ভারত মাতা কি – জয় !

ভারত মাতা কি – জয় !

গুজরাতকী রাজ্যপাল শ্রী অচার্য়া দেবব্রাত জি, গুজরাতকী চীফ মিনিস্তর শ্রী ভুপেন্দ্রভাই পতেল, কেন্দ্রগী মন্ত্রীমন্দলগী ঐগী মরুপ শ্রী পর্সোত্তম রুপালা, সংসদকী ঐগী মরুপ সি.আর পতিল, গুজরাত কোওপরেতিপ মিল্ক মার্কেত্তিং ফেদেরেসনগী চিয়ারমেন শ্রী শামাল বি পতেল অমসুং মফম অসিদা মশিং য়াম্না শরুক য়ারিবা ঐগী ইনাওশিং অমসুং ইচলশিং !

গুজরাতকী খুঙ্গংশিংদা লৌমীশিংনা চহি ৫০গী মমাঙদা থাখিবা উ চারা অমা ঙসি অচৌবা খোঙনাং পাম্বী অমা ওইরে। ঙসি অচৌবা উ পাম্বী অসিগী মশা-মরেশিং লৈবাক শীনবা থুংনা অমসুং মালেম শীনবা থুংনা শন্দোক্লে। গুজরাত কোওপরেতিপ মিল্ক মার্কেত্তিং ফেদেরেসনগী সনা ফুদোঙবা থৌরমদা ঐনা মীয়াম পুম্নমক য়াইফ-পাউজেল পীজরি। গুজরাতকী মিল্ক কম্মিতিশিংগা থবক তৌমিন্নরিবা মীওই খুদিংমক, নুপা খুদিংমক অমসুং নুপী খুদিংমকশু ঐনা নুংঙাইবা ফোঙদোকচরি। মসিগা লোয়ননা, দাইরি সেক্তরদা খ্বাইদগী চাউবা মরী লৈনবা ঐখোয়গী অতোপ্পা মরুপ অমা লৈরি, মহাকশু ঐনা ইকায়খুম্নবা উৎচরি। হায়রিবা মরী লৈনবশিং অদুদি ঐখোয়গী শা-ষনশিংনি। খোঙচৎ অসি মাইপাকহনবগীদমক ঐনা শা-ষনশিং ইকায়খুম্নবা উৎচরি। মখোয় য়াওদনা দাইরিক সেক্তর ওইথোক্লোই। মরম অদুনা, লৈবাক অসিগী শা-ষনশিংদা ঐনা ইকায়খুম্নবা উৎচরি।

ভারতনা নিংতম্বা ফংলবা মতুংদা তোঙান-তোঙানবা ব্রান্দ কয়া থোরক্লবশু, অমুলগুম্বা অমতা য়াওদে। অমুল অসি ভারতকী পাসুপালাকশিংগী থৌনাগী খুদম অমনি। অমুল হায়বগী ৱাহন্থোক্তি থাজবা, চাউখৎপা, মীয়াম শরুক য়াবা, লৌমীশিংগী ফিবম ফগৎহনবা অমসুং মতমগী মতুংইন্না তেক্নোলোজি ফগৎহনবা হায়বনি। অমুল অসি অত্মানির্ভর ভারতকী ইথিল অমনি, অমুল হায়বগী ৱাহন্থোক্তি অচৌবা মঙলানশিং, অচৌবা ৱারেপশিং অমসুং অচৌবা মাইপাকপশিং হায়বনি। ঙসিদি মালেমগী লৈবাক ৫০ হেন্না অমুলগী পোৎথোকশিং থাদোক্লে। মসিদা মিল্ক কোপরেতিপ কম্মিতি ১৮,০০০, লৌমী ৩৬,০০০গী নেতৱার্ক অমা য়াওরি অমসুং নোংমদা শঙ্গোম লিতর করোর ৩.৫ শেম-শারি অমসুং শা-ষন ব্রিদরশিংদা লুপা করোর ২০০ হেনবা ওনলাইন্দা পীখ্রে। লায়রবা শা-ষন ব্রিদরশিংগীদমক লুপ অসিনা পায়খৎলিবা অচৌবা থবকশিং অসি অমুল অমসুং মসিগী কো-ওপরেতিপশিংগী মপাঙ্গলনা ওইহনবনি, কোওপরেসনগী শক্তিনি।

 ইনাওশিং অমসুং ইচলশিং,

অশানবা মীয়েং অমগা লোয়ননা ৱারেপশিং লৌবনা কমদৌনা তুংগী মীরোলশিংগী মরাইবক হোঙহনবা ঙম্মী হায়বসি অমুলনা খুদম অমনি। ঙসিগী অমুলগী য়ুম্ফম অসি সাদার পতেলগী লমজিং মখাদা খেরা মিল্ক য়ুনিয়ন্দগী অমুক হৌরকখিবনি। মসি ঙসি ফাওবা সরকার অমসুং কোওপরেসনগী মরক্তা থবক তৌমিন্নবগী অফবা নমুনা অমা ওইরি। গুজরাত্তা কোওপরেতিপশিং পাকথোক-চাউথোরকপদগী গুজরাত কোওপরেতিপ মিল্ক মার্কেত্তিং ফেদেরেসন ওইরকখিবনি। মসি কোওপরেতিপশিং অমসুং সরকারগী মরক্তা থোং মান্ননা থবক তৌমিন্নবগী অচৌবা খুদম অমনি। অসিগুম্বা থবকশিংনা অসিনা মীওই করোর ৮ থবক পীদুনা মালেমদা খ্বাইদগী চাউবা শঙ্গোম পুথোকপা লৈবাক ওইহল্লে। হৌখিবা চহি ১০দা, শঙ্গোম পুথোকপা চাদা ৬০ হেনগৎলে অমসুং মীকোক অমদা শঙ্গোম শীজিন্নবা চাদা ৪০ রোম হেনগৎলে। মালেমগী ওইনা চাংচৎ অমদা চাদা ২ হেনগৎলিবা অসিগা চাংদম্নবদা ভারতকী দাইরি সেক্তর চহি অমদা চাদা ৬ হেনগৎলে।

মরুপশিং,

য়াম্না তোইনা খন্নদবা ভারতকী দাইরি সেক্তরগী অচৌবা শক্তম অমা লৈরি। ঙসিগী পুৱারি ওইরবা থৌরম অসিদা, মসিগী হিরম অসি কুপ্না খন্নবা ঐ পাম্মী। লুপা করোর লাখ ১০গী দাইরি সেক্তরদা নুপীশিংনা মরুওইবা থৌদাং লৌরি। ঐখোয়গী ইমাশিং লৈরি, ঐখোয়গী ইচলশিং লৈরি, ঐখোয়গী ইচানুপীশিং লৈরি। করিগুম্বা লৈবাক অসিগী গেহু, চেঙ অমসুং চু পুনশিল্লবসু,  হায়রিবা মহৈ-মরোংশিং অসিগী তর্নওভর লুপা করোর লাখ ১০ ফাওবা য়ৌদে। নুপীশিংনা মরুওইবা থৌদাং লৌবদগী দাইরি সেক্তরগী তর্নওভর চাদা ৭০ য়ৌরে, মসিগী তর্নওভর অসি গেহু, চেঙ অমসুং চুগী অপুনবদগী হেল্লে। থবকশিং অসি ঐখোয়গী ইমাশিং, ইচলশিং অমসুং ইচানুপীশিংনা পাংথোকপনি।

ভারতকী দাইরি সেক্তরগী অশেংবা য়াংলেন শরু অসি নারী শক্তিনি। নুপীশিংগী থৌনা খক্তনা মরম ওইদুনা ঙসি অমুলনা য়াম্না চাউনা মাইপাকপা ঙম্বনি। ঙসি, ভারতনা নুপীশিংনা লুচিংদুনা মাঙলোমদা চঙশিনবা মতমদা, দাইরি সেক্তরগী মাইপাকপা অসি অচৌবা ইথিল অমনি। বিকসিত ভারতকী খোঙচত্তা নুপীশিংগী শেন-থুমগী ফিবম ফগৎহনবগী মরুওইবা য়াম্না লৈরি। মরম অদুনা, ঙসি ঐখোয়গী সরকারনা নুপীশিংগী শেন-থুমগী ফিবম ফগৎহন্নবা হিরম খুদিংমক্তা থবক পায়খৎলে।

মরুপশিং,

মুদ্রা য়োজনাগী লুপা করোর লাখ ৩০গী শেন্থংগী চাদা ৭০ নুপী ওন্ত্রেপ্রেনিউয়রশিংনা ফংলে। হৌখিবা চহি ১০দা সরকারনা পায়খৎলিবা থবকশিংনা মরম ওইদুনা সেল্ফ হেল্প গ্রুপশিংদা শরুক য়াবা নুপী মশিং করোর ১০ হেল্লে। হৌখিবা চহি ১০দা, বি.জে.পি সরকারনা মখোয়দা লুপা করোর লাখ ৬ হেনবগী শেন্থং পীখ্রে। পি.এম অৱাস য়োজনাগী য়ুম করোর ৪গী য়াম্বা শরুক নুপীশিংগী মমিংদা পাল্লে। অসিগুম্বা স্কিমশিংনা মরম ওইদুনা, ঙসি খুন্নাইগী শেন-থুমগী থবকশিংদা নুপীশিং শরুক য়াবা হেনগৎলক্লে। অদোম নমো দ্রোন দিদি কেম্পেনগী মরমদা তারম্লগনি। কেম্পেন অসিগী মখাদা, নমো দ্রোন দিদি স্কিম্না খুঙ্গংশিংগী সেল্ফ হেল্প গ্রুপশিং অনৌবা দ্রোন ১৫,০০০ পীখ্রে।  হায়রিবা অনৌবা দ্রোনশিং পাইনবা নমো দ্রোন দিদিশিংদা ত্রেনিং পীখ্রে। খুঙ্গং খুদিংমক্তা তিলহাৎ-হিদাকশিং অমসুং হারশিং চাইবদা নমো দ্রোন দিদিশিংনা মাংজিল থাগদবা নুমিৎ অদু কুইদ্রে।

মরুপশিং,

গুজরাত্তা ঐখোয়গী দাইরি কোওপরেতিপ কম্মিতিশিংদা নুপীশিং মশিং হেনগৎলকপদা ঐ হরাওই। ঐনা গুজরাত্তা লৈরিঙৈদা, দাইরি সেক্তরদা থবক তৌরবী নুপীশিংগী অতোপ্পা অচৌবা থবক অমা ঐখোয়না পাংথোকখিবা অদু ঐ নিংশিংলি। দাইরিদগী ফংলকপা শেনফমশিং ঐখোয়গী ইচলশিং অমসুং ইচানুপীশিংগী বেঙ্ক একাউন্তশিংদা হকথেংননা হাপচিনখি। থবক অসিগীদমক ঐনা ঙসি অমুল থাগৎপা পাম্মী। মখোয়গী খুঙ্গংশিংদা মাইক্রো এ.তি.এমশিং থম্বদগী শা-ষন ব্রিদরশিংনা মখোয়গী শেন লৌথোক্নবা লম থাপ্না চৎত্রে। পসুপালাকশিংদা রুপে কিষান ক্রেদিদ কার্দশিং পীনবা স্কিমশিং লৈরে। মসি পঞ্চপিপ্লা অমসুং বনাসকান্থাদা পাইলোত প্রোজেকশিং ওইনা থবক হৌরে।

মরুপশিং,

লৈবাক অসিগী খুঙ্গংশিং ভারতকী থৱায়নি হায়না গান্ধীজিনা হায়রমখি। বিকসিত ভারত অমা ওইহন্নবা খুঙ্গংগী শেন্মিৎলোন মপাঙ্গল কনখৎহনবা দরকার ওই। মমাঙগী সরকারশিংনা খুঙ্গংগী শেন্মিৎলোন্দা তোখাইবা মীৎয়েং অমা য়েংখি। অদুগা হৌজিক পাল্লিবা সরকার অসিনা খুঙ্গংগী হিরম খুদিংমক্তা মীৎয়েং চঙলি। ঐখোয়গী পান্দমদি কমদৌনা লায়রবা লৌমীশিংগী পুন্সি মহি ফগৎহনগদবা হায়বনি। ঐখোয়গী পান্দমদি কমদৌনা শা-ষনশিং মশা-মউ ফবা হেনগৎহনগদগে হায়বা অসিনি।  ঐখোয়গী পান্দমদি কমদৌনা খুঙ্গংশিংদা শা-ষন লোইবগী থবক, ঙাক য়োকপা অমসুং খোই লোইবা পুক্নিং থৌগৎকদগে হায়বা অসিনি। মসিগী ৱাখল অসিগা লোয়ননা, অহানবা ওইনা ঐখোয়না শা-ষন লোইবা লৌমীশিং অমসুং ঙা য়োকপা লৌমীশিংদা কিষান ক্রেদিদ কার্দকী কান্নবশিং ফংহল্লে।

অইং-অশাগী খল হোংলকপা থেংনবা ঙম্নবা ঐখোয়না লৌমীশিংদা মতমগা চুনবা মরু-মরাংশিং ফংহল্লে। বি.জে.পি সরকারনা নেসনেল গোকুল মিসনগী মখাদা শঙ্গোম থোকপী শা-ষনশিংগী ধারা ফগৎহন্নবা পান্দম থম্লি। ফুত অমসুং মাউথ দিজিজনা মরম ওইদুনা ঐখোয়গী শা-ষনশিং মতম শাংনা অৱাবশিং থেংনদুনা লাক্লি। মসিনা মরম ওইদুনা  শা-ষন লোইরিবশিংনা লুপা কারোর কয়া মাঙবগী  অৱাবশিং থেংনরি। অৱাবশিং  অসিগী ঙাকথোক্নবা সরকারনা থবক পায়খৎলে। লুপা করোর ১৫,০০০ রোমগী লেম্না তিকা থাবগী থৌরম অমা পায়খৎতুনা হৌজিক ফাওবদা তিকা করোর ৭ হেন্না থাখ্রে। ২০৩০ ফাওবগী মনুংদা ফুদ এন্দ মাউথ দিজিজ মুৎথৎনবা ঐখোয় থবক তৌরি।

মরুপশিং,

ঙরাং নুমিদাং ফমখিবা মন্ত্রীমন্দলগী মীফমদা শা-ষনশিংগা মরী লৈনবা ৱারেপ কয়া লৌখ্রে। ঙরাং মন্ত্রীমন্দলনা য়াম্না মরুওইবা ৱারেপশিং লৌখ্রে। লৈবাক অসিগী হান্নদগী লৈরক্লবা ধারাশিং য়োকখৎনবা নেসনেল লাইভস্তোক মিসন শেমদোক্নবা মন্ত্রীমন্দলনা ৱারেপ অমা লৌরে। লৌ উনবদা মফমশিং শজিক থানবদা শীজিন্ননবা শেন্থং পীনবা মন্ত্রীমন্দলনা ৱারেপ লৌরে। শা-ষনশিংগী ইন্সুরেসকী মতাংদা লৌমীশিংগী চাদিং হন্থহন্নবা প্রেমিয়মগী শেনফম হন্থহন্নবা সরকারনা ৱারেপ লৌরে। হায়রিবা ৱারেপশিং অসিনা শা-ষন মশিং হেনগৎহনবদা অমসুং শা-ষন লোইরবা লৌমীশিংগী শেন্থোক হেনগৎহনবদা য়াম্না কান্নগনি। 

মরুপশিং,

গুজরাতকী মীয়াম ঈশিং তাংবা করিনো হায়বা খঙলে। সৌরাস্ত্রা, কুছ, অৱাং গুজরাত্তা, ইকং মনুংদা শা-ষন লিশিং কয়া মফম অমদগী মফম অমদা মাইল কয়া চৎপা ঐখোয় উরে। অশিবা শা-ষনশিংগী মপৈ কয়াগী শক্তমশিং ঐখোয়না উরে। গুজরাত্তা ঈশিং য়োকশিনবগী তঙাইফদবা মরুওইবা লৈরে। সৌরাস্ত্রা অমসুং কুছ লমদমদা ইকংগী অচৌবা অৱাবশিং মায়োক্নরি অমসুং ঈশিং ফংদবগী শা-ষন লিশিং কয়া শিরি। হায়রিবা লমদম অসিদা নর্মাদাগী ঈশিং য়ৌরকপদগী অচৌবা অওনবা অমা লাক্লে। নর্মাদাগী ঈশিং য়ৌরকপদগী অসিগুম্বা লমদম অসিগী মরাইবক হোংলে। মসিনা লমদম অসিগী মীয়ামগী পুন্সি অমসুং লৌউ-শিংউগী থবকশিং শিংথাবা য়ানা ফগৎলে। অসিগুম্বা অৱাবশিং তুংদা থেংনদনবা ঐখোয়না থবক পায়খৎলে। ঈশিং তাংবা থেংননবা অমসুং লৈবাক শীনবা থুংনা খুঙ্গংগী শেন্মিৎলোন ফগৎহন্নবা সরকারনা থবকশিং পায়খৎলে। সরকারনা অমৃত সরোভর ৬০ হেন্না শেমগৎতুনা লৈবাক অসিনা খুঙ্গংগী শেন্মিৎলোন্দা চাউনা কান্নবা ফংলে। ঐখোয়গী থবক্তি খুঙ্গংশিংদা লায়রবা লৌমীশিংদা অনৌবা তেক্নোলোজি ফংহনবনি। অনৌবা তেক্নোলোজিশিংগী খুৎথাংদা লৌমীশিংদা শক্তি পীনবা সরকারনা থবক পায়খৎলে। চহি খর অসিদা, গুজরাত্তা মাইক্রো-ইরিগেসনগী থবক পাকথোক-চাউথোকপা ঐখোয়না উরে। দ্রিপ ইরিগেসন য়াওনা অসিগুম্বা অফবা ইরিগেসনগী থবকশিং ফগৎহন্নবা সরকারনা থবক পায়খৎলি। মখোয়গী খুঙ্গংগী ময়াদা সাইন্তিফিক ওইবা পাম্বৈশিং ফংহন্নবা কিষান সমরিদ্ধি কেন্দ্র লাখ কয়া লিংখৎলে। ওর্গনাইক হারশিং পুথোক্নবা লৌমীশিংদা মতেং পাংলে।

মরুপশিং,

চীঞ্জাক পুথোক্লিবা লৌমীশিং ইনর্জি পুথোকপশিং অমসুং হার পীবশিং ওইহন্নবা সরকারনা মীৎয়েং চঙলে। খুঙ্গংগী শেন্মিৎলোন ফগৎহন্নবা মাইকৈ য়াম্বা থৌরাং কয়া সরকারনা পায়খৎলে। লৌমীশিংদা সোলার পম্পশিং পীবগী মথক্তা, লৌবুক্তা অপীকপা সোলার প্লান্তশিং থম্নবা শেন্থং পীরে। গোবর ধন য়োজনাগী মখাদা লৌমীশিংদগী ষন্থী লৈনবা স্কিম অমা পায়খৎলে অমসুং মসিনা ইলেক্ত্রিসিতি পুথোক্নবা বাইওগ্যাস পুথোকপা ঙমহনগনি। ঐখোয়গী দাইরি প্লান্তশিংদগী মৈ পুথোক্লে। প্লান্তশিং অসিগী পুথোরকপা ওর্গানিক হারশিং লৌমীশিংদা অমুক অহোংবা মমলদা ফংহল্লে। মসিনা লৌমীশিং অমসুং শা-ষনশিং অনিমক কান্নবতা নত্তনা লৌবুকশিংগী লৈবাক-লৈহাওগী ফিবমশু ফগৎহল্লে। অমুলনা বনাসকান্থাদা বাইওগ্যাস প্লান্তশিং লিংখৎপা অসি মাইকৈ অসিদা থাংজিনবা মরুওইবা খোঙথাং অমনি।

মরুপশিং,

ঐখোয়গী সরকারনা খুঙ্গংগী শেন্মিৎলোন্দা কোওপরেসনগী থবকশিং শিংথাবা য়ানা হেনগৎহল্লে। শেন-থুম ফগৎহনবদা মতেং পাংলিবা কোওপরেতিপ সোসাইতিশিং য়োকখৎনবা সরকারনা থবক পায়খৎলে। মসিগীদমক, অহানবা ওইনা কেন্দ্র সরকারদা কোওপরেসনগী তোখাইবা মিনিস্ত্রি অমা লৈরে। ঙসি, লৈবাক শীনবা থুংনা খুঙ্গং লাখ ২ হেনবদা কোওপরেতিপ সোসাইতি লাখ ২ হেন্না লিংখৎতুনা কোওপরেতিপকী ইহৌ কনখৎহল্লে। লৌউ-শিংউ, শা-ষন লোইবা অমসুং ঙা য়োকপগী হিরমশিংদা সোসাইতিশিং শেম্লে। ‘মেদ ইন ইন্দিয়া’ থৌরাংগী মখাদা কোওপরেতিপ সোসাইতিশিং মেনুফেকচরিংদা শরুক য়ানবা ঐখোয়গী সরকারনা পুক্নিং থৌগৎলি। তেক্সকী খুদোংচাবশিং অমসুং শেন্থং পীদুনা সরকারনা মতেং পাংলি। এফ.পি.ও লিশিং ১০ শেম্বগী মনুংদা, এফ.পি.ও লিশিং ৮ থবক হৌখ্রে। মখোয় অপীকপা লৌমীশিংগী অচৌবা লুপশিংনি। মিসন অসিগী পান্দমদি অপীকপা লৌমীশিং পোৎথোক পুথোকপশিং ওইরম্বদগী এগ্রি-প্রেনিউয়রশিং অমসুং এক্সপোর্তরশিং ওইহনবনি। ঙসি বি.জে.পি সরকারনা পি.এ.সিশিং, এফ.পি.ওশিং অমসুং অতোপ্পা কোওপরেতিপ বোদিশিং লুপা করোর কয়াগী শেন্থং পীরে। খুঙ্গংশিংদা লৌউ-শিংউগা মরী লৈনবা এগ্রি-ইনফ্রাস্ত্রকচরগী লুপা করোর লাখ ১ কাইথোকখ্রে। মসিগী স্কিম অসিদগী লৌমীশিংগী কোওপরেতিপ সোসাইতিশিংশু কান্নবা ফংগনি।

মরুপশিং,

শা-ষন লোইবগা মরী লৈনবা ইনফ্রাস্ত্রচর মতমগা চুনবা মওংদা শেমগৎনবা ঐখোয়গী সরকারনা রেকোর্দ ওইনা শেন থাদরে। মসিগীদমক, লুপা করোর লিশিং ৩০গী ফন্দ অমা শেমদুনা লাইভস্তোক ইনফ্রাস্ত্রকচরগী য়াম্লবা শেনফম থাদরে। হৌজিক দাইরি কোওপরেতিপশিং শেন্দোয়গী রিবেত হেন্না ফংলে। মিল্ক প্লান্তশিং মতমগা চুনবা মওংদা শেমগৎনবা সরকারনা লুপা করোর লিশিং কয়া চাদিং তৌরে। স্কিম অসিগী মখাদা, ঙসি সাবারকান্থা মিল্ক য়ুনিয়নগী অচৌবা প্রোজেক অনি শঙ্গারে। মসিদা নোংমদা ষনগী শজিক তন ৮০০ পুথোক্কদবা অনৌবা প্লান্ত অমা য়াওরি।

মরুপশিং,

ঐনা বিকসিত ভারত হায়রকপা মতমদা ঐনা সবকা প্রায়াসতা থাজবা থম্লি। ভারতনা নিংতম্বা চহি ১০০ মপুংফারকপা মতম ২০৪৭দা বিকসিত ভারত অমা ওইহন্নবা ভারতনা ৱারেপ লৌরে। ভারতনা নিংতম্বা চহি ১০০ মপুংফারকপদা অমুল চহি ৭৫ মপুংফারগনি। অদোম ঙসি অনৌবা ৱাশকশিংগা লোয়ননা মফম অসি থাদোক্কদবনি। লেপ্তনা হেনগৎলক্লিবা অপুনবা মীশিংগী দরকার ওইবা মচি ওইবা চীঞ্জাকশিং ফংহনবদা অমুলনা মরুওইবা থৌদাং অমা লৌরি। মথং চহি ৫দা মসিগী প্লান্তশিংগী পোৎথোক পুথোকপা ঙম্বগী চাং শরুক অনি হেনগৎহন্নবা অমুলনা পান্দম থম্বদা অপেনবা ফাওই। ঙসি মালেমদা অমুল ৮শুবা খ্বাইদগী চাউবা দাইরি কম্পেনি ওইরে। অদোম্না কম্পেনি অসি অথুবা মতমদা মালেমদা খ্বাইদগী চাউবা ওইহনগদবনি। হিরম খুদিংমক্তা সরকারনা অদোমগীদমক লেপ্লি, অমসুং মসি মোদীগী গেরেন্তিনি। চহি ৫০গী খুমাঙ চাউশিনবা অসিদা ঐনা অদোমগী মফমদা অমুক হন্না নুংঙাইবা ফোঙদোকচরি!

অদোম থাগৎচরি !

***