নমস্কার!

ঙসিগী থৌরম অসিদা শরুক য়াবীরিবা অমসুং থৌরম অসিনা অথোইবা মিৎয়েং তারিবা ঐখোয়গী অহল ইবুংঙো শ্রীমান ভেঙ্কয়া নাইদু গারু, মহাক্কী ইমুং মনুং, রাজ্য কয়াগী রাজ্যপাল, মন্ত্রী অমসুং সেনিয়র ওইরবা মীথুংলেন, ইবেম্মা অমসুং ইবুংঙোশিং!

হয়েং জুলাইগী অহানবা অসি ভেঙ্কয়া নাইদুজীগী মপোক নুমিৎনি। মহাক্কী পুন্সি খোঙচৎকী 75শুবা চহিনি। হায়রিবা চহি 75 অসি অখন্নবা চাউখৎ থৌরাংগী খোঙচৎনি। চহি 75 অসি অখন্নবা তাঙ্কক অমা ওইরিবনি। মহাক্কী বাইওগ্রাফীগা লোয়ননা মহাক্কা মরী লৈনবা অতোপ্পা লাইরিক অনি অমগা ফোঙবগী খুদোংচাবা ফংজবসিদা ঐহাক্না নুংঙাইবা ফাওই। লাইরিকশিং অসিনা মীয়ামদা ইথিল পীগনি, লৈবাক সেবা তৌবগী অচুম্বা মায়কৈ তাক্কনি হায়না ঐহাক্না থাজৈ।

মরুপশিং,

ঐহাক্না ভেঙ্কয়াজীগা মতম শাংনা থবক তৌমিন্নবগী খুদোংচাবা ফংজখি। মহাক্না পার্তীগী লৈবাক্কী প্রসিদেন্ত ওইরিঙৈদা, মহাক্না কেবিনেতকী সেনিয়র মেম্বর ওইরিঙৈদা, মহাক্না লৈবাক্কী উপ রাস্ত্রপতি ওইরিঙৈদা অমসুং রাজ্যসভাগী চেয়রমেন ওইরিঙৈদা ঐহাক্কী মহাক্কা থবক তৌমিন্নদুনা লাকখিবনি। অচম্বা খুঙ্গংগী লৌমীগী ইমুংদগী থোক্লক্তুনা চাউরবা থৌদাং কয়া লৌবা ঙম্লকপগী খোঙচৎ অসিদা মহাক্না তোঙান-তোঙানবা থৌদোক ৱাথোক কয়া থেংনরমগদগে হায়বা অদোম অমুক্তা খন্থবীয়ু। ঐহাক অমসুং ঐহাক্কুম্বা মীওই লিশিং কয়ানা বেঙ্কয়াজীদগী পারা কয়া অমা তম্বগী খুদোংচাবা ফংজখি।

মরুপশিং,

বেঙ্কয়াজীগী পুন্সি, ৱাখল্লোন, মিৎয়েং অমসুং মওং-মতৌনা মতিক চাবা মীওই অমগী শক্তম উৎলি। ঐখোয়না ঙসিদি আন্ধ্র অমসুং তেলঙ্গানাদা ফিভম য়াম্না ফনা লৈরি। অদুবু দিকেদ খরগী মমাংদা মফমসিদা জন সংঘ অমসুং ভারতিয় জনতা পার্তীগী মরা কয়া চেৎলমদে। মদুগুম্বা ফিভম লৈজরবশু, নাইদুজীনা মতমদুদা ABVPগী থৌমী অমা ওইনা লৈবাক্না খ্বাইদগী হেল্লি হায়বগী ৱাখল্লোনগা লোয়ননা লৈবাক্কীদমক্তা করিগুম্বা খরা পাংথোক্কে হায়বগী অচেৎপা ৱারেপ লৌদুনা লাকখি। মতুংদা মহাক্না জন সংঘদা চঙলকখি। কংগ্রেসনা সংবিধানগী মগুন ঙাক্তনা ইমর্জেন্সী পুরকখিবগী মতম অদু নুমিৎ খরনিগী মমাংদা চহি য়াংখৈ ফাখ্রে। ইমর্জেন্সীগী মাইয়োক্তা শিব কিদনা লেপখিবা মীওই অমদি বেঙ্কয়াজীনি, মতমদুদা মহাক্না থা 17মুক জেলদা লৈখিবনি। মরম অদুনা, ঐহাক্না মহাকপু ইমর্জেন্সীগী মৈশা নংখিবা মরুপ অমনি হায়না খল্লিবনি।

মরুপশিং,

লৈঙাকপা হায়বসি নুংঙাইনবা নত্তে, সেবা তৌবা অমসুং ৱাশক ঙাক্নবা পাম্বৈ অমনি। বেঙ্কয়াজীনা অতলজীগী সরকারগী শরুক অমা ওইখিবা মতমদা ৱাফম অসি থবক্না অচুম্বা ওইনা তাকখিবনি। ঐখোয়গী পার্তী মনুংদা বেঙ্কয়াজীবু থাক ৱাংনা থম্বা মরম্না মালেম্না শীংথানগদবা মন্ত্রালয় অমদা মহাক্না চঙফম থোকই। মসিগুম্বা মন্ত্রালয় অমা মহাক্না শোইদনা ফংগনি হায়না খল্লম্বা য়াই। অদুবু মহাক্না খুঙ্গং চাউখৎ থৌরাংগী মন্ত্রালয় ফংলবদি হেন্না নুংঙাইগনি হায়খিবনি। মসি অচম্বা ৱাফম নত্তে, মহাক্না মসি করিগী হায়রিবনো, মরমদি মহাক্না খুঙ্গংগী সেবা নীংথিনা তৌনিংবগীনি। মসিগী অখন্নবা ৱাফম অমা য়েংবীয়ু, মহাক্না অতলজীগী মতমদা খুঙ্গং চাউখৎ থৌরাংগী থৌদাং পাংথোকখি। অদুগা ঐহাক্কা লোয়নবা মতমদা মহাক্না শহরগী চাউখৎ থৌরাংগী সেনিয়র কেবিনেত মন্ত্রী ওইনা থবক তৌখি। হায়বদি, হীরম অনিমক্তা মায় পাকখ্রে হায়বনি। মহাক্না হীরম অসিদা থবক তৌখিবগে, ভারতকী শহরগী মিৎয়েং য়েংখিবা, লৌখিবা খোঙথাং, মহাক্কী কত্থোকপগী মতাংদা ৱারী লিরবদি পুং কয়া অমা চঙগনি। বেঙ্কয়াজীগী মতমদা স্বচ্ছ ভারত মিশন, স্মার্ত সিতী মিশন অমসুং অমৃত য়োজনাগুম্বা খোঙথাং কয়া অমা হৌদোক্লমখি।

মরুপশিং,

বেঙ্কয়াজীগী ৱারী শাবা মতমদা মহাক্কী ৱাঙাংলোই ওইবগী মতিক, মহাক্কী ৱাখল্লোনগী মতাংদা পন্দ্রবদি ৱারী মপুং ফারোই। বেঙ্কয়াজীগী মীকুপ নাহুম শিংবা, মহাক্কী খুদক্তা পাউখুম পীবা ঙম্বগী মতিক, মহাক্কী ৱান লাইনর অসিগা চাংদম্ননীংঙাই লৈরোই হায়না ঐহাক্না লৌই। বাজপাইজীগী কোলিসন সরকার লৈরিঙৈ মতমদা মহাক্না খুৎ অমদা বি.জে.পি.গী ফিরাল অমসুং অতোপ্পা খুৎ মদনা এন.দি.এ.গী এজেন্দা হায়না থমখিবা ৱাফম ঐহাক্না ঙসিশু নীংশিংলি। অদুগা, ইং 2014দা সরকার শেম্লবা নুমিৎ খরনিগী তুংদা মহাক্না হায়খি “মেকিং ওফ দিভেলপ ইন্দিয়া” , হায়বদি MODI হায়না ফোংদোকখিবনি। বেঙ্কয়াজীগী ৱাখল্লোন অসি মতৌ করম্না খনবনো হায়না ঐহাক মতমদুদা ঙকখিবনি। বেঙ্কয়াজীগী ৱাফম অসি মগুন য়াম্না লৈ হায়না ঐহাক্না মহাক্কী মওং মতৌমক্তদা রাজ্যসভাদা অমুক্কা হন্না হায়খিবনি। মহাক্কী ৱারোলদা মিৎয়েংশু লৈ অমসুং পাইরক্কী লৌশিংশু লৈ। মহাক্কী ৱারোল তাবদা নুংশিবশু ফাওই অদুগা লৌশিং ওইনা লৌবশু য়াবনি।

মরুপশিং,

মহাক্কী মসিগুম্বা অখন্নবা মওং মতৌ অসিগা লোয়ননা মহাক্না রাজ্যসভাগী চেয়রমেন ওইবা মতমশিংদা হাউসপু পোজিতিবিতীনা থলহন্দুনা লৈহনখিবনি। মহাক্কী মতমদা হাউসকী পুৱারী ওইরবা ৱারেপ কয়া মহাক্না লৌরমখি, মসি লৈবাক পুম্বনা উনখিবনি। জম্মু কশ্মিরদগী আর্তিকল 370 লৌথোকপগী বিল অদু লোক সভাগী মহুত্তা রাজ্য সভাদা পুথোকখিবনি। মতমদুদা, রাজ্যসভাদা ঐখোয়গী মেজোরিতী লৈরমদে হায়বা অদোম খঙলমগনি। অদুবু আর্তিকল 370 লৌথোকপগী বিল অদু রাজ্য সভাদা য়াম্না হরাও তয়াম্না পাস তৌখিবনি। মসিদা মরুপ অমসুং পার্তী কয়াগী থৌদাং কয়া য়াওখি। অদুবু, মসিগুম্বা অরুবা তাঞ্জাদা হাউসপু লেঙদনা থম্বা হায়বসিদা মহাক্কুম্বা এক্সপেরিএন্স লৈরবা মীওই অমগী তঙাই ফদবনি। অদোম্না লৈবাক অসিবু, লোক তন্ত্রা অসিগীদমক্তা মসিগুম্বা মশিং থীঙমদ্রবা সেবা কয়া তৌবীখি। বেঙ্কয়া গারু, অদোম্না ঙসিগুম্না হকশেল ফনা লৈদুনা ঐখোয়গা মতম শাংনা লোয়নদুনা লমজিংবীয়ু হায়না ঐহাক্না হায়জনীংই। অদুবু বেঙ্কয়াজী অসি য়াম্না ইমোস্নেল ওইবা মীওইনি হায়বসি মীওই য়াম্না খঙলম্লোই। ঐহাক্না গুজরাত্তা থবক তৌরিঙৈদা অদোম লাকখি। নুংঙাইতবা থৌদোকপা থোকপা খুদিংদা মহাক্না খ্বাইদগী হেন্না ৱাজবা মীওই ওইরিবনি। ভারতিয় জনতা পার্তীগী চাউরবা খোংনাং অসিগী মখাদা লৈরিবা বেঙ্কয়া গারুগুম্বা থৌমী লাক্ষ কয়া অসিবু দিকেদ কয়াদগী হৌনা মহাক্কী ‘ভারত ইমানা য়াইফরে’ হায়বা খোল্লাওনা অমত্তা ওইনা পুন্দুনা থমদুনা লাক্লিবনি। মদুনা মরম ওইরগা ঙসিগী ফিভম অসি য়ৌবা ঙম্লিবনি। বেঙ্কয়াজীগী রাইমিং অসিনা মীওই কয়াগী পুক্নিং চীংশিল্লি। ঐখোয়গী বেঙ্কয়াজীশু মীওই কয়াবু চা অথক পীজবা য়াম্না পামজবনি। মকর সংক্রান্তীদা মহাক্কী দিল্লীগী লৈফমদা মীয়াম কৌবনি, তেলেগু অমসুং অৱাং ভারতকী কুহ্মৈশিংদশু কৌবনি। করিগুম্বা চহি অমদা মসিগুম্বা থৌদোক থোক্তবা মতমদা, বেঙ্কয়াজী দিল্লীদা লৈতে হায়না খঙনরিবনি। মহাক্কী মকর সংক্রান্তী পাংথোকপগী থৌওং অসি মীপুম খুদিংনা খঙই অমসুং মসিনা মহাক অসি কয়া চম্বগে হায়বগে মমিশু তাহল্লিবনি। পাউ নুংঙাইবা অমা হেক তাবগা মহাক্তি কোল অদুম তৌরক্কনি। মহাক্না নুংঙাইনা পাউ ফাওরকপা মতমদা ঐখোয়দা ইথিল অমুক হাপিবনি। মরম অদুনা, মহাক্কী পুন্সিনা লাক্কদৌরিবা চারোনগী ইথিল ওইগনি হায়না ঐহাক্না হায়জরিবসিনি, অদুগা মীয়ামগী সেবা তৌগে খনবা মীওইশিংগী ওইনশু, মহাক্কী পুন্সিনা লমজিং লমতাক্কনি। অদুগা ঙসি ফোঙলিবা লাইরিক অসিনা মহাক্কী পুন্সি অমসুং পুন্সিগী খোঙচৎপু ঐখোয়দা খঙহনবগা লোয়ননা মহাক্কী পুন্সি খোঙচত্তা শরুক য়াবশু ফংগনি।

মরুপশিং,

ঐহাক্না শ্রীমান বেঙ্কয়া গারুজীগীদমক্তা লোকসভাদা ৱাহৈ পরেং খরা থমখিবদু অদোম নীংশিংলিবরা? ঐহাক্না রাজ্যসভাদা হায়খিবা অদু অমুক্কা হন্না হায়জগে, পুন্সিবু শান্তি লৈনা য়েংবীয়ু, অদোম্না য়েংলু য়েংলুবা মায়কৈদা মীপুম খুদিংনা অদোম্বু ইকায় খুম্নগনি... মসিমক মহাক্কী মওং মতৌনি। ঐহাক্না ৱাফম অমশু নীংশিংলি। ঐহাক্কী মরুপ অমগী 75শুবা মপোক নুমিত্তা ঐহাক্না ফোন তৌরগা অদোমগী চহি কয়া শুরগে হংখিবনি, মদুদা মহাক্না চহি কয়া হৌখ্রে হংগদৌ নত্তে, কয়া য়াম্না ৱাৎলিবগে হায়গদবনি অদুনা চহি 25 ৱাৎলি হায়না পাউখুম পীরকখিবনি। মহাক্কী পুন্সিদা য়েংবা মিৎয়েং অসি মসিনি। অদোমগী চহি 75গী মশক থোক্লবা খোঙচৎ অসিগীদমক্তা ঐহাক্না অদোম্বু থাগৎচরি, অদুগা অদোম্না চহি চাম্মা শুবা মতম ইং 2047দা চাউখৎপা ভারত অসিনা নীংতম্বগী চহি চাম্মা মপুং ফাবগী হরাওবা ফোংদোক্নগনি। হন্না হন্না থাগৎচরি। অদোমগী ইমুংনা অদোমগী মায় পাকপদা অচৌবা থৌদাং য়ারি, পুম্নমক্না লেং মান্ননা তেংবাংনদুনা চৎমিন্নৈ। অমনা অমদগী হেন্নবা তৌনদে। অদুনা, ঐহাক্না অদোমগী ইমুংগী মীওই খুদিংবুশু থাগৎচরি অমসুং মখোয়গী পুন্সিনা নুংঙাই য়াইফবা ওইসনু হায়না পাউজেল পীজরি।

অদোম্বু অমুক্কা হন্না থাগৎচরি।

***