سماجی انصاف اور تفویض اختیارات کے مرکزی وزیر ڈاکٹر وریندر کمار نے آج ڈاکٹر امبیڈکر انٹرنیشنل سنٹر میں ہندوستانی سماعت سے محروم کرکٹ ٹیم کو انگلینڈ کے خلاف دو طرفہ بین الاقوامی سماعت سے محروم کرکٹ سیریز میں ان کی تاریخی جیت پر مبارکباد پیش  کی۔ ٹیم نے انگلینڈ میں 18 جون سے 27 جون 2024 کے دوران ہونے والے ٹی 20 میچوں میں 5-2 سے جیت کے ساتھ سیریز اپنے نام کی۔

اعزازی تقریب کے دوران، ڈاکٹر کمار نے ٹیم کے ارکان کو گلدستے اور شال سے نوازا، اور ان کی شاندار کامیابی پر قوم کے فخر کا اظہار کیا۔ ڈاکٹر کمار نے کہا، "انڈین سماعت سے محروم کرکٹ ٹیم کی یہ جیت پورے ملک کے لیے فخر کا لمحہ ہے۔ ٹیم کے عزم نے ناممکن کو ممکن میں بدل دیا ہے۔ یہ جیت صرف آپ کی نہیں بلکہ پوری قوم کی ہے،"۔

وزیر موصوف  نے مزید کہا، "ہمارے سماعت سے محروم کھلاڑیوں نے ثابت کیا ہے کہ موقع ملنے پر وہ ہمیشہ شاندار کارکردگی کا  مظاہرہ کر سکتے ہیں۔ غیر ملکی سرزمین پر ترنگا لہرانا ہم سب کے لیے بڑے فخر کی بات ہے۔ کرکٹ کے میدان پر فتح ایک شخص کی زندگی میں توانائی، جوش اور  مسرت پیدا کرتی ہے اور انہیں سخت ترین حالات پر قابو پانے کی ترغیب دیتی ہے۔"

اس تقریب میں معذور افراد کو بااختیار بنانے کے محکمے کے سکریٹری جناب راجیش اگروال، ڈپٹی ڈائریکٹر جنرل جناب کشور بابو راؤ سورواڈے، محکمہ کے سینئر افسران اور ہندوستانی انجمن برائے سماعت سے محروم افراد کے نمائندے بھی موجود تھے۔ انہوں نے ٹیم کے تمام ممبران کو مبارکباد پیش کی  اور نیک خواہشات کا اظہار کیا۔

ڈاکٹر کمار نے یہ کہتے ہوئے اختتام کیا، "ہندوستانی سماعت سے محروم  کرکٹ ٹیم کی کامیابی سماعت سے محروم  کھلاڑیوں کی زندگیوں میں امید اور حوصلہ افزائی پیدا  کرے گی اور انہیں آگے بڑھنے اور مزید بلندیوں کو حاصل کرنے کی ترغیب دے گی۔"

**********

ش ح۔ا ک ۔ رب

U:8028