ঙসি নিউ দিল্লিদা সাইন্স অমসুং তেক্নোলোজিগী রাজ্য মন্ত্রী(মনিংতম্বা), আর্থ সাইন্সেসগী রাজ্য মন্ত্রী(মনিংতম্বা), পি.এম.ও, এতোমিক ইনর্জি দিপার্তমেন্ত, স্পেস দিপার্তমেন্ত, পর্সোনেল, পব্লিক গ্রিভান্সেস অমসুং পেন্সন্সগী রাজ্য মন্ত্রী দোক্তর জিতেন্দ্র সিংহনা হায়খি মদুদি ভারত মশাগী দিপ সি মিসন লৈবা ৬শুবা লৈবাক ওইরগনি।

আর্থ সাইন্সেস মিনিস্ত্রিগী নুমিৎ ১০০গী এক্সন প্লানগী মতাংদা পাংথোকপা মীফম অমা লুচিংখিবা দোক্তর জিতেন্দ্র সিংহনা হায়খি লৈবাক অসিগী দিপ সি মিনস খুমাঙ চাউশিনবদা হরাওবা অমসুং চাউথোকচবা ফাওই অমসুং থবক অসি পাংথোকপা ঙম্বা লৈবাক খরগী মনুংদা ভারত য়াওরে। সমুদ্রগী মখা পোল্লিবা অমসুং মখোয়গী হিংনবা লম্বীগী মসিগী শক্তি শীজিন্নরিবা মীয়ামগী য়াইফনবা শিংনবা কয়া মায়োক্নবা ঙম্বা ব্লু-ইকোনোমি অমা ফংনবা ইন্সতিতুৎশিংনা মীৎয়েং চঙগদবনি। মিসন অসি শুপ্নগী ধাতুশিং থিনবা নত্তে, মসিনা ওসিন সাইন্স চাউখৎহনগনি অমসুং সমুদ্রগী থৱায় পানবা জিবশিং থিজিনবগী থবক চাউখৎহনগনি।

সমুদ্রদা মিতর ৬০০০ ফাওবা লুপ্পা ঙমগদবা মতস্যায়ান ৬০০০ শেমগৎপগীদমক য়ুনিয়ন মিনিস্তরনা নেসনেল ইন্সতিতুৎ ওফ ওসিন তেক্নোলোজি( এন আই ও তি) থাগৎপা ফোঙদোকখি। সেপ্তেম্বর ২০২৪ ফাওবগী মনুংদা হার্বর ত্রেলগী অহানবা তাঙ্কক মপুংফানা লোইশিন্নবা মহাক্না ওফিসিএলশিংদা খঙহনখি। মিসন অসিগী চাংয়েংশিং ২০২৬ ফাওবগী মনুংদা লোইশিনগনি।

অকনবা প্রেসর খাংবা ঙম্বা ‘তিতানিয়ম হুল’ পুথোকপগীদমক য়ুনিয়ন মিনিস্তরনা ইন্দিয়ান স্পেস রিছার্স ওর্গনাইজেসন(ইসরো) থাগৎপা ফোঙদোকখি। খুদোংথিবা থোক্লকপা মতমদা মশা মরোমদোম তাউখৎচবা ঙম্বা তেক্নোলোজিগী মতাংদা অমসুং পুং ৭২ ইরোন্নুংদা লৈবগী মতাংদা মহাক্না ৱাহংশিং হংখি। য়ান্না পুং ৪ মখাদা লুপ্পগী মতাংদা খুমাঙ চাউশিনবা কয়া পাউদমখি।

দোক্তর জিতেন্দ্র সিংহনা হায়খি ভারতকী শেন্মিৎলোন চাউখৎহনবদা দিপ সি মিসন্না চাউনা মতেং পাংনবা খুদোংচাবা লৈরি। মিসন অসিনা ভারত মহাসাগরগী খোঙনুংদা সমুদ্রগী ঙা অমসুং পাম্বীশিং, অরুবা ইরোন্নুংদা চঙবা, অতাংবা মখলগী ধাতুশিং থিদোকপা অমসুং পোলি মেতালিক নোদুলশিং থিদোকপদা চাউনা মতেং পাংগনি। ভারতনা অতোপ্পা লৈবাকশিংগী মখা পোনবা হন্থনবা লৈবাক অসিগী মশাগী ওইজবা তেক্নোলোজি পুথোক্নবা মহাক্না সাইন্তিস্তশিং অমসুং ওফিসিএলশিংগী পুক্নিং থৌগৎখি অমসুং য়াথং পীখি।

মীফম অদুদা আর্থ সাইন্সেসকী সেক্রেতরি দোক্তর এম. রবি চন্দ্রন অমসুং অতোপ্পা সেনিয়ার ওফিসিএল কয়া শরুক য়াখি।

****