U Myntri Rangbah duh, Narendra Modi u la plie bad buh maw nongrim ia ki projek bapher bapher ba iadei bad ka leit ka wan ba shongdor T. 15,400 klur ha Kolkata mynta ka sngi. Ki projek ka roi ka par ba iadei bad ka leit ka wan ha ki jaka sor ki kynthup ia ka lynti Metro bad ka Regional Rapid Transit System (RRTS).

U Myntri Rangbah duh u la peit bniah ia baroh ki projek ba iadei bad ki metro bad u la shong ia ka rel metro ha ka lynti Esplanade - Howrah Maidan, ka Metro hapoh um kaba nyngkong jong ka India ha Kolkata. U la iakren ruh bad ki shramik bad ki khynnah skul ha kane ka jingshong rel metro jong u.

Ha ki post ha ka X, u Myntri Rangbah duh u la ong:

“Ka jingshong rel metro kalong kaba sah jingkynmaw bad nga ai khublei ia ka kynhun jong kine ki khynnah samla bad kito kiba trei ha kane ka projek. Ngi la iaid lyngba ruh ia ka tunnel hapoh ka wah Hooghly.”

“Kalong ka sngi kaba kyrpang bha ia ki briew jong ka Kolkata haba la kyntiew ia ki kam metro jong ka nongbah. Yn kyntiew ia ki lad ka leit ka wan bad yn pynduna ia ka jingkhapngiah. Kalong ka por kaba sngewsarong ba ka lynti metro Howrah Maidan-Esplanade ka don ia ka metro transportation tunnel kaba iaid napoh um ha ka sien ba nyngkong hapoh kano kano ka wah ha ka ri jong ngi.”

“Ki por ba sah jingkynmaw na Kolkata Metro. Nga ai nguh ia ka Jan Shakti bad ngan iai ai ka jingshakri ia ki da ka bor ba thymmai.”

U Lat ka jylla West Bengal, u C V Ananda Bose u la iadonlang ha kane ka jingialang lem bad kiwei kiwei.

Ka Nongrim

Da ka jingphaikhmat ban kyntiew ia ki lad ki lynti ban pynthikna ka jingsuk ka leit ka wan ha ki jaka sor, u Myntri Rangbah duh u la plie paidbah ia ka bynta ka lynti metro Howrah Maidan - Esplanade jong ka Kolkata Metro, ka Kavi Subhash - Hemanta Mukhopadhyay Metro section, Taratala - Majerhat Metro section (shi bynta jong ka Joka- Esplanade line); Pune Metro na Ruby Hall Clinic sha lynti Ramwadi; Kochi Metro Rail Phase I Extension project (Phase IB) na SN Junction Metro station sha Tripunithura Metro station; ka lynti jong ka Agra Metro na Taj East Gate sha Mankameshwar; bad Duhai-Modinagar (North) section jong ka Delhi-Meerut RRTS Corridor. U la pyllait ruh ia ki jingshakri jong ki rel ha kine ki bynta. U Myntri Rangbah duh u la buh maw nongrim ruh na ka bynta ban pynheh ia ka Pune Metro Rail project Phase 1 hapdeng ka Pimpri Chinchwad Metro-Nigdi.

Kine ki bynta kin iarap ban pynduna ka jingkhapngiah ki surok bad wanrah ia ka leit ka wan kaba ryntih bad kaba jai jai. Ka lynti metro Howrah Maidan - Esplanade jong ka Kolkata Metro ka don ia ka transportation tunnel kaba nyngkong hapoh um. Ka Howrah Metro Station kadei a metro station kaba jylliew tam ha India. Kumjuh ruh, ka Majerhat Metro Station, ha Taratala - Majerhat Metro section kaba la plie paidbah mynta ka sngi, kadei ka Metro station kaba kham kyrpang ha ki lynti rel, ki platform bad nala. Ka bynta jong ka Agra Metro ba la plie paidbah mynta ka sngi kan kyntiew ia ka leit ka wah ha ki jaka jngoh kai. Ka RRTS section kan kyntiew ia ki kam ba iadei bad ka ioh ka kot ha NCR.

*****