ঙসি নিউ দিল্লিগী শাস্ত্রি ভাবন্দা মহাক্কী ওফিসতা শ্রী ধর্মেন্দ্র প্রধান ইজুকেসনগী য়ুনিয়ন মিনিস্তরগী থবক পায়বা হৌখ্রে। মহাক ইজুকেসন মিনিস্ত্রিদা থুংলবগা হায়র ইজুকেসন দিপার্তমেন্তগী সেক্রেতরি শ্রী কে সঞ্জয় মুর্তি, স্কুল ইজুকেসন অমসুং লিতেরেসি দিপার্তমেন্তগী সেক্রেতরি শ্রী সঞ্জয় কুমার অমসুং মিনিস্ত্রিগী সেনিয়ার ওফিসিএলশিংনা তরাম্না ওকখি।

থবক পায়বা হৌরবা মতুংদা, শ্রী প্রধান্না মহাক মখা তানা থাজবা থম্বগীদমক মহাক্না প্রধান মন্ত্রী শ্রী নরেন্দ্র মোদীগী মফমদা তৌবীমল খঙবা উৎখি। মহাক্না হায়খি লৈবাক অসিগী তাকপী-তম্বীবগী থবক অসি তুংগী থৌরাং তৌনবা, মীয়াম থৌনা হাপ্নবা অমসুং ভারত অসি ২১শুবা চহিচাগী লৌশিংগী শেন্মিৎলোন অমা ওইনা শেমগৎনবা প্রধান মন্ত্রীগী লমজিং মখাদা এন.ই.পি ২০২০ থবক ওইনা পাংথোক্নবা মহাক অমসুং মহাক্কী কাংবুনা হোৎনগনি।

শ্রী প্রধানগা লোয়ননা ইজুকেসনগী রাজ্য মন্ত্রী শ্রী জয়ান্ত চৌধুরি অমসুং দোক্তর সুকান্ত মজুমদার থৌরম অদুদা শরুক য়াখি। মখোয়গী অনৌবা থৌদাং অসিগীদমক মহাক্না মখোয় থাগৎপা ফোঙদোকখি অমসুং মহাক্না হায়খি মদুদি প্রধান মন্ত্রীগী মঙলানশিং থবক ওইনা পাংথোক্নবা অমসুং ভারত অসি লাইরিক-লাইশু, স্কিল, ইন্নোবেসন অমসুং থিজিনবগী মালেমগী মফম অমা ওইনা শেমগৎনবা মখোয়গা লোয়ননা থবক তৌমিন্নবা থাজবা থম্লি।

শ্রী প্রধান লোক সভাগী মীখলদা ওরিসাগী সাম্বালপুর কেন্দ্রদগী কারকপনি। মহাক ২০১৪ দা পেত্রোলিয়ম অমসুং নেচরেল গ্যাসকী রাজ্য মন্ত্রী(মনিংতম্বা) ওইখি। মহাক ২০১৭দা পেত্রোলিয়ম অমসুং নেচরেল গ্যাসকী মিনিস্তর অমসুং স্কিল দিবলপমেন্ত অমসুং ওন্ত্রেপ্রেনিউয়রশিপকী মিনিস্তর ওইখি। মহাক ২০১৯ দা পেত্রোলিয়ম অমসুং নেচরেল গ্যাসকী মিনিস্তর হাপখি।

জুলাই ২০২১দা, শ্রী প্রধান ইজুকেসন মিনিস্তর অমসুং স্কিল দিবলপমেন্ত অমসুং ওন্ত্রেপ্রেনিউয়রশিপকী মিনিস্তর ওইখি। লৈবাক অসিদা নেসনেল ইজুকেসন পোলিসি ২০২০ পায়খৎনবা মহাক্না কন্না হোৎনখি। লৈবাক অসিদা লাইরিক-লাইশুগী লমদা অচৌবা ইথিল পীবা অনৌবা থবক কয়া মহাক্না হৌদোকখি।

****