وزیر اعظم جناب نریندر مودی کی قیادت میں، کھادی اور ولیج انڈسٹریز کمیشن (کے وی آئی سی)، بہت چھوٹی، چھوٹی اور درمیانے درجے کی صنعتوں کی وزارت نے مالی سال 2023-24 میں پیداوار، فروخت، اور روزگار کے نئے مواقع پیدا کرنے میں ایک نیا ریکارڈ قائم کیا ہے۔

آج یہاں مالی سال 2023-24 کے عارضی اعداد و شمار جاری کرتے ہوئے، کے وی آئی سی کے چیئرمین جناب منوج کمار نے کہا کہ پچھلے تمام اعداد و شمار کو پیچھے چھوڑتے ہوئے، مالی سال 2013-14 کے مقابلے میں فروخت میں 399.69 فیصد (تقریباً 400 فیصد)، پیداوار میں 314.79 فیصد (تقریباً 315 فیصد)، اور نئے روزگار پیدا کرنے میں 80.96 فیصد (تقریباً 81 فیصد) اضافہ ہوا ہے۔ مالی سال 2022-23 میں، سال 2013-14 کے مقابلے میں فروخت میں 332.14 فیصد، پیداوار میں 267.52 فیصد، اور روزگار کے نئے مواقع پیدا کرنے میں 69.75 فیصد کا اضافہ ہوا۔

جناب کمار نے کہا کہ کے وی آئی سی کی اس شاندار کارکردگی نے 2047 تک ’ترقی یافتہ ہندوستان‘ کے وژن کو عملی جامہ پہنانے اور ہندوستان کو دنیا کی تیسری سب سے بڑی معیشت بنانے کی سمت میں اہم کردار ادا کیا ہے۔ انہوں نے کہا کہ آزاد ہندوستان کی تاریخ میں پہلی بار کے وی آئی سی مصنوعات کی فروخت مالی سال 2023-24 میں 1.55 لاکھ کروڑ روپے سے تجاوز کر گئی ہے۔ مالی سال 2022-23 میں فروخت کا اعداد و شمار 1.34 لاکھ کروڑ روپے تھا۔ مودی حکومت کے پچھلے دس مالی سالوں میں، دیہی علاقوں میں کاریگروں کے ذریعہ تیار کردہ دیسی کھادی اور گاؤں کی صنعت کی مصنوعات کی فروخت، جو کہ مالی سال 2013-14 میں 31154.20 کروڑ روپے تھی، مالی سال 2023-24 میں بڑھ کر 155673.12 کروڑ روپے کی سب سے زیادہ سطح پر پہنچ گئی ہے، جو اب تک کی سب سے بڑی کامیابی ہے۔ مالی سال 2023-24 میں، کے وی آئی سی کی کوششوں سے دیہی علاقوں میں 10.17 لاکھ نئی ملازمتیں پیدا ہوئی ہیں، جس سے دیہی ہندوستان کی معیشت مضبوط ہوئی ہے۔

کے وی آئی سی کے چیئرمین نے اس تاریخی کامیابی کا سہرا قابل احترام باپو کی تحریک، وزیر اعظم جناب نریندر مودی کی ضمانت اور ملک کے دور دراز دیہاتوں میں کام کرنے والے کروڑوں کاریگروں کی انتھک محنت کو دیا ہے۔ انہوں نے کہا کہ وزیر اعظم جناب نریندر مودی کی کھادی کی توثیق نے کھادی مصنوعات میں لوگوں کا اعتماد بڑھا ہے۔ کھادی نوجوانوں کے لیے فیشن کا ایک ’نیا اسٹیٹس سمبل‘ بن چکی ہے۔ کھادی اور گاؤں کی صنعت کی مصنوعات کی مانگ مارکیٹ میں تیزی سے بڑھ رہی ہے، جس کی عکاسی پیداوار، فروخت اور روزگار کے اعداد و شمار سے ہوتی ہے۔ انہوں نے مزید کہا کہ کھادی اور دیہی صنعتوں کی پیداوار بڑھانے کے لیے وزیر اعظم جناب نریندر مودی کی رہنمائی میں گزشتہ دس سالوں میں بڑی تبدیلیاں اور فیصلے کیے گئے ہیں، جن کے مثبت نتائج برآمد ہو رہے ہیں۔ انہوں نے مزید کہا کہ یہ اعداد و شمار اس بات کا ثبوت ہیں کہ ’میک ان انڈیا‘، ’ووکل فار لوکل‘ اور ’سودیشی مصنوعات‘ پر ملک کے لوگوں کا اعتماد بڑھ گیا ہے۔

کھادی اور گاؤں کی صنعت کی مصنوعات کی پیداوار، جو مالی سال 2013-14 میں 26,109.08 کروڑ روپے تھی، مالی سال 2023-24 میں 108,297.68 کروڑ روپے تک پہنچ گئی، جس میں 314.79 فیصد کا اضافہ ہوا، جبکہ مالی سال 2022-23 میں پیداوار 95956.67 کروڑ روپے تھی۔ یہ مسلسل بڑھتی ہوئی پیداوار اس بات کا مضبوط ثبوت ہے کہ کھادی اور ولیج انڈسٹریز کمیشن نے دیہی علاقوں میں تاریخی کام کیا ہے۔

پچھلے 10 مالی سالوں میں، کھادی اور ولیج انڈسٹریز کی مصنوعات نے ہر سال فروخت کے نئے ریکارڈ قائم کیے ہیں۔ جب کہ مالی سال 2013-14 میں فروخت 31,154.20 کروڑ روپے تھی، وہ مالی سال 2023-24 میں 1,55,673.12 کروڑ روپے تک پہنچ گئی، جس میں 399.69 فیصد کے غیر معمولی اضافہ کے ساتھ، اب تک کی سب سے زیادہ فروخت شامل ہے۔

گزشتہ دس سالوں میں کھادی کے کپڑے کی پیداوار میں بھی غیر معمولی اضافہ ہوا ہے۔ جب کہ کھادی کپڑوں کی پیداوار مالی سال 2013-14 میں 811.08 کروڑ روپے تھی، یہ مالی سال 2023-24 میں 295.28 فیصد کے اضافے کے ساتھ 3,206 کروڑ روپے تک پہنچ گئی، جو اب تک کی بہترین کارکردگی ہے۔ مالی سال 2022-23 میں کھادی کپڑوں کی پیداوار 2915.83 کروڑ روپے تھی۔

کھادی کپڑوں کی مانگ میں بھی پچھلے دس مالی سالوں میں تیزی سے اضافہ ہوا ہے۔ جبکہ مالی سال 2013-14 میں اس کی فروخت صرف 1,081.04 کروڑ روپے تھی، یہ مالی سال 2023-24 میں 500.90 فیصد کے اضافے کے ساتھ 6,496 کروڑ روپے تک پہنچ گئی۔ مالی سال 2022-23 میں 5,942.93 کروڑ روپے کے کھادی کپڑے فروخت ہوئے۔ وزیر اعظم جناب نریندر مودی کی طرف سے بڑے پلیٹ فارموں سے کھادی کے فروغ کا کھادی کے کپڑوں کی فروخت پر وسیع اثر پڑا ہے۔ گزشتہ سال ملک میں منعقدہ G-20 سربراہی اجلاس کے دوران وزیر اعظم نے جس طرح کھادی کو فروغ دیا اس نے عالمی برادری کو کھادی کی طرف راغب کیا۔

کھادی اینڈ ولیج انڈسٹری کمیشن کا بنیادی مقصد دیہی علاقوں میں روزگار کے زیادہ سے زیادہ مواقع فراہم کرنا ہے۔ کے وی آئی سی نے پچھلے دس سالوں میں اس علاقے میں ایک ریکارڈ بھی قائم کیا ہے۔ جب کہ مجموعی ملازمتیں مالی سال 2013-14 میں 1.30 کروڑ تھی، یہ 43.65 فیصد کے اضافے کے ساتھ 2023-24 میں 1.87 کروڑ تک پہنچ گئی۔ اسی طرح، جب کہ مالی سال 2013-14 میں 5.62 لاکھ نئی ملازمتیں پیدا ہوئیں، مالی سال 2023-24 میں یہ 80.96 فیصد اضافے کے ساتھ 10.17 لاکھ تک پہنچ گئی۔ کھادی کے کپڑے بنانے میں 4.98 لاکھ دیہی کھادی کاریگر (اسپنر اور ویور) اور کارکن بھی کام کرتے ہیں۔

کھادی اور گرام ادیوگ بھون، نئی دہلی کے کاروبار میں بھی پچھلے دس سالوں میں بے مثال ترقی ہوئی ہے۔ جب کہ یہاں کا کاروبار مالی سال 2013-14 میں 51.13 کروڑ روپے تھا، یہ مالی سال 2023-24 میں 87.23 فیصد بڑھ کر 95.74 کروڑ روپے ہو گیا۔ مالی سال 2022-23 میں کھادی گرام ادیوگ بھون نئی دہلی کا کاروبار 83.13 کروڑ روپے تھا۔

**********

ش ح۔ ف ش ع- م ف

U: 8182