U Myntri Rangbah Duh, Narendra Modi u la ai jingkren ha ka prokram ‘Empowering Youth, Transforming J&K’ ha ka Sher-i-Kashmir International Conference Centre (SKICC) ha Srinagar, Jammu & Kashmir mynta ka sngi. U Myntri Rangbah Duh u la plié paidbah bad buh maw nongrim ia ki projek ka roi ka par bapher bapher ha J&K Kiba kot sha palat T 1,500 klur kiba iadei bad ki surok, ka jingpynpoi um, bad ki jingdon jingem ha ki kam pule ba kham halor. U la plié paidbah ruh ia ka Competitiveness Improvement in Agriculture and Allied Sectors Project (JKCIP) kaba T. 1,800 klur. U Modi u la sdang ruh ia ka jingai ia ki shithi thung kam ia 200 ngut ki nongtrei Sorkar ba thymmai. Ha kane ka sngi, u Myntri Rangbah Duh u la iaid lyngba ka exhibition bad u la iakren bad ki samla ba la pawkhmat na kane ka Union Territory.

Ha ka jinga ijingkren jong u, u Myntri Rangbah Duh u la ong ba u sngewkmen ban wan sha Jammu & Kashmir bad u la ai artylli ki daw na ka bynta kane. U la ong, “Ha kaba nyngkong, ka prokram mynta ka sngi ka iadei bad ka jingplie paidbah bad ka jingbuh maw nongrim ia ki projek ka roi ka par ha Jammu & Kashmir bad ha kaba ar, kane ka dei ka jingialang ba nyngkong bad ki briew ka Jammu & Kashmir hadien ka elekshon Lok Sabha.” U la krenshaphang ka jingwan jong u dang shen sha Italy na ka bynta ka G7 Summit bad u la kdew sha ka jingktah jong ka jingbteng ka Sorkar haduh lai samoi namar kane ka la pynkylla ia ka rukom peit ka pyrthei ia ka India. U la ong ruh ba ki jingthrang jong ki briew jong ka India ki dei ka bor ba khraw tam jong ka ri. U la ong ba kane ka jingthrang ka ialam sha ki jingkhmih lynti na ka Sorkar bad kumta, ka samoi ba lai jong kane ka Sorkar mynta ka long kaba kyrpang namar ka jingthew ia ka imlang sahlang kaba khmih lynti ka dei ka jingpynurlong ia ki kam. “Ki briew ki don jingshaniah ia ki jingthmu bad ki polisi jong ka Sorkar,” u la ong.

U Myntri Rangbah Duh u la ong ba ka khubor kaba heh ha ka rai jong ki briew ha ka elekshon Lok Sabha ka dei shaphang ka jingiaid ryntih. U la ong ba u kynmaw ia ki samoi ba jrong jong ki Sorkar bym skhem ha ka por ba ka ri ka don 5 tylli ki elekshon hapoh 10 snem kaba la ktah bha ia ka roi ka par. “Da kaba ieh ia kane shadien, ka India mynta ka la poi sha ka bynta kaba thymmai jong ka Sorkar kaba skhem kaba la pynkhlain ia ka synshar paidbah.” U la kdew ruh sha ka bynta jong ki briew jong ka Jammu & Kashmir ha kane ka jingpynkhlain ia ka synshar paidbah. “Ngi dang sakhi ia ki jingthmu Insaniyat, Jamhooriyataur Kashmiriyat jong u Atalji ba la kylla sha ka jingshisha mynta” la ong u Modi. U la kdew sha ka jingiamih paidbah ban iashim bynta ha kane ka elekshon ba la dep bad u la iaroh ia ki briew jong ka Jammu & Kashmir kiba la shaniah ha ka synshar paidbah. “Nga la wan ban pynsngew ia ka jingsngewnguh ia ki jingpyrshang jong phi ban kyntiew ia ka synshar paidbah,” u la bynrap.

“Ka jingkylla kaba wan ha Jammu & Kashmir ka dei namar ka kam ba ka Sorkar ka la leh ha kine ki 10 snem ba la dep,” la ong u Modi. Da kaba ong ba ki longkmie bad kito kiba duna ka jingioh na kane ka thain kim shym la ioh ia ka hok jong ki, u Myntri Rangbah Duh u la ong ba kane ka Sorkar ka la trei ban wanrah ki lad ki lynti bad ka jingwanrah biang ia ka hok jong ki da kaba pdiang ia ka jingngeit ha ka ‘Sabka Saath SabkaVikas’. U Myntri Rangbah Duh u la ong ba ki phetwir na Pakistan, ki briew na ka jaitbynriewValmiki bad ki longiing jong ki Safai Karamchari ki la ioh ka hok ban thep vote ha ka sien kaba nyngkong. U la kren ruh shaphang ka jingpynurlong ia ki jingthrang ba la slem jong ki jaitbynriewValmiki ban ioh jingithuh kum ki SC, ka jingbuh kyrpang ka jaka ia ki SC ha ka Legislative Assembly, bad ka jingkynthup ia ka jaitbynriew Paddari, Pahariya caste, Gadda Brahman bad jaitbynriew Koli ha ka thup SC. U la ong ruh ba la buh jaka kyrpang ia ki OBC ha ki elekshon Panchayat, Nagar Palikabad Nagar Nigam. Ha ka jingkren shaphang ka bor jong ka Riti Synshar jong ka India bad ka jingiahap jong ka, u Myntri Rangbah Duh u la ong ba kane ka pynthikna ia ka hok jong ki 140 klur ngut ki briew jong ka India bad ka plié lad ia ki ba kin iatreilang ha ka jingtei ia ka ri. U Modi u la ong ruh ba u sngewsih ia ka jingkyntait ia ka Riti Synshar jong ka India bad ka jingiehbein ia ka Jammu & Kashmir naduh ba la ioh jinglaitluid ka ri. “Nga kmen mynta ka sngi ba ngi im katkum ka Riti Synshar jong ka India. Lyngba ka Riti Synshar.Lyngba ka Riti Synshar ngi dang shem ia ki lad ba thymmai ban pynkylla ia ka Kashmir sha kaba bha,” la ong u Myntri Rangbah Duh. Khatduh khatwai la don ka jingpdiang shisha ia ka Riti Synshar jong ka India da ka Jammu & Kashmir”, la ong u Modi, “Ki diengpynkiang jong ka Article 370 ki dei kiba la weng.”

Ha ka jingkren shaphang ki jingjia ha Kashmir ha kine ki 10 snem ba la dep, u Myntri Rangbah Duh u la ongba ka pyrthei ka sakhi ia ki jingkylla ba dang shen ha ka them Kashmir. Ka pyrthei ka bteng ban iaroh ia ki briew jong ka them kiba la pdiang kylluid mynsiem ia ki ha ka por jong ka G20 Summit. U la ong ba ka jingpynlong ia ka prokram jong ka pyrthei kum ka G20 Summit ha ka them ka la wanrah jingsngew sarong ia ki briew jong ka Kashmir. Ka jingiohi ia ki khynnah ba ki ialehkai ha ka Lal Chowk haduh ka por janmiet ka la pynkmen shisha ia ki briew jong ka India. Kumjuh, ki iew ba shongshit ha ka them ki pynkmen ia baroh. Da kabakynmaw ia ka jingpyni ia ki jait kali bapher bapher hajan ka Dal Lake ha u Lber mynta u snem, u Modi u la ong ba baroh kawei ka pyrthei ka la peit ia kane ka prokram kaba dei ka dak jong ka jingiaid shaphrang ha kane ka them. U la ong ba baroh ki iakren shaphang ka kam jngohkai ha Kashmir da kaba bynrap ba ka prokram International Yoga Day lashai kan khring shuh shuh ia ki nongjngohkai sha kane ka jaka. U Myntri Rangbah Duh u la kdewsha ka jingkren jong u Lieutenant Governor Sinha, ha kaba u la ong ba ka jingwan palat 2 klur ngut ki nongjngoh kai sha ka them Kashmir ka dei ka bym pat ju iohi mynshuwa bad kan iarap bha ia ka ioh ka kot ha kane ka jaka.

“Nga aiti met bad mynsiem bad ka hok ban pynthikna ba ki jingeh jong ka pateng kaba la leit yn lah ban pynbha. Ngi trei borbah ban weng baroh ki jingeh la ka long ka jingsngewjngai ka mynsiem lane ka Delhi (Dil ya Dilli),” la ban jur u Myntri Rangbah duh u Modi. U la ban ba ka jingdonkam jong ki sienjam iatreilang ban pynthikna ba ki soh jong ka synshar paidbah ki poi sha man ka longiing bad ki briew. U la ong ba man ka pisa na ka jingiarap jong ka sorkar pdeng la pynlut ha ka bha ka miat jong ki briew ka Jammu & Kashmir. “Kalong kaba bha ia ki briew jong ka Jammu & Kashmir kiba la jied ia ki nongmihkhmat jong ki bad weng ia ki jingeh lyngba jong ki. Kumta la sdang ia ki jingpynkhreh na ka bynta ki elekshon sha ka iing dorbar thawain. Ka sngi ka la jan haba phin sa jied ia ka sorkar ba thymmai jong ka Jammu & Kashmir da la ka jong ka vote. Shen ka sngi kan sa poi haba ka Jammu & Kashmir kan sa saindur ia la ka lawei kum ka jylla sa shisien pat,” la ong u Myntri Rangbah duh.

Haba kren shaphang ki projek ha kaba la buh ia ki maw nongrim lane ia kaba la plie paidbah, u Myntri Rangbah duh u la ong ba ki projek ba iadei bad ka roi ka par ki shongdor palat T. 1,500 klur bad ka projek Agriculture and Allied Sectors (JKCIP)  ka shongdor T. 1,800 klur. U la iaroh ia ki bor pyniaid jong ka UT kiba la pynsted ia ka kam ban thung kam ha ki ophis sorkar bad u la pyntip ba ha ki 5 snem ba la leit, la pyndep kumba 40,000 ki jingthung kam. U la ban ruh ia ka jingmyntoi jong ki jingbei tyngka ha Jammu & Kashmir.

Haba iaroh ia ka jingkiew shaphang ha Kashmir, u Myntri Rangbah duh u la ong ba mynta kane ka them ka sakhi ia ki kam pynroi ba khraw ha jan baroh ki bynta, kynthup ka jingpyniasoh lynti rel, ka pule puthi, ki jingdon jingem ba iadei bad ki lad jingsumar, ka bording elektrik bad ka um. U la ban ba la shna da ki hajar kilometer ki surok hapoh ka Pradhan Mantri Gramin Sadak Yojna, nalor ki surok bah bad ki expressway ba thymmai, yn pyniasoh ruh ia ka them da ki lynti rel. Ka jingitynnad jong ka jingkieng rel Chenab ka pyndap ia baroh da ka jingsngew sarong. Ka them Gurez ha ka phang shatei jong ka Kashmir ka la ioh ia ka jingpyniasoh bad ka grid ha ka sien ba nyngkong. U Modi u la ban biang ba mynta, ka them ka dap da ki lad ki lynti ha man ki liang, naduh ka rep ka riang haduh ki kam horticulture haduh ki kam ialehkai bad ki start-up

Haba iaroh ia ka roi ka par ha Kashmir ha kine ki 10 snem ba la leit, u Myntri Rangbah duh u la ong ba ka them suki suki kan sa long ka jaka pdeng jong ki start-up, ka jingtbit ha ki sap treikam bad ki kam ialehkai. U la kdew ba jan 70 per cent ki kam rep ha kane ka them ki kynthup ki start-up, da kaba bynrap shuh shuh ba la sdang palat 50 tylli ki degree college ha ka them ha kine ki snem ba la leit. “La kyntiew ia ki seat ha ki polytechnic, bad ki lad ioh jinghikai ha ki sap treikam ba thymmai. La shna ia ka IIT, IIM bad AIIMS ryngkat ki medical college ba thymmai,”  u la ong. La kyntiew ia ki sap treikam ha kaba iadei bad ki kam Jngoh Kai bad kam hospitality, u la ong.  U Myntri Rangbah duh u la ai jingmut ruh ban sdang ia ki jingai jinghikai lyngba ki lad online ia ki nongsynran ia ki nongjngoh kai bad ka jingplie ia ki youth tourism club ha ki skul- college- skulbah…. baroh kine ki kam ki la jia ha Kashmir mynta.

U Myntri Rangbah duh u la ban ia ka jingktah kaba bha ki kam pynroi ia ka narishakti jong ka Jammu and Kashmir. U la kren shaphang ki kam jngoh kai bad ka jinghikai pyntbit ha ka IT ia ki longkmie jong ki Self Help Group.

Haba kren shaphang ka jingsdang ia ka prokram Krishi Sakhi ha ki arsngi ba ladep, u Myntri Rangbah duh u la pyntip ba palat 1200 ngut ki longkmie na Jammu & Kashmir ki trei kum ki Krishi Sakhi. U la kren ruh shaphang ka prokram Namo Drone Didi bad ong ba ki khun kynthei jong ka Jammu & Kashmir ki la ioh jinghikai pyntbit hapoh ka skhim. “Ka sorkar ka shim ia kine ki sienjam ban kyntiew ia ka kamai kajih jong ki longkmie bad plie ki lad kamai jakpoh,” u la bynrap.

“Ka India ka dang kylla sha ka bor kaba khraw ha ka pyrthei ha ki kam jngoh kai bad ki kam ialehkai,” la ong u Myntri Rangbah duh haba u la ban ia ki lad ba ka Jammu & Kashmir ka don ha kine ki ar bynta. U la ban ia ka jingkiew ki jingdon jingem ha ki kam ialehkai ha man ka distrik jong ka Jammu & Kashmir bad u la ong ba la shna kumba 100 tylli ki Khelo India center. U la pyntip kumba 4,500 ngut ki samla jong ka Jammu & Kashmir ki la ioh jinghikai pyntbit ha ki jingiakhun hapoh ri bad shabar ri. Haba kren shaphang ki winter sport, u Myntri Rangbah duh, Modi u la ong ba ka Jammu & Kashmir ka la kylla long ka nongbah jong ki winter sport ha India. U la kren ruh shaphang ka bynta ba saw jong ka Khelo India Winter Games ba dang shu kut ha u bnai Rymphang mynta u snem kaba la sakhi ia ka jingiashim bynta jong palat 800 ngut ki nongialehkai na kylleng ka ri.

U Myntri Rangbah duh u la maham ia ki briew jong ka Jammu & Kashmir shaphang ki nongshun jong ka shongsuk shongsain bad ka jingiatiplem para briew kiba ieng pyrshah ia ka roi ka par. U la ban ba ka sorkar ka la shimkhia ia ki jingjia pyntriem ba dang shen ha kaba  u Myntri ka Tnat Kam Pohiing jong ka sorkar pdeng u la peit bniah ia baroh ki jingpynkhreh ha ka jingiatreilang bad ki bor pyniaid jong ka Jammu & Kashmir. U Myntri Rangbah duh u la ban biang, “Nga pynthikna ia phi ba ngin trei borbah ban pynshitom ia ki nongshun jong ka Jammu & Kashmir. Ka pateng ba thymmai jong ka Jammu & Kashmir kan im ha ka shongsuk shongsain shirta. Ngin pynkhlain ia ka lynti jong ka jingkiew shaphrang ba la jied da ka Jammu & Kashmir.” U Myntri Rangbah duh u la pynkut ia ka jingkren jong u da kaba ai khublei ia ki briew jong ka Jammu & Kashmir na ka bynta ki projek kam pynroi mynta ka sngi.

U Lieutenant Governor jong ka Jammu & Kashmir, u Manoj Sinha bad u Myntri Khynnah jong ka sorkar pdeng (Independent Charge) u Prataprao Jadhav ki la iadonlang ha ka jingialang.

Ka Nongrim

Ka prokram ‘Empowering Youth, Transforming J&K’ kadei kaba kongsan ia ka thain, kaba pyni ia ka jingkiew shaphrang bad kaba ai mynsiem ia ki samla.

U Myntri Rangbah duh u la buh maw nongrim bad plie paidbah 84 tylli ki projek kam pynroi ba shongdor palat T. 1,500 klur. Ki jingplie paidbah ki kynthup ki projek ba iadei bad ki surok, ki skhim pynpoi um, bad ki jingdon jingem ba iadei bad ki kyrsan pule ba kham shalor bad kiwei kiwei. Shuh shuh, u Myntri Rangbah duh u la buh maw nongrim ia ki projek kum ka jingkyntiew ia ka Chenani-Patnitop-Nashri Section, ka jingkyntiew ia ki jaka ba don ki karkhana bad ka jingshna 6 tylli ki Degree College jong ka sorkar.

U Myntri Rangbah duh u la plie paidbah ia projek Competitiveness Improvement in Agriculture & Allied Sectors (JKCIP) ba shongdor T. 1,800 klur. Ia ka projek yn pyntreikam ha 90 tylli ki Block ha 20 tylli ki Distrik jong ka J&K, bad kan poi sha 300,000 tylli ki longiing bad 15 lak ngut ki briew kiba dei ban ioh jingmyntoi. Ka jingbuh maw nongrim/ ka jingplie paidbah ia kine ki projek kan pynkupbor ia ki samla bad kyntiew ia ki jingdon jingem ha Jammu & Kashmir.

U Myntri Rangbah duh u la sam ruh ia ki shithi thung kam sha palat 2000 ngut ki briew kiba la ioh kam sorkar.

***