮಾನ್ಯ ಸಭಾಪತಿಗಳೆ,

ಖರ್ಗೆ ಜೀ ಅವರು ಉತ್ಸುಕರಾಗಿರುವುದನ್ನು ನಾನು ಗಮನಿಸಿದ್ದೇನೆ. ಬಹುಶಃ ಖರ್ಗೆ ಜೀ ಅವರು ತಮ್ಮ ಪಕ್ಷಕ್ಕೆ ಸೋಲಿನ ಭಾರ ಹೊರಬೇಕಾದವರನ್ನು ರಕ್ಷಿಸುವ ಮೂಲಕ ಮತ್ತು ಗೋಡೆಯಂತೆ ದೃಢವಾಗಿ ನಿಲ್ಲುವ ಮೂಲಕ ತಮ್ಮ ಪಕ್ಷಕ್ಕೆ ದೊಡ್ಡ ಸೇವೆ ಸಲ್ಲಿಸಿದರು. ಕಾಂಗ್ರೆಸ್ ಪಕ್ಷದ ಇಂತಹ ಧೋರಣೆಗೆ ಇತಿಹಾಸವೇ ಇದೆ, ಆದರೆ ಅಂತಹ ಸಮಯದಲ್ಲಿ, ದಲಿತರು ಮತ್ತು ಹಿಂದುಳಿದ ಸಮುದಾಯಗಳು ಪರಿಣಾಮಗಳನ್ನು ಎದುರಿಸಿದರೆ 'ಕುಟುಂಬ'ವು ಹೊಣೆಗಾರಿಕೆಯಿಂದ ತಪ್ಪಿಸಿಕೊಳ್ಳುತ್ತದೆ. ಇತ್ತೀಚೆಗಷ್ಟೇ ಲೋಕಸಭೆಯಲ್ಲಿ ಸ್ಪೀಕರ್ ಚುನಾವಣೆ ವೇಳೆ ಈ ಮಾದರಿ ಎದ್ದು ಕಾಣುತ್ತಿತ್ತು. ಅವರಿಗೆ ಸೋಲು ಅನಿವಾರ್ಯ ಎಂದು ಗೊತ್ತಿದ್ದರೂ ಕಾರ್ಯತಂತ್ರವಾಗಿ ದಲಿತ ಅಭ್ಯರ್ಥಿಯನ್ನು ಕಣಕ್ಕಿಳಿಸಿದ್ದರು. ರಾಷ್ಟ್ರಪತಿ ಮತ್ತು ಉಪರಾಷ್ಟ್ರಪತಿ ಚುನಾವಣೆಯಲ್ಲೂ ಇದೇ ರೀತಿಯ ತಂತ್ರಗಳನ್ನು ಬಳಸಲಾಯಿತು, ವಿಶೇಷವಾಗಿ 2022ರಲ್ಲಿ ಶ್ರೀ ಸುಶೀಲ್ ಕುಮಾರ್ ಶಿಂಧೆ ಉಪರಾಷ್ಟ್ರಪತಿ ಸ್ಥಾನಕ್ಕೆ ನಾಮನಿರ್ದೇಶನಗೊಂಡು ಸೋಲು ಎದುರಿಸಿದರು. ಇಂತಹ ಧೋರಣೆ ಅಥವಾ ಕ್ರಮವು ದಲಿತ ಅಭ್ಯರ್ಥಿಗೆ ವ್ಯತಿರಿಕ್ತ ಪರಿಣಾಮಗಳನ್ನು ಸೃಷ್ಟಿಸುತ್ತದೆ. 2017ರಲ್ಲಿ ಶ್ರೀಮತಿ ಮೀರಾ ಕುಮಾರ್ ಅವರನ್ನು ಇದೇ ಪರಿಸ್ಥಿತಿಯಲ್ಲಿ ಮುಂದಿಟ್ಟು, ಸೋಲು ಎದುರಿಸಿದರು. ಕಾಂಗ್ರೆಸ್ ಪಕ್ಷದ “ಪರಿಶಿಷ್ಟ ಜಾತಿ, ಪಂಗಡ ಮತ್ತು ಇತರೆ ಹಿಂದುಳಿದ ವರ್ಗಗಳ ವಿರೋಧಿ ನಿಲುವು” ಮಾಜಿ ರಾಷ್ಟ್ರಪತಿ ಶ್ರೀ ರಾಮ್ ನಾಥ್ ಕೋವಿಂದ್ ಅವರಿಗೆ ಅಗೌರವ ತಂದಿತು. ಈ ರೀತಿಯ ಮನಸ್ಥಿತಿಯು ದೇಶದ ಮೊದಲ ಬುಡಕಟ್ಟು ಮಹಿಳಾ ರಾಷ್ಟ್ರಪತಿ ಅವರನ್ನು ಅವಮಾನಿಸುವ ಮತ್ತು ವಿರೋಧಿಸುವ ಯಾವುದೇ ಪ್ರಯತ್ನ ಬಿಡಲಿಲ್ಲ.

ಗೌರವಾನ್ವಿತ ಸಭಾಪತಿಗಳೆ,

ಈ ಸಂಸತ್ತು, ಈ ಮೇಲ್ಮನೆ, ಅರ್ಥಪೂರ್ಣ ಚರ್ಚೆಗಳು, ಸಂವಾದಗಳು ಮತ್ತು ನಮ್ಮ ದೇಶವಾಸಿಗಳ ಪ್ರಯೋಜನಕ್ಕಾಗಿ ಬುದ್ಧಿವಂತಿಕೆಯನ್ನು ಹೊರತೆಗೆಯುವ ವೇದಿಕೆಯಾಗಿ ಕಾರ್ಯ ನಿರ್ವಹಿಸುತ್ತದೆ. ಇದು ನಮ್ಮ ರಾಷ್ಟ್ರದ ಉತ್ತುಂಗ ವೇದಿಕೆ ಎಂದು ಪರಿಗಣಿಸಲಾಗಿದೆ. ಇನ್ನು, ಕಳೆದ 2 ದಿನಗಳಿಂದ ಹಲವು ಹಿರಿಯ ನಾಯಕರ ಮಾತುಗಳು ನನಗೆ ಮಾತ್ರವಲ್, ಇಡೀ ದೇಶವನ್ನೇ ನಿರಾಸೆಗೊಳಿಸಿದೆ. ರಾಷ್ಟ್ರದ ಇತಿಹಾಸದಲ್ಲಿ ಸಂವಿಧಾನ ರಕ್ಷಣೆಯ ಸುತ್ತ ಕೇಂದ್ರೀಕೃತವಾಗಿರುವ ಮೊದಲ ಚುನಾವಣೆ ಇದಾಗಿದೆ ಎಂದು ಇಲ್ಲಿ ಪ್ರತಿಪಾದಿಸಲಾಯಿತು. ನಾನು ಅವರಿಗೆ ನೆನಪಿಸಲೇಬೇಕು: ಅವರು ಈ ಸುಳ್ಳು ನಿರೂಪಣೆ ಮುಂದುವರಿಸಲು ಮುಂದುವರಿಯುತ್ತಾರೆಯೇ? ಪತ್ರಿಕೆಗಳ ಸ್ವಾತಂತ್ರ್ಯ ಮೊಟಕುಗೊಳಿಸಿದಾಗ, ರೇಡಿಯೊಗಳನ್ನು ಮೌನಗೊಳಿಸಿದಾಗ ಮತ್ತು ಭಾಷಣವನ್ನು ನಿಗ್ರಹಿಸಿದ 1977ರ ಚುನಾವಣೆಗಳನ್ನು ಅವರು ಮರೆತಿದ್ದಾರೆ. ಆದರೆ ಜನರು ಪ್ರಜಾಪ್ರಭುತ್ವ ಮರುಸ್ಥಾಪಿಸಲು ಒಂದು ವಿಷಯದ ಮೇಲೆ ಪ್ರತಿಧ್ವನಿಸುವಂತೆ ಮತ ಚಲಾಯಿಸಿದ್ದಾರೆ. ಸಂವಿಧಾನ ಸಂರಕ್ಷಣೆಗಾಗಿ ಜಾಗತಿಕವಾಗಿ ಇದಕ್ಕಿಂತ ಮಹತ್ವದ ಚುನಾವಣೆ ಹಿಂದೆಂದೂ ನಡೆದಿರಲಿಲ್ಲ. 1977ರ ಚುನಾವಣೆಯು ಭಾರತೀಯ ಜನತೆಯಲ್ಲಿ ಪ್ರಜಾಪ್ರಭುತ್ವವು ಎಷ್ಟು ಆಳವಾಗಿ ಬೇರೂರಿದೆ ಎಂಬುದನ್ನು ಪ್ರದರ್ಶಿಸಿತು. ಅಂತಹ ವ್ಯಾಪಕವಾದ ತಪ್ಪು ಮಾಹಿತಿಯು ಮೇಲುಗೈ ಸಾಧಿಸಲು ನಾವು ಅನುಮತಿ ಕೊಡಬೇಕೇ? 1977ರ ಚುನಾವಣೆಯು ಸಂವಿಧಾನ ರಕ್ಷಿಸುವಲ್ಲಿ ಅತ್ಯಂತ ಮಹತ್ವದ್ದಾಗಿದೆ ಎಂದು ನಾನು ದೃಢವಾಗಿ ನಂಬುತ್ತೇನೆ. ಅಲ್ಲಿ ನಮ್ಮ ರಾಷ್ಟ್ರದ ಸಾಮೂಹಿಕ ಬುದ್ಧಿವಂತಿಕೆಯು ಅಧಿಕಾರದಲ್ಲಿರುವವರನ್ನು, ಅದರ ಪಾವಿತ್ರ್ಯತೆಗೆ ಧಕ್ಕೆ ತಂದವರನ್ನು ಹೊರಹಾಕಿತು. ಇತ್ತೀಚೆಗಿನ ಚುನಾವಣೆಯು ಸಂವಿಧಾನ ರಕ್ಷಿಸುವ ವಿಷಯವಾಗಿದ್ದರೆ, ಜನರು ಈ ಗಂಭೀರ ಕರ್ತವ್ಯವನ್ನು ನಮಗೆ ಒಪ್ಪಿಸಿದ್ದಾರೆ. ನಾವು ಅದನ್ನು ರಕ್ಷಿಸಲು ಸಮರ್ಥರಾಗಿದ್ದೇವೆ ಎಂಬುದನ್ನು ಅವರು ನಂಬುತ್ತಾರೆ ಮತ್ತು ಅವರು ನಮ್ಮ ಮೇಲೆ ನಂಬಿಕೆ ಇಟ್ಟಿದ್ದಾರೆ.

ಗೌರವಾನ್ವಿತ ಸಭಾಪತಿಗಳೆ,

ಖರ್ಗೆ ಜೀ ಅವರು ಇಂತಹ ಹೇಳಿಕೆಗಳನ್ನು ನೀಡಿದಾಗ, ಸ್ವಲ್ಪ ದುಃಖ ತಂದಿತು. ಏಕೆಂದರೆ ಅವರು ತುರ್ತು ಪರಿಸ್ಥಿತಿಯಲ್ಲಿ ನಡೆಸಿದ ದೌರ್ಜನ್ಯವನ್ನು ಪ್ರತ್ಯಕ್ಷವಾಗಿ ಕಂಡಿದ್ದಾರೆ. ಆ ಅವಧಿಯಲ್ಲಿ ಸಂವಿಧಾನ ನಿರ್ಲಕ್ಷಿಸಿ, ಪ್ರಜಾಪ್ರಭುತ್ವ ದುರ್ಬಲಗೊಳಿಸಲಾಯಿತು. ಇಡೀ ಸಂವಿಧಾನವನ್ನೇ ಬುಲ್ಡೋಜರ್ ಮಾಡಲಾಯಿತು. ಅದೇ ಪಕ್ಷದ ಪ್ರಮುಖ ನಾಯಕರಾಗಿ, ಅವರು ಈ ಘಟನೆಗಳಿಗೆ ಗೌಪ್ಯವಾಗಿದ್ದಾರೆ, ಆದರೂ ಅವರು ಸದನದ ದಾರಿ ತಪ್ಪಿಸುತ್ತಾರೆ.

ಗೌರವಾನ್ವಿತ ಸಭಾಪತಿಗಳೆ,

ನಾನು ತುರ್ತು ಪರಿಸ್ಥಿತಿಯನ್ನು ಹತ್ತಿರದಿಂದ ನೋಡಿದ್ದೇನೆ. ಕೋಟಿಗಟ್ಟಲೆ ಜನರು ತೀವ್ರ ಚಿತ್ರಹಿಂಸೆ ಅನುಭವಿಸಿದರು, ಅವರ ಜೀವನ ಕಷ್ಟಕರವಾಯಿತು. ಆ ಸಮಯದಲ್ಲಿ ಸಂಸತ್ತಿನ ಕಲಾಪಗಳು ಉತ್ತಮವಾಗಿ ದಾಖಲಿಸಲ್ಪಟ್ಟವು. ಭಾರತದ ಸಂವಿಧಾನದ ಬಗ್ಗೆ ಬೋಧನೆ ನೀಡುವವರಿಗೆ ನಾನು ಕೇಳುತ್ತೇನೆ. ನಿಮ್ಮ 7 ವರ್ಷಗಳ ಅಧಿಕಾರಾವಧಿಯಲ್ಲಿ ಲೋಕಸಭೆ ನಡೆಸುತ್ತಿರುವಾಗ - ಅದರ ಕಡ್ಡಾಯ 5 ವರ್ಷಗಳ ಅವಧಿಯ ಹೊರತಾಗಿಯೂ ಯಾವ ಸಂವಿಧಾನದ ಅಡಿ, ನೀವು ಅಧಿಕಾರ ಚಲಾಯಿಸಿದ್ದೀರಿ, ಜನರನ್ನು ದಬ್ಬಾಳಿಕೆ ಮಾಡಿದ್ದೀರಿ ಮತ್ತು ಈಗ ನಮಗೆ ಸಂವಿಧಾನ ಕುರಿತು ಉಪನ್ಯಾಸ ನೀಡುತ್ತಿದ್ದೀರಿ?

ಗೌರವಾನ್ವಿತ ಸಭಾಪತಿಗಳೆ,

ಈ ವ್ಯಕ್ತಿಗಳು 38ನೇ, 39ನೇ, ಮತ್ತು 42ನೇ ತಿದ್ದುಪಡಿಗಳನ್ನು ಒಳಗೊಂಡಂತೆ ಹಲವಾರು ತಿದ್ದುಪಡಿಗಳ ಮೂಲಕ ಸಂವಿಧಾನದ ಸಾರ ನಾಶ ಮಾಡಲು ಜವಾಬ್ದಾರರಾಗಿದ್ದರು, ಇದನ್ನು ಸಾಮಾನ್ಯವಾಗಿ ಮಿನಿ-ಸಂವಿಧಾನ ಎಂದು ಕರೆಯಲಾಗುತ್ತದೆ. ಅದೆಲ್ಲ ಏನಾಗಿತ್ತು? ಅವರೇ ಈ ಅಕ್ರಮಗಳನ್ನು ಎಸಗಿದಾಗ ‘ಸಂವಿಧಾನದ ರಕ್ಷಣೆ’ ಎಂಬ ಪದಗಳನ್ನು ಅವರು ಈಗ ಹೇಗೆ ಕೂಗುತ್ತಾರೆ? ತುರ್ತು ಪರಿಸ್ಥಿತಿಯ ಮೇಲ್ವಿಚಾರಣೆಯ ಹಿಂದಿನ ಸರ್ಕಾರದ ಅವಧಿಯಲ್ಲಿ ಖರ್ಗೆ ಜಿ ಅವರು 10 ವರ್ಷಗಳ ಕಾಲ ಸಂಪುಟದಲ್ಲಿ ಸೇವೆ ಸಲ್ಲಿಸಿದರು. ಏನಾಯಿತು? ಪ್ರಧಾನ ಮಂತ್ರಿ ಸ್ಥಾನವು ಸಾಂವಿಧಾನಿಕ ಕಚೇರಿಯಾಗಿದೆ. ಪ್ರಧಾನ ಮಂತ್ರಿಗಳ ಕಚೇರಿಯ ಮೇಲ್ವಿಚಾರಣೆಗಾಗಿ ರಾಷ್ಟ್ರೀಯ ಸಲಹಾ ಮಂಡಳಿ(ಎನ್ಎಸಿ) ಸ್ಥಾಪನೆಯು ಪ್ರಶ್ನೆಗಳನ್ನು ಹುಟ್ಟುಹಾಕುತ್ತದೆ. ಯಾವ ಸಾಂವಿಧಾನಿಕ ಅಧಿಕಾರದ ಅಡಿ ಈ ವ್ಯವಸ್ಥೆ ಮಾಡಲಾಗಿದೆ? ಯಾವ ಸಾಂವಿಧಾನಿಕ ಆದೇಶದ ಮೂಲಕ ಅವರು ಅದನ್ನು ಜಾರಿಗೆ ತಂದರು? ಈ ಕಾಯಿದೆಯು ಪ್ರಧಾನಿ ಸ್ಥಾನದ ಘನತೆಗೆ ಧಕ್ಕೆ ತಂದಿತು, ರಿಮೋಟ್ ಪೈಲಟ್‌ನಂತೆ ನಿಯಂತ್ರಣವನ್ನು ಸಮರ್ಥವಾಗಿ ವಹಿಸಿಕೊಂಡಿತು. ಅಂತಹ ಕ್ರಮಗಳು ಪ್ರಶ್ನೆಯನ್ನು ಕೇಳುತ್ತವೆ. ಯಾವ ಸಂವಿಧಾನ ಈ ಹಸ್ತಕ್ಷೇಪವನ್ನು ಕಾನೂನುಬದ್ಧಗೊಳಿಸುತ್ತದೆ?

ಸನ್ಮಾನ್ಯ ಸಭಾಪತಿಗಳೆ,

ಕ್ಯಾಬಿನೆಟ್ ನಿರ್ಧಾರವನ್ನು ಸಾರ್ವಜನಿಕವಾಗಿ ಹರಿದು ಹಾಕುವ ಅಧಿಕಾರವನ್ನು ಸಂಸದರಿಗೆ ಯಾವ ಸಂವಿಧಾನ ನೀಡುತ್ತದೆ ಎಂಬುದನ್ನು ದಯವಿಟ್ಟು ಸ್ಪಷ್ಟಪಡಿಸುವಿರಾ? ಯಾವ ಅಧಿಕಾರದ ಅಡಿ ಈ ಕ್ರಮ ಕೈಗೊಳ್ಳಲಾಗಿದೆ?

ಸನ್ಮಾನ್ಯ ಸಭಾಪತಿಗಳೆ,

ನಮ್ಮ ದೇಶವು ಸುಸ್ಥಾಪಿತ ಸಂಪ್ರದಾಯಗಳ ಅಡಿ ಕಾರ್ಯ ನಿರ್ವಹಿಸುತ್ತದೆ, ಅಲ್ಲಿ ರಾಷ್ಟ್ರಪತಿ, ಉಪರಾಷ್ಟ್ರಪತಿ, ಪ್ರಧಾನ ಮಂತ್ರಿ ಮತ್ತು ಸ್ಪೀಕರ್‌ನಂತಹ ಸ್ಥಾನಗಳನ್ನು ವಿವರಿಸಲಾಗಿದೆ. ಈ ಪ್ರೋಟೋಕಾಲ್ ಉಲ್ಲಂಘಿಸುವುದು ಮತ್ತು ಸಾಂವಿಧಾನಿಕ ಕಚೇರಿಗಳನ್ನು ಹೊಂದಿರುವವರಿಗಿಂತ ಒಂದು ಕುಟುಂಬಕ್ಕೆ ಆದ್ಯತೆ ನೀಡುವುದು ಹೇಗೆ ಸಮರ್ಥನೆಯಾಗುತ್ತದೆ? ಯಾವ ಸಂವಿಧಾನ ಇದಕ್ಕೆ ಅನುಮತಿ ನೀಡಿದೆ? ಸಾಂವಿಧಾನಿಕ ಗಣ್ಯರಿಗಿಂತ ಒಂದು ಕುಟುಂಬಕ್ಕೆ ಆದ್ಯತೆ ನೀಡುವ ಮೂಲಕ, ನೀವು ಯಾವ ಸಂವಿಧಾನ ಘನತೆಯನ್ನು ಎತ್ತಿ ಹಿಡಿದಿದ್ದೀರಿ? ಇಂದು ನೀವು ಸಂವಿಧಾನ ಪ್ರತಿಪಾದಿಸುತ್ತೀರಿ ಮತ್ತು "ಜೈ ಸಂವಿಧಾನ್" ಎಂಬ ಘೋಷಣೆಗಳನ್ನು ಕೂಗುತ್ತೀರಿ, ಆದರೆ ಐತಿಹಾಸಿಕವಾಗಿ, "ಭಾರತವೇ ಇಂದಿರಾ, ಇಂದಿರಾ ಈಸ್ ಇಂಡಿಯಾ" ಎಂಬ ಘೋಷಣೆಗಳನ್ನು ಸಂವಿಧಾನದ ಬಗ್ಗೆ ಯಾವುದೇ ಕಾಳಜಿಯಿಲ್ಲದೆ ಕೂಗಲಾಯಿತು.

ಸನ್ಮಾನ್ಯ ಸಭಾಪತಿಗಳೆ,

ನಾನು ಇದನ್ನು ಅತ್ಯಂತ ಗಂಭೀರತೆಯಿಂದ ಹೇಳುತ್ತೇನೆ: ಕಾಂಗ್ರೆಸ್ ಪಕ್ಷವು ನಮ್ಮ ದೇಶದಲ್ಲಿ ಸಂವಿಧಾನದ ದೊಡ್ಡ ವಿರೋಧಿಯಾಗಿದೆ.

ಸನ್ಮಾನ್ಯ ಸಭಾಪತಿಗಳೆ,

ಈ ಚರ್ಚೆಯ ಉದ್ದಕ್ಕೂ, ಅವರು 200ರಿಂದ 500 ವರ್ಷಗಳ ಹಿಂದಿನ ಘಟನೆಗಳನ್ನು ಉಲ್ಲೇಖಿಸುವ ಧೈರ್ಯ ಮಾಡಿದರು. ಆದರೆ ತುರ್ತು ಪರಿಸ್ಥಿತಿಯ ಮಹತ್ವವನ್ನು ಅವರಿಗೆ ಅನುಕೂಲಕರವಾಗಿ ತಳ್ಳಿಹಾಕುತ್ತಾರೆ. ಇದನ್ನು 'ಹಳೆಯ ಘಟನೆ' ಎಂದು ಕರೆಯುತ್ತಾರೆ. ಅವರ ಈ ನಿರಾಕರಣೆಯ ಸಮಯವು ಅವರನ್ನು ಹೊಣೆಗಾರಿಕೆಯಿಂದ ಮುಕ್ತಗೊಳಿಸುತ್ತದೆಯೇ?

ಸನ್ಮಾನ್ಯ ಸಭಾಪತಿಗಳೆ,

ಈ ಸದನದಲ್ಲಿ ಸಂವಿಧಾನವನ್ನು ಚರ್ಚಿಸುವ ಪ್ರಯತ್ನಗಳು ಸಾಮಾನ್ಯವಾಗಿ ತುರ್ತು ಪರಿಸ್ಥಿತಿಯ ವಿಷಯ ಬಂದಾಗ ನಿಗ್ರಹಿಸಲ್ಪಡುತ್ತವೆ. ಇಂದು ಇಲ್ಲಿ ಕುಳಿತಿರುವವರಲ್ಲಿ ಹಲವರು ಆ ಕರಾಳ ಕಾಲಕ್ಕೆ ಬಲಿಯಾದವರು. ಆದಾಗ್ಯೂ, ಇಂದು ಅಂತಹ ಶಕ್ತಿಗಳೊಂದಿಗೆ ಹೊಂದಾಣಿಕೆ ಮಾಡುವ ಅವರ ನಿರ್ಧಾರವು ವಿಭಿನ್ನ ಪ್ರೇರಣೆ-ಅವಕಾಶವಾದವನ್ನು ಸೂಚಿಸುತ್ತದೆ. ಅವರ ಬದ್ಧತೆಯು ನಿಜವಾಗಿಯೂ ಸಂವಿಧಾನದೊಂದಿಗೆ ಇದ್ದರೆ, ಅವರು ಈ ಆಯ್ಕೆಯನ್ನು ಮಾಡುತ್ತಿರಲಿಲ್ಲ.

ಸನ್ಮಾನ್ಯ ಸಭಾಪತಿಗಳೆ,

ತುರ್ತು ಪರಿಸ್ಥಿತಿ ಕೇವಲ ರಾಜಕೀಯ ಬಿಕ್ಕಟ್ಟು ಆಗಿರಲಿಲ್ಲ. ಇದು ಪ್ರಜಾಪ್ರಭುತ್ವ ಮತ್ತು ಸಂವಿಧಾನದ ಮೇಲೆ ಪ್ರಭಾವ ಬೀರಿದ ಆಳವಾದ ಮಾನವೀಯ ಬಿಕ್ಕಟ್ಟು. ಅನೇಕ ವ್ಯಕ್ತಿಗಳು ಚಿತ್ರಹಿಂಸೆಗೆ ಒಳಗಾದರು, ಕೆಲವರು ಜೈಲುಗಳಲ್ಲಿ ಪ್ರಾಣ ಕಳೆದುಕೊಂಡರು. ಆ ಅವಧಿಯಲ್ಲಿ ವಿಧಿಸಲಾದ ಷರತ್ತುಗಳಿಂದ ಜಯಪ್ರಕಾಶ್ ನಾರಾಯಣ್ ಜಿ ಅವರ ಆರೋಗ್ಯ ಜೈಲಿನಲ್ಲಿ ಸರಿಪಡಿಸಲಾಗದ ಮಟ್ಟಿಗೆ ಹದಗೆಟ್ಟಿತು. ಇದರಿಂದ ಕೇವಲ ರಾಜಕಾರಣಿಗಳಷ್ಟೇ ಅಲ್ಲ, ಜನಸಾಮಾನ್ಯರೂ ಸಹ ಪಾರಾಗಲಿಲ್ಲ. ಅವರದೇ ಪಕ್ಷದವರನ್ನೂ ಬಿಟ್ಟಿಲ್ಲ, ಅವರಿಗೂ ಚಿತ್ರಹಿಂಸೆ ನೀಡಲಾಯಿತು.

ಸನ್ಮಾನ್ಯ ಸಭಾಪತಿಗಳೆ,

ಆ ಕರಾಳ ದಿನಗಳಲ್ಲಿ ವ್ಯಕ್ತಿಗಳು ತಮ್ಮ ಮನೆಗಳನ್ನು ತೊರೆದು ಹಿಂದಿರುಗದ ನಿದರ್ಶನಗಳಿವೆ. ಅವರ ಇರುವಿಕೆ, ಅಗಲಿಕೆ ಸೇರಿದಂತೆ ಅವರ ಭವಿಷ್ಯ ಇಂದಿಗೂ ಹೊರಬಂದಿಲ್ಲ.

ಸನ್ಮಾನ್ಯ ಸಭಾಪತಿಗಳೆ,

ಅವರೊಂದಿಗೆ ಹೊಂದಾಣಿಕೆ ಮಾಡಿಕೊಂಡಿರುವ ಹಲವು ರಾಜಕೀಯ ಪಕ್ಷಗಳು ತಾವು ಅಲ್ಪಸಂಖ್ಯಾತರ ಹಕ್ಕುಗಳ ಹೋರಾಟಗಾರರು ಎಂದು ಹೇಳಿಕೊಳ್ಳುತ್ತವೆ, ಈ ವಿಷಯಗಳ ಬಗ್ಗೆಯೇ ಗಟ್ಟಿಯಾಗಿ ಮಾತನಾಡುತ್ತವೆ. ಆದರೆ ತುರ್ತು ಪರಿಸ್ಥಿತಿಯ ಸಂದರ್ಭದಲ್ಲಿ ಮುಜಾಫರ್‌ನಗರ ಮತ್ತು ಟರ್ಕ್‌ಮನ್ ಗೇಟ್‌ನಲ್ಲಿ ಅಲ್ಪಸಂಖ್ಯಾತರು ಅನುಭವಿಸಿದ ದುಃಸ್ಥಿತಿ ನೆನಪಿಸಿಕೊಳ್ಳುವ ಧೈರ್ಯ ಯಾರಿಗಾದರೂ ಇದೆಯೇ? ಅದರ ಬಗ್ಗೆ ಮಾತನಾಡಲು ಯಾರಾದರೂ ಧೈರ್ಯ ಮಾಡುತ್ತಾರೆಯೇ?

ಸನ್ಮಾನ್ಯ ಸಭಾಪತಿಗಳೆ,

ಈಗ ಅವರೆಲ್ಲರೂ ಕಾಂಗ್ರೆಸ್‌ಗೆ ಕ್ಲೀನ್ ಚಿಟ್ ನೀಡುತ್ತಿದ್ದಾರೆ. ದೇಶವು ಅವರನ್ನು ಹೇಗೆ ಕ್ಷಮಿಸುತ್ತದೆ? ಇಂದು ಇಂತಹ ಸರ್ವಾಧಿಕಾರವನ್ನು ಸಮರ್ಥಿಸಿಕೊಳ್ಳುತ್ತಿರುವವರು ಸಂವಿಧಾನದ ಪ್ರತಿಯನ್ನು ಕೈಯಲ್ಲಿ ಹಿಡಿದುಕೊಂಡು ತಮ್ಮ ದುಷ್ಕೃತ್ಯಗಳನ್ನು ಮರೆಮಾಚಲು ಯತ್ನಿಸುತ್ತಿರುವುದು ನಾಚಿಕೆಗೇಡಿನ ಸಂಗತಿ.

ಸನ್ಮಾನ್ಯ ಸಭಾಪತಿಗಳೆ,

ಆ ಅವಧಿಯಲ್ಲಿ ತುರ್ತು ಪರಿಸ್ಥಿತಿ ವಿರುದ್ಧ ನಿಂತು ಕ್ರಮೇಣ ತಮ್ಮದೇ ಆದ ಅಡಿಪಾಯ ನಿರ್ಮಿಸಿದ ಅನೇಕ ಸಣ್ಣ ರಾಜಕೀಯ ಪಕ್ಷಗಳು ಇದ್ದವು. ಅವುಗಳು ಇಂದು ಕಾಂಗ್ರೆಸ್‌ಗೆ ಬೆಂಬಲ ನೀಡುತ್ತಿವೆ. ಕಾಂಗ್ರೆಸ್ ಇತರರನ್ನು ನೆಚ್ಚಿಕೊಳ್ಳುವ ಯುಗ ಆರಂಭವಾಗಿದೆ ಎಂದು ನಿನ್ನೆ ಲೋಕಸಭೆಯಲ್ಲಿ ಹೇಳಿದ್ದೆ. ಇದು ಪರಾವಲಂಬಿ ಕಾಂಗ್ರೆಸ್. ಅವರು ಏಕಾಂಗಿಯಾಗಿ ಸ್ಪರ್ಧಿಸಿದಲ್ಲೆಲ್ಲಾ ಅವರ ಯಶಸ್ಸಿನ ಪ್ರಮಾಣ ನೀರಸವಾಗಿದೆ. ಬೇರೆಯವರು ಒಲವು ತೋರಿದಲ್ಲೆಲ್ಲಾ ಅವರು ಸ್ವಲ್ಪಮಟ್ಟಿಗೆ ಉಸಿರಾಡುವಲ್ಲಿ ಯಶಸ್ವಿಯಾದರು. ದೇಶದ ಜನ ಇನ್ನೂ ಅವರನ್ನು ಒಪ್ಪಿಕೊಂಡಿಲ್ಲ. ಅವರು ಬೇರೊಬ್ಬರ ಛತ್ರಿ ಅಡಿ ಆಶ್ರಯ ಪಡೆದಿದ್ದಾರೆ. ಈ ಕಾಂಗ್ರೆಸ್ ಪರಾವಲಂಬಿಯಂತೆ ವರ್ತಿಸುತ್ತಿದೆ. ಮಿತ್ರಪಕ್ಷಗಳ ಮತಗಳನ್ನು ತಿನ್ನುವ ಮೂಲಕ ತಾತ್ಕಾಲಿಕವಾಗಿ ಅಭಿವೃದ್ಧಿ ಹೊಂದುತ್ತಿದೆ. ಅವರ ಸ್ವಂತ ಕ್ರಿಯೆಗಳು ಅವರನ್ನು ಪರಾವಲಂಬಿಗಳಾಗಿ ಬ್ರಾಂಡ್ ಮಾಡಿವೆ. ಅವರು ಜನರ ವಿಶ್ವಾಸ ಗಳಿಸುವಲ್ಲಿ ವಿಫಲರಾಗಿದ್ದಾರೆ. ಬದಲಾಗಿ, ಅವರು ಗೊಂದಲವನ್ನು ಆಶ್ರಯಿಸುತ್ತಾರೆ, ನಕಲಿ ನಿರೂಪಣೆಗಳು ಮತ್ತು ವೀಡಿಯೊಗಳ ಮೂಲಕ ದೇಶದ ಜನತೆಯನ್ನು ದಾರಿ ತಪ್ಪಿಸುತ್ತಾರೆ.

ಸನ್ಮಾನ್ಯ ಸಭಾಪತಿಗಳೆ,

ಮೇಲ್ಮನೆಯಲ್ಲಿ ಅಭಿವೃದ್ಧಿ ದೃಷ್ಟಿಕೋನಗಳ ಬಗ್ಗೆ ಚರ್ಚೆಗಳನ್ನು ನಿರೀಕ್ಷಿಸಲಾಗುತ್ತದೆ. ಆದಾಗ್ಯೂ, ಗಂಭೀರ ಭ್ರಷ್ಟಾಚಾರ ಆರೋಪಗಳನ್ನು ಎದುರಿಸುತ್ತಿರುವವರನ್ನು ರಕ್ಷಿಸಲು ಕಾಂಗ್ರೆಸ್ ಸದಸ್ಯರು ನಾಚಿಕೆಯಿಲ್ಲದೆ ಚಳವಳಿಗಳನ್ನು ನಡೆಸುತ್ತಾರೆ. ಶಿಕ್ಷೆಗೊಳಗಾದ ವ್ಯಕ್ತಿಗಳೊಂದಿಗೆ ಅವರು ಸಂತೋಷದಿಂದ ಫೋಟೊಗಳಿಗೆ ಪೋಸ್ ಕೊಡುತ್ತಾರೆ. ಹಿಂದೆ ಅವರು, ಭ್ರಷ್ಟಾಚಾರದ ವಿರುದ್ಧ ಕ್ರಮ ತೆಗೆದುಕೊಳ್ಳಲಿಲ್ಲ ಎಂದು ನಮ್ಮನ್ನು ಟೀಕಿಸಿದರು; ಈಗ ಭ್ರಷ್ಟರನ್ನು ಜೈಲಿಗೆ ಕಳುಹಿಸಿದಾಗ ಅವರು ಪ್ರತಿಭಟನೆ ನಡೆಸಿ ಗೊಂದಲ ಸೃಷ್ಟಿಸುತ್ತಿದ್ದಾರೆ.

ಸನ್ಮಾನ್ಯ ಸಭಾಪತಿಗಳೆ,

ಇಲ್ಲಿ ನಡೆದ ಚರ್ಚೆಯಲ್ಲಿ ಕೇಂದ್ರ ತನಿಖಾ ಸಂಸ್ಥೆಗಳ ವಿರುದ್ಧ ಆರೋಪ ಕೇಳಿಬಂದಿದೆ. ಈ ಸಂಸ್ಥೆಗಳನ್ನು ಈ ಸರ್ಕಾರ ದುರ್ಬಳಕೆ ಮಾಡಿಕೊಳ್ಳುತ್ತಿದೆ ಎಂದು ದೂರಲಾಗಿದೆ.

ಸನ್ಮಾನ್ಯ ಸಭಾಪತಿಗಳೆ,

ಈಗ ನಾನು ನಿಮಗೆ ಇದನ್ನು ಕೇಳುತ್ತೇನೆ. ಆಮ್ ಆದ್ಮಿ ಪಾರ್ಟಿ(ಎಎಪಿ) ಭ್ರಷ್ಟಾಚಾರ, ಮದ್ಯ ಹಗರಣಗಳು, ಮಕ್ಕಳನ್ನು ಒಳಗೊಂಡ ತರಗತಿ ನಿರ್ಮಾಣ ಹಗರಣಗಳು ಮತ್ತು ನೀರಿನ ಹಗರಣಗಳ ಆರೋಪ ಎದುರಿಸುತ್ತಿದೆ. ಕಾಂಗ್ರೆಸ್ ಎಎಪಿ ವಿರುದ್ಧ ದೂರುಗಳನ್ನು ದಾಖಲಿಸುತ್ತದೆ, ಎಎಪಿಯನ್ನು ನ್ಯಾಯಾಲಯಕ್ಕೆ ಕೊಂಡೊಯ್ಯುತ್ತದೆ. ಯಾವುದೇ ಕ್ರಮ ಕೈಗೊಂಡರೆ ಅವರು ಮೋದಿಯನ್ನು ದೂಷಿಸುತ್ತಾರೆ. ಈಗ ಈ ಪಕ್ಷಗಳು ತಮ್ಮ ತಮ್ಮಲ್ಲೇ ಪಾಲುದಾರರಾಗಿವೆ. ಅವರಿಗೆ ಧೈರ್ಯವಿದ್ದರೆ ಈ ಸದನದಲ್ಲಿ ಎದ್ದು ನಿಂತು ಉತ್ತರ ನೀಡಬೇಕು. ನಾನು ಇದನ್ನು ಎಎಪಿ ಸದಸ್ಯರಿಗೆ ತಿಳಿಸುತ್ತಿದ್ದೇನೆ. ಎಎಪಿ ವಿರುದ್ಧ ಹಲವಾರು ಪತ್ರಿಕಾಗೋಷ್ಠಿಗಳಲ್ಲಿ ಅವರು ಪ್ರಸ್ತುತಪಡಿಸಿದ ಪುರಾವೆಗಳು ನಿಜವೋ ಸುಳ್ಳೋ ಎಂಬುದನ್ನು ಕಾಂಗ್ರೆಸ್ ಸ್ಪಷ್ಟಪಡಿಸಬೇಕು. ಎರಡೂ ಪಕ್ಷಗಳು ಪರಸ್ಪರ ಬಹಿರಂಗಪಡಿಸಬೇಕು.

ಸನ್ಮಾನ್ಯ ಸಭಾಪತಿಗಳೆ,

ಅಂತಹ ಆರೋಪಗಳಿಗೆ ಉತ್ತರಿಸಲು ಅವರಿಗೆ ಧೈರ್ಯವಿದೆ ಎಂಬುದು ನನಗೆ ಅನುಮಾನವಿದೆ.

ಸನ್ಮಾನ್ಯ ಸಭಾಪತಿಗಳೆ,

ಈ ವ್ಯಕ್ತಿಗಳು ಇಬ್ಭಗೆಯ ಮಾನದಂಡಗಳನ್ನು ಮತ್ತು ದ್ವಂದ್ವ ಮನೋಭಾವ ಪ್ರದರ್ಶಿಸುತ್ತಾರೆ. ಅವರ ಬೂಟಾಟಿಕೆಯನ್ನು ನಾನು ದೇಶಕ್ಕೆ ನೆನಪಿಸಲು ಬಯಸುತ್ತೇನೆ. ಅವರು ದೆಹಲಿಯಲ್ಲಿ ವೇದಿಕೆಗಳಲ್ಲಿ ಕುಳಿತು ತನಿಖಾ ಸಂಸ್ಥೆಗಳನ್ನು ಟೀಕಿಸುತ್ತಾರೆ, ಭ್ರಷ್ಟರನ್ನು ರಕ್ಷಿಸಲು ರಾಲಿಗಳನ್ನು ಆಯೋಜಿಸುತ್ತಾರೆ. ಆದಾಗ್ಯೂ, ಕೇರಳದಲ್ಲಿ, ಅವರ ನಾಯಕರು ತಮ್ಮ ಒಕ್ಕೂಟದ ಪಾಲುದಾರರಾಗಿರುವ ಮುಖ್ಯಮಂತ್ರಿಯನ್ನು ಜೈಲಿಗೆ ಹಾಕುವಂತೆ ಭಾರತ ಸರ್ಕಾರಕ್ಕೆ ಮನವಿ ಮಾಡುತ್ತಾರೆ. ಅವರು ದೆಹಲಿಯ ಜಾರಿ ನಿರ್ದೇಶನಾಲಯ(ಇಡಿ) ಮತ್ತು ಸಿಬಿಐ ಕ್ರಮಗಳನ್ನು ಕಟುವಾಗಿ ವಿರೋಧಿಸುತ್ತಾರೆ.ಆದರೂ ಕೇರಳ ಮುಖ್ಯಮಂತ್ರಿಯನ್ನು ವಿಚಾರಣೆಗೆ ಒಳಪಡಿಸಲು ಈ ಏಜೆನ್ಸಿಗಳನ್ನು ಬಳಸುತ್ತಾರೆ. ಈ ವಿರೋಧಾಭಾಸವು ಅವರ ಸಮಗ್ರತೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕುತ್ತದೆ.

ಸನ್ಮಾನ್ಯ ಸಭಾಪತಿಗಳೆ,

ಛತ್ತೀಸ್‌ಗಢದಲ್ಲಿ ಕಾಂಗ್ರೆಸ್ ಸರ್ಕಾರದ ಮುಖ್ಯಮಂತ್ರಿ ಶಾಮೀಲಾಗಿರುವ ಮದ್ಯದ ಹಗರಣ ಬೆಳಕಿಗೆ ಬಂದಿದೆ. ಈ ಮುಖ್ಯಮಂತ್ರಿಯ ತನಿಖೆ ಮಾಡಲು ಮತ್ತು ಜೈಲಿಗಟ್ಟಲು ಇಡಿ ಮತ್ತು ಸಿಬಿಐ ಅನ್ನು ನಿಯೋಜಿಸುವ ಬಗ್ಗೆ ಎಎಪಿ ಸದಸ್ಯರು ಧ್ವನಿ ಎತ್ತಿದ್ದರು. ಆ ಸಮಯದಲ್ಲಿ ಏಜೆನ್ಸಿಗೆ ತಮ್ಮ ಬೆಂಬಲ ತೋರಿಸಲು ಅವರು ಕ್ರಮ ಕೈಗೊಳ್ಳಲು ಇಡಿಯನ್ನು ಬಹಿರಂಗವಾಗಿ ವಿನಂತಿಸಿದರು.

ಸನ್ಮಾನ್ಯ ಸಭಾಪತಿಗಳೆ,

ತನಿಖಾ ಸಂಸ್ಥೆಗಳನ್ನು ನಿಂದಿಸುತ್ತಿರುವವರು ಮತ್ತು ಇಂದು ಗದ್ದಲ ಸೃಷ್ಟಿಸುತ್ತಿರುವವರಿಗೆ, ಹಿಂದಿನ ಕೆಲವು ಘಟನೆಗಳನ್ನು ನೆನಪಿಸಿಕೊಳ್ಳಬೇಕೆಂದು ನಾನು ಒತ್ತಾಯಿಸುತ್ತೇನೆ. ಈ ಏಜೆನ್ಸಿಗಳನ್ನು ಈ ಹಿಂದೆ ಹೇಗೆ ದುರುಪಯೋಗ ಪಡಿಸಿಕೊಳ್ಳಲಾಗಿದೆ? ಯಾರಿಂದ ಎಂಬುದನ್ನು ನಾನು ವಿವರಿಸುತ್ತೇನೆ. ನಿಮ್ಮ ಪರಿಗಣನೆಗೆ ಕೆಲವು ಹೇಳಿಕೆಗಳನ್ನು ಪ್ರಸ್ತುತಪಡಿಸಲು ನನಗೆ ಅನುಮತಿ ನೀಡಿ. 2013ರಲ್ಲಿ ಮುಲಾಯಂ ಸಿಂಗ್ ಅವರು, "ಕಾಂಗ್ರೆಸ್ ವಿರುದ್ಧ ಹೋರಾಡುವುದು ಸುಲಭವಲ್ಲ, ಅವರು ನಿಮ್ಮನ್ನು ಜೈಲಿಗೆ ಹಾಕುತ್ತಾರೆ, ಸಿಬಿಐ ನಿಮ್ಮ ಹಿಂದೆ ಬರುತ್ತದೆ. ಕಾಂಗ್ರೆಸ್ ನಮಗೆ ಸಿಬಿಐ ಮತ್ತು ಆದಾಯ ತೆರಿಗೆ ಬೆದರಿಕೆ ಹಾಕುವ ಮೂಲಕ ಬೆಂಬಲ ಕೇಳುತ್ತಿದೆ" ಎಂದು ಹೇಳಿಕೆ ನೀಡಿದ್ದರು. ಈ ಸದನದ ಗೌರವಾನ್ವಿತ ಸದಸ್ಯ ರಾಮ್ ಗೋಪಾಲ್ ಜೀ ಅವರನ್ನು ನಾನು ಕೇಳುತ್ತೇನೆ, ಮುಲಾಯಂ ಸಿಂಗ್ ಜಿ ಎಂದಾದರೂ ಸುಳ್ಳು ಹೇಳಿದ್ದಾರೆಯೇ? ಅವರು ಸತ್ಯವನ್ನೇ ಮಾತನಾಡಿದರು.

ಸನ್ಮಾನ್ಯ ಸಭಾಪತಿಗಳೆ,

ಇದನ್ನು ಅವರ ಸೋದರಳಿಯನಿಗೆ ತಿಳಿಸುವಂತೆ ರಾಮ್ ಗೋಪಾಲ್ ಜಿ ಅವರಿಗೆ ನೆನಪಿಸಲು ನಾನು ಬಯಸುತ್ತೇನೆ. ಅವರು ರಾಜಕೀಯಕ್ಕೆ ಬಂದ ತಕ್ಷಣ ತಮ್ಮ ಸೋದರಳಿಯನನ್ನು ಸಿಬಿಐಗೆ ಗುರಿಪಡಿಸಿದವರನ್ನು ನೆನಪಿಸಲು ಬಯಸುತ್ತೇನೆ. ಅವರಿಗೆ ನೆನಪಿಟ್ಟುಕೊಳ್ಳಲು ಸೌಮ್ಯವಾದ ಜ್ಞಾಪನೆ ಸಾಕು.

ಸನ್ಮಾನ್ಯ ಸಭಾಪತಿಗಳೆ,

ನಾನು 2013ರ ಇನ್ನೊಂದು ಹೇಳಿಕೆ ಕೇಳಿದ್ದೆ. ಕಾಮ್ರೇಡ್ ಶ್ರೀ ಪ್ರಕಾಶ್ ಕಾರಟ್ ಹೇಳಿದ್ದರು: "ಕಾಂಗ್ರೆಸ್ ಅನೇಕ ಪಕ್ಷಗಳಲ್ಲಿ ರಾಜಕೀಯ ಚೌಕಾಶಿ ಮಾಡಲು ಸಿಬಿಐ ಬಳಸಿಕೊಂಡಿದೆ". ಈ ಏಜೆನ್ಸಿಗಳನ್ನು ಯಾರು ದುರುಪಯೋಗ ಪಡಿಸಿಕೊಳ್ಳುತ್ತಿದ್ದರು ಎಂದು ಉಲ್ಲೇಖಿಸಿ 2013ರಲ್ಲಿ ಅವರು ಈ ರೀತಿ ಹೇಳಿದ್ದರು. ಹೆಚ್ಚುವರಿಯಾಗಿ, ಯುಪಿಎ ಸರ್ಕಾರದ ಅವಧಿಯಲ್ಲಿ “ತನ್ನ ಯಜಮಾನನ ಧ್ವನಿಯಲ್ಲಿ ಮಾತನಾಡುವ ಪಂಜರದ ಗಿಳಿ” ಎಂದು ನಮ್ಮ ದೇಶದ ಸುಪ್ರೀಂ ಕೋರ್ಟ್ ಸಿಬಿಐ ಅನ್ನು ಉಲ್ಲೇಖಿಸಿದ ಪ್ರಮುಖ ಹೇಳಿಕೆಯನ್ನು ನಾನು ನೆನಪಿಸಿಕೊಳ್ಳುತ್ತೇನೆ. ಈ ಏಜೆನ್ಸಿಗಳನ್ನು ಯಾರು ದುರುಪಯೋಗ ಪಡಿಸಿಕೊಳ್ಳುತ್ತಿದ್ದರು ಎಂಬುದಕ್ಕೆ ಇಂದು ನಮ್ಮ ಬಳಿ ಜೀವಂತ ಪುರಾವೆಗಳಿವೆ.

ಸನ್ಮಾನ್ಯ ಸಭಾಪತಿಗಳೆ,

ನನ್ನ ಪಾಲಿಗೆ ಭ್ರಷ್ಟಾಚಾರ ವಿರುದ್ಧದ ಹೋರಾಟವು ಚುನಾವಣಾ ಗೆಲುವು ಅಥವಾ ಸೋಲುಗಳನ್ನು ಮೀರಿದೆ. ನಾನು ಚುನಾವಣೆಯಲ್ಲಿ ಸೋಲು-ಗೆಲುವಿಗಾಗಿ ಭ್ರಷ್ಟಾಚಾರದ ವಿರುದ್ಧ ಹೋರಾಡುತ್ತಿಲ್ಲ. ಇದು ನನ್ನ ಧ್ಯೇಯ, ಭ್ರಷ್ಟಾಚಾರವು ನಮ್ಮ ರಾಷ್ಟ್ರವನ್ನು ದುರ್ಬಲಗೊಳಿಸಿದ ಗೆದ್ದಲು ಹುಳು ಎಂಬುದು ನನ್ನ ದೃಢ ನಂಬಿಕೆ. ನಮ್ಮ ದೇಶವನ್ನು ಭ್ರಷ್ಟಾಚಾರದಿಂದ ಮುಕ್ತಗೊಳಿಸಲು, ನಮ್ಮ ನಾಗರಿಕರಲ್ಲಿ ಅದರ ಬಗ್ಗೆ ಆಳವಾದ ದ್ವೇಷವನ್ನು ಬೆಳೆಸಲು ನಾನು ಪೂರ್ಣ ಹೃದಯದಿಂದ ಬದ್ಧನಾಗಿದ್ದೇನೆ, ನಾನು ಇದನ್ನು ಪವಿತ್ರ ಕರ್ತವ್ಯವೆಂದು ಪರಿಗಣಿಸುತ್ತೇನೆ. 2014ರಲ್ಲಿ ನಮ್ಮ ಸರ್ಕಾರ ಚುನಾಯಿತವಾದಾಗ, ನಾವು 2 ಮಹತ್ವದ ಗುರಿಗಳ ಸಾಧನೆಗೆ ಸಂಕಲ್ಪ ಮಾಡಿದ್ದೇವೆ: ಬಡವರ ಕಲ್ಯಾಣಕ್ಕಾಗಿ ನಮ್ಮನ್ನು ಅರ್ಪಿಸಿಕೊಳ್ಳುವುದು, ಭ್ರಷ್ಟಾಚಾರ ಮತ್ತು ಕಪ್ಪುಹಣವನ್ನು ಪತ್ತೆ ಹಚ್ಚುವುದು. ನಾನು ಇದನ್ನು 2014ರಲ್ಲಿ ಸಾರ್ವಜನಿಕವಾಗಿ ಹೇಳಿದ್ದೆ. ಈ ಉದ್ದೇಶದಿಂದ ನಾವು ಬಡವರಿಗಾಗಿ ವಿಶ್ವದ ಅತಿದೊಡ್ಡ ಕಲ್ಯಾಣ ಯೋಜನೆಯಾದ ಗರೀಬ್ ಕಲ್ಯಾಣ್ ಯೋಜನೆ ಪ್ರಾರಂಭಿಸಿದ್ದೇವೆ. ಏಕಕಾಲದಲ್ಲಿ, ನಾವು ಭ್ರಷ್ಟಾಚಾರವನ್ನು ನಿಭಾಯಿಸಲು ಹೊಸ ಕಾನೂನುಗಳು, ವ್ಯವಸ್ಥೆಗಳು ಮತ್ತು ಕಾರ್ಯವಿಧಾನಗಳನ್ನು ಅಭಿವೃದ್ಧಿಪಡಿಸಿದ್ದೇವೆ. ನಾವು ಭ್ರಷ್ಟಾಚಾರ ತಡೆ ಕಾಯಿದೆ-1988ಕ್ಕೆ ತಿದ್ದುಪಡಿ ತಂದಿದ್ದೇವೆ, ಕಪ್ಪುಹಣದ ವಿರುದ್ಧ ಹೊಸ ಕಾನೂನುಗಳನ್ನು ಜಾರಿಗೆ ತಂದಿದ್ದೇವೆ, ಬೇನಾಮಿ ಆಸ್ತಿಯ ಮೇಲೆ ಕಾನೂನು ಜಾರಿಗೆ ತಂದಿದ್ದೇವೆ. ಈ ಕ್ರಮಗಳ ಮೂಲಕ ಭ್ರಷ್ಟ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗಿದೆ. ಇದಲ್ಲದೆ, ಸೋರಿಕೆ ಮುಚ್ಚಲು ನಾವು ಸರ್ಕಾರದೊಳಗೆ ಸಕಾರಾತ್ಮಕ ಬದಲಾವಣೆಗಳನ್ನು ಜಾರಿಗೆ ತಂದಿದ್ದೇವೆ, ನೇರ ನಗದು ವರ್ಗಾವಣೆಗೆ ಒತ್ತು ನೀಡಿದ್ದೇವೆ, ಡಿಜಿಟಲ್ ತಂತ್ರಜ್ಞಾನವನ್ನು ಸಂಪೂರ್ಣವಾಗಿ ಬಳಸಿಕೊಳ್ಳುತ್ತಿದ್ದೇವೆ. ಪರಿಣಾಮವಾಗಿ, ಪ್ರತಿಯೊಬ್ಬ ಅರ್ಹ ಫಲಾನುಭವಿಯು ಈಗ ಯಾವುದೇ ಸೋರಿಕೆಯಿಲ್ಲದೆ ನೇರವಾಗಿ ಪ್ರಯೋಜನಗಳನ್ನು ಪಡೆಯುತ್ತಿದ್ದಾನೆ. ಇದು ಭ್ರಷ್ಟಾಚಾರ ವಿರುದ್ಧದ ನಮ್ಮ ಹೋರಾಟದ ನಿರ್ಣಾಯಕ ಅಂಶವಾಗಿದೆ. ನಾಗರಿಕರು ಈ ಪ್ರಯೋಜನಗಳನ್ನು ಪಡೆದಾಗ ಮತ್ತು ಈ ಸುಧಾರಣೆಗಳನ್ನು ಅನುಭವಿಸಿದಾಗ, ಪ್ರಜಾಪ್ರಭುತ್ವದಲ್ಲಿ ಅವರ ನಂಬಿಕೆ ಬೆಳೆಯುತ್ತದೆ, ಅವರು ಸರ್ಕಾರದೊಂದಿಗೆ ಸಂಪರ್ಕ ಹೊಂದುತ್ತಾರೆ, ನಮ್ಮ ಪ್ರಜಾಪ್ರಭುತ್ವವನ್ನು ಬಲಪಡಿಸುತ್ತಾರೆ.

ಸನ್ಮಾನ್ಯ ಸಭಾಪತಿಗಳೆ,

ನಾನು ನೇರವಾಗಿ ಮತ್ತು ಯಾವುದೇ ಅಸ್ಪಷ್ಟತೆ ಇಲ್ಲದೆ ಮಾತನಾಡಲು ಬಯಸುತ್ತೇನೆ. ಭ್ರಷ್ಟಾಚಾರ ಮತ್ತು ಭ್ರಷ್ಟರ ವಿರುದ್ಧ ಅತ್ಯಂತ ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಲು ನಾನು ಏಜೆನ್ಸಿಗಳಿಗೆ ಸಂಪೂರ್ಣ ಸ್ವಾತಂತ್ರ್ಯ ನೀಡಿದ್ದೇನೆ ಎಂದು ನಾನು ದೇಶಕ್ಕೆ ಭರವಸೆ ನೀಡಲು ಬಯಸುತ್ತೇನೆ. ಅವರ ಕೆಲಸದಲ್ಲಿ ಸರ್ಕಾರ ಹಸ್ತಕ್ಷೇಪ ಮಾಡುವುದಿಲ್ಲ. ಅವರು ಪ್ರಾಮಾಣಿಕವಾಗಿ ಮತ್ತು ಪಾರದರ್ಶಕವಾಗಿ ಕೆಲಸ ಮಾಡುತ್ತಾರೆ ಎಂಬುದು ನನ್ನ ನಿರ್ದೇಶನವಾಗಿದೆ.

ಸನ್ಮಾನ್ಯ ಸಭಾಪತಿಗಳೆ,

ನಾನು ಮತ್ತೊಮ್ಮೆ ದೇಶಕ್ಕೆ ಪುನರುಚ್ಚರಿಸಲು ಬಯಸುತ್ತೇನೆ. ಯಾವುದೇ ಭ್ರಷ್ಟ ವ್ಯಕ್ತಿ ಕಾನೂನಿನಿಂದ ತಪ್ಪಿಸಿಕೊಳ್ಳಲು ಬಿಡುವುದಿಲ್ಲ. ಇದು ಮೋದಿ ಗ್ಯಾರಂಟಿ.

ಸನ್ಮಾನ್ಯ ಸಭಾಪತಿಗಳೆ,

ರಾಷ್ಟ್ರಪತಿ ಅವರು ತಮ್ಮ ಭಾಷಣದಲ್ಲಿ ಪ್ರಶ್ನೆ ಪತ್ರಿಕೆ ಸೋರಿಕೆಯ ಸಮಸ್ಯೆಯನ್ನು ಮಹತ್ವದ ಸಮಸ್ಯೆ ಎಂದು ಒತ್ತಿ ಹೇಳಿದರು. ಎಲ್ಲಾ ಪಕ್ಷಗಳು ರಾಜಕೀಯ ಭಿನ್ನಾಭಿಪ್ರಾಯಗಳನ್ನು ಮೀರಿ ಈ ವಿಷಯವನ್ನು ಚರ್ಚಿಸುತ್ತವೆ ಎಂದು ನಾನು ಆಶಿಸಿದ್ದೆ. ದುರದೃಷ್ಟವಶಾತ್, ನಮ್ಮ ಯುವಜನರ ಭವಿಷ್ಯದ ಮೇಲೆ ಪರಿಣಾಮ ಬೀರುವ ಈ ಸೂಕ್ಷ್ಮ ಮತ್ತು ನಿರ್ಣಾಯಕ ವಿಷಯವು ರಾಜಕೀಯದಿಂದ ಮುಚ್ಚಿಹೋಯಿತು. ಇದಕ್ಕಿಂತ ದುರದೃಷ್ಟಕರ ಮತ್ತೊಂದಿಲ್ಲ. ನಿಮಗೆ ದ್ರೋಹ ಮಾಡಿದವರನ್ನು ಈ ಸರ್ಕಾರ ಬಿಡುವುದಿಲ್ಲ ಎಂದು ನಾನು ನಮ್ಮ ದೇಶದ ಯುವಕರಿಗೆ ಭರವಸೆ ನೀಡಲು ಬಯಸುತ್ತೇನೆ. ನಮ್ಮ ಯುವಕರ ಭವಿಷ್ಯಕ್ಕೆ ಧಕ್ಕೆ ತಂದವರಿಗೆ ಕಠಿಣ ಶಿಕ್ಷೆಯಾಗುವಂತೆ ಮಾಡಲು ಒಂದರ ಹಿಂದೆ ಒಂದರಂತೆ ಕ್ರಮ ಕೈಗೊಳ್ಳಲಾಗುತ್ತಿದೆ. ನಾವು ಸಂಸತ್ತಿನಲ್ಲಿ ಇಂತಹ ದುಷ್ಕೃತ್ಯಗಳ ವಿರುದ್ಧ ಕಠಿಣ ಕಾನೂನು ಪರಿಚಯಿಸಿದ್ದೇವೆ. ನಾವು ಸಂಪೂರ್ಣ ವ್ಯವಸ್ಥೆ ಬಲಪಡಿಸುತ್ತಿದ್ದೇವೆ. ಇದರಿಂದ ನಮ್ಮ ಯುವಕರು ತಮ್ಮ ಆಕಾಂಕ್ಷೆಗಳನ್ನು ಆತ್ಮವಿಶ್ವಾಸದಿಂದ ಮುಂದುವರಿಸಬಹುದು, ಆತಂಕದ ಸ್ಥಿತಿಯಲ್ಲಿ ಬದುಕಬೇಕಾಗಿಲ್ಲ, ಇದರಿಂದ ಅವರು ತಮ್ಮ ಸಾಮರ್ಥ್ಯವನ್ನು ಪೂರ್ಣ ವಿಶ್ವಾಸದಿಂದ ಪ್ರದರ್ಶಿಸಬಹುದು, ಅವರ ಹಕ್ಕುಗಳನ್ನು ಪಡೆಯಬಹುದು. ಇದು ನಮ್ಮ ಬದ್ಧತೆ, ಈ ನಿಟ್ಟಿನಲ್ಲಿ ನಾವು ಸಕ್ರಿಯವಾಗಿ ಕೆಲಸ ಮಾಡುತ್ತಿದ್ದೇವೆ.

ಸನ್ಮಾನ್ಯ ಸಭಾಪತಿಗಳೆ,

ಆರೋಪಗಳು ಇಲ್ಲಿ ಸಾಮಾನ್ಯ, ಆದರೆ ಕೆಲವು ಘಟನೆಗಳ ಮೂಲಕ ಅವು ಹೊರಹೋಗುತ್ತವೆ. ಈಗ, ಸ್ಪಷ್ಟನೆಗೆ ಯಾವುದೇ ಪುರಾವೆಯ ಅಗತ್ಯವಿಲ್ಲ. ಜಮ್ಮು-ಕಾಶ್ಮೀರದಲ್ಲಿ ಇತ್ತೀಚೆಗೆ ನಡೆದ ಲೋಕಸಭೆ ಚುನಾವಣೆಯು ಕಳೆದ 4 ದಶಕಗಳ ಮತದಾನದ ದಾಖಲೆಗಳನ್ನು ಮುರಿದಿದೆ. ಈ ಸಾಧನೆಯು ಪರಿಮಾಣವನ್ನು ಹೇಳುತ್ತದೆ, ಇದಕ್ಕೆ ಹೆಚ್ಚಿನ ಪುರಾವೆಗಳ ಅಗತ್ಯವಿಲ್ಲ. ಅಲ್ಲಿನ ಜನರು ಭಾರತದ ಸಂವಿಧಾನ, ಭಾರತದ ಪ್ರಜಾಪ್ರಭುತ್ವ ಮತ್ತು ಭಾರತದ ಚುನಾವಣಾ ಆಯೋಗವನ್ನು ಎತ್ತಿ ಹಿಡಿದಿದ್ದಾರೆ.

ಸನ್ಮಾನ್ಯ ಸಭಾಪತಿಗಳೆ,

ಇದೊಂದು ಮಹತ್ವದ ವಿಜಯವಾಗಿದೆ. ದೇಶವೇ ಕುತೂಹಲದಿಂದ ಕಾಯುತ್ತಿದ್ದ ಕ್ಷಣ ಇಂದು ನಮ್ಮ ಮುಂದೆ ತೆರೆದುಕೊಳ್ಳುತ್ತಿದೆ. ದಶಕಗಳಿಂದ ಬಂದ್‌ಗಳು, ಮುಷ್ಕರಗಳು, ಭಯೋತ್ಪಾದಕ ಬೆದರಿಕೆಗಳು ಮತ್ತು ವಿರಳ ಬಾಂಬ್ ಪ್ರಯತ್ನಗಳೆಲ್ಲವೂ ಈ ಪ್ರದೇಶದಲ್ಲಿ ಪ್ರಜಾಪ್ರಭುತ್ವವನ್ನು ಹಾವಳಿ ಮಾಡಿವೆ. ಆದರೆ, ಇಂದು ಜನತೆ ಸಂವಿಧಾನದಲ್ಲಿ ಹೊಂದಿರುವ ಅಚಲವಾದ ನಂಬಿಕೆಯಿಂದ ತಮ್ಮ ಭವಿಷ್ಯವನ್ನು ನಿರ್ಣಾಯಕವಾಗಿ ರೂಪಿಸಿಕೊಂಡಿದ್ದಾರೆ. ಜಮ್ಮು-ಕಾಶ್ಮೀರದ ಮತದಾರರಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ.

ಸನ್ಮಾನ್ಯ ಸಭಾಪತಿಗಳೆ,

ಜಮ್ಮು-ಕಾಶ್ಮೀರದಲ್ಲಿ ಭಯೋತ್ಪಾದನೆ ವಿರುದ್ಧದ ನಮ್ಮ ಹೋರಾಟ ಅಂತಿಮ ಹಂತದಲ್ಲಿದೆ. ಭಯೋತ್ಪಾದನೆಯ ಅವಶೇಷಗಳನ್ನು ಕಿತ್ತೊಗೆಯಲು ನಾವು ಸಮಗ್ರ ಕಾರ್ಯತಂತ್ರದೊಂದಿಗೆ ಮುನ್ನಡೆಯುತ್ತಿದ್ದೇವೆ. ಕಳೆದ 1 ದಶಕದಲ್ಲಿ ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಭಯೋತ್ಪಾದಕ ಘಟನೆಗಳು ಗಣನೀಯವಾಗಿ ತಗ್ಗಿವೆ.  ಕಲ್ಲು ತೂರಾಟ ಘಟನೆಗಳು ಈಗ ಅಪರೂಪದ ಘಟನೆಗಳಾಗಿವೆ. ಜಮ್ಮು- ಕಾಶ್ಮೀರದಲ್ಲಿ ಭಯೋತ್ಪಾದನೆ ಮತ್ತು ಪ್ರತ್ಯೇಕತಾವಾದ ಇಳಿಮುಖವಾಗಿದೆ. ಜಮ್ಮು- ಕಾಶ್ಮೀರದ ಜನರು ಈ ನಿರ್ಣಾಯಕ ಪ್ರಯತ್ನದಲ್ಲಿ ನಮಗೆ ಸಕ್ರಿಯವಾಗಿ ಬೆಂಬಲ ಮತ್ತು ಮಾರ್ಗದರ್ಶನ ನೀಡುತ್ತಿದ್ದಾರೆ, ಇದು ನಿಜಕ್ಕೂ ಸ್ಫೂರ್ತಿದಾಯಕವಾಗಿದೆ. ಇಂದು ಪ್ರವಾಸೋದ್ಯಮವು ಹೊಸ ದಾಖಲೆಗಳನ್ನು ಸ್ಥಾಪಿಸುತ್ತಿದೆ, ಈ ಪ್ರದೇಶದಲ್ಲಿ ಹೂಡಿಕೆ ಹೆಚ್ಚುತ್ತಿದೆ.

ಸನ್ಮಾನ್ಯ ಸಭಾಪತಿಗಳೆ,

ಇಂದು ಈಶಾನ್ಯ ರಾಜ್ಯಗಳ ಬೆಳವಣಿಗೆಗಳನ್ನು ಪ್ರಶ್ನಿಸುತ್ತಿರುವವರು ಕೇವಲ ಚುನಾವಣಾ ಲೆಕ್ಕಾಚಾರಗಳಿಂದ ಕೈಬಿಟ್ಟಿದ್ದಾರೆ. ಈಶಾನ್ಯದ ಕಡಿಮೆ ಸಂಖ್ಯೆಯ ಲೋಕಸಭಾ ಸ್ಥಾನಗಳನ್ನು ರಾಜಕೀಯ ಭೂದೃಶ್ಯದಲ್ಲಿ ಅತ್ಯಲ್ಪವೆಂದು ಪರಿಗಣಿಸಲಾಯಿತು. ಹೀಗಾಗಿ, ಅದನ್ನು ನಿರ್ಲಕ್ಷಿಸಲಾಯಿತು. ಇಂದು ನಮ್ಮ ಸಮರ್ಪಿತ ಪ್ರಯತ್ನಗಳು ಈಶಾನ್ಯವನ್ನು ದೇಶದ ಅಭಿವೃದ್ಧಿಯ ಸದೃಢವಾದ ಎಂಜಿನ್ ಆಗಿ ಪರಿವರ್ತಿಸುತ್ತಿವೆ. ರೈಲು, ಪ್ರವಾಸೋದ್ಯಮ ಮತ್ತು ಸಾಂಸ್ಕೃತಿಕ ವಿನಿಮಯದ ವಿಷಯದಲ್ಲಿ ಹೆಚ್ಚಿನ ಸಂಪರ್ಕದ ಮೂಲಕ ಈ ಪ್ರದೇಶವು ಪೂರ್ವ ಏಷ್ಯಾದ ಪ್ರವೇಶ ದ್ವಾರ(ಗೇಟ್‌ವೇ)ವಾಗಿ ಹೊರಹೊಮ್ಮುತ್ತಿದೆ. ಅವರೇ ಹೇಳಿದಂತೆ, 21ನೇ ಶತಮಾನವು ಭಾರತಕ್ಕೆ ಸೇರಿದ್ದು ಮತ್ತು ಈ ಉಪಕ್ರಮವು ನಿಸ್ಸಂದೇಹವಾಗಿ ಆ ನಿರೂಪಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಈ ವಾಸ್ತವವನ್ನು ನಾವು ಒಪ್ಪಿಕೊಳ್ಳಲೇಬೇಕು.

ಸನ್ಮಾನ್ಯ ಸಭಾಪತಿಗಳೆ,

ಕಳೆದ 5 ವರ್ಷಗಳಲ್ಲಿ ಈಶಾನ್ಯದಲ್ಲಿ ಸಾಧಿಸಿದ ಪ್ರಗತಿಯು ಹಳೆಯ ಕಾಂಗ್ರೆಸ್ ಆಡಳಿತವು ಕನಿಷ್ಠ 2 ದಶಕಗಳಲ್ಲಿ, ಬಹುಶಃ ಒಂದು ಪೀಳಿಗೆಯಲ್ಲಿ ಸಾಧಿಸಿದ  ಸಾಧನೆಯನ್ನು ಮೀರಿಸಿದೆ. ನಾವು ಅಭೂತಪೂರ್ವ ವೇಗದಲ್ಲಿ ಅಭಿವೃದ್ಧಿಯನ್ನು ತ್ವರಿತಗೊಳಿಸಿದ್ದೇವೆ. ಇಂದು ಸಂಪರ್ಕವು ಈಶಾನ್ಯದ ಪ್ರಗತಿಯ ಮೂಲಾಧಾರವಾಗಿದೆ. ನಾವು ಮೂಲಸೌಕರ್ಯ ಅಭಿವೃದ್ಧಿಗೆ ಆದ್ಯತೆ ನೀಡಿದ್ದೇವೆ, ಹಿಂದಿನ ಎಲ್ಲಾ ಪ್ರಯತ್ನಗಳನ್ನು ದಾಟಿ ಮುಂದೆ ಸಾಗಿದೆ.

ಸನ್ಮಾನ್ಯ ಸಭಾಪತಿಗಳೆ,

ಕಳೆದ 1 ದಶಕದಲ್ಲಿ, ಈಶಾನ್ಯದಲ್ಲಿ ನಿರಂತರ ಶಾಂತಿಗಾಗಿ ಅವಿರತ ಪ್ರಯತ್ನಗಳನ್ನು ಮಾಡಲಾಗಿದೆ, ಅಲ್ಲಿ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಳ್ಳಲಾಗಿದೆ. ಸೀಮಿತ ರಾಷ್ಟ್ರೀಯ ಗಮನದ ಹೊರತಾಗಿಯೂ, ಈ ಪ್ರಯತ್ನಗಳು ಭರವಸೆಯ ಫಲಿತಾಂಶಗಳನ್ನು ನೀಡಿವೆ. ರಾಜ್ಯಗಳ ನಡುವಿನ ಐತಿಹಾಸಿಕ ಗಡಿ ವಿವಾದಗಳು ಸ್ವಾತಂತ್ರ್ಯಾ ನಂತರದ ಸಂಘರ್ಷದ ದೀರ್ಘಕಾಲಿಕ ಮೂಲವಾಗಿದೆ. ರಾಜ್ಯಗಳ ಜತೆಗೂಡಿ ಮಾಡಿದ ಸಂಘಟಿತ ಪ್ರಯತ್ನಗಳು ಮತ್ತು ಒಪ್ಪಂದಗಳ ಮೂಲಕ, ನಾವು ಈ ಅನೇಕ ವಿವಾದಗಳನ್ನು ಪರಿಹರಿಸಿದ್ದೇವೆ. ಪ್ರತಿಯೊಂದು ಒಪ್ಪಂದವನ್ನು ಸೂಕ್ಷ್ಮವಾಗಿ ದಾಖಲಿಸಲಾಗಿದೆ, ಭೇಟಿಗಳು ಮತ್ತು ಚರ್ಚೆಗಳ ಅಗತ್ಯ,  ಅಗತ್ಯವಿರೆಡೆ  ಗಡಿಗಳನ್ನು ವಿವರಗಳನ್ನು ಒಪ್ಪಂದದಲ್ಲಿ ದಾಖಲಿಸಲಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಇದು ಈಶಾನ್ಯಕ್ಕೆ ಮಹತ್ವದ ಮೈಲಿಗಲ್ಲು. ಹಿಂದೆ ಹಿಂಸಾಚಾರಕ್ಕೆ ಸಂಬಂಧಿಸಿದ ಶಸ್ತ್ರಸಜ್ಜಿತ ಗುಂಪುಗಳು ಭೂಗತ ಕದನಗಳನ್ನು ನಡೆಸುತ್ತಿದ್ದವು, ಪ್ರತಿ ವ್ಯವಸ್ಥೆಗೂ ಸವಾಲು ಒಡ್ಡುತ್ತಿದ್ದವು. ಪ್ರತಿಸ್ಪರ್ಧಿ ಗುಂಪುಗಳನ್ನು ವಿರೋಧಿಸಿದವು, ಇದು ರಕ್ತಪಾತಕ್ಕೆ ಕಾರಣವಾಯಿತು. ಇಂದು ನಾವು ಅವರೊಂದಿಗೆ ಶಾಶ್ವತ ಒಪ್ಪಂದಗಳನ್ನು ಮಾಡುತ್ತಿದ್ದೇವೆ, ಶಸ್ತ್ರಾಸ್ತ್ರಗಳ ಶರಣಾಗತಿಯನ್ನು ಸುಲಭಗೊಳಿಸುತ್ತಿದ್ದೇವೆ. ಗಂಭೀರ ಅಪರಾಧಗಳಲ್ಲಿ ಭಾಗಿಯಾಗಿರುವ ವ್ಯಕ್ತಿಗಳು ನ್ಯಾಯಾಲಯಗಳನ್ನು ಎದುರಿಸಲು ತಯಾರಿ ನಡೆಸುತ್ತಿದ್ದಾರೆ, ಜೈಲು ಶಿಕ್ಷೆ ಅನುಭವಿಸಲು ಸಿದ್ಧರಾಗಿದ್ದಾರೆ. ಈ ಪ್ರಕ್ರಿಯೆಯು ನ್ಯಾಯಾಂಗದಲ್ಲಿ, ಭಾರತದ ಸಂವಿಧಾನದಲ್ಲಿ, ಪ್ರಜಾಪ್ರಭುತ್ವದಲ್ಲಿ ಮತ್ತು ನಮ್ಮ ದೇಶದ ಆಡಳಿತ ರಚನೆಗಳಲ್ಲಿ ಹೆಚ್ಚಿನ ನಂಬಿಕೆ ಬೆಳೆಸುತ್ತಿದೆ.

ಗೌರವಾನ್ವಿತ ಸಭಾಪತಿಗಳೆ,

ಕಳೆದ ಅಧಿವೇಶನದಲ್ಲಿ ನಾನು ಮಣಿಪುರದ ಬಗ್ಗೆ ವ್ಯಾಪಕವಾಗಿ ಚರ್ಚಿಸಿದ್ದೇನೆ, ನಾನು ಇಂದು ಪುನರುಚ್ಚರಿಸಲು ಬಯಸುತ್ತೇನೆ. ಮಣಿಪುರದಲ್ಲಿ ಪರಿಸ್ಥಿತಿಯನ್ನು ಸಾಮಾನ್ಯಗೊಳಿಸುವ ನಿಟ್ಟಿನಲ್ಲಿ ಸರ್ಕಾರ ದೃಢವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಮಣಿಪುರ ಸಣ್ಣ ರಾಜ್ಯವಾಗಿದ್ದರೂ ಅಲ್ಲಿನ ಘಟನೆಗಳಿಗೆ ಪ್ರತಿಕ್ರಿಯೆಯಾಗಿ 11,000ಕ್ಕೂ ಹೆಚ್ಚಿನ ಎಫ್‌ಐಆರ್‌ಗಳು ದಾಖಲಾಗಿವೆ. 500ಕ್ಕೂ ಹೆಚ್ಚಿನ ಬಂಧನಗಳನ್ನು ಮಾಡಲಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಮಣಿಪುರದಲ್ಲಿ ಹಿಂಸಾಚಾರ ಘಟನೆಗಳು ನಿರಂತರವಾಗಿ ಕಡಿಮೆಯಾಗುತ್ತಿವೆ ಎಂಬುದು ಗಮನಾರ್ಹ. ಇದು ಈ ಪ್ರದೇಶದಲ್ಲಿ ಶಾಂತಿ, ಭರವಸೆ ಮತ್ತು ನಂಬಿಕೆಯತ್ತ ಪ್ರಗತಿಯನ್ನು ಸೂಚಿಸುತ್ತಿದೆ. ಇಂದು ಮಣಿಪುರದ ಹೆಚ್ಚಿನ ಭಾಗಗಳಲ್ಲಿ ಶಾಲೆಗಳು, ಕಾಲೇಜುಗಳು, ಕಚೇರಿಗಳು ಮತ್ತು ಇತರ ಸಂಸ್ಥೆಗಳು ಸಾಮಾನ್ಯವಾಗಿ ಕಾರ್ಯ ನಿರ್ವಹಿಸುತ್ತಿವೆ.

ಗೌರವಾನ್ವಿತ ಸಭಾಪತಿಗಳೆ,

ದೇಶದ ಇತರ ಭಾಗಗಳಂತೆ, ಮಣಿಪುರದಲ್ಲಿ ಪರೀಕ್ಷೆಗಳನ್ನು ನಡೆಸಲಾಯಿತು, ಮಕ್ಕಳು ತಮ್ಮ ಬೆಳವಣಿಗೆಯ ಪ್ರಯಾಣ ಮುಂದುವರಿಸಲು ಅವಕಾಶ ಮಾಡಿಕೊಡಲಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಎಲ್ಲಾ ಪಾಲುದಾರರೊಂದಿಗೆ ಸಂವಾದದ ಮೂಲಕ ಶಾಂತಿ ಮತ್ತು ಸೌಹಾರ್ದತೆ ಉತ್ತೇಜಿಸಲು ಅವಿರತವಾಗಿ ಶ್ರಮಿಸುತ್ತಿವೆ. ಈ ಸ್ಮರಣೀಯ ಕಾರ್ಯವು ಸಮಾಜದ ಸಣ್ಣ ಘಟಕಗಳು ಮತ್ತು ಘಟಕಗಳನ್ನು ಸೂಕ್ಷ್ಮವಾಗಿ ಒಟ್ಟುಗೂಡಿಸುತ್ತಿದೆ. ಅದು ಶಾಂತಿಯುತವಾಗಿ ಪ್ರಗತಿಯಲ್ಲಿದೆ. ಇಂತಹ ನಿರಂತರ ಪ್ರಯತ್ನಗಳು ಹಿಂದಿನ ಸರ್ಕಾರಗಳಲ್ಲಿ ಕಂಡುಬಂದಿಲ್ಲ; ಸ್ವತಃ ಗೃಹ ಸಚಿವರು ಅಲ್ಲಿ ಹಲವಾರು ದಿನಗಳನ್ನು ಕಳೆದರು, ಆದರೆ ಗೃಹ ವ್ಯವಹಾರಗಳ ರಾಜ್ಯ ಸಚಿವರು ವಾರಗಳ ಕಾಲ ಉಳಿದುಕೊಂಡರು, ಸಂಬಂಧಪಟ್ಟ ಜನರನ್ನು ಸಂಪರ್ಕಿಸಲು ಮತ್ತು ಪಾಲುದಾರರೊಂದಿಗೆ ಪದೇಪದೆ ತೊಡಗಿಸಿಕೊಂಡರು.

ಗೌರವಾನ್ವಿತ ಸಭಾಪತಿಗಳೆ,

ಅಲ್ಲಿ ರಾಜಕೀಯ ನಾಯಕತ್ವವಿದೆ. ಈ ವಿಷಯದಲ್ಲಿ ಭಾಗಿಯಾಗಿರುವ ಎಲ್ಲಾ ಹಿರಿಯ ಸರ್ಕಾರಿ ಅಧಿಕಾರಿಗಳು ನಿಯಮಿತವಾಗಿ ಪ್ರದೇಶಗಳಿಗೆ ಭೇಟಿ ನೀಡುತ್ತಾರೆ, ನಿರಂತರ ಸಂವಾದ ನಡೆಸುತ್ತಾರೆ, ಸಮಸ್ಯೆಗಳನ್ನು ಪರಿಹರಿಸಲು ಎಲ್ಲ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ.

ಗೌರವಾನ್ವಿತ ಸಭಾಪತಿಗಳೆ,

ಪ್ರಸ್ತುತ ಮಣಿಪುರವೂ ಪ್ರವಾಹ ಭೀತಿ ಎದುರಿಸುತ್ತಿದೆ. ಕೇಂದ್ರ ಸರ್ಕಾರ ರಾಜ್ಯ ಸರ್ಕಾರಕ್ಕೆ ಸಂಪೂರ್ಣ ಸಹಕಾರ ನೀಡುತ್ತಿದೆ. ಇಂದು ಎನ್ ಡಿಆರ್ ಎಫ್ 2  ತಂಡಗಳು ಈಗಾಗಲೇ ಪ್ರದೇಶವನ್ನು ತಲುಪಿವೆ. ಅಂದರೆ ಈ ಪ್ರಾಕೃತಿಕ ವಿಕೋಪದಲ್ಲೂ ಕೇಂದ್ರ ಮತ್ತು ರಾಜ್ಯ ಜಂಟಿಯಾಗಿ ಮಣಿಪುರವನ್ನು ನೋಡಿಕೊಳ್ಳುತ್ತಿವೆ.

ಗೌರವಾನ್ವಿತ ಸಭಾಪತಿಗಳೆ,

ರಾಜಕೀಯ ಭಿನ್ನಾಭಿಪ್ರಾಯಗಳನ್ನು ಮೀರಿ ಮಣಿಪುರದಲ್ಲಿ ಪರಿಸ್ಥಿತಿ  ಸ್ಥಿರಗೊಳಿಸಲು ಒಟ್ಟಾಗಿ ಕೆಲಸ ಮಾಡುವುದು ನಮ್ಮ ಸಾಮೂಹಿಕ ಜವಾಬ್ದಾರಿಯಾಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಮಣಿಪುರದಲ್ಲಿ ಉದ್ವಿಗ್ನತೆ ಉಲ್ಬಣಗೊಳಿಸಲು ಪ್ರಯತ್ನಿಸುತ್ತಿರುವವರಿಗೆ, ಅಂತಹ ಚಟುವಟಿಕೆಗಳನ್ನು ನಿಲ್ಲಿಸುವಂತೆ ನಾನು ಅವರಿಗೆ ಎಚ್ಚರಿಕೆ ನೀಡುತ್ತೇನೆ. ಅಂತಹ ವ್ಯಕ್ತಿಗಳನ್ನು ಮಣಿಪುರದ ಜನತೆಯೇ ತಿರಸ್ಕರಿಸುವ ಕಾಲ ಬರಲಿದೆ.

ಗೌರವಾನ್ವಿತ ಸಭಾಪತಿಗಳೆ,

ಮಣಿಪುರದ ಇತಿಹಾಸ ಮತ್ತು ಘಟನೆಗಳ ಬಗ್ಗೆ ತಿಳಿದಿರುವವರು ಅದರ ಇತಿಹಾಸದಲ್ಲಿ ಆಳವಾಗಿ ಬೇರೂರಿರುವ ಅದರ ದೀರ್ಘಕಾಲದ ಸಾಮಾಜಿಕ ಸಂಘರ್ಷಗಳ ಬಗ್ಗೆ ತಿಳಿದಿರುತ್ತಾರೆ. ಅದನ್ನು ಅಲ್ಲಗಳೆಯುವಂತಿಲ್ಲ. ಈ ಸಮಸ್ಯೆಗಳಿಂದಾಗಿ ಮಣಿಪುರದಂತಹ ಚಿಕ್ಕ ರಾಜ್ಯದಲ್ಲಿ 10 ಬಾರಿ ರಾಷ್ಟ್ರಪತಿ ಆಳ್ವಿಕೆ ಹೇರಬೇಕಾಯಿತು ಎಂಬುದನ್ನು ಕಾಂಗ್ರೆಸ್ ಪಕ್ಷ ನೆನಪಿಡಬೇಕು. ಇಂತಹ ಸಮಸ್ಯೆಗಳು ಇದ್ದವು, ಆದರೆ ನಮ್ಮ ಅಧಿಕಾರಾವಧಿಯಲ್ಲಿ ಅವು ಸಂಭವಿಸಿಲ್ಲ. ಆದರೂ ಪರಿಸ್ಥಿತಿಯನ್ನು ರಾಜಕೀಯ ಲಾಭಕ್ಕಾಗಿ ಬಳಸಿಕೊಳ್ಳುವ ಪ್ರಯತ್ನಗಳು ನಿರಂತರವಾಗಿ ನಡೆಯುತ್ತಿವೆ.

ಗೌರವಾನ್ವಿತ ಸಭಾಪತಿಗಳೆ,

ಗೌರವಾನ್ವಿತ ಸದನದಲ್ಲಿ ನಾನು ರಾಷ್ಟ್ರಕ್ಕೆ ತಿಳಿಸಲು ಬಯಸುತ್ತೇನೆ, 1993ರಲ್ಲಿ ಮಣಿಪುರದಲ್ಲಿ 5 ವರ್ಷಗಳ ಕಾಲ ತೀವ್ರವಾಗಿ ಹಿಂಸಾಚಾರ ಘಟನೆಗಳು ತೆರೆದುಕೊಂಡವು. ಈ ಐತಿಹಾಸಿಕ ಸಂದರ್ಭವನ್ನು ಅರ್ಥ ಮಾಡಿಕೊಂಡು, ಪರಿಸ್ಥಿತಿಯನ್ನು ಸರಿಪಡಿಸಲು ನಾವು ಬುದ್ಧಿವಂತಿಕೆಯಿಂದ ಪ್ರಯತ್ನಿಸಬೇಕು. ಸಹಕರಿಸಲು ಇಚ್ಛಿಸುವವರೆಲ್ಲರ ಸಹಕಾರ ಕೋರುತ್ತೇವೆ. ನಮ್ಮ ಪ್ರಯತ್ನಗಳು ಸಹಜತೆಯನ್ನು ಮರುಸ್ಥಾಪಿಸಲು ಮತ್ತು ಶಾಂತಿ ಬೆಳೆಸಲು ಕೇಂದ್ರೀಕೃತವಾಗಿವೆ.

ಗೌರವಾನ್ವಿತ ಸಭಾಪತಿಗಳೆ,

ಪ್ರಧಾನ ಮಂತ್ರಿಯ ಪಾತ್ರ ವಹಿಸುವ ಮೊದಲು, ನಾನು ಮಹತ್ವದ ಅವಧಿಯವರೆಗೆ ಮುಖ್ಯಮಂತ್ರಿಯಾಗಿ ಸೇವೆ ಸಲ್ಲಿಸುವ ಸೌಭಾಗ್ಯ ಪಡೆದಿದ್ದೆ ಎಂದು ನಾನು ಭಾವಿಸುತ್ತೇನೆ. ಈ ಅನುಭವವು ಒಕ್ಕೂಟ ವ್ಯವಸ್ಥೆಯ ಆಳವಾದ ಮಹತ್ವವನ್ನು ನನಗೆ ಕಲಿಸಿದೆ. ಇದು ಸಹಕಾರಿ ಒಕ್ಕೂಟ ವ್ಯವಸ್ಥೆ ಮತ್ತು ಸ್ಪರ್ಧಾತ್ಮಕ ಸಹಕಾರಿ ಒಕ್ಕೂಟ ವ್ಯವಸ್ಥೆಯ ತತ್ವಗಳ ಮೇಲೆ ನನ್ನ ಮಹತ್ವವನ್ನು ರೂಪಿಸಿದೆ. ಈ ತತ್ವವು ಜಿ-20 ಶೃಂಗಸಭೆಯ ಸಮಯದಲ್ಲಿ ನಮ್ಮ ನಿರ್ಧಾರಗಳಿಗೆ ಮಾರ್ಗದರ್ಶನ ನೀಡಿತು. ವೈಭವಕ್ಕಾಗಿ ದೆಹಲಿಯಲ್ಲಿ ಆಯೋಜಿಸುವ ಬದಲು, ನಾವು ವಿವಿಧ ರಾಜ್ಯಗಳಾದ್ಯಂತ ಪ್ರಮುಖ ಜಿ-20 ಕಾರ್ಯಕ್ರಮಗಳನ್ನು ಆಯೋಜಿಸಿದ್ದೆವು. ಆ ರಾಜ್ಯಕ್ಕೆ ಗರಿಷ್ಠ ಜಾಗತಿಕ ಮನ್ನಣೆ ನೀಡಲು ಪ್ರಯತ್ನಗಳು ನಡೆದವು. ನಾವು ಆ ರಾಜ್ಯವನ್ನು ಬ್ರ್ಯಾಂಡಿಂಗ್ ಮಾಡುವ ದಿಕ್ಕಿನಲ್ಲಿ ಕೆಲಸ ಮಾಡಿದ್ದೇವೆ. ಇದರಿಂದ ಜಗತ್ತು ಆ ರಾಜ್ಯಗಳನ್ನು ಸಹ ಗುರುತಿಸುತ್ತದೆ, ಅದರ ಸಾಮರ್ಥ್ಯವನ್ನು ತಿಳಿದುಕೊಳ್ಳುತ್ತದೆ, ಅದರ ಅಭಿವೃದ್ಧಿ ಪಯಣದಲ್ಲಿ ಸಹಾಯ ಮಾಡುತ್ತದೆ. ಏಕೆಂದರೆ ಅಸ್ತಿತ್ವದಲ್ಲಿರುವ ಒಕ್ಕೂಟ ವ್ಯವಸ್ಥೆಯ ವೈವಿಧ್ಯಮಯ ರೂಪಗಳನ್ನು ನಾವು ತಿಳಿದಿದ್ದೇವೆ.

ಗೌರವಾನ್ವಿತ ಸಭಾಪತಿಗಳೆ,

ಕೋವಿಡ್-19 ವಿರುದ್ಧದ ನಮ್ಮ ಯುದ್ಧದ ಸಮಯದಲ್ಲಿ, ಮುಖ್ಯಮಂತ್ರಿಗಳೊಂದಿಗಿನ ನಮ್ಮ ಸಂಪರ್ಕ ಮತ್ತು ಸಂವಾದ ಆವರ್ತನವು ಬಹುಶಃ ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಒಂದು ಪೂರ್ವನಿದರ್ಶನ ಹೊಂದಿಸುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ಈ ಸದನವು ರಾಜ್ಯಗಳೊಂದಿಗೆ ಸಂಕೀರ್ಣವಾದ ಸಂಬಂಧ ಹೊಂದಿದೆ. ಆದ್ದರಿಂದ, ರಾಜ್ಯದ ಅಭಿವೃದ್ಧಿಯ ಕೆಲವು ಪ್ರಮುಖ ಕ್ಷೇತ್ರಗಳನ್ನು ಚರ್ಚಿಸಲು ಮತ್ತು ಕೆಲವು ಮನವಿಗಳನ್ನು ಹಂಚಿಕೊಳ್ಳಲು ಇದು ಸೂಕ್ತವೆಂದು ನಾನು ಭಾವಿಸುತ್ತೇನೆ. ಪ್ರಸ್ತುತ, ನಾವು ಮುಂದಿನ ಕ್ರಾಂತಿಯನ್ನು ಮುನ್ನಡೆಸುವ ಅಂಚಿನಲ್ಲಿದ್ದೇವೆ. ಆದ್ದರಿಂದ, ಪ್ರತಿ ರಾಜ್ಯವು ತಮ್ಮ ನೀತಿ ನಿರೂಪಣೆಗಳಲ್ಲಿ ಸೆಮಿಕಂಡಕ್ಟರ್‌ಗಳು ಮತ್ತು ಎಲೆಕ್ಟ್ರಾನಿಕ್ ಉತ್ಪಾದನೆಯಂತಹ ಕ್ಷೇತ್ರಗಳಿಗೆ ಆದ್ಯತೆ ನೀಡಬೇಕು. ಸಂಕೀರ್ಣ ಯೋಜನೆಗಳೊಂದಿಗೆ ಹೆಜ್ಜೆ ಹಾಕಬೇಕೆಂದು ನಾನು ಒತ್ತಾಯಿಸುತ್ತೇನೆ. ಅಭಿವೃದ್ಧಿಯಲ್ಲಿ ರಾಜ್ಯಗಳ ನಡುವೆ ಆರೋಗ್ಯಕರ ಸ್ಪರ್ಧೆಯನ್ನು ನಾನು ಪ್ರತಿಪಾದಿಸುತ್ತೇನೆ. ಹೂಡಿಕೆಗಳನ್ನು ಆಕರ್ಷಿಸಲು ನೀತಿಗಳಲ್ಲಿ ಓಟ ಇರಬೇಕು, ಉತ್ತಮ ಆಡಳಿತ ಮತ್ತು ಪಾರದರ್ಶಕ ನೀತಿಗಳಿಂದ ಇದನ್ನು ಸುಗಮಗೊಳಿಸಲಾಗುತ್ತದೆ. ಭಾರತದೊಂದಿಗೆ ತೊಡಗಿಸಿಕೊಳ್ಳಲು ಜಗತ್ತು ಉತ್ಸುಕವಾಗಿರುವ ಪ್ರಸ್ತುತ ಸನ್ನಿವೇಶದಲ್ಲಿ, ಪ್ರತಿಯೊಂದು ರಾಜ್ಯಕ್ಕೂ ಅವಕಾಶವಿದೆ ಎಂದು ನಾನು ಬಲವಾಗಿ ನಂಬುತ್ತೇನೆ. ಇದು ರಾಜ್ಯಗಳಿಗೆ ಸಂಪರ್ಕ ಹೊಂದಿದ ಸದನ ಆಗಿರುವುದರಿಂದ, ಅಭಿವೃದ್ಧಿಯ ಪಯಣದಲ್ಲಿ ಮುಂದೆ ಬಂದು ಪ್ರಯೋಜನ ಪಡೆದುಕೊಳ್ಳುವಂತೆ ನಾನು ನಿಮ್ಮನ್ನು ಒತ್ತಾಯಿಸುತ್ತೇನೆ.

ಉದ್ಯೋಗ ಸೃಷ್ಟಿಯಲ್ಲಿ ರಾಜ್ಯಗಳ ನಡುವೆ ಪೈಪೋಟಿ ಏಕೆ ಇರಬಾರದು? ಒಂದು ರಾಜ್ಯದ ನೀತಿಯು ತನ್ನ ಯುವಕರಿಗೆ ಗಣನೀಯ ಪ್ರಮಾಣದಲ್ಲಿ ಉದ್ಯೋಗ ಸೃಷ್ಟಿಸಿದರೆ, ಇನ್ನೊಂದು ರಾಜ್ಯವು ಆ ನೀತಿಯನ್ನು ಹೆಚ್ಚಿಸಲು ಮತ್ತು ಅದೇ ರೀತಿಯ ಪ್ರಯೋಜನಗಳನ್ನು ಪಡೆಯುವ ಗುರಿ ಹೊಂದಿರಬೇಕು. ಉದ್ಯೋಗಾವಕಾಶಗಳಿಗಾಗಿ ರಾಜ್ಯಗಳ ನಡುವಿನ ಸ್ಪರ್ಧೆಯು ನಮ್ಮ ಯುವಕರ ಭವಿಷ್ಯವನ್ನು ಗಮನಾರ್ಹವಾಗಿ ಬದಲಾಯಿಸುತ್ತದೆ. ಈ ಕಾರ್ಯ ವಿಧಾನವು ಯುವಜನರಿಗೆ ಅಪಾರ ಪ್ರಯೋಜನಕಾರಿಯಾಗುತ್ತದೆ ಎಂದು ನಾನು ನಂಬುತ್ತೇನೆ.

ಪ್ರಸ್ತುತ, ಉತ್ತರ ಅಸ್ಸಾಂನಲ್ಲಿ ಸೆಮಿಕಂಡಕ್ಟರ್ ಅಭಿವೃದ್ಧಿಯಲ್ಲಿ ಗಮನಾರ್ಹ ಪ್ರಗತಿ ನಡೆಯುತ್ತಿದೆ. ಈ ಉಪಕ್ರಮವು ಅಸ್ಸಾಂ ಮತ್ತು ಈಶಾನ್ಯದ ಯುವಕರಿಗೆ ಪ್ರಯೋಜನ ನೀಡುವುದಲ್ಲದೆ, ಇಡೀ ದೇಶಕ್ಕೆ ಸಕಾರಾತ್ಮಕ ಕೊಡುಗೆ ನೀಡುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ವಿಶ್ವಸಂಸ್ಥೆಯು 2023 ಇಸವಿಯನ್ನು ಸಿರಿಧಾನ್ಯಗಳ ವರ್ಷವೆಂದು ಗೊತ್ತುಪಡಿಸಿದೆ, ಇದು ಭಾರತದ ಶಕ್ತಿ ಮತ್ತು ನಮ್ಮ ಸಣ್ಣ ರೈತರಿಗೆ, ವಿಶೇಷವಾಗಿ ಸೀಮಿತ ನೀರು ಮತ್ತು ನೀರಾವರಿ ಸೌಲಭ್ಯಗಳನ್ನು ಹೊಂದಿರುವ ಪ್ರದೇಶಗಳಿಗೆ ವರವಾಗಿದೆ ಎಂದು ಗುರುತಿಸಿದೆ. ಸಿರಿಧಾನ್ಯವು ಉತ್ಕೃಷ್ಟ ಆಹಾರವಾಗಿದ್ದು, ಅಪಾರ ಸಾಮರ್ಥ್ಯ ಹೊಂದಿದೆ. ಎಲ್ಲಾ ರಾಜ್ಯಗಳು ತಮ್ಮ ತಮ್ಮ ರಾಜ್ಯಗಳ ಸಿರಿಧಾನ್ಯಗಳನ್ನು ಜಾಗತಿಕ ಮಾರುಕಟ್ಟೆಗೆ ಕೊಂಡೊಯ್ಯಲು ಮುಂದಾಗಬೇಕು, ಇದಕ್ಕಾಗಿ ಕಾರ್ಯತಂತ್ರ ರೂಪಿಸಬೇಕು ಎಂದು ನಾನು ಒತ್ತಾಯಿಸುತ್ತೇನೆ. ಈ ಉಪಕ್ರಮವು ಭಾರತೀಯ ಸಿರಿಧಾನ್ಯಗಳನ್ನು ವಿಶ್ವಾದ್ಯಂತ ಊಟದ ಟೇಬಲ್‌ಗಳ ಮೇಲೆ ಇರಿಸುವಂತಾಗಬೇಕು. ಇದು ಭಾರತೀಯ ರೈತರಿಗೆ ಗಳಿಕೆಯ ಅವಕಾಶಗಳನ್ನು ಸೃಷ್ಟಿಸುತ್ತದೆ, ಇದು ಸಮೃದ್ಧಿಯ ಮಾರ್ಗವೂ ಆಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ದೇಶದ ಸಿರಿಧಾನ್ಯಗಳು ಜಾಗತಿಕ ಪೌಷ್ಟಿಕಾಂಶ ಸವಾಲುಗಳಿಗೆ ಪರಿಹಾರವನ್ನು ನೀಡುತ್ತವೆ. ಏಕೆಂದರೆ ಇವುಗಳು 'ಸೂಪರ್‌ಫುಡ್(ಉತ್ಕೃಷ್ಟ ಆಹಾರ)'ಗಳಾಗಿವೆ. ಜಾಗತಿಕ ಆರೋಗ್ಯ ಉಪಕ್ರಮಗಳಲ್ಲಿ ಭಾರತದ ಉಪಸ್ಥಿತಿ ಹೆಚ್ಚಿಸಲು ರಾಜ್ಯಗಳು ಅವುಗಳನ್ನು ಸಕ್ರಿಯವಾಗಿ ಉತ್ತೇಜಿಸಬೇಕು.

ಗೌರವಾನ್ವಿತ ಸಭಾಪತಿಗಳೆ,

21ನೇ ಶತಮಾನದಲ್ಲಿ, ಪ್ರತಿಯೊಬ್ಬ ನಾಗರಿಕನು ಸುಲಭವಾಗಿ ಬದುಕಲು ಅರ್ಹನಾಗಿದ್ದಾನೆ. ಜನಸಾಮಾನ್ಯರಿಗೆ ಸುಲಭವಾಗಿ ಬದುಕಲು ಆದ್ಯತೆ ನೀಡುವ ನೀತಿಗಳು, ನಿಯಮಗಳು ಮತ್ತು ವ್ಯವಸ್ಥೆಗಳನ್ನು ಅಭಿವೃದ್ಧಿಪಡಿಸಲು ನಾನು ರಾಜ್ಯ ಸರ್ಕಾರಗಳನ್ನು ಪ್ರೋತ್ಸಾಹಿಸುತ್ತೇನೆ. ಈ ಸಂದೇಶವು ಇದೇ ಸದನದಿಂದ ರಾಜ್ಯಗಳಿಗೆ ಹೋದರೆ ಅದು ದೇಶಕ್ಕೆ ಉಪಯುಕ್ತವಾಗುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ಭ್ರಷ್ಟಾಚಾರ ವಿರುದ್ಧದ ನಮ್ಮ ಹೋರಾಟವು ಪಂಚಾಯತಿ, ನಗರಪಾಲಿಕೆ, ಮಹಾನಗರ ಪಾಲಿಕೆ, ತಾಲೂಕು ಪಂಚಾಯಿತಿಯಿಂದ ಜಿಲ್ಲಾ ಪಂಚಾಯಿತಿವರೆಗೆ ಆಡಳಿತದ ಎಲ್ಲಾ ಹಂತಗಳನ್ನು ತಲುಪಬೇಕು. ಈ ಘಟಕಗಳಾದ್ಯಂತ ಭ್ರಷ್ಟಾಚಾರ ನಿರ್ಮೂಲನೆ ಮಾಡಲು ರಾಜ್ಯಗಳು ಏಕೀಕೃತ ಕಾರ್ಯಾಚರಣೆ ಕೈಗೊಂಡರೆ, ನಾವು ಸಾಮಾನ್ಯ ಜನರನ್ನು ಅದರ ಹಿಡಿತದಿಂದ ತ್ವರಿತವಾಗಿ ಮುಕ್ತಗೊಳಿಸಬಹುದು.

ಗೌರವಾನ್ವಿತ ಸಭಾಪತಿಗಳೆ,

ದಕ್ಷತೆಯನ್ನು ಸದೃಢವಾಗಿ ಪರಿವರ್ತಿಸುವುದು ಇಂದಿನ ಅಗತ್ಯವಾಗಿದೆ. 21ನೇ ಶತಮಾನದಲ್ಲಿ ಭಾರತವು ತನ್ನನ್ನು ತಾನು “ಭಾರತದ ಶತಮಾನ”ವೆಂದು ಸ್ಥಾಪಿಸಲು, ನಮ್ಮ ಆಡಳಿತ, ವಿತರಣೆ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಮಾದರಿಗಳಲ್ಲಿ ದಕ್ಷತೆಯೇ ನಿರ್ಣಾಯಕವಾಗಿದೆ. ಸೇವೆಗಳ ವೇಗ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಗಳನ್ನು ಹೆಚ್ಚಿಸಲು ಪ್ರಯತ್ನಗಳನ್ನು ಮಾಡಲಾಗುವುದು ಎಂದು ನಾನು ಭರವಸೆ ನೀಡುತ್ತೇನೆ. ಸಮರ್ಥವಾಗಿ ಆಡಳಿತ ನಡೆಸಿದಾಗ, ಪಾರದರ್ಶಕತೆ ಸಹಜವಾಗಿ ಅನುಸರಿಸುತ್ತದೆ, ನಾಗರಿಕರ ಹಕ್ಕುಗಳ ರಕ್ಷಣೆಯನ್ನು ಖಾತ್ರಿಪಡಿಸುತ್ತದೆ ಮತ್ತು ಎಲ್ಲರಿಗೂ ಸುಲಭವಾಗಿ ಬದುಕಲು ಅನುಕೂಲ ಕಲ್ಪಿಸುತ್ತದೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ನಾಗರಿಕರ ಜೀವನದಲ್ಲಿ ಸರ್ಕಾರದ ಹಸ್ತಕ್ಷೇಪ ಕಡಿಮೆ ಮಾಡಲು ನಾವು ಶ್ರಮಿಸಬೇಕು ಎಂಬುದು ನನಗೆ ಮನವರಿಕೆಯಾಗಿದೆ. ಅವರ ದೈನಂದಿನ ಜೀವನದಲ್ಲಿ. ಇದನ್ನು ತರಲು ನಾವು ಈ ಗುರಿಯತ್ತ ಸಾಗುತ್ತಿದ್ದೇವೆ. ಸರ್ಕಾರದ ಬೆಂಬಲ ಅಗತ್ಯವಿರುವವರು ಅದನ್ನು ತಪ್ಪದೆ ಸ್ವೀಕರಿಸಬೇಕು, ತಮ್ಮ ಸ್ವಂತ ಪ್ರಯತ್ನದ ಮೂಲಕ ಪ್ರಗತಿ ಸಾಧಿಸಲು ಶ್ರಮಿಸುವ ವ್ಯಕ್ತಿಗಳು ಅನಗತ್ಯವಾಗಿ ಸರ್ಕಾರದ ಅಡೆತಡೆಗಳನ್ನು ಎದುರಿಸಬಾರದು. ಆದ್ದರಿಂದ, ಸಾಧ್ಯವಾದಷ್ಟು ಮಟ್ಟಿಗೆ ಸರ್ಕಾರದ ಹಸ್ತಕ್ಷೇಪ ಕಡಿಮೆ ಮಾಡುವ ಸಮಾಜ ಮತ್ತು ಸರ್ಕಾರಿ ಚೌಕಟ್ಟು ಬೆಳೆಸುವಂತೆ ನಾನು ರಾಜ್ಯಗಳನ್ನು ಒತ್ತಾಯಿಸುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ಹವಾಮಾನ ಬದಲಾವಣೆಯಿಂದಾಗಿ, ನೈಸರ್ಗಿಕ ವಿಕೋಪಗಳ ಪ್ರಮಾಣ ಹೆಚ್ಚುತ್ತಿದೆ. ಈ ಸವಾಲು ಎದುರಿಸಲು ಸಾಮೂಹಿಕ ಕ್ರಮಗಳ ಅಗತ್ಯವಿದೆ. ನೈಸರ್ಗಿಕ ವಿಪತ್ತುಗಳಿಂದ ರಕ್ಷಿಸಲು ರಾಜ್ಯಗಳು ತಮ್ಮ ವಿಪತ್ತು ನಿರ್ವಹಣಾ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಬೇಕು. ಶುದ್ಧ ಕುಡಿಯುವ ನೀರಿನ ಪ್ರವೇಶವನ್ನು ಖಚಿತಪಡಿಸಿಕೊಳ್ಳುವುದು ಮತ್ತು ಸಾಮಾನ್ಯ ಜನರಿಗೆ ಆರೋಗ್ಯ ರಕ್ಷಣೆಗೆ ಆದ್ಯತೆ ನೀಡುವುದು ಅಷ್ಟೇ ಮುಖ್ಯ. ರಾಜಕೀಯ ಇಚ್ಛಾಶಕ್ತಿ ಪ್ರದರ್ಶಿಸುವ ಮೂಲಕ ರಾಜ್ಯಗಳು ಈ ಮೂಲಭೂತ ಕಾರ್ಯಗಳನ್ನು ಪರಿಹರಿಸುವಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುತ್ತವೆ ಎಂಬ ವಿಶ್ವಾಸ ನನಗಿದೆ.

ಗೌರವಾನ್ವಿತ ಸಭಾಪತಿಗಳೆ,

ಈ ದಶಕ ಮತ್ತು ಈ ಶತಮಾನ ಭಾರತದ್ದು. ಆದಾಗ್ಯೂ, ನಮಗೆ ಮೊದಲು ಅವಕಾಶಗಳು ಬಂದಿದ್ದವು ಎಂಬುದನ್ನು ಇತಿಹಾಸವೇ ನಮಗೆ ನೆನಪಿಸುತ್ತದೆ. ಆದರೆ ನಮ್ಮದೇ ಆದ ನ್ಯೂನತೆಗಳಿಂದ ನಾವು ಅವುಗಳನ್ನು ಕಳೆದುಕೊಂಡಿದ್ದೇವೆ. ಈಗ, ಅವಕಾಶಗಳು ಜಾರಿ ಹೋಗುವಂತೆ ಬಿಡುವ ತಪ್ಪನ್ನು ನಾವು ಪುನರಾವರ್ತಿಸಬಾರದು. ನಾವು ಅವಕಾಶಗಳನ್ನು ಹುಡುಕಬೇಕು, ಅವುಗಳನ್ನು ಪಡೆದುಕೊಳ್ಳಬೇಕು ಮತ್ತು ನಮ್ಮ ಆಕಾಂಕ್ಷೆಗಳನ್ನು ಪೂರೈಸಲು ಬಳಸಬೇಕು. 1.4 ಶತಕೋಟಿ ಜನರನ್ನು ಹೊಂದಿರುವ ಭಾರತಕ್ಕೆ ಇದಕ್ಕಿಂತ ಉತ್ತಮ ಸಮಯ ಇನ್ನೊಂದಿಲ್ಲ. ಜಾಗತಿಕವಾಗಿ ಅತ್ಯಂತ ಕಿರಿಯ ಜನಸಂಖ್ಯೆಯೊಂದಿಗೆ, ಈ ಮಾರ್ಗವನ್ನು ಪ್ರಾರಂಭಿಸಲು. ನಮ್ಮಂತೆಯೇ ಅದೇ ಸಮಯದಲ್ಲಿ ಸ್ವಾತಂತ್ರ್ಯ ಗಳಿಸಿದ ಕೆಲವು ದೇಶಗಳು ನಮ್ಮನ್ನು ಹಿಂದೆ ಬಿಟ್ಟು ವೇಗವಾಗಿ ಮುನ್ನಡೆದವು ಎಂಬುದು ಸ್ಪಷ್ಟವಾಗಿದೆ. ಈ ಪಥವನ್ನು ಬದಲಿಸಿ ಸಂಕಲ್ಪದಿಂದ ಮುನ್ನಡೆಯಬೇಕು. 1980ರ ದಶಕದಲ್ಲಿ ಸುಧಾರಣೆಗಳನ್ನು ಜಾರಿಗೆ ತಂದ ದೇಶಗಳು ನಂತರ ವೇಗವಾಗಿ ಅಭಿವೃದ್ಧಿ ಹೊಂದುತ್ತಿವೆ. ಸುಧಾರಣೆಗಳಿಗೆ ನಾವು ಹಿಂಜರಿಯಬಾರದು ಅಥವಾ ಭಯಪಡಬಾರದು. ಅವುಗಳನ್ನು ಅಪ್ಪಿಕೊಳ್ಳುವುದರಿಂದ ನಮ್ಮ ಶಕ್ತಿ ಕುಂದುವುದಿಲ್ಲ. ಬದಲಾಗಿ, ಹೆಚ್ಚಿನ ಭಾಗವಹಿಸುವಿಕೆ ಮತ್ತು ನಿರ್ಧಾರ ತೆಗೆದುಕೊಳ್ಳುವ ಮೂಲಕ ಸಾಮಾನ್ಯ ಜನರನ್ನು ಸಬಲೀಕರಣಗೊಳಿಸಿದರೆ ನಮ್ಮನ್ನು ಬಲಪಡಿಸುತ್ತದೆ. ನಾವು ಪ್ರಾರಂಭಿಸಲು ತಡವಾಗಿದ್ದರೂ, ನಾವು ನಮ್ಮ ಪ್ರಗತಿಯನ್ನು ವೇಗಗೊಳಿಸಬಹುದು ಮತ್ತು ನಾವು ಬಯಸಿದ ಯಶಸ್ಸನ್ನು ಸಾಧಿಸಬಹುದು.

ಗೌರವಾನ್ವಿತ ಸಭಾಪತಿಗಳೆ,

ಅಭಿವೃದ್ಧಿ ಹೊಂದಿದ ಭಾರತ ಕಟ್ಟುವ ಧ್ಯೇಯವು ಯಾವುದೇ ಒಬ್ಬ ವ್ಯಕ್ತಿಯ ಧ್ಯೇಯವಲ್ಲ, ಇದು 14ದ ಕೋಟಿ ನಾಗರಿಕರ ಧ್ಯೇಯವಾಗಿದೆ. ಇದು ಯಾವುದೇ ಏಕ ಸರ್ಕಾರವನ್ನು ಮೀರಿಸುತ್ತದೆ. ಇದು ನಮ್ಮ ದೇಶದ ಎಲ್ಲಾ ಹಂತದ ಸರ್ಕಾರಗಳು ಮತ್ತು ಆಡಳಿತಗಳ ಸಾಮೂಹಿಕ ಧ್ಯೇಯವಾಗಿದೆ. ಈ ಏಕೀಕೃತ ನಿರ್ಣಯದೊಂದಿಗೆ, ನಾವು ಈ ಆಕಾಂಕ್ಷೆಗಳನ್ನು ವಾಸ್ತವಕ್ಕೆ ತಿರುಗಿಸಬಹುದು ಎಂದು ನಾನು ದೃಢವಾಗಿ ನಂಬುತ್ತೇನೆ.

ಗೌರವಾನ್ವಿತ ಸಭಾಪತಿಗಳೆ,

ಪ್ರಪಂಚವು ಹೂಡಿಕೆ ಮಾಡಲು ಉತ್ಸುಕವಾಗಿದೆ ಮತ್ತು ಭಾರತವು ಅವರ ಅಗ್ರಗಣ್ಯ ಆಯ್ಕೆಯಾಗಿದೆ ಎಂದು ನಾನು ಜಾಗತಿಕ ವೇದಿಕೆಗಳ ಸಂವಾದಗಳಲ್ಲಿ, ಸತತವಾಗಿ ಕಂಡುಕೊಂಡಿದ್ದೇನೆ. ಹೂಡಿಕೆಗಳು ನಮ್ಮ ರಾಜ್ಯಗಳಿಗೆ ಹರಿಯಲು ಸಿದ್ಧವಾಗಿವೆ ಮತ್ತು ಈ ಅವಕಾಶದ ಪ್ರಾಥಮಿಕ ಪ್ರವೇಶ ದ್ವಾರ ಪ್ರತಿ ರಾಜ್ಯವೂ ಆಗಿದೆ. ರಾಜ್ಯಗಳು ಈ ಅವಕಾಶವನ್ನು ಪೂರ್ಣ ಪ್ರಮಾಣದಲ್ಲಿ ಬಳಸಿಕೊಂಡರೆ, ಅವರು ಸಹ ಏಳಿಗೆ ಹೊಂದುತ್ತಾರೆ ಎಂಬ ವಿಶ್ವಾಸವಿದೆ.

ಗೌರವಾನ್ವಿತ ಸಭಾಪತಿಗಳೆ,

ನಮ್ಮ ಗೌರವಾನ್ವಿತ ಸದಸ್ಯರು ಎತ್ತಿದ ಎಲ್ಲಾ ಕಳವಳಗಳನ್ನು ಪರಿಹರಿಸುವ ಸಮಗ್ರ ಅವಲೋಕನ ನೀಡಲು ನಾನು ಪ್ರಯತ್ನಿಸಿದೆ. ಅವರ ಭಾಷಣ, ಅವರು ನೀಡಿದ ಮಾರ್ಗದರ್ಶನ ಮತ್ತು ನಮ್ಮ ರಾಷ್ಟ್ರದ ಜನರಲ್ಲಿ ಅವರು ತುಂಬಿದ ವಿಶ್ವಾಸಕ್ಕಾಗಿ ನಾನು ರಾಷ್ಟ್ರಪತಿ ಅವರಿಗೆ ನನ್ನ ಹೃತ್ಪೂರ್ವಕ ಕೃತಜ್ಞತೆಯನ್ನು ಸಲ್ಲಿಸುತ್ತೇನೆ. ನನ್ನ ಪರವಾಗಿ ಮತ್ತು ಈ ಸದನದ ಪರವಾಗಿ, ನಾನು ನನ್ನ ಭಾಷಣ  ಮುಕ್ತಾಯಗೊಳಿಸುತ್ತೇನೆ.

ತುಂಬು ಧನ್ಯವಾದಗಳು!

ಹಕ್ಕು ನಿರಾಕರಣೆ: ಪ್ರಧಾನ ಮಂತ್ರಿ ಅವರ ಭಾಷಣದ ಅಂದಾಜು ಇಂಗ್ಲೀಷ್ ಅನುವಾದದ ಕನ್ನಡ ರೂಪಾಂತರ ಇದಾಗಿದೆ. ಅವರು ಮೂಲತಃ ಹಿಂದಿ ಭಾಷೆಯಲ್ಲಿ ಭಾಷಣ ಮಾಡಿದ್ದಾರೆ.

*****