প্ৰধানমন্ত্ৰী মেল’নি

সন্মানীয় অতিথিসকল

নমস্কাৰ,
প্ৰথমে প্ৰধানমন্ত্ৰী মেলনীক মোক এই সন্মিলনলৈ আমন্ত্ৰণ জনোৱাৰ বাবে আৰু আমাৰ প্ৰতি আগবঢ়োৱা উষ্ম আতিথ্যৰ বাবে আন্তৰিক ধন্যবাদ জ্ঞাপন কৰিলোঁ। চেন্সেলৰ অ’লাফ শ্বলজক জন্মদিনৰ বহুত বহুত শুভেচ্ছা জনালোঁ। জি-৭ সন্মিলনৰ এই অনুষ্ঠানটো কেৱল বিশেষ নহয়, ঐতিহাসিকো। এই গোটৰ ৫০ বছৰীয়া প্ৰতিষ্ঠা দিৱস উপলক্ষে জি-৭ৰ সকলো সহকৰ্মীলৈ আন্তৰিক অভিনন্দন জনালোঁ।

বন্ধুসকল,

যোৱা সপ্তাহত আপোনালোকৰ বহুতেই ইউৰোপীয় সংসদৰ নিৰ্বাচনত ব্যস্ত আছিল। আগন্তুক সময়ত নিৰ্বাচনৰ উৎসাহ উদ্দীপনাৰ মাজেৰে পাৰ হ’ব একাংশ বন্ধু। ভাৰততো কেইমাহমান আগতে নিৰ্বাচনৰ সময় আছিল। ভাৰতত নিৰ্বাচনৰ স্বকীয়তা আৰু পৰিসৰ কিছু পৰিসংখ্যাৰ পৰা বুজিব পাৰি: ২৬০০ৰো অধিক ৰাজনৈতিক দল, ১০ লাখতকৈ অধিক ভোটগ্ৰহণ কেন্দ্ৰ, ৫০ লাখতকৈ অধিক ইলেক্ট্ৰনিক ভোটিং মেচিন, ১৫ নিযুত ভোটগ্ৰহণ কৰ্মচাৰী আৰু প্ৰায় ৯৭ কোটি ভোটাৰ, ইয়াৰ ভিতৰত... যিটো ৬৪ কোটি লোকে নিজৰ ভোটাধিকাৰ সাব্যস্ত কৰিছে। প্ৰযুক্তিৰ সৰ্বব্যাপী ব্যৱহাৰে সমগ্ৰ নিৰ্বাচনী প্ৰক্ৰিয়াটো ন্যায্য আৰু স্বচ্ছ কৰি তুলিছে। আৰু ইমান বৃহৎ নিৰ্বাচনৰ ফলাফলো কেইঘণ্টামানৰ ভিতৰতে ঘোষণা কৰা হ’ল! এইটো আছিল বিশ্বৰ গণতন্ত্ৰৰ আৰু মানৱতাৰ ইতিহাসৰ আটাইতকৈ ডাঙৰ উৎসৱ। গণতন্ত্ৰৰ মাতৃ হিচাপে আমাৰ প্ৰাচীন মূল্যবোধৰ ই এক জীৱন্ত নিদৰ্শনো। আৰু মই সৌভাগ্যৱান যে ভাৰতৰ জনসাধাৰণে মোক একেৰাহে তৃতীয়বাৰৰ বাবে তেওঁলোকৰ সেৱা কৰাৰ সুযোগ দিছে। যোৱা ছয় দশকত ভাৰতত প্ৰথমবাৰৰ বাবে এনেকুৱা হৈছে। এই ঐতিহাসিক বিজয়ৰ ৰূপত ভাৰতৰ জনসাধাৰণে যি আশীৰ্বাদ দিছে সেয়া গণতন্ত্ৰৰ বিজয়। ই সমগ্ৰ গণতান্ত্ৰিক বিশ্বৰ জয়। আৰু কাৰ্যভাৰ গ্ৰহণ কৰাৰ মাত্ৰ কেইদিনমানৰ পিছত আপোনালোক সকলো বন্ধুৰ মাজত উপস্থিত থাকিবলৈ পাই মই অত্যন্ত সুখী।

সন্মানীয় অতিথিবৃন্দ,

একবিংশ শতিকাটো হৈছে প্ৰযুক্তিৰ শতিকা। মানৱ জীৱনৰ এনে কোনো দিশেই প্ৰযুক্তিৰ প্ৰভাৱৰ পৰা বঞ্চিত হোৱাটো প্ৰায়েই নাই। এফালে প্ৰযুক্তিয়ে মানুহক চন্দ্ৰলৈ নিয়াৰ সাহস দিয়ে যদিও আনফালে চাইবাৰ সুৰক্ষাৰ দৰে প্ৰত্যাহ্বানৰো সৃষ্টি কৰে। আমি সামূহিকভাৱে নিশ্চিত কৰিব লাগিব যে প্ৰযুক্তিৰ সুফল সমাজৰ সকলো শ্ৰেণীলৈ যায়, সমাজৰ প্ৰতিজন ব্যক্তিৰ সম্ভাৱনা উপলব্ধি কৰিব লাগিব, সামাজিক বৈষম্য দূৰ কৰাত সহায় কৰিব লাগিব আৰু মানৱ শক্তিক সীমিত কৰাৰ পৰিৱৰ্তে সম্প্ৰসাৰণ কৰিব লাগিব। এয়া কেৱল আমাৰ ইচ্ছাই নহয়, আমাৰ দায়িত্বও হ’ব লাগে। আমি প্ৰযুক্তিৰ একচেটিয়া অধিকাৰক গণ ব্যৱহাৰলৈ ৰূপান্তৰিত কৰিব লাগিব। আমি প্ৰযুক্তিক সৃষ্টিশীল কৰি তুলিব লাগিব, ধ্বংসাত্মক নহয়। তেতিয়াহে আমি এখন সৰ্বাংগীন সমাজৰ ভেটি স্থাপন কৰিব পাৰিম। ভাৰতে মানৱকেন্দ্ৰিক দৃষ্টিভংগীৰে উন্নত ভৱিষ্যতৰ বাবে চেষ্টা চলাইছে। কৃত্ৰিম বুদ্ধিমত্তাৰ ৰাষ্ট্ৰীয় কৌশল প্ৰণয়ন কৰা প্ৰথম কেইখনমান দেশৰ ভিতৰত ভাৰত অন্যতম। এই কৌশলৰ ভিত্তিত এই বছৰ আমি আৰম্ভ কৰিছো A.I. মিচন৷ ই "A.I. for All" মন্ত্ৰৰ পৰা উদ্ভৱ হৈছে৷ এ আইৰ বাবে বিশ্ব অংশীদাৰিত্বৰ প্ৰতিষ্ঠাপক সদস্য আৰু মুখ্য অধ্যক্ষ হিচাপে আমি সকলো দেশৰ মাজত সহযোগিতা প্ৰসাৰিত কৰিছো। যোৱা বছৰ ভাৰতে আয়োজন কৰা জি-২০ সন্মিলনৰ সময়ত আমি ইয়াত গুৰুত্ব আৰোপ কৰিছিলো যাতে আগন্তুক সময়ত এ আইৰ সন্দৰ্ভত আমি সকলো দেশৰ সৈতে একেলগে কাম কৰিব পাৰোঁ৷

সন্মানীয় অতিথিবৃন্দ

শক্তিৰ ক্ষেত্ৰত ভাৰতৰ দৃষ্টিভংগীও চাৰিটা নীতিৰ ওপৰত ভিত্তি কৰি গঢ় লৈ উঠিছে-উপলব্ধতা, সুলভতা, ব্যয়সাধ্যতা আৰু গ্ৰহণযোগ্যতা। চিঅ’পিৰ অধীনত দিয়া সকলো প্ৰতিশ্ৰুতি সময়ৰ আগতেই পালন কৰা ভাৰত প্ৰথমখন দেশ। আৰু আমি ২০৭০ চনৰ ভিতৰত নেট জিৰ’ৰ লক্ষ্যত উপনীত হোৱাৰ প্ৰতিশ্ৰুতি পূৰণৰ বাবে সকলো প্ৰচেষ্টা চলাইছো। আমি একেলগে আহিবলগীয়া সময়টোক সেউজ যুগ হিচাপে গঢ়ি তুলিবলৈ চেষ্টা কৰা উচিত। ইয়াৰ বাবে ভাৰতে মিচন লাইফ অৰ্থাৎ পৰিৱেশৰ বাবে জীৱনশৈলী আৰম্ভ কৰিছে। এই মিছনটোক আগুৱাই লৈ গৈ ৫ জুন, পৰিৱেশ দিৱসত মই এটা অভিযান আৰম্ভ কৰিছো - "এক পেড় মা কে নাম"। সকলোৱে নিজৰ মাকক ভাল পায়। এই অনুভূতিৰে আমি ব্যক্তিগত স্পৰ্শ আৰু বিশ্ব দায়বদ্ধতাৰে বৃক্ষৰোপনক এক গণ আন্দোলন হিচাপে গঢ়ি তুলিব বিচাৰিছো। আপোনালোক সকলোকে ইয়াত যোগদান কৰিবলৈ আহ্বান জনাইছো। মোৰ দলটোৱে ইয়াৰ সবিশেষ সকলোৰে সৈতে শ্বেয়াৰ কৰিব।

সন্মানীয় অতিথিবৃন্দ

২০৪৭ চনৰ ভিতৰত এখন উন্নত ভাৰত গঢ়ি তোলাটো আমাৰ সংকল্প। দেশৰ উন্নয়ন যাত্ৰাত যাতে সমাজৰ কোনো শ্ৰেণী পিছ পৰি নাযায় সেয়াই আমাৰ প্ৰতিশ্ৰুতি। আন্তঃৰাষ্ট্ৰীয় সহযোগিতাৰ প্ৰেক্ষাপটতো এইটো গুৰুত্বপূৰ্ণ। গ্ল’বেল ছাউথৰ দেশসমূহে বিশ্বৰ অনিশ্চয়তা আৰু উত্তেজনাৰ বোজা বহন কৰিছে। গ্ল’বেল ছাউথৰ দেশসমূহৰ অগ্ৰাধিকাৰ আৰু উদ্বেগক বিশ্বৰ মঞ্চত স্থান দিয়াটো ভাৰতে নিজৰ দায়িত্ব বুলি গণ্য কৰিছে। এই প্ৰচেষ্টাসমূহত আমি আফ্ৰিকাক অতিশয় অগ্ৰাধিকাৰ দিছো। আমি গৌৰৱান্বিত যে ভাৰতৰ অধ্যক্ষতাত জি-২০ দলে আফ্ৰিকান ইউনিয়নক স্থায়ী সদস্য কৰি তুলিলে। আফ্ৰিকাৰ সকলো দেশৰ অৰ্থনৈতিক আৰু সামাজিক উন্নয়ন, সুস্থিৰতা আৰু নিৰাপত্তাৰ ক্ষেত্ৰত ভাৰতে অৰিহণা যোগাই আহিছে আৰু আগলৈও আগবঢ়াই যাব।

সন্মানীয় অতিথিবৃন্দ

আজিৰ বৈঠকত সকলো দেশৰ অগ্ৰাধিকাৰৰ মাজত গভীৰ অভিসৰণ প্ৰতিফলিত হৈছে। এই সকলোবোৰ বিষয়ত আমি জি-৭ৰ সৈতে আলোচনা আৰু সহযোগিতা অব্যাহত ৰাখিম।

আপোনালোক সকলোকে অশেষ ধন্যবাদ৷

***

DS/ST/DB