U Myntri Sorkar Pdeng ba dei khmih ia ki tnat Communications, Railway bad Electronics & Information Technology, Ashwini Vaishnaw ha ka jingiadon lang u Myntri Khynnah ka Tnat Communication, Devusinh Chauhan u la plié ia ka ‘Digital Intelligence Platform (DIP)’ jong ka Tnat Communication ban wanrah ka jingiatreilangh jong kiba iadon bynta ban tehlakam ia ka jingpyndonkam bakla ia ki jingdon jingem Telecom na ka bynta ki kam beain cyber bad ki jingthok pisa bad ka ‘Chakshu (चक्षु)’ ha ka rynsan Sanchar Saathi (https://sancharsaathi.gov.in), ka sienjam ba prat lynti kiba pynkupbor ia ki briew ba kin ai jingtip shaphang ki jingsuba shaphang ki jingai jingtip kiba thmu ban thok ia ki briew.

Ha kane ka sngi, u Myntri u la ong ba ka Sorkar ka bteng ban shim ia ki sienjam ban tehlakam ia ki kam beain cyber hapoh ka projek Secure India ha ki lai tylli ki kyrdan – Ha ka Ri, ha ki kynhun bad ha ki briew. U la ong ba ka tnat Telecommunication ka la shim shibun ki sienjam ban ai jingtip khnang ba ki briew kin pyndonkam ia kine ki atiar ban pynbeit ia ki jingjynjar jong ki bad ruh ban iada ialade na ki kam beain cyber. U Vaishnaw u la kren shaphang ka rynsan “Sanchar Saathi” ha kaba iadei bad kane da kaba ong ba kane ka la iarap ban tehlakam ia kum kine ki kam. U Myntri u la ong ba mynta ha ryngkat ki ar tylli ki rynsan - DIP bad Chakshu, kine ki atiar kin kyntiew ia ka bor ban tehlakam ia ki jingma ia ka jingshngain ha ki kam cyber.

U Myntri Khynnah ka tnat Communication, Devusinh Chauhan u la iaroh ia ki jingpyrshang jong ka Tnat Telecommunication bad u la ong ba ka Tnat ka la pyndep shibun ki projek ban ialeh pyrshah ia ki jingma ia ka jingshngain ha ki kam cyber. Dang don shibun kine ki jait projek kiba dang iaid shakhmat ban peit ia ki jingma ba dang mih, u la ong.

U Telecom Secretary Dr. Neeraj Mittal, u la ong ba kine ki ar tylli ki rynsan ki dei sa kawei ka sienjam ban tehlakam ia ki jingma ha ki kam cyber ia ki jingdon jingem digital jong ki briew. U la ong ba kine ki atiar kin iarap ban tehlakam ia ki lad ban thok bad pyndonkam bakla ia ki lad iakren.

Digital Intelligence Platform (DIP):

Ka Digital Intelligence Platform (DIP) kaba la saindur da ka Tnat Telecommunication ka dei ka rynsan ba la pyniasoh lang ban ioh iasam jingtip mardor, bad ka jingiatreilang hapdeng kiba iadon bynta kum ki Telecom Service Provider (TSP), ki kynhun ba pyntreikam ia ka ain, ki bank bad ki jaka ba trei ha ki kam pisa, ki rynsan social media, ki jaka ba ai ia ki kot ki sla ba iadei bad ki ID, bad kiwei kiwei. Kane ka rynsan ka don jingtip ruh shaphang ki jingjia ba la lap ha kaba la pyndonkam bakla ia ki jingdon jingem telecom. Kane ka jingiasam jingtip kan iarap ia kiba iadon bynta ha ki kam ba ki peit.

Ka long ruh ka jaka pdeng jong ki jingkyntu jong ki briew ha ka rynsan Sanchar Saathi ban peit ia kiba iadon bynta ha ki kam.

Ka DIP ka dei kaba ki briew ki lah ban pyndonkam lyngba ki connection ba shngain bad la iasam ia ki jingtip katkum ki kam. Ki paidbah kim lah ban pyndonkam ia kane ka rynsan.

Ka Chakshu (चक्षु) ha ka rynsan Sanchar Saathi:

Ka Chakshu (चक्षु) ka dei ka bynta kaba thymmai tam ha ki jingai jingshakri na ka bynta ka bha ka miat jong ki briew kaba don ha ka rynsan Sanchar Saathi jong ka Tnat Telecommunication. Ka ‘Chakshu’ ka plié lad ia ki briew ba kin ai jingujor shaphang ka jingioh ia ki call, SMS lane WhatsApp kiba thmu ban thok ia ki kum ka jingpyntip ia ka jingkut ka KYC ne ka jingpynthymmai ia ka bank account / payment wallet / SIM / gas connection / electricity connection, sextortion, ka jingkam ba dei ki ophisar Sorkar / bahaiing ban phah pisa, ka jingpynduh ia baroh ki mobile number da ka Tnat Telecommunication bad kiwei kiwei.

Lada ki briew ki la dep shah thok, la ai jingmut ia ki ba kin ai jingujor ha ka cyber-crime helpline number 1930 lane ka website https://www.cybercrime.gov.in jong ka Sorkar India.

Ki jingai jingshakri ba la don lypa ha ka rynsan Sanchar Saathi (https://sancharsaathi.gov.in) 

1. Ban tip ia ki mobile connection ba la ai hapoh ka kyrteng ne ai jingujor shaphang ka mobile number ban pynkut noh kiba ym donkam shuh ne ki bym shym la shim da ki briew,
2. Ban ai jingtip shaphang ka jingshah tuh / jing jah ka mobile ban block ne buddien,
3. Ban peit ia ka jingshisha jong ka mobile haba thied ia ka mobile kaba thymmai / rim,
4. Ban ai jingtip shaphang ka jingioh ia ka call nabar ri na u mobile number napoh India,
5. Ban pynshisha ia ki jingtip shaphang ki wireline Internet Service Providers.

Ki jingseisoh jong kiwei kiwei ki sienjam jong ka Tnat:

Ka jingsdang ia ka DIP bad ‘Chakshu (चक्षु)’ ka pyni ia ka jingkut jingmut ka Tnat Telecommunication ban pynkupbor ia ki briew bad ban wanrah ia ka jingshngain ha ki kam digital. Da kaba pynshlur ia ka jingai jingtip bad ka jingshim ia ki sienjam pyrshah ki jingpyrshang ban thok ia ki briew, ka Tnat ka ieng skhem ban iada ia ka bha ka miat jong baroh ki briew jong ka ri.

********