U Myntri Rangbah Duh, Narendra Modi u la plie paidbah, aiti sha ka ri bad buh maw nongrim ia ki projek ka roi ka par kiba kot sha palat T 17,500 klur ha Jorhat, Assam mynta ka sngi. Ki projek mynta ka sngi ki kynthup ia kito kiba iadei bad ka koit ka khiah, ka umphniang bad gas, kam rel bad ki iing.

Ha ka jingai jingkren jong u, u Myntri Rangbah Duh u la ai jingsngewnguh ia ki briew kiba la wan iashim bynta bad u la ong ruh ba 2 lak ngut ki briew ki la wan na ki bynta bapher bapher jong ka jylla ban iashim bynta ha kane ka prokram. U Modi u la peit thuh ruh ia ka jingthang da ki hajar tylli ki diya da ki briew ka Kolaghat bad u la ong ba ka jingieid jong ki briew ka dei ka bor kaba khlain tam jong u. U la pynskhem shuh shuh ia ka jingpyntyllun shakhmat ia ka roi ka par jong ka Assam da kaba buh maw nongrim bad jingaiti sha ka ri ia ki projek ka roi ka par kiba kumba T 17,500 klur mynta ka sngi kiba iadei bad ka koit ka khiah, ki iing bad ka petroleum.

Ha ka jingkren shaphang ka jingleit jong u sha ka Kaziranga National Park, u Myntri Rangbah Duh u la ong ba kane ka dei ka national park kaba kyrpang bad ka jaka kaba dei kyrpang ia ki khla bad u la kdew sha ka jingkhring jong ka jingdon jingem ka mariang ha kane ka UNESCO World Heritage Site. “70% ki single-horned rhino ki don ha Kaziranga”, u la ong. U la kren shaphang ka jingiohi ia ki mrad khlaw kum ki skei, ki khla, ki hati bad ki muid. U Myntri Rangbah u la batai kumno ki kyndat ki la don jingma ban duh jait namar ka jingieh bein bad ka jingiatreilang bad ki riewsniew bad u la kdew sha ka jingpyniap ia 27 tylli ki kyndat ha ka shi snem kum ka nuksa jong kane. Kane ka la hiar sha ka zero ha u 2022 lyngba ki sienjam jong ka Sorkar. Ha ka jingai khublei ia ki briew jong ka Assam ha ka jingdap 50 snem ka Kaziranga, u Myntri Rangbah Duh u la kyntu ia ki briew ba kin leit sha kane ka national park.

U Myntri Rangbah Duh u la kren shaphang a jingpyllait paidbah ia u mot jong u Veer Lachit Borphukan mynta ka sngi bad u la ong, “U Veer Lachit Borphukan u long kum ka dak jong ka jingshlur bad ka jingskhem jingmut ka Assam”. U la kren ruh shaphang ka jingrakhe ia ka lyngkhuh sngi kha ba 400 kaba la long ha u snem 2002 ha New Delhi ha kaba u la nguh ia une u riewshlur.

“Ka roi ka par “Vikas bhi aur Virasat Bhi’ ha ryngkat ka deiriti ka dei ka mantra jong ka Sorkar kaba ar bynta ki kor jong ngi,” la ong u Myntri Rangbah Duh. U la ong ba ka Assam ka la jam shaphrang ha ki jingdon jingem, ka koit ka khiah bad ki kam bording. Ki jingdon jingem ha ka koit ka khiah kum ka AIIMS, Tinsukia Medical College, Shiv Sagar Medical College bad Cancer Hospital ha Jorhat kin pynkylla ia ka Assam sha ka jaka pdeng jong ki kam ai jingsumar ha ka thain shatei lammihngi, u la ong.

U Myntri Rangbah Duh u la kren ruh shaphang ka jingaiti sha ka ri ia ka Barauni - Guwahati Pipeline hapoh ka PM Urja Ganga Yojna. U la pynbna ba kane ka gas pipeling kan pyniasoh ia ka grid jong ka thain shatei lammihngi bad ka grid jong ka ri bad kan iarap ban pynpoi gas sha 30 lak tylli ki iing bad palat 600 tylli ki CNG station bad kane kan ai jingmyntoi ia ki briew na palat 30 tylli ki distrik ka Bihar, West Bengal bad Assam.

Ha ka jingkren shaphang ka jingplie ia ka jingpyniar ia ka Digboi Refinery bad Guwahati Refinery, u Myntri Rangbah Duh u la ong ba ki Sorkar mynshuwa kim shym la pynsngap ia ka jingdawa jong ki briew ban pyniar ia ka bor treikam jong ki refinery ha Assam. U la ong ba lyngba ki sienjam jong kane ka Sorkar mynta, ka bor treikam jong ki refinery ha Assam kan kiew arshah katba ka Numaligarh Refinery kan kiew lai shah. “Ka roi ka par jong kano kano ka jaka ka wan mar mar haba ki jing thmu ban wanrah ka roi ka par ki long kiba khlain,” u la bynrap.

U la kitbok kitrwiang ia ki 5.5 lak tylli ki longiing kiba la ioh ia ki iing thymmai ba bha mynta ka sngi. U la ong ba kine kim dei tang ki iing hynrei ki don ruh ia ka painkhana, ka gas connection, ka bording bad ka um kor. Haduh mynta, 18 lak tylli ki longiing ki la ioh kum kine ki iing, u la iathuh. U la ong ba u dap da ka jingkmen ba jan baroh kine ki iing ki don hapoh ka kyrteng jong ki longkmie.

U la ban jur halor ka jingkut jingmut ka Sorkar ban pynsuk ia ka jingim jong man ka longkmie ha Assam bad ban kyntiew ia ka jingkynshew pisa jong ki ha kaba u la kren ruh shaphang ka rai hynnin ka sngi ban pynduna ia ka bai tyndong gas da T 100 ha ka Women’s Day. Ki skhim kum ka Ayushman Card ruh ka ai jingmyntoi ia ki longkmie. Hapoh ka Jal Jeevan Mission, palat 50 lak ki iing ki la ioh ia ka um kor ha Assam. U la ban jur ruh ia ka jingkut jingmut jong u ban don 3 klur ngut ki Lakhpati Didi.

Ha ka jingkren shaphang ki jingpynkylla kiba la wan ha ka Assam hadien u snem 2014, u Myntri Rangbah Duh u la iathuh shaphang ka jingai ki hok na ka bynta ki jaka sha 2.5 lak ngut ki briew jong ka jylla ki bym don jaka puta bad ka jingpynioh ia ki kam bank na ka bynta 8 lak ngut ki briew kiba trei ha ki kper slasha kaba la plie lad ia ka jingpynpoi ia ki jingmyntoi na ki skhim Sorkar beit beit sha ki bank account jong ki. U Myntri Rangbah Duh u la ong ba kane ka la khan glut ki lad ki lynti jong ki briew kiba mushlia ha ki kam.

“Ka jingkyntiew ia ka thain shatei lammihngi ka long kaba donkam na ka bynta ka Viksit Bharat”, la ong u Myntri Rangbah Duh. “U Modi u khein ba baroh kawei ka thain shatei lammihngi ka dei ka longiing jong u. Ka dei namar kane ba ngi dang peit bniah ia ki projek ba la ieh teng da ki snem,” u la ong. U la kren shaphang ki projek kum ka jingkieng Saraighat, jingkieng Dhola-Sadiya, jingkieng Bogibeel, ka jingpyniar ia ka rel broad gauge shaduh sha them Barak, ka Multi-modal Logistics Park, Jogighopa, ar tylli ki jingkieng ba thymmai ha ka Wah Brahmaputra bad 18 tylli ki lad ka leit ka wan lyngba ki jaka shongum ha ka thain shatei lammihngi haba ianujor bad tang 1 ha Assam ha u snem 2014. U la ong ba kine ki projek ki la plie ia ki lad ba thymmai ha ka thain. U la kren ruh shaphang ka skhim UNNATI kaba thymmai bad kaba kham iar kaba la ioh jingmynjur ha ka jingiakynduh ba dang shu dep jong ka Kynhun Myntri. Ka Kynhun Myntri ka la kyntiew ruh ia ka MSP ia u ksai borni ka ban iarap ia ki nongrep ksai borni ha ka Jylla.

U Myntri Rangbah Duh u la ai jingsngewnguh ia ka jingied jong ki briew bad u la ong ba man u briew jong ka ri u dei u bahaiing jong u. “Ka jingied ba k briew ki don ia u Modi kam dei tang namar ba u ngeit ba ki 140 klur ngut ki briew jong ka ri ki dei ki bahaiing jong u, hynrei ka dei ruh namar ba u ai jingshakri ia ki bad step bad miet,” la ong u Myntri Rangbah Duh da kaba ong ruh ba kane ka porkram mynta ka sngi ka pyni ia kane ka jingngeit. U la pynkut da kaba kitbok kitrwiang ia ki briew na ka bynta ki projek ka roi ka par kiba mynta ka sngi hapdeng ki jingsawa jong ka ‘Bharat Mata ki Jai’ ha kane ka sngi.

U Myntri Rangbah ka jylla Assam, Dr Himanta Biswa Sarma bad u Myntri Sorkar Pdeng, Sarbananda Sonowal ki la iadon lang ha kane ka sngi ha ryngkat kiwei kiwei.

Ka nongrim

U Myntri Rangbah Duh u la buh maw nongrim ia katto katne ki projek hapoh ka skhim Prime Minister’s Development Initiative for North Eastern Region (PM-DevINE) ba kynthup ka Medical College & Hospital ha Sivasagar bad ka Hemato-Lymphoid center ha Guwahati. U la buh maw nongrim ruh ia ki projek ba kongsan ha ki kam umphniang bad gas ba kynthup ia ka jingpynkiew ia ka bor treikam jong ka Digboi Refinery na ka 0.65 sha ka 1 MMTPA (million metric tonnes per annum); Guwahati Refinery Expansion (1.0 sha ka 1.2 MMTPA) ha ryngkat ka jingbuh ia ka Catalytic Reforming Unit (CRU); ka jingkyntiew ia ki jingai jingshakri ha ka Betkutchi (Guwahati) Terminal: Indian Oil Corporation Limited, ha ryngkat kiwei kiwei.

U Myntri Rangbah Duh u la aiti sha ka ri ia ki projek ba kongsan kum ka Medical College bad Hospital ba thymmai ha Tinsukia; ka Barauni - Guwahati Pipeline kaba 718 km (shi bynta ka Pradhan Mantri Urja Ganga Project) kaba la tei ha ka jinglut jingsep kaba kumba T 3,992 klur ha ryngkat kiwei kiwei. U Myntri Rangbah Duh u la pyllait paidbah ruh ia kumba 5.5 lak tylli ki iing hapoh ka Pradhan Mantri Awas Yojana - Gramin (PMAY-G), ba la tei ha ka jinglut kaba kumba T.8,450 klur;

U Myntri Rangbah Duh u la aiti sha ka ri ruh ia ki projek surok bah kiba tam ia ka T 1300 klur ha Assam ba kynthup ia ka bynta Dhupdhara-Chhaygaon (shi bynta ka New Bongaigaon – Guwahati Via Goalpara Doubling Project) bad ka bynta New Bongaigaon – Sorbhog (shi bynta ka New Bongaigaon – Agthori Doubling Project).