“Ka India ka la khreh ban long ka ri kaba 6 ban don la ka jong ka Deep Sea Mission” la ong u Dr. Jitendra Singh, Myntri Khynnah (Independent Charge) jong ka Tnat Science and Technology, Myntri Khynnah (Independent Charge) jong ka tnat Earth Sciences, bad Myntri Khynnah ka tnat PMO, Tnat Atomic Energy bad Tnat Space bad Myntri Khynnah ka Tnat Personnel, Public Grievances and Pensions, ha ka sngi Saitjain ha New Delhi.

Ha ka jingpyniaid ia ka jingialang ban iakren shaphang ki jingpynkhreh kam ha ki 100 sngi jong ka tnat Earth Sciences, u Dr Jitendra Singh u la ong ba u dap da ka jingsngew sarong ia ka jingiaid shaphrang jong ka Deep Sea mission bad ba ka India ka dei kawei na tang katto katne ki ri kaba la pynurlong ia kane ka kam kaba khraw. U la kyntu ia ki jaka treikam ba kin peit bniah ia ka jingpynurlong ia ka ioh ka kot na ki jaka duriaw khnang ban pynkupbor ia ki briew kiba shaniah ha ki kam ha ki duriaw bad ruh ka bor jong ki duriaw ban kamai jakpoh. U la ong, “Ka Mission kam dei tang ban wad mar poh khyndew hynrei ka dei ruh ban kyntiew ia ki kam ocean sciences bad ka jingwad ia ki jingim bad ki jingthung bad ruh ban pynneh ia ka jingiar jong ki jingdon jingem ha ki duriaw bad kiwei kiwei ki kam.”

U Myntri u la iaroh ia ki sienjam jong ka National institute of ocean technology (NIOT)ban tei ia ka Matsyayaan 6000 kaba lah ban hiar haduh 6000 m ka jingjylliew ha ka duriaw. Ha ka jingpeit ia ka jingiaid shaphrang ki kam, u la bthah ia ki ophisar ba kin pyndep ia ka bynta kaba nyngkong jong ka harbor trail shuwa u Nailur 2024. Bad ban pyndep iakiwei kiwei ki trial ne ki jingpyrshang shuwa u 2026.

U Dr. Jitendra Singh u la iaroh ia ki ba ki la iatreilang bad ka Indian Space Research Organisation (ISRO) ban lah ban ialeh pyrshah ia ka pressure da kaba shna ia ka ‘Titanium Hull’. U la kylli ruh shaphang ka jingshna ia ka ‘Self –Floatation’ teknoloji ban ialeh pyrshah ia ki jingjia ba syndet haba la don hapoh duriaw palat 72 kynta. Ki mat ba kongsan ki long ka jingiaid shaphrang ha ka jinghiar kaba 4 jong ka Yaan.

“Ka Deep Sea Mission ka don ka lad ban iarap bha ia ka jingkiew ka ioh ka kot jong ka India,” la ong u Dr. Jitendra Singh da kaba kdew sha ki jingiarap kiba bun ba kane kan don na ka bynta ki jingim bad ki jingthung, ka jingpeit ia ki jaka duriaw ba jylliew, ka jingwad ia ki mar poh khyndew, ka jingwad ia ki nar bad ki poly metallic nodule ha ki jaka duriaw jong ka India. U la bthah ruh ia ki stad science bad ki ophisar ba kin shna ia ki teknoloji lajong khnang ban pynduna ia ka jinghap shaniah ka India ia kiwei kiwei ki ri.

U Dr. M Ravi Chandran, Secretary, ka tnat Earth Sciences bad kiwei kiwei ki ophisar ki la iadonlang ha kane ka jingialang.

****