നമസ്‌കാരം!

ഇന്ന് നിങ്ങള്‍ അബുദാബിയില്‍ ചരിത്രം സൃഷ്ടിച്ചിരിക്കുന്നു. നിങ്ങള്‍ യുഎഇയുടെ വിവിധ കോണുകളില്‍ നിന്നും ഭാരതത്തിന്റെ വിവിധ സംസ്ഥാനങ്ങളില്‍ നിന്നും വന്നവരാണ്, എന്നാല്‍ എല്ലാവരുടെയും ഹൃദയങ്ങള്‍ പരസ്പര ബന്ധിതമാണ്. ഈ ചരിത്ര സ്റ്റേഡിയത്തിലെ ഓരോ ഹൃദയമിടിപ്പും പറയുന്നു--ഭാരത-യുഎഇ സൗഹൃദം നീണാള്‍ വാഴട്ടെ! ഓരോ ശ്വാസവും പറയുന്നു -- ഭാരത-യുഎഇ സൗഹൃദം നീണാള്‍ വാഴട്ടെ! ഓരോ ശബ്ദവും പറയുന്നു -- ഭാരത-യുഎഇ സൗഹൃദം നീണാള്‍ വാഴട്ടെ! ഈ നിമിഷത്തില്‍ നമുക്ക് സമ്പൂര്‍ണമായി ജീവിക്കണം. ജീവിതകാലം മുഴുവന്‍ നമ്മോടൊപ്പം തങ്ങിനില്‍ക്കുന്ന ആ ഓര്‍മ്മകള്‍ ഇന്ന് നമുക്ക് ശേഖരിക്കേണ്ടതുണ്ട് -- ജീവിതകാലം മുഴുവന്‍ എന്നോടൊപ്പവും ഈ ഓര്‍മ്മകള്‍ തങ്ങിനില്‍ക്കും.

എന്റെ സഹോദരീ സഹോദരന്മാരേ,

ഇന്ന് ഞാന്‍ എന്റെ കുടുംബാംഗങ്ങളെ കാണാന്‍ വന്നതാണ്. കടല്‍ കടന്ന്, നീ ജനിച്ച നാടിന്റെ സുഗന്ധം ഞാന്‍ കൊണ്ടുവന്നു. നിങ്ങളുടെ 1.4 ബില്യണ്‍ ഇന്ത്യന്‍ സഹോദരീസഹോദരന്മാരില്‍ നിന്ന് ഞാന്‍ ഒരു സന്ദേശം കൊണ്ടുവന്നു... സന്ദേശം ഇതാണ് - ഭാരതം നിങ്ങളില്‍ അഭിമാനിക്കുന്നു, നിങ്ങള്‍ രാജ്യത്തിന്റെ അഭിമാനമാണ്. ഭാരതം നിങ്ങളെയോര്‍ത്ത് അഭിമാനിക്കുന്നു.
भारतम् निंगड़ै-और्त् अभिमा-निक्कुन्नु !! उंगलई पार्त् भारतम् पेरुमई पड़गिरदु !!
भारता निम्मा बग्गे हेम्मे पडु-त्तदे !! मी पइ भारतदेशम् गर्विस्तोन्दी !!എന്ന മനോഹരമായ ഈ ചിത്രം, നിങ്ങളുടെ ആവേശവും ശബ്ദവും, ഇന്ന് അബുദാബിയുടെ വിഹായസിനുമപ്പുറം എത്തുകയാണ്. ഈ വാത്സല്യവും അനുഗ്രഹവും എന്നെ സംബന്ധിച്ചിടത്തോളം വളരെ വലുതാണ്. നിങ്ങള്‍ ഇവിടെ വരാന്‍ സമയം കണ്ടെത്തിയതില്‍ ഞാന്‍ വളരെ നന്ദിയുള്ളവനാണ്.

സുഹൃത്തുക്കളേ,

ഇന്ന് സഹിഷ്ണുതയുടെ മന്ത്രി ശൈഖ് നഹ്യാനും നമുക്കിടയില്‍ ഉണ്ട്. അദ്ദേഹം ഇന്ത്യന്‍ സമൂഹത്തിന്റെ നല്ല സുഹൃത്തും അഭ്യുദയകാംക്ഷിയുമാണ്. ഇന്ത്യന്‍ സമൂഹത്തോടുള്ള അദ്ദേഹത്തിന്റെ സ്‌നേഹം പ്രശംസനീയമാണ്. ഇന്ന്, ഈ മഹത്തായ സംഭവത്തിന് എന്റെ സഹോദരന്‍ ഹിസ് ഹൈനസ് ഷെയ്ഖ് മുഹമ്മദ് ബിന്‍ സായിദിനോടും ഞാന്‍ നന്ദി രേഖപ്പെടുത്തുന്നു. അദ്ദേഹത്തിന്റെ പിന്തുണയില്ലാതെ ഈ ആവേശകരമായ ആഘോഷം സാധ്യമാകുമായിരുന്നില്ല. അദ്ദേഹത്തിന്റെ വ്യക്തിപരമായ സ്പര്‍ശം, എന്നെ ചേര്‍ത്തു പിടിക്കുന്ന അദ്ദേഹത്തിന്റെ അടുപ്പം, എന്റെ ഏറ്റവും വലിയ സമ്പത്താണ്. 2015ലെ എന്റെ ആദ്യ യാത്ര ഞാന്‍ ഓര്‍ക്കുന്നു. ഞാന്‍ കേന്ദ്രത്തില്‍ അധികാരത്തില്‍ അധികകാലം ഉണ്ടായിരുന്നില്ല. മൂന്ന് പതിറ്റാണ്ടിന് ശേഷം ഒരു ഇന്ത്യന്‍ പ്രധാനമന്ത്രിയുടെ ആദ്യ യുഎഇ സന്ദര്‍ശനമായിരുന്നു അത്. നയതന്ത്രലോകം എനിക്കും പുതിയതായിരുന്നു. ആ സമയം കിരീടാവകാശിയും ഇപ്പോഴത്തെ പ്രസിഡന്റും അവരുടെ അഞ്ച് സഹോദരന്മാരോടൊപ്പം എന്നെ സ്വീകരിക്കാന്‍ വിമാനത്താവളത്തില്‍ വന്നിരുന്നു. അവരുടെ ഉത്സാഹവും കണ്ണുകളിലെ തിളക്കവും എനിക്ക് ഒരിക്കലും മറക്കാന്‍ കഴിയില്ല. ആ ആദ്യ കൂടിക്കാഴ്ചയില്‍, പ്രിയപ്പെട്ട ഒരാളുടെ വീട്ടില്‍ വന്നതുപോലെ തോന്നി. ഒരു കുടുംബാംഗത്തെപ്പോലെ അവര്‍ എന്നെ ബഹുമാനിക്കുകയും ചെയ്തു. പക്ഷേ സുഹൃത്തുക്കളേ, ആ ബഹുമതി എന്റേത് മാത്രമായിരുന്നില്ല. ആ ബഹുമതി, ആ സ്വീകരണം, 1.4 ബില്യണ്‍ ഇന്ത്യക്കാര്‍ക്കുള്ളതാണ്. ആ ബഹുമതി യുഎഇയില്‍ താമസിക്കുന്ന ഓരോ ഇന്ത്യക്കാരനും അവകാശപ്പെട്ടതാണ്.

സുഹൃത്തുക്കളേ,

അന്ന് ആ ദിനവും, ഇന്ന് ഈ ദിനവും. 10 വര്‍ഷത്തിനിടെ യുഎഇയിലേക്കുള്ള എന്റെ ഏഴാമത്തെ യാത്രയാണിത്. ഇന്നും എയര്‍പോര്‍ട്ടില്‍ എന്നെ സ്വീകരിക്കാന്‍ സഹോദരന്‍ ഷെയ്ഖ് മുഹമ്മദ് ബിന്‍ സായിദ് എത്തിയിരുന്നു. അദ്ദേഹത്തിന്റെ ഉത്സാഹം ഒന്നുതന്നെയായിരുന്നു, അവന്റെ അടുപ്പവും ഒന്നുതന്നെയായിരുന്നു, ഇതാണ് അവനെ വളരെ സവിശേഷനാക്കുന്നത്.

സുഹൃത്തുക്കേളേ,

നാല് തവണ അദ്ദേഹത്തെ ഭാരതത്തിലേക്ക് സ്വാഗതം ചെയ്യാന്‍ നമുക്കും അവസരം ലഭിച്ചതില്‍ എനിക്ക് സന്തോഷമുണ്ട്. കുറച്ച് ദിവസങ്ങള്‍ക്ക് മുമ്പ് അദ്ദേഹം ഗുജറാത്ത് സന്ദര്‍ശിച്ചിരുന്നു. ആ സമയം റോഡിനിരുവശവും ലക്ഷക്കണക്കിന് ആളുകളാണ് നന്ദി അറിയിക്കാന്‍ തടിച്ചു കൂടിയത്. എന്തുകൊണ്ടാണ് അവര്‍ ഈ നന്ദി പ്രകടിപ്പിച്ചതെന്ന് നിങ്ങള്‍ക്കറിയാമോ? യുഎഇയില്‍ നിങ്ങളെയെല്ലാം അദ്ദേഹം പരിപാലിക്കുന്ന രീതി, നിങ്ങളുടെ താല്‍പ്പര്യങ്ങളില്‍ അദ്ദേഹം ശ്രദ്ധിക്കുന്ന രീതി, അപൂര്‍വമായി മാത്രമേ കാണാനാകൂ എന്നതിനാലാണ് ഈ നന്ദിയുള്ളത്. അതുകൊണ്ടാണ് അദ്ദേഹത്തോടുള്ള അഭിനന്ദനം അറിയിക്കാന്‍ ആ ആളുകളെല്ലാം വീടുകളില്‍ നിന്ന് പുറത്തിറങ്ങിയത്.

സുഹൃത്തുക്കളേ,

യുഎഇ തങ്ങളുടെ ഏറ്റവും ഉയര്‍ന്ന സിവിലിയന്‍ അവാര്‍ഡ് -- ഓര്‍ഡര്‍ ഓഫ് സായിദ് നല്‍കി എന്നെ ആദരിച്ചതും വിശേഷ സൗഭാഗ്യമായി കാണുന്നു. ഈ ബഹുമതി എന്റേത് മാത്രമല്ല, ഈ ബഹുമതി ദശലക്ഷക്കണക്കിന് ഇന്ത്യക്കാര്‍ക്കുള്ളതാണ്. എന്റെ സഹോദരന്‍ ഷെയ്ഖ് മുഹമ്മദ് ബിന്‍ സായിദിനെ കാണുമ്പോഴെല്ലാം അദ്ദേഹം എല്ലാ ഇന്ത്യന്‍ പൗരന്മാരെയും വളരെയധികം പ്രശംസിക്കാറുണ്ട്. യുഎഇയുടെ വികസനത്തില്‍ നിങ്ങളുടെ പങ്കിനെ അദ്ദേഹം അഭിനന്ദിക്കുന്നു. ഈ സായിദ് സ്റ്റേഡിയം പോലും ഇന്ത്യന്‍ വിയര്‍പ്പിന്റെ സത്ത വഹിക്കുന്നു. ഞങ്ങളുടെ എമിറാത്തി സുഹൃത്തുക്കള്‍ ഇന്ത്യക്കാര്‍ക്ക് അവരുടെ ഹൃദയത്തില്‍ ഇടം നല്‍കുകയും അവരുടെ സന്തോഷത്തിലും സങ്കടത്തിലും അവരെ പങ്കാളികളാക്കുകയും ചെയ്തതില്‍ എനിക്ക് സന്തോഷമുണ്ട്. കാലക്രമേണ, ഈ ബന്ധം അനുദിനം ദൃഢമായിക്കൊണ്ടിരിക്കുകയാണ്, സഹോദരന്‍ ഷെയ്ഖ് മുഹമ്മദ് ബിന്‍ സായിദ് ഇതില്‍ ഗണ്യമായ പങ്ക് വഹിച്ചു. കോവിഡ് സമയത്ത് നിങ്ങളോടുള്ള അദ്ദേഹത്തിന്റെ സഹാനുഭൂതി ഞാന്‍ കണ്ടു. ആ സമയം ഞാന്‍ അദ്ദേഹത്തോട് പറഞ്ഞു, ഞങ്ങള്‍ ഇന്ത്യക്കാരെ തിരികെ കൊണ്ടുവരാന്‍ ഒരുങ്ങുകയാണ്. പക്ഷേ, ഒട്ടും വിഷമിക്കേണ്ടെന്ന് അദ്ദേഹം എന്നോട് പറഞ്ഞു. ഇവിടെയുള്ള ഇന്ത്യക്കാരുടെ ചികില്‍സയ്ക്കുള്ള വാക്‌സിനേഷന്‍ ഉള്‍പ്പെടെ എല്ലാ സജ്ജീകരണങ്ങളും അദ്ദേഹം ചെയ്തു. അദ്ദേഹം ഇവിടെ ഉള്ളതിനാല്‍ എനിക്ക് ഒട്ടും വിഷമിക്കേണ്ടി വന്നില്ല. ഓരോ നിമിഷവും നിങ്ങളോടെല്ലാമുള്ള അവന്റെ അതിരുകളില്ലാത്ത സ്‌നേഹം ഞാന്‍ അനുഭവിക്കുന്നു. മാത്രവുമല്ല, 2015ല്‍ നിങ്ങളുടെ എല്ലാവരുടെയും പേരില്‍ ഇവിടെ അബുദാബിയില്‍ ഒരു ക്ഷേത്രം പണിയണമെന്ന ആശയം ഞാന്‍ നിര്‍ദ്ദേശിച്ചപ്പോള്‍, ഒരു നിമിഷം പോലും പാഴാക്കാതെ അദ്ദേഹം ഉടന്‍ തന്നെ പറഞ്ഞു. 'നിങ്ങള്‍ ചൂണ്ടി്ക്കാട്ടുന്ന ഭൂമി ഞാന്‍ തരാം.' എന്നു പോലും അദ്ദേഹം പറഞ്ഞു. ഇപ്പോഴിതാ അബുദാബിയിലെ ഈ മഹത്തായ ക്ഷേത്രത്തിന്റെ ഉദ്ഘാടനത്തിന് ചരിത്രപരമായ സമയം സമാഗതമായിരിക്കുന്നു.

സുഹൃത്തുക്കളേ,

ഭാരതവും യുഎഇയും തമ്മിലുള്ള സൗഹൃദം ഭൂമിയിലും ബഹിരാകാശത്തും അഭൂതപൂര്‍വമായ ഉയരത്തിലെത്തുകയാണ്. അന്താരാഷ്ട്ര ബഹിരാകാശ നിലയത്തില്‍ 6 മാസം ചെലവഴിച്ച ആദ്യ എമിറാത്തി ബഹിരാകാശ സഞ്ചാരിയായ സുല്‍ത്താന്‍ അല്‍ നെയാദിയെ ഭാരതത്തിന് വേണ്ടി ഞാന്‍ അഭിനന്ദിക്കുന്നു. അന്താരാഷ്ട്ര യോഗ ദിനത്തിലും സ്വാതന്ത്ര്യ ദിനത്തിലും ബഹിരാകാശത്ത് നിന്ന് ഭാരതത്തിന് ആശംസകള്‍ അയച്ചതിന് ഞാന്‍ അദ്ദേഹത്തിന് നന്ദി പറയുന്നു.

സുഹൃത്തുക്കളേ,

ഭാരതവും യുഎഇയും തമ്മിലുള്ള ബന്ധം ഇരുപത്തിയൊന്നാം നൂറ്റാണ്ടിന്റെ ഈ മൂന്നാം ദശകത്തില്‍ അഭൂതപൂര്‍വമായ ഉയരങ്ങളിലെത്തുകയാണ്. നമ്മള്‍ പരസ്പരം പുരോഗതിയില്‍ പങ്കാളികളാണ്. നമ്മുടെ ബന്ധം കഴിവ്, പുതുമ, സംസ്‌കാരം എന്നിവയെ അടിസ്ഥാനമാക്കിയുള്ളതാണ്. അടുത്ത കാലത്തായി, എല്ലാ ദിശകളിലും ഞങ്ങള്‍ ഞങ്ങളുടെ ബന്ധത്തിലേക്ക് പുതിയ ഊര്‍ജ്ജം പകര്‍ന്നിട്ടുണ്ട്. കൈകോര്‍ത്ത് ഞങ്ങള്‍ ഒരുമിച്ച് മുന്നേറി. ഇന്ന് ഭാരതത്തിന്റെ മൂന്നാമത്തെ വലിയ വ്യാപാര പങ്കാളിയാണ് യുഎഇ. ഇന്ന് ഭാരതത്തിന്റെ ഏഴാമത്തെ വലിയ നിക്ഷേപകനാണ് യുഎഇ. സുഗമമായ ജീവിതത്തിലും ബിസിനസ്സ് ചെയ്യാനുള്ള എളുപ്പത്തിലും നമ്മുടെ രണ്ട് രാജ്യങ്ങളും കാര്യമായി സഹകരിക്കുന്നുണ്ട്. ഇന്ന് നമ്മള്‍ ഒപ്പുവെച്ച കരാറുകള്‍ ഈ പ്രതിബദ്ധതയെ കൂടുതല്‍ മുന്നോട്ട് കൊണ്ടുപോകുന്നു. സാമ്പത്തിക സംവിധാനങ്ങളും ഞങ്ങള്‍ സമന്വയിപ്പിക്കുന്നു. സാങ്കേതികവിദ്യയിലും നൂതനത്വത്തിലും ഭാരതവും യുഎഇയും തമ്മിലുള്ള പങ്കാളിത്തം തുടര്‍ച്ചയായും ശക്തമായും വളരുകയാണ്.

സുഹൃത്തുക്ക​ളേ,

സാമൂഹികവും സാംസ്‌കാരികവുമായ ബന്ധങ്ങളുടെ കാര്യത്തില്‍ ഭാരതവും യുഎഇയും കൈവരിച്ച നേട്ടങ്ങള്‍ ലോകത്തിന് തന്നെ മാതൃകയാണ്. ഭാഷാ മേഖലയിലും ഇരു രാജ്യങ്ങളും എത്രമാത്രം അടുത്താണെന്ന് എന്റെ യുഎഇ സുഹൃത്തുക്കളോട് പറയാനും ഞാന്‍ ആഗ്രഹിക്കുന്നു. അറബിയില്‍ കുറച്ച് വാചകങ്ങള്‍ സംസാരിക്കാന്‍ ഞാന്‍ ശ്രമിക്കട്ടെ -

“अल हिंद वल इमारात, बी-कलम अल ज़मान, वल किताब अद्दुनिया. नक्तुबु, हिसाब ली मुस्तकबल अफ़दल. व सदाका बयिना, अल हिंद वल इमारात हिया, सरवतना अल मुश्तरका. फ़िल हक़ीका, नहनु, फ़ी बीदएया, साईदा ली मुस्तकबल जईईदा !!!

അറബിയില്‍ സംസാരിക്കാനാണ് ഞാന്‍ ശ്രമിച്ചത്. എന്റെ ഉച്ചാരണത്തില്‍ എന്തെങ്കിലും തെറ്റുകള്‍ ഉണ്ടെങ്കില്‍ എന്റെ യുഎഇ സുഹൃത്തുക്കളോട് ഞാന്‍ ക്ഷമ ചോദിക്കുന്നു. ഞാന്‍ പറഞ്ഞത് മനസ്സിലാകാത്തവര്‍ക്ക്, ഞാന്‍ അതിന്റെ അര്‍ത്ഥവും വിശദീകരിക്കട്ടെ.  ഭാരതവും യുഎഇയും കാലത്തിന്റെ തൂലിക ഉപയോഗിച്ച് ലോകമാകുന്ന പുസ്തകത്തില്‍ മെച്ചപ്പെട്ട ഒരു വിധി രചിക്കുകയാണ് എന്നാണ് അറബിയില്‍ ഞാന്‍ പറഞ്ഞതിന്റെ അര്‍ത്ഥം. ഭാരതവും യുഎഇയും തമ്മിലുള്ള സൗഹൃദം നാം പങ്കുവയ്ക്കുന്ന സമ്പത്താണ്. വാസ്തവത്തില്‍, നാം ഒരു മികച്ച ഭാവിയ്ക്ക് തുടക്കം കുറിക്കുകയാണ്. ഇപ്പോള്‍ ചിന്തിക്കുമ്പോള്‍ - 'കലം' (പേന), 'കിതാബ്' (പുസ്തകം), 'ദുനിയ' (ലോകം), 'ഹിസാബ്' (കണക്ക്), 'സമീന്‍' (ഭൂമി) എന്നിവ ഭാരതത്തില്‍ എത്ര എളുപ്പത്തിലാണ് സംസാരിക്കുന്നത്. എങ്ങനെയാണ് ഈ വാക്കുകള്‍ അവിടെ എത്തിയത്? ഈ ഗള്‍ഫ് മേഖലയില്‍ നിന്ന് തന്നെ! നമ്മുടെ ഇരു രാജ്യങ്ങളും തമ്മിലുള്ള ബന്ധം ആയിരകണക്കിന് വര്‍ഷങ്ങള്‍ നീണ്ടതാണ്. ഈ ബന്ധം അനുദിനം അഭിവൃദ്ധി പ്രാപിക്കുമെന്ന് ഭാരതം പ്രതീക്ഷിക്കുന്നു.

സുഹൃത്തുക്കളേ,

നൂറുകണക്കിന് വിദ്യാര്‍ത്ഥികള്‍ ഇപ്പോള്‍ ഈ സ്റ്റേഡിയത്തില്‍ ഉണ്ടെന്ന് എനിക്ക് മനസിലാക്കാന്‍ കഴിഞ്ഞു. നിലവില്‍ യുഎഇയിലെ ഇന്ത്യന്‍ സ്‌കൂളുകളില്‍ 1.25 ലക്ഷത്തിലധികം വിദ്യാര്‍ഥികള്‍ പഠിക്കുന്നുണ്ട്. ഈ യുവ സുഹൃത്തുക്കള്‍ ഭാരതത്തിന്റെയും യുഎഇയുടെയും അഭിവൃദ്ധിയില്‍ പങ്കാളികളാകാന്‍ പോകുന്നു. ബഹുമാനപ്പെട്ട ഷെയ്ഖ് മുഹമ്മദ് ബിന്‍ സായിദിന്റെ പിന്തുണയോടെ, ഐഐടി ഡല്‍ഹിയുടെ അബുദാബി ക്യാമ്പസിലെ മാസ്റ്റര്‍ കോഴ്സ് കഴിഞ്ഞ മാസം ഉദ്ഘാടനം ചെയ്തു. സെന്‍ട്രല്‍ ബോര്‍ഡ് ഓഫ് സെക്കന്‍ഡറി എജ്യുക്കേഷന്റെ (സിബിഎസ്ഇ) ഓഫീസും ദുബായില്‍ ഉടന്‍ തുറക്കാന്‍ പോകുന്നു. ഇവിടുത്തെ ഇന്ത്യന്‍ സമൂഹത്തിന് മികച്ച വിദ്യാഭ്യാസം നല്‍കാന്‍ ഈ സ്ഥാപനങ്ങള്‍ സഹായിക്കുമെന്ന് ഞാന്‍ വിശ്വസിക്കുന്നു.

സുഹൃത്തുക്കളേ,

ഇന്ന് ഓരോ ഇന്ത്യക്കാരന്റെയും ലക്ഷ്യം 2047-ഓടെ ഭാരതത്തെ വികസിത രാഷ്ട്രമാക്കുക എന്നതാണ്. ഏത് രാജ്യമാണ് അതിവേഗം വളരുന്ന സമ്പദ്‌വ്യവസ്ഥ? അത് നമ്മുടെ ഭാരതമാണ്! ഏറ്റവും കൂടുതല്‍ സ്മാര്‍ട്ട്ഫോണ്‍ ഡാറ്റ ഉപയോഗിക്കുന്ന രാജ്യം ഏതാണ്? അത് നമ്മുടെ ഭാരതമാണ്! ആഗോള ഫിന്‍ടെക് സ്വീകരണ നിരക്ക് ഏറ്റവും കൂടുതലുള്ള രാജ്യം ഏതാണ്? അത് നമ്മുടെ ഭാരതമാണ്! ഏറ്റവും കൂടുതല്‍ പാല്‍ ഉല്‍പ്പാദിപ്പിക്കുന്ന രാജ്യം ഏതാണ്? അത് നമ്മുടെ ഭാരതമാണ്! ഇന്റര്‍നെറ്റ് ഉപയോക്താക്കളുടെ കാര്യത്തില്‍ രണ്ടാം സ്ഥാനത്തുള്ള രാജ്യം ഏതാണ്? അത് നമ്മുടെ ഭാരതമാണ്! ലോകത്തിലെ ഏറ്റവും വലിയ രണ്ടാമത്തെ മൊബൈല്‍ നിര്‍മ്മാതാക്കളായ രാജ്യം ഏതാണ്? അത് നമ്മുടെ ഭാരതമാണ്! ലോകത്തിലെ ഏറ്റവും വലിയ മൂന്നാമത്തെ സംരംഭക ആവാസവ്യവസ്ഥയുള്ള രാജ്യം ഏതാണ്? അത് നമ്മുടെ ഭാരതമാണ്! ആദ്യ ശ്രമത്തില്‍ തന്നെ ചൊവ്വയില്‍ എത്തിയ രാജ്യം ഏത്? അത് നമ്മുടെ ഭാരതമാണ്! ചന്ദ്രന്റെ ദക്ഷിണധ്രുവത്തില്‍ പതാക സ്ഥാപിച്ച രാജ്യം ഏത്? അത് നമ്മുടെ ഭാരതമാണ്! നൂറ് കണക്കിന് ഉപഗ്രഹങ്ങള്‍ ഒറ്റയടിക്ക് അയച്ച് റെക്കോര്‍ഡ് സ്ഥാപിച്ച രാജ്യം ഏതാണ്? അത് നമ്മുടെ ഭാരതമാണ്! സ്വന്തമായി 5 ജി സാങ്കേതികവിദ്യ വികസിപ്പിക്കുകയും ഏറ്റവും വേഗത്തില്‍ പുറത്തിറക്കുകയും ചെയ്ത രാജ്യം ഏതാണ്? അത് നമ്മുടെ ഭാരതമാണ്!

സുഹൃത്തുക്കളേ,

ഭാരതത്തിന്റെ നേട്ടങ്ങൾ ഓരോ ഇന്ത്യക്കാരന്റെയും നേട്ടങ്ങളാണ്. വെറും 10 വർഷത്തിനുള്ളിൽ, ലോകത്തിലെ പതിനൊന്നാമത്തെ വലിയ സമ്പദ്‌വ്യവസ്ഥയിൽ നിന്ന് അഞ്ചാമത്തെ വലിയ സമ്പദ്‌വ്യവസ്ഥയിലേക്ക് ഭാരതം മാറിയിരിക്കുന്നു. നിങ്ങൾക്കറിയാവുന്നത് പോലെ, ഓരോ ഇന്ത്യക്കാരന്റെയും കഴിവുകളിൽ എനിക്ക് അപാരമായ വിശ്വാസമുണ്ട്. ഈ ആത്മവിശ്വാസത്തിന്റെ അടിസ്ഥാനത്തിലാണ് മോദിയും ഉറപ്പ് നൽകിയത്. മോദിയുടെ ഉറപ്പ് അറിയാമോ? തന്റെ മൂന്നാം കാലയളവിൽ ഭാരതത്തെ മൂന്നാമത്തെ വലിയ സമ്പദ്‌വ്യവസ്ഥയാക്കുമെന്ന് മോദി ഉറപ്പുനൽകിയിട്ടുണ്ട്. മോദിയുടെ ഉറപ്പ് എന്നാൽ പൂർത്തീകരണത്തിന്റെ ഉറപ്പ് എന്നാണ്. ജനങ്ങളുടെ ജീവിത നിലവാരം ഉയർത്തുന്നതിനും അവരുടെ പ്രശ്നങ്ങൾ കുറയ്ക്കുന്നതിനുമായി നമ്മുടെ ഗവണ്മെന്റ് തുടർച്ചയായി പ്രവർത്തിക്കുന്നു. നാല് കോടിയിലധികം കുടുംബങ്ങൾക്ക് ഞങ്ങൾ ഭവനങ്ങൾ നൽകി. 10 കോടിയിലധികം കുടുംബങ്ങൾക്ക് ഞങ്ങൾ കുടിവെള്ള കണക്ഷനുകൾ നൽകിയിട്ടുണ്ട്. 50 കോടിയിലധികം പേരെ ഞങ്ങൾ ബാങ്കിംഗ് സംവിധാനവുമായി ബന്ധിപ്പിച്ചു. 50 കോടിയിലധികം പേർക്ക് 5,00,000 രൂപയുടെ സൗജന്യ ചികിത്സ ഞങ്ങൾ ലഭ്യമാക്കിയിട്ടുണ്ട്. ഗ്രാമീണ മേഖലയിലെ ജനങ്ങൾക്ക് ചികിത്സ ലഭിക്കുന്നതിന് ഒരു പ്രശ്നവുമില്ലെന്ന് ഉറപ്പുവരുത്തുന്നതിനായി ഞങ്ങൾ 1.5 ലക്ഷത്തിലധികം ആയുഷ്മാൻ ആരോഗ്യ മന്ദിരങ്ങൾ നിർമ്മിച്ചു.

സുഹൃത്തുക്കളേ,

ഈയിടെ ഭാരതം സന്ദർശിച്ച നിങ്ങളിൽ പലർക്കും ഭാരതം എത്ര വേഗത്തിലാണ് ഇക്കാലത്ത് മാറിക്കൊണ്ടിരിക്കുന്നതെന്ന് അറിയാം. ഇന്ന് ഭാരതം ആധുനിക അതിവേഗ പാതകൾ നിർമ്മിക്കുന്നു. ഇന്ന് ഭാരതം പുതിയ വിമാനത്താവളങ്ങൾ നിർമ്മിക്കുന്നു. ഇന്ന് ഭാരതം ആധുനിക റെയിൽവേ സ്റ്റേഷനുകൾ നിർമ്മിക്കുകയാണ്. ഇന്ന്, ഭാരതത്തിന്റെ സ്വത്വം രൂപപ്പെടുന്നത് പുതിയ ആശയങ്ങളാലും പുതിയ കണ്ടുപിടുത്തങ്ങളാലും ആണ്. ഇന്ന് ഭാരതത്തെ തിരിച്ചറിയുന്നത് വൻകിട അടിസ്ഥാനസൗകര്യ വികസന പദ്ധതികളിലൂടെയാണ്. ഇന്ന്, ഭാരതത്തിന്റെ സ്വത്വം ഊർജ്ജസ്വലമായ ഒരു വിനോദസഞ്ചാര കേന്ദ്രമായി വികസിച്ചുകൊണ്ടിരിക്കുന്നു. ഇന്ന്, ഭാരതത്തിന്റെ സ്വത്വം ഒരു പ്രധാന കായിക ശക്തിയായി സ്ഥാപിക്കപ്പെടുകയാണ്. ഇതൊക്കെ കേൾക്കുമ്പോൾ നിങ്ങളിൽ അഭിമാനം നിറയും, അല്ലേ?

സുഹൃത്തുക്കളേ,

ഭാരതത്തിൽ നടക്കുന്ന ഡിജിറ്റൽ വിപ്ലവം നിങ്ങൾക്കെല്ലാം സുപരിചിതമാണ്. ഡിജിറ്റൽ ഇന്ത്യയുടെ പ്രശംസ ലോകമെമ്പാടും അലയടിക്കുകയാണ്. യുഎഇയിലുള്ള ഞങ്ങളുടെ എല്ലാ സഹപ്രവർത്തകർക്കും ഇതിന്റെ പ്രയോജനം ലഭിക്കുന്നുണ്ടെന്ന് ഉറപ്പാക്കാൻ ഞങ്ങൾ ശ്രമിക്കുന്നു. ഞങ്ങൾ ഞങ്ങളുടെ RuPay കാർഡ് സ്റ്റാക്ക് യുഎഇയുമായി പങ്കിട്ടു. ഇത് ആഭ്യന്തര കാർഡ് സംവിധാനം വികസിപ്പിക്കുന്നതിന് യുഎഇയെ സഹായിച്ചു. ഭാരതത്തിന്റെ പിന്തുണയോടെ വികസിപ്പിച്ച കാർഡ് സംവിധാനത്തിന് യുഎഇ നൽകിയ പേര് എന്താണെന്ന് നിങ്ങൾക്കറിയാമോ? UAE ഇതിന് "ജീവൻ" എന്ന് പേരിട്ടു. എത്ര മനോഹരമായ പേരാണ് യുഎഇ നൽകിയത്!!!

സുഹൃത്തുക്കളേ,

താമസിയാതെ യുഎഇയിലും യുപിഐ അവതരിപ്പിക്കും. ഇത് യുഎഇയും ഇന്ത്യൻ അക്കൗണ്ടുകളും തമ്മിൽ തടസ്സമില്ലാത്ത പണമിടപാടുകൾ സാധ്യമാക്കും. ഇതോടെ, ഭാരതത്തിലെ നിങ്ങളുടെ കുടുംബാംഗങ്ങൾക്ക് കൂടുതൽ എളുപ്പത്തിൽ പണം അയയ്ക്കാൻ കഴിയും.

സുഹൃത്തുക്കളേ,

ഭാരതത്തിന്റെ വർദ്ധിച്ചുവരുന്ന കഴിവുകൾ ലോകത്ത് സ്ഥിരതയ്ക്കും സമൃദ്ധിക്കും വേണ്ടിയുള്ള പ്രത്യാശ പകർന്നു. വിശ്വസനീയമായ ആഗോള ക്രമം സ്ഥാപിക്കുന്നതിൽ ഭാരതത്തിന് സജീവമായ പങ്ക് വഹിക്കാൻ കഴിയുമെന്ന് ലോകം വിശ്വസിക്കുന്നു. ഇന്ന് ഭാരതവും യുഎഇയും ഒരുമിച്ച് ഈ വിശ്വാസത്തെ ശക്തിപ്പെടുത്തുന്നതിൽ എനിക്ക് സന്തോഷമുണ്ട്. ഭാരതം ജി20 ഉച്ചകോടി വിജയകരമായി ആതിഥേയത്വം വഹിച്ചതും നിങ്ങൾ എല്ലാവരും കണ്ടതാണ്. ഈ ഉച്ചകോടിയിൽ പങ്കാളിയായി ഞങ്ങൾ യുഎഇയെയും ക്ഷണിച്ചു. അത്തരം ശ്രമങ്ങൾ നമ്മുടെ തന്ത്രപരമായ പങ്കാളിത്തത്തെ പുതിയ ഉയരങ്ങളിലേക്ക് കൊണ്ടുപോകുന്നു. ഇന്ന് ലോകം ഭാരതത്തെ കാണുന്നത് ഒരു ‘വിശ്വ ബന്ധു’ (ആഗോള സുഹൃത്ത്) ആയിട്ടാണ്. ഇന്ന്, ലോകത്തിലെ എല്ലാ പ്രധാന വേദികളിലും ഭാരതത്തിന്റെ ശബ്ദം കേൾക്കുന്നു. പ്രതിസന്ധികൾ ഉണ്ടാകുമ്പോഴെല്ലാം, ആദ്യം എത്തിച്ചേരുന്ന രാജ്യങ്ങളിൽ ഭാരതത്തിന്റെ പേരും ഉൾപ്പെടുന്നു. ഇന്നത്തെ കരുത്തുറ്റ ഭാരതം ഓരോ ചുവടുവയ്പ്പിലും അതിന്റെ ജനങ്ങളോടൊപ്പം തോളോട് തോൾ ചേർന്ന് നിൽക്കുന്നു. കഴിഞ്ഞ 10 വർഷമായി, വിദേശത്ത് താമസിക്കുന്ന ഇന്ത്യക്കാർക്ക് പ്രശ്‌നങ്ങൾ നേരിടുമ്പോഴെല്ലാം ഇന്ത്യാ ഗവണ്മെന്റ് അതിവേഗം പ്രവർത്തിച്ചത് നിങ്ങൾ കണ്ടു. യുക്രെയ്ൻ, സുഡാൻ, യെമൻ തുടങ്ങി വിവിധ ഇടങ്ങളിൽ പ്രതിസന്ധികളിൽ കുടുങ്ങിപ്പോയ ആയിരക്കണക്കിന് ഇന്ത്യക്കാരെ ഞങ്ങൾ സുരക്ഷിതമായി മാറ്റി ഭാരതത്തിലേക്ക് തിരികെ കൊണ്ടുവന്നു. ലോകത്തിന്റെ വിവിധ ഭാഗങ്ങളിൽ താമസിക്കുന്ന ഇന്ത്യക്കാരെ സഹായിക്കാൻ ഗവണ്മെന്റ് അശ്രാന്തം പ്രവർത്തിക്കുന്നു.

സുഹൃത്തുക്കളേ,

ഭാരതവും യുഎഇയും ചേർന്ന് 21-ാം നൂറ്റാണ്ടിന് പുതിയ ചരിത്രം രചിക്കുന്നു. സുഹൃത്തുക്കളേ, നിങ്ങളെല്ലാവരും ഈ ചരിത്രത്തിന്റെ സുപ്രധാന അടിത്തറയാണ്. നിങ്ങൾ ഇവിടെ നടത്തുന്ന കഠിനാധ്വാനം ഭാരതത്തിനും ഊർജം പകരുന്നു. ഭാരതവും യുഎഇയും തമ്മിലുള്ള വികസനവും സൗഹൃദവും ശക്തിപ്പെടുത്തുന്നത് തുടരുക. ഈ വിശ്വാസത്തോടെ ഒരിക്കൽ കൂടി ഈ മഹത്തായ സ്വീകരണത്തിന് എല്ലാവർക്കും ഞാൻ നന്ദി പറയുന്നു! എന്നോടൊപ്പം പറയൂ: ഭാരത് മാതാ കീ—ജയ്! ഭാരത് മാതാ കീ —ജയ്! ഭാരത് മാതാ കീ —ജയ്!

എനിക്കും നിങ്ങൾക്കും ഇടയിൽ ഒരുപാട് ദൂരമുണ്ട്, അതിനാൽ ഞാൻ നിങ്ങളെ കാണാൻ വരുന്നു. എന്നാൽ നിങ്ങളോട് എന്റെ അഭ്യർത്ഥന എന്താണെന്നാൽ, നിങ്ങൾ എവിടെയാണോ അവിടെ തന്നെ തുടരണം, അങ്ങനെ എനിക്ക് നിങ്ങളെ ശരിയായി കാണാൻ കഴിയും. അതുകൊണ്ട്, നിങ്ങൾ എന്നെ സഹായിക്കുമല്ലോ?

ഭാരത് മാതാ കീ —ജയ്!

ഭാരത് മാതാ കീ —ജയ്!

വളരെ നന്ദി.

NS