கர்நாடக ஆளுநர் திரு தாவர் சந்த் கெலாட் அவர்களே, முதலமைச்சர் திரு சித்தராமையா அவர்களே, கர்நாடக சட்டமன்ற எதிர்க்கட்சித் தலைவர் திரு  ஆர். அசோக் அவர்களே, பாரத் போயிங் நிறுவனத்தின் தலைமை நிர்வாக அதிகாரி திரு ஸ்டீபனி போப் அவர்களே, இதர தொழில் கூட்டாளிகளே, தாய்மார்களே, அன்பர்களே!

வெளிநாடுகளில் இருந்து வருகை தந்துள்ள அனைத்து சிறப்பு விருந்தினர்களையும் பெங்களூருக்கு அன்புடன் வரவேற்கிறோம். பெங்களூரு, அபிலாஷைகளை புதுமைகள் மற்றும் சாதனைகளுடன் இணைக்கிறது, மேலும் இந்தியாவின் தொழில்நுட்ப திறனை உலகளாவிய தேவையுடன் இணைக்கிறது. பெங்களூருவில் போயிங்கின் புதிய உலகளாவிய தொழில்நுட்ப வளாகத்தின் திறப்பு இந்த அடையாளத்தை வலுப்படுத்தத் தயாராக உள்ளது. குறிப்பிடத்தக்க வகையில், இந்த வளாகம் அமெரிக்காவிற்கு வெளியே போயிங் நிறுவனத்தின் மிகப்பெரிய வசதியாக உள்ளது, இது இந்தியாவுக்கு மட்டுமல்ல, உலகளாவிய விமான சந்தைக்கும் புதிய உத்வேகத்தை வழங்குகிறது. ஆனால் நண்பர்களே, இந்த வசதியின் முக்கியத்துவம் இத்துடன் நின்றுவிடவில்லை. இந்த வசதியின் முக்கியத்துவம் உலகளாவிய தொழில்நுட்ப முன்னேற்றங்கள், ஆராய்ச்சி, கண்டுபிடிப்பு, வடிவமைப்பு மற்றும் தேவை ஆகியவற்றை வழிநடத்துவதற்கான பாரத்தின் உறுதிப்பாட்டுடன் எதிரொலிக்கிறது. 'இந்தியாவில் தயாரிப்போம், உலகிற்காக தயாரிப்போம்' என்ற நமது உறுதிப்பாட்டுக்கு இது வலு சேர்க்கிறது. மேலும், இந்த வளாகத்தை நிறுவியிருப்பது பாரதத்தின் திறமை மீது உலகம் கொண்டுள்ள நம்பிக்கையை அடிக்கோடிட்டுக் காட்டுகிறது.

நண்பர்களே,

கர்நாடக மக்களுக்கும் இன்று ஒரு முக்கியமான நாள். ஆசியாவின் மிகப்பெரிய ஹெலிகாப்டர் உற்பத்தி தொழிற்சாலை கடந்த ஆண்டு கர்நாடகாவில் கட்டி முடிக்கப்பட்டது. இப்போது அவர்கள் இந்த உலகளாவிய தொழில்நுட்ப வளாகத்தையும் பெறப் போகிறார்கள். கர்நாடகா ஒரு பெரிய விமானப் போக்குவரத்து மையமாக எவ்வாறு வளர்ந்து வருகிறது என்பதை இது சித்தரிக்கிறது. பாரதத்தின் இளைஞர்களுக்கு எனது வாழ்த்துகளைத் தெரிவித்துக் கொள்கிறேன், ஏனெனில் இந்த வசதி அவர்களுக்கு விமானப் போக்குவரத்துத் துறையில் புதிய திறன்களை வளர்த்துக் கொள்ள எண்ணற்ற வாய்ப்புகளை அளிக்கும்.

நண்பர்களே,

இன்று நாட்டின் ஒவ்வொரு துறையிலும் பெண்களின் பங்களிப்பை ஊக்குவிப்பதே எங்கள் முயற்சியாகும். ஜி-20 உச்சிமாநாட்டின் போது எங்களது தீர்மானங்களில் ஒன்றில் குறிப்பிடப்பட்டபடி, பெண்கள் தலைமையிலான வளர்ச்சியின் சகாப்தம் வந்துவிட்டது என்பதை உலகிற்கு தெரிவித்துள்ளோம். விமானப் போக்குவரத்து மற்றும் விண்வெளித் துறையில் பெண்களுக்கு புதிய வாய்ப்புகளை உருவாக்கும் எங்களது முயற்சிகள் விரிவடைந்துள்ளன. போர் விமானிகளாக இருந்தாலும் சரி அல்லது சிவில் விமானப் போக்குவரத்தில் இருந்தாலும் சரி, இன்று பாரதம் பெண் விமானிகளைப் பொறுத்தவரை உலகளவில் முன்னோடியாகத் திகழ்கிறது. பாரதத்தின் விமானிகளில் 15 சதவீதம் பேர் பெண்கள் என்பதை என்னால் பெருமையுடன் கூற முடியும், இது உலகளாவிய சராசரியை விட மூன்று மடங்கு அதிகம். புதிதாக தொடங்கப்பட்டுள்ள போயிங் சுகன்யா திட்டம், இந்தியாவின் விமானப் போக்குவரத்துத் துறையில் நமது மகள்களின் பங்களிப்பை மேலும் மேம்படுத்தத் தயாராக உள்ளது. விமானிகளாக ஆசைப்படும் தொலைதூரப் பகுதிகளில் உள்ள பொருளாதாரத்தில் பின்தங்கிய குடும்பங்களைச் சேர்ந்த மகள்களின் கனவுகளை நனவாக்கும் வகையில் இந்த முயற்சி அமையும். கூடுதலாக, நாடு முழுவதும் உள்ள பல அரசு பள்ளிகளில் ஆர்வமுள்ள விமானிகளுக்கான தொழில் பயிற்சி மற்றும் மேம்பாட்டு வசதிகள் நிறுவப்படும்.

நண்பர்களே,

பாரத்தின் விமான நிலைய திறன் விரிவடைந்துள்ளதால், விமான சரக்கு துறை விரைவான வளர்ச்சியைக் கண்டுள்ளது. இந்த வளர்ச்சி பாரதத்தின் தொலைதூர பகுதிகளிலிருந்து சர்வதேச சந்தைகளுக்கு பொருட்களை எளிதாக கொண்டு செல்ல உதவியுள்ளது. வேகமாக வளர்ந்து வரும் விமானப் போக்குவரத்துத் துறை இந்தியாவின் ஒட்டுமொத்த வளர்ச்சிக்கு பங்களிப்பது மட்டுமல்லாமல், வேலைவாய்ப்பை உருவாக்குவதற்கும் உந்துதலாக உள்ளது.

நண்பர்களே,

'இதுதான் நேரம், இதுதான் சரியான நேரம்' என்று நான் செங்கோட்டையின் கொத்தளத்திலிருந்து பிரகடனம் செய்தேன். போயிங் மற்றும் பிற சர்வதேச நிறுவனங்கள் தங்கள் வளர்ச்சியை பாரத்தின் விரைவான முன்னேற்றத்துடன் சீரமைக்க இது சரியான நேரம். அடுத்த 25 ஆண்டுகளில் வளர்ச்சியடைந்த இந்தியாவை உருவாக்குவதில் 140 கோடி இந்தியர்களின் அர்ப்பணிப்பில் இப்போது கவனம் செலுத்துகிறது. கடந்த 9 ஆண்டுகளில், சுமார் 25 கோடி இந்தியர்கள் வறுமையிலிருந்து உயர்த்தப்பட்டு, வளர்ந்து வரும் புதிய நடுத்தர வர்க்கத்தை உருவாக்கியுள்ளனர்.

மிகவும் நன்றி.

***

PKV/BR/KV