امور داخلہ اور باہمی تعاون کے مرکزی وزیر جناب امت شاہ نے آج احمد آباد، گجرات میں امین پی جے کے پی ودھیارتھی بھون کا افتتاح کیا۔ اس موقع پر گجرات کے وزیر اعلیٰ بھوپیندر پٹیل سمیت کئی معززین موجود تھے۔

جناب امت شاہ نے احمد آباد میں جدید ملٹی اسپیشلٹی ایس ایل آئی ایم ایس اسپتال کا بھی افتتاح کیا۔

قبل ازیں جناب امت شاہ نے احمد آباد کے سری جگناتھ مندر میں منگلا آرتی کی۔

ایکس پلیٹ فارم پر ایک پوسٹ میں مرکزی وزیر داخلہ نے مہا پربھو جگن ناتھ جی کی رتھ یاترا کے موقع پر ہم وطنوں کو اپنی دلی مبارکباد پیش کی ۔ انہوں نے کہا، "مہا پربھو جگن ناتھ کی رتھ یاترا ہندوستانی ثقافتی ورثے اور خوشحالی کو محفوظ رکھنے اور نئی پیش رفت فراہم کرنے کا ایک اچھا موقع ہے، جسے ملک کے کروڑوں عقیدت مند انتہائی عقیدت کے ساتھ مناتے ہیں۔ یہ یاترا اس بات کی علامت ہے کہ ہندوستانی ثقافت  واقعتا متحرک ہے اور تقریبات اور روحانیت اس کی خصوصیات ہیں ۔میں مہا پربھو کی رتھ یاترا پر تمام ہم وطنوں کو دلی  مبارکباد پیش کرتا ہوں اور مہا پربھو جگناتھ، ویر بلبھدر اور ماتا سبھدرا سے ہر ایک کی بھلائی اور ترقی کے لیے دعا کرتا ہوں۔

امین پی جے کے پی ودھیارتھی بھون کے افتتاح کے بعد، جناب امت شاہ نے کہا کہ اگر کسی ادارے نے اپنے قیام کے 100 سال مکمل کیے ہیں، تو یہ کہا جا سکتا ہے کہ اس ادارے کو پورے سماج کی حمایت حاصل ہے، تب ہی وہ 100 سال پورے کرنے میں کامیاب ہو سکا ہے۔ انہوں نے کہا کہ اس ادارے نے 92 سال سے مسلسل ہزاروں بچوں کی زندگیوں میں علم کے چراغ جلائے ہیں اور اس ہاسٹل نے کئی شخصیات دی ہیں ،جنہوں نے گجرات اور ملک کی خدمت کی۔ انہوں نے طلباء سے کہا کہ زندگی میں خواہ کتنی ہی مشکلات آئیں، اگر آپ ان کا مقابلہ مسکراہٹ اور عزم کے ساتھ کریں تو تمام مشکلات خود ہی دور ہو جائیں گی۔

مرکزی وزیر داخلہ نے کہا کہ اس ادارے نے بہت سے اچھے شہری پیدا کیے ہیں جنہوں نے گجرات کی ترقی میں اپنا تعاون پیش کیا ہے۔ انہوں نے کہا کہ آج ہم سب جہاں بیٹھے ہیں، سردار پٹیل نے کبھی اپنے دن گزارے تھے اور تحریک آزادی کے دوران کئی میٹنگیں کی تھیں۔ انہوں نے کہا کہ ہر جگہ کی اپنی ثقافت ہوتی ہے اور زمین سے جڑنا ان ثقافتی اقدار کو ہمارے اندر پیدا کرتا ہے۔ جناب شاہ نے کہا کہ یہاں آنے والے طلباء کو ہمیشہ یاد رکھنا چاہیے کہ سردار پٹیل جیسی عظیم شخصیت نے تحریک آزادی میں یہاں سے بہت بڑا تعاون کیا تھا۔ انہوں نے کہا کہ آج کی نسل کے طلباء کو ملک کے لیے اپنی جانیں قربان کرنے کی ضرورت نہیں بلکہ انہیں ملک کے لیے جینے کی ضرورت ہے۔ انہوں نے طلباء سے کہا کہ وہ اپنی زندگی میں جو کچھ بھی کریں، ملک کے لیے کریں۔ انہوں نے کہا کہ ہمیں زندگی بھر ملک کے لیے کام کرنے کا جذبہ رکھنا چاہیے۔

جناب امت شاہ نے کہا کہ اس ودھیارتھی بھون میں تقریباً 1000 طلباء اعلیٰ تعلیم کے لیے تعلیم حاصل کریں گے۔ انہوں نے کہا کہ جن علاقوں میں اعلیٰ تعلیم کی سہولت نہیں وہاں کے طلباء بھی یہاں آکر تعلیم حاصل کر سکیں گے ،جس سے ان کی زندگیاں روشن ہوں گی۔ انہوں نے کہا کہ کدوا پٹیل برادری نے گجرات کی ترقی میں بہت تعاون کیا ہے۔ جناب شاہ نے کہا کہ اگر ہم گجرات اور پٹیل برادری کی ترقی کے گراف کو دیکھیں تو دونوں متوازی طور پر آگے بڑھ رہے ہیں۔ انہوں نے کہا کہ پٹیل برادری کی ترقی کے ساتھ ساتھ گجرات کی بھی ترقی ہوئی ہے۔ انہوں نے کہا کہ پٹیل برادری ایک محنتی برادری ہے، جس میں تعلیم، کاروباری ذہن، ہمت اور سماج کو متحد کرکے آگے بڑھنے جیسی خوبیاں ہیں، جس نے پوری پٹیل برادری، خاص کر کدوا پاٹیدار برادری کو بہت آگے لے گیا ہے۔ انہوں نے کہا کہ اس کمیونٹی نے گجرات اور ملک کی ترقی کے ساتھ ساتھ معاشرے کی ترقی میں بھی بہت تعاون کیا ہے۔

امور داخلہ اور باہمی تعاون کے مرکزی وزیر نے کہا کہ یہاں آنے والے تمام طلباء بہت خوش قسمت ہیں کہ انہیں ایک تاریخی مقام پر تعلیم حاصل کرنے کا موقع ملا ہے۔ انہوں نے کہا کہ یہ ہر انسان کا حق ہے کہ وہ اپنی فلاح و بہبود کے لیے سوچے اور اپنی خوشیوں کے حصول میں لگے، لیکن یہ معاشرے کے لیے اچھا ہو گا اگر کوئی اپنی فلاح کے لیے ایسے راستے کا انتخاب کرے جس سے دوسرے لوگوں کو بھی فائدہ ہو۔ جناب شاہ نے کہا کہ طلباء کو اپنی زندگی کا ایک مقصد طے کرنا چاہیے اور اسے حاصل کرنے کے لیے کوششیں کرنا بہت ضروری ہے۔ انہوں نے کہا کہ مقصد کے حصول کے لیے زندگی میں محنت کرنا ضروری ہے لیکن شارٹ کٹ کبھی نہیں اپنانا چاہیے۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض  ۔ت ع  (

8141