প্রধান মন্ত্রী মেলোনি

হিস হোলিনেস

হিস মেজেস্তি

হিস হায়নেস

ইকায়খুম্নরবশিং

খুরুমজরি
অহানবদা, মীফম অসিদা শরুক য়ানবা চেবাউ পীরকপগীদমক অমসুং ঐখোয় তরাম্না ওকপগীদমক ঐনা থম্মোয় শেংনা প্রধান মন্ত্রী মেলোনিগী মফমদা তৌবীমল খঙবা উৎচরি। নুংঙাইরবা মপোক নুমিৎ লাকপদা ঐনা চান্সেলর ওলাফ স্কোলজগী মফমদা য়াইফ-পাউজেল পীজরি। হন্দক্কী জি-৭ মীফম অসি অখন্নবা অমসুং পুৱারি ওইরবা অমনি। কাংবু অসিনা চহি ৫০ মপুংফারকপদা জি-৭গী লৈবাকশিংগী থাগৎপা ফোঙদোকচরি।
 

মরুপশিং,

হৌখিবা চয়োল অসিদা ঐখোয় অয়াম্বা য়ুরোপিয়ান পর্লিয়ামেন্ত মীখলগী থবক চিনখি। মীখল পাংথোকপা অসিদা মরুপ খর হরাওরমগনি। ভারতকী ওইনসু, থা খরগী মমাংদা, লৈবাক অসিগী মীখলশিং পাংথোকখ্রে। ভারতকী মীখলশিংগী তোপ-তোপ্পা অমসুং পাক-চাউবা অসি মশিং খরদগী খঙবা ঙমগনি:  রাজনিতি দল ২৬০০ হেনবা, পোল্লিং বুথ মিল্লিয়ন অমা হেনবা, ইলেক্ত্রোনিক ভোত্তিং মেছিন মিল্লিয়ন ৫ হেনবা, পোল্লিং স্তাফ মিল্লিয়ন ১৫ হেন্না অমসুং ভোত্তর মিল্লিয়ন ৯৭০ রোমগী মনুংদা মীওই মিল্লিয়ন ৬৪০ হেন্না মখোয়গী ভোৎ থাদখি।

তেক্নোলোজি শীজিন্নদুনা মীখলগী থবক খুদিংমক অরোন-অথুপ লৈতনা পাংথোকখি অমসুং অচৌবা মীখল অসিগী ফল পুং খরগী মনুংদা লাউথোকখি। মসি মালেমদা খ্বাইদগী চাউবা গনতন্ত্রগী কুহ্মৈনি অমসুং মসি মীওইবা খুন্নাইগী খ্বাইদগী চাউবা পুৱারিনি। মসি গনতন্ত্রগী মমা ওইনা ভারতকী অরিবা গুনশিংগী অহিংবা খুদম অমনি। অহুমলকশুবা তার্ম ওইনা মখোয়গী সেবা তৌনবা ভারতকী মীয়াম্না খুদোংচাবা পীবা অসি ঐগী লাইবক ফবনি। মসি চহি ৬০গী মনুংদা ভারত্তা অহানবা ওইনা থোকপনি। পুৱারি ওইনা মাইপাকপগী মওংদা ভারতকী মীয়াম্না পীরিবা থৌজাল অসি গনতন্ত্রগী মাইপাকপা অমনি। মসি মালেমগী শীনবা থুংবগী গনতন্ত্রগী মাইপাকপনি। ওফিস পায়বা নুমিৎ খরনিগী মতুংদা মরুপ ময়ামগী মরক্তা শরুক য়াবা অসি ঐ তশেংনা হরাওই।
 

শক্নাইরবশিং,

২১শুবা চহিচা অসি তেক্নোলোজিগী চহিচানি। তেক্নোলোজিনা ইথিল পীদবা মীওইবগী পুন্সিগী শরুক অমতা লৈত্রে। অতোপ্পা অমদা, তেক্নোলোজিনা মীওইবনা থাদা চৎনবগী থৌনা পীরে, অতোপ্পা অমদা মসিনা সাইবর সেকুরিতিগুম্বা শিংনবা কয়া থোকহল্লে। তেক্নোলোজিগী কান্নবশিং খুন্নাইগী কাংলুপ খুদিংমক্তা য়ৌহন্নবা, খুন্নাইদা মীওই খুদিংমক মতিং ফুদোকহন্নবা, খুন্নাইগী থোং মান্নদবশিং লৈহন্দনবা অমসুং মীওইবগী তৌবা ঙম্বা শক্তি হেনগৎহন্নবা ঐখোয়না অপুনবা ওইনা হোৎনগদবনি। মসিগী ঐখোয়বা অপাম্বা খক ওইহনবা নত্তনা, মসিগী ঐখোয়গী দাইত্ব ওইহনগদবনি। তেক্নোলোজি অসি মীওই খর খক্তগী ওইরম্বা অদু ঐখোয়না মীয়াম পাক-শন্না শীজিন্নহল্লে। ঐখোয়না তেক্নোলোজি অসি কান্নবা মওংদা শীজিন্নরে, মাংহন-তাকহন্নবা হিরমদা শীজিন্নদ্রে। হায়রিবা থবকশিং অসি খক্তনা ঐখোয়না অপুনবা খুন্নাই অমগী য়ুম্ফম থোনবা ঙমগনি। লৈবাক অসিগী মীওইবা খুন্নাইগী খনবা থৌরাংশিংনা ভারতনা হেন্না ফবা তুংলমচৎকী থবক পাংথোক্লি। আর্তিফিসিএল ইন্তিলিজেন্সকী লমদা লৈবাক্কী লাল্লোং শেম্বা অহানবা লৈবাক খরগী মনুংদা ভারত য়াওরি। লাল্লোং অসিগী মখাদা, চহি অসিদগী ঐখোয়না এ.আই মিসন হৌদোক্লে। মসি “এ.আই ফোর ওল” হায়বা লাইৱাদগী লৌথোকপনি। এ.আইগী মালেমগী পুন্না থবক তৌমিন্নবগী ফাউন্দিং মেম্বর অমসুং চিয়ার ওইনা, লৈবাকশিংগী মরক্তা মতেং পাংনবা ঐখোয়না পুক্নিং থৌগৎলি। হৌখিবা চহিদা ভারতনা য়ুম্বু ওইখিবা জি-২০ মীফমদা, এ.আইগী লমদা মালেমগী ওইবা চৎন-কাংলোন অমা লৈবগী মরুওইবা অদু ঐখোয়না তকশিনখি। তুংদা, ঐখোয়না এ.আই অসি অরোন-অথুপ লৈতনবা, অশোই-অঙাম লৈহন্দনবা, লাইনা শীজিন্নবা ফংহন্নবা অমসুং দাইত্ব লৈনা থবক তৌনবা ঐখোয়না মখা তানা লৈবাক খুদিংমক্কা থবক তৌমিন্নগনি।

শক্নাইরবশিং,

ইনর্জিগী লমদা ভারতনা পায়খৎলিবা থবক অসি মরুওইবা ৱাফম মরি- মরাং কাইহনবা, লাইনা ফংহনবা, মমল হোংহনবা অমসুং শীজিন্নবা য়াহনবা অসিদা য়ুম্ফম ওইবনি। মমাঙদা কোপকী মখাদা থাজবা পীনখিবশিং থবক ওইনা পাংথোকপা অহানবা লৈবাক ভারতনি। ২০৭০ ফাওবগী মনুংদা নেত জিরোগী পান্দম ফংনবা ঐখোয়না পীখিবা থাজবা অদু থবক ওইনা পাংথোক্নবা ঐখোয়না থবক খুদিংমক পায়খৎলি। মৈখু থাংদবা যুগ অমা পুরক্নবা ঐখোয় পুন্না হোৎনমিন্নগদবনি। মসিগীদমক, ভারতনা মিসন লাইফ হায়বদি লাইফস্তাইল ফোর ইনভাইরোনমেন্ত হৌদোক্লে। মিসন অসি মাঙলোমদা চঙশিল্লদুনা, মালেমগী মহৌশাগী অকোয়বগী ফিবম নুমিৎ, জুন ৫দা, ঐনা “উ পাম্বী অমা ইমাগী মিংদা” খোঙজং অমা হৌদোক্লে। মীওই খুদিংমক মখোয়গী মমা নুংশি। মসিগী ৱাখল্লোন অসিগা লোয়ননা, মীনুংশিংগা লোয়ননা অমসুং মালেমগী ওইনা থৌদাং লৌদুনা উ থাবগী অচৌবা খোঙজং অমা চঙশিনবা ঐখোয়না পাম্মী। মসিদা শরুক য়ানবা ঐনা ময়ামগী মফমদা হায়জরি। ঐগী কাংবুনা মসিগী অকুপ্পা মরোলশিং মীওই খুদিংমক্তা খঙহনগনি।

শক্নাইরবশিং,

২০৪৭ দা চাউখৎলবা ভারত অমা ওইহনবা হায়বসি ঐখোয়গী ৱাশক্নি। লৈবাক্কী চাউখৎপগী খোঙচত্তা খুন্নাইগী কাংলুপ অমতা চিৎথহৌদবা হায়বদি ঐখোয়গী ৱাশক্নি। মসি মালেমগী ওইনা মতেং পাংনবগী লমদশু মরুওইবা অমনি। মালেমগী খা থংবা শরুক্তা লৈরিবা লৈবাকশিং অসি মালেমগী তম্বা ঙমদবা ফিবমশিং অমসুং মুক্নবশিংগী চৈথেং ফংলি। মালেমগী খা থংবা শরুক্তা লৈরিবা লৈবাকশিংগী খুদোংচাদবশিং অমসুং মরুওইবশিং মালেমগী ফম্পাক্তা পুখৎপা হায়বদি লৈবাক অসিগী থৌদাংনি হায়না ভারতনা খল্লি। হায়রিবা থবকশিং অসিদা ঐখোয়না অফ্রিকা মরুওইনা লৌরি। ভারতনা চিয়ার্মেন ওইখিবা জি-২০গী মখাদা অফ্রিকান য়ুনিয়ন মসিগী লেংদবা মেম্বর অমা ওইহনখিবা অসি ঐখোয়গী চাউথোকচবনি। অফ্রিকাগী লৈবাক খুদিংমক্কী শেন-থুম অমসুং খুন্নাই চাউখৎপা, তুংদু-লৈতাবা অমসুং সেকুরিতি লৈহন্নবা ভারতনা মতেং পাংলি অমসুং মখা তানা মতেং পাংগনি।
 

শক্নাইরবশিং,

লৈবাক পুম্নমক্কী মরুওইবশিং মফম অমদা পুনশিনবগী মমি অমা ঙসিগী মীফম অসিদা তারে। হায়রিবা মরুওইবা ৱাফমশিং অসি জি-৭গা লোয়ননা ঐখোয়না মখা তানা ৱারি শান্নগি অমসুং মতেং পীনগনি।

অদোম থাগৎচরি।

দিক্লাইমর : মসি প্রধান মন্ত্রীগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

*****