ಮಹಾರಾಷ್ಟ್ರದ ರಾಜ್ಯಪಾಲ ಶ್ರೀ ರಮೇಶ್ ಬೈಸ್ ಅವರು 2024ರ ಜೂನ್ 22ರಂದು (ಶನಿವಾರ) ಮುಂಬೈನ ರಾಜಭವನದಲ್ಲಿ 'ಗೇಟ್ವೇಸ್ ಟು ದಿ ಸೀ: ಹಿಸ್ಟಾರಿಕ್ ಪೋರ್ಟ್ಸ್ ಅಂಡ್ ಡಾಕ್ಸ್ ಆಫ್ ಮುಂಬೈ ರೀಜನ್ ' ಎಂಬ ಪುಸ್ತಕವನ್ನು ಬಿಡುಗಡೆ ಮಾಡಿದರು. ಈ ಪುಸ್ತಕವನ್ನು ಭಾರತ ಸರ್ಕಾರದ ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಪ್ರಕಾಶನ ವಿಭಾಗ ಪ್ರಕಟಿಸಿದೆ. ಇದು ಮ್ಯಾರಿಟೈಮ್ ಮುಂಬೈ ಮ್ಯೂಸಿಯಂ ಸೊಸೈಟಿ (ಎಂಎಂಎಂಎಸ್) ಸಂಗ್ರಹಿಸಿದ ಪ್ರಸಿದ್ಧ ಲೇಖಕರ 18 ಲೇಖನಗಳನ್ನು ಒಳಗೊಂಡಿದೆ.

ಈ ಸಂದರ್ಭದಲ್ಲಿ ಮಹಾರಾಷ್ಟ್ರದ ರಾಜ್ಯಪಾಲ ಶ್ರೀ ರಮೇಶ್ ಬೈಸ್ ಅವರು ಎಂಎಂಎಂಎಸ್ ಮತ್ತು 17 ಲೇಖಕರು ಮತ್ತು ಇಬ್ಬರು ಸಂಪಾದಕರನ್ನು ಸನ್ಮಾನಿಸಿದರು. ಅವರು ಮುಂಬೈನ ನಾಗರಿಕರನ್ನು ತಮ್ಮ ಪ್ರಾಚೀನ ಕಡಲ ಇತಿಹಾಸದ ಬಗ್ಗೆ ಕಲಿಯಲು ಪ್ರೋತ್ಸಾಹಿಸಿದರು. ಏಷಿಯಾಟಿಕ್ ಸೊಸೈಟಿಯ ಸಹಯೋಗದೊಂದಿಗೆ ಪ್ರಕಾಶನ ವಿಭಾಗವು ರಾಜಭವನದ ದರ್ಬಾರ್ ಹಾಲ್ ನಲ್ಲಿ ಪುಸ್ತಕದ ಪ್ರಸ್ತುತಿಯನ್ನು ನೀಡಿತು. ಆಹ್ವಾನಿತರಲ್ಲಿ ಇತಿಹಾಸಕಾರರು ಮತ್ತು ಇತಿಹಾಸ ಉತ್ಸಾಹಿಗಳು ಸೇರಿದ್ದರು.

ಎಂಎಂಎಂಎಸ್ ಸಂಗ್ರಹಿಸಿದ ಈ ಪುಸ್ತಕವು ಮುಂಬೈ ಪ್ರದೇಶದ ಸೊಪಾರಾ, ವಸಾಯಿ, ವರ್ಸೊವಾ, ಮಾಹಿಮ್, ಕಲ್ಯಾಣ್, ಥಾಣೆ, ಪನ್ವೇಲ್, ಅಲಿಬಾಗ್, ಚೌಲ್, ಮಂದಾದ್ ಮತ್ತು ಜಂಜೀರಾದಂತಹ ವಿವಿಧ ಬಂದರುಗಳು ಮತ್ತು ಹಡಗುಕಟ್ಟೆಗಳ ಇತಿಹಾಸದ ಬಗ್ಗೆ ಅಧಿಕೃತ ಲೇಖನಗಳ ಸಂಕಲನವಾಗಿದೆ. ಇತಿಹಾಸಕಾರರು, ಸಂಶೋಧಕರು, ಕಡಲ ತಜ್ಞರು, ಸಂರಕ್ಷಣಾ ವಾಸ್ತುಶಿಲ್ಪಿಗಳು ಮತ್ತು ಬರಹಗಾರರು ಎಲ್ಲಾ 18 ಅಧ್ಯಾಯಗಳನ್ನು ಕೊಡುಗೆ ನೀಡಿದ್ದಾರೆ. ಈ ಪುಸ್ತಕದ ಪ್ರಕಟಣೆಯು ಮೇಲೆ ತಿಳಿಸಿದ ಪ್ರಾಚೀನ ಬಂದರುಗಳ ಬಗ್ಗೆ ಜಾಗೃತಿ ಮೂಡಿಸುವಲ್ಲಿ ಒಂದು ಪ್ರಮುಖ ಮೈಲಿಗಲ್ಲಾಗಿದೆ ಮತ್ತು ಇದು ಮಜಗಾಂವ್ ಹಡಗುಕಟ್ಟೆ, ಮುಂಬೈ ಬಂದರು, ಬಾಂಬೆ ಡಾಕ್, ಸಸೂನ್ ಡಾಕ್ ಮತ್ತು ಭೌಚಾ ಧಕ್ಕಾ ಎಂದೂ ಕರೆಯಲ್ಪಡುವ ಫೆರ್ರಿ ವಾರ್ಫ್ ಸೇರಿದಂತೆ ಮುಂಬೈನ ಆಧುನಿಕ ಬಂದರುಗಳು ಮತ್ತು ಹಡಗುಕಟ್ಟೆಗಳ ಅಭಿವೃದ್ಧಿಯನ್ನು ಸಹ ಒಳಗೊಂಡಿದೆ.

ಕಾರ್ಯಕ್ರಮದಲ್ಲಿ ಮಾರಿಟೈಮ್ ಮುಂಬೈ ಮ್ಯೂಸಿಯಂ ಸೊಸೈಟಿಯ ಅಧ್ಯಕ್ಷ ಕ್ಯಾಪ್ಟನ್ ಕೆ.ಡಿ.ಬಹ್ಲ್, ವೈಸ್ ಅಡ್ಮಿರಲ್ (ನಿವೃತ್ತ) ಇಂದ್ರಶೀಲ್ ರಾವ್, ಸಂಪಾದಕ ಡಾ.ಶೆಫಾಲಿ ಶಾ, ಉಪಾಧ್ಯಕ್ಷೆ ಅನಿತಾ ಯೆವಾಲೆ, ಪ್ರಕಾಶನ ವಿಭಾಗದ ಉಪ ನಿರ್ದೇಶಕಿ ಸಂಗೀತಾ ಗೋಡಬೋಲೆ ಮತ್ತು ಕೊಡುಗೆ ನೀಡಿದ ಬರಹಗಾರರು ಉಪಸ್ಥಿತರಿದ್ದರು.

*****