মহারাস্ত্রগী রাজ্যপাল শ্রী রমেশ বৈসজী, মুখ্য মন্ত্রী শ্রী একনাথ শিন্দেজী, মন্ত্রীমন্দলগী ঐহাক্কী মরুপ নির্মলা সীতারমনজী, ভাগবত করাদজী, পঙ্কজ চৌধরীজী, মহারাস্ত্র সরকারগী উপ মুখ্য মন্ত্রী দেবেন্দ্রজী, অজিৎজী, রিজর্ব বেঙ্ককী গভর্নর শক্তিকান্ত দাসজী, রিজর্ব বেঙ্ক ওফ ইন্দিয়াগী ওফিসিএলশিং, অতৈ অথোইবা মীথুংলেন, নুপীশিং অমসুং নুপাশিং,

ঙসি, ভারতকী রিজর্ব বেঙ্কনা পুৱারী ওইরবা তাঙ্কক অমা য়ৌরে। RBIনা চহি 90 মপুং ফারে। ইন্সতিত্যুসন অমা ওইনা, RBIনা নীংখা তম্বা ফংদ্রিঙৈগী মমাং অমসুং নীংখা তম্বগী মতুংগী মতমশিং থেংনখি। ঙসিদি, মালেম পুম্বদা RBIগী মশক অসি মাগী প্রোফেস্নেলিজম অমসুং কম্মিতমেন্তনা তাক্লি। ঐহাক্না ময়াম পুম্নমকপু, রিজর্ব বেঙ্ক ওফ ইন্দিয়াগী স্তাফ অমসুং ওফিসিএল পুম্নমকপু থাগৎপা ফোঙদোকচরি।

অমসুং, ঐহাক্না হৌজিক RBIগা মরী লৈনরিবা মীওইশিং অসি য়াম্না লাইবক ফৈ হায়না ফাওই। ঙসি অদোম্না শেমগদবা পোলিসীশিং, অদোম্না পায়খৎকদবা থবকশিং অসিনা RBIগী মথংগী চহী তরাগী খোঙথাং অদু লেপকনি। হায়রিবা চহী অসি ইন্সতিত্যুসন অসিবু চহি চা মপুং ফারকপদা পুরক্কদৌরিবা চহী অমনি। অমসুং মসিগী চহীচা অসি চাউখৎলবা ভারতকী ৱারেপ লৌবগী খোঙচৎকীদমক্তসু য়াম্না মরু ওই। অমসুং মসিগীদমক্তা, অদোমগী মন্ত্রনা হায়রিবগুম্না, RBIনা থুনা চাউখৎলকপদা খ্বাইদগী ৱাংবা প্রাইওরিতী পীদুনা থাজবা অমসুং স্তেবিলিতীদসু চপ মান্ননা মীৎয়েং থমগদবনি। ঐহাক্না RBIবু মসিগী পান্দম অমসুং ৱারেপশিং অসিগীদমক য়াইফ-পাউজেল পীজরি।

মরুপশিং,

নখোয়না নখোয়গী লমদা খঙহৈরবশিং ওইরি। লৈবাক অসিগী শেন্মিৎলোন, ঐখোয়গী GDP অসি মোনিতরী অমসুং ফিস্কেল পোলিসীশিংগী কোওর্দিনেসনদা য়ুম্ফম ওই হায়বসি অদোম্না খঙই। ঐহাক্না নীংশিংলি  মদুদি ঐহাক্না 2014দা রিজর্ব বেঙ্ককী চহি 80শুবা থৌরমদা লাকখিবা অদুদা, ফিভম অসি য়াম্না খেন্নরম্মি। ভারতকী বেঙ্কিং সেক্তর পুম্নমক অসি অৱাবা অমসুং শীংনবা কয়া মায়োক্নখি। NPAগী মতাংদা মীপুম খুদিংমক্না ভারতকী বেঙ্কিং সিস্তেমগী স্তেবিলিতী অমসুং মসিগী তুংলমচৎকী মতাংদা শিংনবা কয়া লৈখি। ফিভম অসি য়াম্না ফত্তবনা মরম ওইরগা পব্লিক সেক্তর বেঙ্কশিংনা লৈবাক অসিগী শেন্মিৎলোনগী খুমাং চাউশিল্লকপদা মথৌ তাবা খোংজেল পীবা ঙমখিদে। ঐখোয় পুম্নমক মফম অদুদগী হৌখি। ঙসিদি, ভারতকী বেঙ্কিং সিস্তেম অসি মালেমদা মপাঙ্গল কনবা অমসুং তুং কোইনা চৎনবা য়াবা সিস্তেম অমনি হায়না লৌনরি। মতম অমদা শিথরুগদবগী তৌরম্বা বেঙ্কিং সিস্তেম অদু হৌজিক্তি লন-থুমগী চাং হেনগৎলক্লি অমসুং ক্রেদিৎকী রেকোর্দ হেনগৎলক্লি।

মরুপশিং,

চহি 10 খক্তদা অসিগুম্বা অচৌবা অহোংবা অমা পুরকপা অসি অরাইবা নত্তে হায়বসিসু অদোম্না খঙই। মসিগী অহোংবা অসি ঐখোয়গী পোলিসী, ইন্তেন্সন অমসুং ৱারেপশিং অসিদা ক্লিয়রিতী লৈবনা লাকপনি। ঐখোয়গী হোৎনরিবশিংদা পুক্নিং চিংশিনবা অমসুং অচুম্বা মওংদা থবক তৌবনা মরম ওইদুনা অহোংবা অসি লাকখি। ঙসি লৈবাক অসিনা উবা ফংলি মদুদি ৱাখল্লোন চুম্লবদি পোলিসীসু চুম্মি। পোলিসীদু চুম্লবদি, ৱারেপশিংদু চুমগনি। অমসুং করিগুম্বা ৱারেপশিং অদু চুম্লবদি, মহৈ অদুসু চুমগনি। অতেনবা মওংদা হায়রবদা, ঐহাক্না হায়জনীংবদি - করিগুম্বা ৱাখল্লোন অদু চুম্লবদি, মদুগী মহৈ অদুসু চুমগনি।

লৈবাক অসিগী বেঙ্কিং সিস্তেম অসি মতৌ করম্না শেমদোকখিবগে হায়বসি নৈন্নবা হীরম অমনি। ঐখোয়গী সরকারনা ‘রিকগনিসন’, ‘রিজোল্যুসন’ অমসুং ‘রিকেপিতেলাইজেন’গী স্ত্রাতেজিদা থবক তৌখি। পব্লিক সেক্তর বেঙ্কশিংগী ফীভম ফগৎহন্নবা সরকারনা লুপা করোর লাখ 3.5 রোমগী কেপিতেল ইনফ্যুজন তৌখি অমসুং গভর্নান্সকা মরী লৈনবা রিফোর্ম কয়া অমসু পায়খৎখি। ইন্সোলভেন্সী অমসুং বেঙ্ক্রপসি কোদকী অনৌবা সিস্তেম্না মরম ওইদুনা লুপা করোর লাখ 3.25গী লোনশিং রিজোল্ব তৌখি।

অমসুং লৈবাক অসিগী মীওইশিংনা মশিং অমা খঙজিনবা য়াম্না মরু ওই। অসিগুম্বা এপ্লিকেসন লিশিং 27 হেন্না, লুপা করোর লাখ 9 হেনবগী দিফোল্ত লৈরম্বা অদু IBCদা এদমিসন তৌদ্রিঙৈদা রিজোল্ব তৌখি। মসিনা অনৌবা সিস্তেম অসিগী পোতেন্সিএল অসি কয়া য়াম্না লৈবগে হায়বদু উৎলি। বেঙ্কশিংগী গ্রোস NPA অসি 2018দা চাদা 11.25 রোম ওইখি। সেপ্তেম্বর 2023 ফাওবদা, মসি চাদা 3গী মখাদা ওইখি।

ঙসিদি ত্বিন বেলেন্স শীৎকী প্রোব্লেম অসি মমাংঙৈগী ওইরে। ঙসি বেঙ্কশিংগী ক্রেদিৎ গ্রোথ অসি চাদা 15 য়ৌরে। অমসুং RBIগী কো-পার্তিসিপেসন অমসুং খোঙথাংশিং অসিনা মসিগী মাইপাকপশিং অসিদা অচৌবা থৌদাং লৌরি অমসুং মখোয়বু থাগৎচরি।

মরুপশিং,

RBIগুম্বা ইন্সতিত্যুসন অমগী মতাংদা খন্ন-নৈনবা অসি শেন-থুমগী ৱাহন্থোক অমসুং অরুবা ৱাহৈশিংখক্তদা য়ুম্ফম ওই। অদোমগী থবক অসি য়াম্না লুবা অসি মহৌশানি। অদুম ওইনমক, অদোম্না পায়খৎলিবা থবকশিং অসিনা লৈবাক অসিগী মীচম প্রজাগী পুন্সিদা হকথেংননা কান্নবা ফংহল্লি। হৌখিবা চহি 10 অসিদা, ঐখোয়না সেন্ত্রেল বেঙ্ক, বেঙ্কিং সিস্তেম অমসুং লাস্ত মাইলদা লৈরিবা মীওইশিংগী মরক্তা লৈনরিবা মরী অসিবু ময়েক শেংহনখি। ঙসি লায়রবশিংগী শেল-থুমগী ওইবা ইনক্লুজন অসি মসিগী অচৌবা খুদম অমনি। ঙসিদি লৈবাক অসিদা জন ধন একাউন্ত করোর 52 লৈরে। মসিগী মনুংদা, একাউন্তশিংগী চাদা 55 হেন্না নুপীশিংগী মিংদা লৈ। লৌউ-শিংউ অমসুং ঙা য়োকপগুম্বা সেক্তরশিংদা ফাইনান্সিএল ইনক্লুজনগী কান্নবা অদুসু অদোম্না উবা ফংগনি।

ঙসিদি লৌমী, ঙামী অমসুং শা-শন য়োকপা মীওই করোর 7 হেনবনা কিসান ক্রেদিৎ কার্দ পায়রে। মসিনা ঐখোয়গী খুঙ্গংগী শেন্মিৎলোনদা অচৌবা শাহৌ পীরি। কোওপরেতিব সেক্তরসু হৌখিবা চহি 10 অসিদা চাউনা চাউখৎলক্লি। কোওপরেতিব বেঙ্কশিংনা কোওপরেসনদা অচৌবা থৌদাং অমা লৌরি অমসুং মসি রিজর্ব বেঙ্ককী রিগুলেসন অমসুং সুপরভিজনগী মরুওইবা লম অমসু ওইরি। ঙসিদি UPIনা মালেমগী ওইনা শকখঙনরবা প্লেৎফোর্ম অমা ওইরে। মসিদা থা খুদিংগী ত্রাঞ্জেক্সন করোর  1200 হেন্না তৌরি।

হৌজিক নখোয়না সেন্ত্রেল বেঙ্ক দিজিতেল করেন্সীদা থবক তৌরি। হায়বদি মসি হৌখিবা চহী 10 অসিদা পুরকখিবা অহোংবশিংগী মশক অমসু ওইরি। চহী তরাগী মনুংদা ঐখোয়না মপুং ফানা অনৌবা বেঙ্কিং সিস্তেম, অনৌবা ইকোনোমী অমসুং অনৌবা শেন-থুমগী এক্সপরিয়েন্স অমদা চঙশিল্লক্লি। অমসুং ঐহাক্না মমাংদা হায়খিবগুম্না, হৌখিবা চহি 10 অসিদা থোকখিবা পুম্নমক অসি ত্রেলর খক্তনি। তৌগদবা কয়া লৈরি, ঐখোয়না লৈবাক অসিবু মাংলোমদা পুখৎকনি।

মরুপশিং,

মথংগী চহি 10গীদমক ঐখোয়না য়াম্না ময়েক শেংবা পান্দমশিং থম্বা অসি য়াম্না মরু ওই। লাক্কদৌরিবা চহি 10 অসিদা ঐখোয় পুন্না দিজিতেল ত্রান্সসেক্সনগী ওইথোকপা য়াবশিং পাকথোক চাউথোকহনগদবনি। শেল য়াওদবা শেন্মিৎলোনদগী লাকপা অহোংবশিং অসিদসু ঐখোয়না মীৎয়েং থমগদবনি। ঐখোয়না ফাইনান্সিএল ইনক্লুজন অমসুং এম্পাৱরিংগী থবকশিংসু ফগৎহনগদবনি।

মরুপশিং,

মীশিং য়াম্লবা মীওইশিংগী বেঙ্কিংগী মথৌ তাবশিং অসিসু খেন্নৈ। মীওই কয়ানা ফিজিকেল ব্রাঞ্চ মোদেল, মীওই কয়ানা দিজিতেল দেলিভরী পাম্মি। বেঙ্কিং তৌবদা হেন্না লায়বা ওইহন্নবা অমসুং মীওই খুদিংমক্না মখোয়গী মথৌ তাবশিং অদুগী মতুং ইন্না ক্রেদিৎ ফংহন্নবা লৈবাক অসিনা অসিগুম্বা পোলিসীশিং অসি শেমগৎপা মথৌ তাই। ভারতপু DPI গী লমদা মকোক থোংবা অমা ওইহন্নবগীদমক, ঐখোয়না লেপ্পা লৈতনা আর্তিফিসিএল ইন্তেলিজেন্স, মেছিন লর্নিংগী মতেং লৌগদবনি। ভারতকী খোংজেল য়াংনা, পুম্নমক য়াওবা অমসুং তুং কোইনা চংশিন্নবা, রিজর্ব বেঙ্কনা লেপ্পা লৈতনা খোংথাং লৌখৎকদবনি। রেগ্যুলেতর অমা ওইনা, RBIনা বেঙ্কিং সেক্তরদা রুলদা য়ুম্ফম ওইবা দিসিপ্লিন অমসুং শেল-থুমগী মতাংদা চেকশিন থৌরাংশিং পাঙথোক্নবা হোৎনরি।

অদুবু মসিগা লোয়ননা, সেক্তর কয়াগী তুংগী মথৌ তাবশিং য়েংলগা RBIনা হৌজিক শেম-শাবা, বেঙ্কশিংবু পুক্নিং থৌগৎপা অমসুং প্রোএক্তিব ওইবা খোঙথাং কয়া লৌখৎপা অসিসু মথৌ তাই। সরকারনা অদোমগীদমক লেপ্পী হায়না ঐনা থাজবা পীজরি। চহি 10গী মমাংদা, দবল দিজিৎ ইনফ্লেসন থেংনবগী মমি অদু মতম অদুগী ফাইনান্সিএল পোলিসীশিংদা উবা ফংখিদে। মসি থেংননবা, ঐখোয়গী সরকারনা রিজর্ব বেঙ্ক ওফ ইন্দিয়াদা ইনফ্লেসন তার্গেতিং তৌবগী হক পীখি। মোনিতরী পোলিসী কম্মিতীনা মসিগী মেন্দেৎ অসিদা য়াম্না ফজনা থবক তৌখি। মতম অমত্তদা, সরকারনা এক্তিব প্রাইস মোনিতরিং অমসুং ফিক্সেল কন্সোলিদেসনগুম্বা খোংথাংশিং লৌখৎখি। মরম অদুনা, কোরোনাগী অৱাবা, তোঙান-তোঙানবা লৈবাকশিংদা লানগী ফিভম, তেন্সন লৈরবসু, ভারত্তা শেন্দোন হন্থবগী চাং অসি অৱাংবা থাক্তা লৈরি।

মরুপশিং,

প্রাইওরিতিশিং অদু ময়েক শেংনা খঙলবা লৈবাক অমনাদ চাউখৎপদা থিংবা ঙম্লোই। ঐখোয়না কোরোনাগী মতমদা ফাইনান্সিএল প্রুদেন্সগী মতাংদসু পুক্নিং চিংশিনখি অমসুং মীচম প্রজাগী পুন্সিদা খ্বাইদগী মরুওইবা মীৎয়েং চংখি। মসিনা মরম ওইদুনা ভারতকী লায়রবশিং অমসুং ভারতকী মিদল ক্লাসনা খুদোংচাদবশিং অসিদগী অৱাবা কোকপা ঙমখি অমসুং হৌজিক্তি শেন্মিৎলোনদসু শাহৌ পীরি। মালেমগী অচৌবা লৈবাকশিং অসি হৌজিক ফাওবা চৈথেং অসিদগী ফগৎনবা হোৎনরিঙৈদা, ভারতকী শেন্মিৎলোননা অনৌবা রেকোর্দশিং থম্লি। RBIনা ভারতকী মাইপাকপা অসি মালেমগী থাক্তা পুখৎপা ঙমগনি।

ইনফ্লেসন লাকশিন্নবা অমসুং গ্রোথকী মরক্তা বেলেন্স অমা থম্বা অসি চাউখৎলক্লিবা লৈবাক খুদিংমক্কী অখন্নবা মথৌ তাবা অমনি। মসিগা মরী লৈননা করম্বা মোনিতরী তুলশিং শিজিন্নবা য়াবগে হায়বদু খন্নবা য়াম্না মরু ওই। RBIনা মসিগীদমক মোদেল অমা ওইদুনা মালেমবু লুচিংবগী থৌদাং লৌবা য়াই। অমসুং মসি ঐহাক্না চহি 10গী এক্সপরিয়েন্সকী মতুংদা হায়জবনি। অমসুং ঐহাক্না মসি মালেম অসিবু য়াম্না নক্না খঙবদগী অমসুং খঙজিনবদগী হায়জরি। অমসুং মসিনা গ্লোবেল সাউথ পুম্নমক্তা অচৌবা মতেং পাংগনি।

মরুপশিং,

লাক্কদৌরিবা চহি 10গীদমক পান্দম থম্লিঙৈদা ঐখোয়না অতোপ্পা ৱাফম অমা 6 মথৌ তাই। মসি ভারতকী নহারোলশিংগী এস্পিরেসনশিংনি। ঙসি ভারত অসি মালেমগী খ্বাইদগী নহা ওইরিবা লৈবাকশিংগী মনুংদা অমনি। নহারোলশিংগী অপাম্বশিং অসি মপুং ফাহন্নবদা RBIগী মরুওইবা থৌদাং লৈ। হৌখিবা চহি 10দা সরকারগী পোলিসীশিংগী মতুং ইন্না, অনৌবা সেক্তরশিং শেমগৎলে। লৈবাক অসিগী নহারোলশিংনা সেক্তরশিং অসিদা অনৌবা খুদোংচাবা কয়া ফংলি। অদোম্না উবা ফংই, ঙসি গ্রীন ইনর্জীগুম্বা অনৌবা সেক্তরশিং অসি পাকথোক চাউথোক্লি।

সরকারনা সোলর ইনর্জী অমসুং গ্রীন হাইদ্রোজেনগুম্বা সেক্তরশিং প্রমোৎ তৌরি। ঙসিদি লৈবাক অসিদা ইথানোল ব্লেন্দিং লেপ্তনা হেনগৎলক্লি। ঙসি ভারত অসি দিজিতেল তেক্নোলোজীদা মরুওইবা শান্নরোই অমা ওইরক্লি। ঐখোয়না স্বদেশী 5G তেক্নোলোজীদা থবক তৌরি। দিফেন্স সেক্তরদা ঐখোয়না অচৌবা এক্সপোর্তর ওইবগী থৌদাং লৌরি।

MSMEশিং অসি ভারতকী শেন্মিৎলোন অমসুং মেন্যুফেকচরিং সেক্তরগী মপাঙ্গলনি। অসিগুম্বা সেক্তর খুদিংমক্তা তোঙান তোঙানবা মওংদা লোন মথৌ তাই । কোরোনাগী মতমদা ঐখোয়না MSME সেক্তরগীদমক ক্রেদিৎ গেরেন্তী স্কিম শেমখি। মসিনা সেক্তর অসিদা চাউরবা শক্তি অমা পীরম্মি। রিজর্ব বেঙ্কনা মখা তানা আউৎ ওফ দি বোক্স পোলিসীগী মতাংদা খনবা মথৌ তাই। অমসুং ঐনা উখি মদুদি ঐখোয়গী শক্তিকান্তজী অসি বোক্সকী মপান্দা খনবা ঙম্বগী হৈশিংবা লৈ। অখন্ননা অনৌবা সেক্তরশিংদা ঐখোয়গী নহারোলশিংনা ক্রেদিৎ মতিক চানা ফংহনবা অসি য়াম্না মরু ওই।

মরুপশিং,

ইন্নোভেসন অসি 21শুবা চহিচাদা য়াম্না মরু ওইগনি। সরকারনা ইন্নোভেসনদা রেকোর্দ ইনভেস্তমেন্ত তৌরি। অদোম্না উখ্রে, হৌজিক ঐখোয়না ইন্তেরিম বজেৎ পুথোকখ্রে, মসিদা ইন্নোভেসনগীদমক লুপা করোর লাখ 1গী রিসর্স ফন্দসু শেম্লে। 'কাতিং এদজ তেক্নোলোজী'গী মতাংদা লাক্কদৌরিবা প্রোপোজেলশিং অমসুং লম অসিদা থবক তৌবা পাম্বা মীওইশিংগীদমক্তা ঐখোয়না করম্না শেম-শাবা য়াবগে হায়বদু খনবা অসি য়াম্না মরু ওই। অমসুং RBIনা হৌজিক্তি মখোয়বু মতৌ করম্না মতেং পাংগদগে হায়বদু খনবা তাই। ঐখোয়না অসিগুম্বা মীওইশিংবু মশক খঙদোক্কদবনি, অসিগুম্বা তীমশিং শেমগদবনি। ঐখোয়না ত্রেদিস্নেল ব্যুজিনেস অমসুং লাক্কদৌরিবা হীরমশিংদা এক্সপেরিএন্স শেমগৎকদবনি।

মসিগা মান্ননা, স্পেস সেক্তরসু হাংদোক্লি, অনৌবা স্তার্ত-অপশিংসু মসিদা লাক্লি। মরম অদুনা ঐখোয়না ক্রেদিৎকীদমক্তা মখোয়দা করম্বা মখলগী সপোর্ত মথৌ তাবগে হায়বদু য়েংবা তাই। মসিগা মান্ননা, ভারতকী খ্বাইদগী চাউবা অনৌবা সেক্তরশিংগী মনুংদা অমা মপুং ফানা লাক্লি, মদুদি তুরিজম সেক্তরনি। তুরিজম সেক্তরসু চাউখৎলক্লি অমসুং মালেম পুম্নমক্না ভারত্তা লাকপা পাম্মি, ভারত উবা পাম্মি, ভারতপু খঙবা পাম্মি। তুরিজম এক্সপর্তশিংনা হায়খিবগী মতুং ইন্না লাক্কদৌরিবা চহিশিংদা অয়োধ্যা অসি মালেমগী খ্বাইদগী চাউবা স্পিরিচুএল তুরিজমগী কেপিতেল ওইগনি হায়না ঐনা হন্দক্তা থেংনখি। ঐখোয়না সেক্তর অসিবু শেল থুমগী মতেং পীনবগীদমক ঐখোয়না করম্বা শেম-শাবা য়াবগে হায়বদু য়েংবা তাই। লৈবাক অসিদা শেমগৎলক্লিবা অনৌবা সেক্তরশিংদা ঐখোয়না এক্সপর্তিজ দিবেলপ তৌগদবনি অমসুং ঐখোয়না মখোয়বু মতৌ করম্না মতেং পাংগদগে হায়বগী মতাংদা মাংজৌননা খন্নগদবনি।

নুমিৎ 100নিদি ঐহাক মীখলগী থবক চিল্লি, অদুনা নখোয়দা মতম য়াম্না লৈ। অদোম্না খল্লু, মরমদি ৱাশক লৌরবা মতুং নুমিৎ হুম্নি শুবদা মদু কান্নরক্কনি।

মরুপশিং,

ঐখোয়না ফাইনান্সিএল ইনক্লুজন, দিজিতেল পেমেন্তশিংদা থবক কয়া পায়খৎলি। মসিগা লোয়ননা, ঐখোয়গী অপীকপা ললোন-ইতিক অমসুং লম্বীদা পোৎচৈ য়োল্লিবশিংগী শেল-থুমগী মপাঙ্গল অসি ময়েক শেংনা উবা ফংহল্লে, হৌজিক্তি মসিগী ইনফোর্মেসন অসি শিজিন্নদুনা, ঐখোয়না মখোয়বু শেল থুমগী মতাংদা শক্তি পীবা তাই।

মরুপশিং,

লাক্কদৌরিবা চহি 10 অসিদা ঐখোয় পুন্না চাউরবা থবক অমা পাঙথোক্কদৌরি। ঐখোয়না ভারতকী শেন্মিৎলোনদা মশা-মরোমদোম লেপচবা ঙম্বা হেনগৎহনগদবনি। মালেমগী অৱা-অনাশিংনা ঐখোয়গী শেন্মিৎলোনদা চৈথেং পীদুনা শোকহন্দনবা ঐখোয়না হোৎনগদবনি। ঙসিদি, ভারতনা মালেমগী GDPগী গ্রোথতা চাদা 15গী শিয়রগা লোয়ননা মালেমগী গ্রোথকী ইঞ্জিন ওইরক্লি। অসিগুম্বা ফিভম অসিদা, মালেম শিনবা থুংনা ঐখোয়গী রুপী অসি হেন্না এক্সেসিবল অমসুং এসেপ্তেবল ওইহন্নবা হোৎনবা তাই।

হৌখিবা চহি খরা অসিদা মালেম শীনবা থুংনা উবা ফংলিবা অতোপ্পা চৎনবী অমা হায়রগদি শেন্মিৎলোনবু কা হেন্না পাকথোক চাউথোকহনবা অমসুং শেল থাদবগী চাং হেনগৎলকপা অসিনি। লৈবাক কয়াগী প্রাইবেৎ সেক্তরগী শেনফম অসি মখোয়গী GDPদগী শরুক অনি হেনখ্রে। লৈবাক কয়াগী শেনদোনগী থাক অসিনা লৈবাক অদুগী শেন্মিৎলোনগা লোয়ননা মালেম পুম্বদা শোকহল্লি। রিজর্ব বেঙ্কনা মসিদসু নৈনগদবনি।

ভারতকী চাউখৎপগী ওইথোকপা য়াবা অমসুং তৌবা ঙম্বশিং অদু খঙনা, ক্রেদিৎ করম্না ফংহনগদগে অমসুং মসি মতৌ করম্না তুংকোইনা চলাইগদগে হায়বদু মোদর্ন পর্সপেক্তিব অমদা লেপথোকপা অসি য়াম্না মরু ওই।।

মরুপশিং,

ঐখোয়গী বেঙ্কিং ইন্দস্ত্রীনা লৈবাক অসিগী মরুওইবা প্রোজেক্তশিংদা শেল থাদবদা খুমাং চাউশিল্লকপা অসিসু চপ মান্ননা মরু ওইগনি। অমসুং মসিগী মথৌ তাবগী মরক্তা, ঙসিদি লম কয়াদা শিংনবশিং লৈরি। AI অমসুং ব্লোক চেনগুম্বা অনৌবা তেক্নোলোজীশিংনা বেঙ্কিং তৌবগী মওং হোংহল্লে। থৌওং পুম্নমক হোংখ্রে। চাউখৎলক্লিবা দিজিতেল বেঙ্কিং সিস্তেমদা সাইবর সেক্যুরিতীগী থৌদাং অসি য়াম্না মরু ওইরক্লি। ফিনতেক্কী অনৌবা ইন্নোভেসনশিংনা বেঙ্কিংগী অনৌবা পাম্বৈশিং পুথোক্কনি। অসিগুম্বা ফিভম অসিদা, লৈবাক অসিগী বেঙ্কিং সেক্তরগী স্ত্রকচরদা করি অহোংবা লাক্কদগে হায়বদু ঐখোয়না খন্থবা তাই। মসিদা ঐখোয়না অনৌবা ফাইনান্সিং, ওপরেতিং অমসুং বিজিনেস মোদেলশিং মথৌ তাবা য়াই। চাউখৎলবা ভারত অমগীদমক্তা য়াম্না মরু ওই মদুদি ঐখোয়না মালেমগী চেম্পিয়নশিংগী ক্রেদিৎকী মথৌ তাবশিং, লম্বীদা পোৎ য়োল্লিবশিংগী মথৌ তাবশিং, অৱাংবা থাক্কী সেক্তরশিংদগী হৌরগা ত্রেদিস্নেল সেক্তরশিং ফাওবা মপুং ফাহনবা ঙমগনি।।

রিজর্ব বেঙ্ক অসি চাউখৎলবা ভারত অমগী বেঙ্কিং ভিজনগী মপুং ফানা নৈনবগীদমক্তা য়াম্না মতিক চাবা ইন্সতিত্যুসন অমনি। 2047 ফাওবদা চাউখৎলবা ভারত অমা শেমগৎনবা অদোমগী হোৎনরিবশিং অসি য়াম্না মরু ওইগনি।।

অমুক হন্না ময়ামবু ঐহাক্না হন্না-হন্না নুংঙাইবা ফোঙদোকচরি।

থাগৎচরি!

*****