প্রধানমন্ত্রীগী লোইশঙ
অৱাং নোংপোক স্তেতশিংদা পাঙথোক্লিবা খেলো ইন্দিয়া য়ুনিভর্সিতী গেম্সতা পি.এম. মোদীনা ৱা ঙাংখ্রে
“গেম্স মাস্কোত ‘অস্তলক্সমী’না অৱাং নোংপোক্কী মঙলানশিং অনৌবা মশা পাল্লকপবু তাকই”
“খেলো ইন্দিয়া শান্ন-খোৎনবগী থৌরমশিং ভারতকী কাচিন কোয়া শিনবা থুংনা, অৱাংদগী খা ফাওবদা অমদি নোংচুপ্তগী নোংপোক ফাওবদা পাঙথোক্লি”
“একাদমিক্কী মায় পাকপশিং হরাও তয়াম্না পাঙথোকপগা লোয়ননা, ঐখোয়না শান্ন-খোৎনবদা হৈথোই শিংথোইবশিংবু ইকায় খুম্নননবগী চৎনবী অমা শেমগৎকদবনি। মসি তৌনবগীদমক ঐখোয়না অৱাং নোংপোক্তগী তমগদবনি”
“খেলো ইন্দিয়া, তোপ্স, নৎত্রগা অতৈ থৌরাংশিংবু ওইরবসু, ওইথোকপা য়াবশিংগী অনৌবা ইকোসিস্তেম অমা ঐখোয়গী নহা মীরোলশিংগীদমক শেমগৎলি”
“ঐখোয়গী শান্নরোয়শিংনা, করিগুম্বা মখোয়দা সাইন্তিফিক ওইবা পরম অমদা মতেং পাংবিরবদি, হীরম খুদিংদা মায় পাকপা ঙমগনি”
Posted On:
19 FEB 2024 7:42PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি অৱাং নোংপোক্কী স্তেত তরেত্তা পাঙথোক্লিবা খেলো ইন্দিয়া য়ুনিভর্সিতী গেম্স থৌরমদা ভিদিও পাউজেলগী খুত্থাঙদা ৱা ঙাংখ্রে। পি.এম. মোদীনা খেলো ইন্দিয়া য়ুইভর্সিতী গেম্সকী মাস্কোত, কুরাক মওং মানবা ‘অস্তলক্সমী’গী মরমদা ৱা ঙাংখি। অৱাং নোংপোক স্তেতশিংবু ‘অস্তলক্সমী’ হায়না হেক হেক কৌবা পি.এম.না গেম্স অসিগী মাস্কোতপু কুরাক অমা ওইহনবনা অৱাং নোংপোক্কী মঙলানশিংদা পাল্লক্লিবা অনৌবা মশাশিংবুসু মশক তাক্লি হায়খি।
শান্নরোয়শিংগী মফমদা য়াইফ-পাউজেল পীরদুনা, প্রধান মন্ত্রীনা মখোয়বু গুৱাহাতীদা ‘এক ভারত শ্রেস্থ ভারত’কী অচৌবা শক্তম অমা শেম্বগীদমক থাগৎখি। “পুক্নিং চঙনা শান্নৌ, অকিবা লৈতনা শান্নৌ, নখোয় নশাগী অমদি তীমগীদমক থোইয়ু, অমদি করিগুম্বা অদোম্না মায়থিরবসু, পেন্দবা তৌগনু। খোঙফম হনবা খুদিংমক তমশিন্নবগী তাঞ্জা অমনি”, হায়না প্রধান মন্ত্রীনা হায়খি।
লৈবাক পুম্বদা পায়খৎলিবা শান্ন-খোৎনবগী থৌরাংশিংগী মতাংদা ফোঙদোক্লদুনা, প্রধান মন্ত্রী মোদীনা হৌজিক অৱাং নোংপোক্তা পাঙথোক্লিবা খলো ইন্দিয়া য়ুনিভর্সিতী গেম্স, লদাখতা পাঙথোক্লিবা খেলো ইন্দিয়া ৱিন্তর গেম্স, তামিল নাদুদা পাঙথোক্লিবা খেলো ইন্দিয়া য়ুথ গেম্স, দিউদা পাঙথোক্লিবা বীচ গেম্স পনখি অমদি, “ভারতকী কাচিন কোয়া খুদিংদা, অৱাংদগী খা ফাওবদা অমদি নোংচূপ্তগী নোংপোক ফাওবদা শান্ন-খোৎনবগী থৌরমশিং পাঙথোক্লিবসি উবদা ঐঙোন্দা অপেনবা পোকই” হায়খি। মহাক্না অসাম লৈঙাক য়াওনা তোঙান তোঙানবা স্তেত লৈঙাকশিংনা শান্ন-খোৎনববু য়োকখৎপগী লৌরিবা থৌদাং অমদি নহাশিংদা মখোয়গী হৈ শিংবা উৎননবগী খুদোংচাবা ফংহন্নবগী হোৎনরিবশিংবু থাগৎখি।
শান্ন-খোৎনবগী লমদা খুন্নাইগী মীৎয়েংদা হোংলক্লিবশিংগী মতাংদ পল্লদুনা প্রধান মন্ত্রী মোদীনা, মমাংদা মমা মপাশিংনা মখোয়গী অঙাংশিংবু লাইরিক লাইশু তম্বদগী পুক্নিং থৈদোকখিগদ্রা কিদুনা শান্ন-খোৎনবদা চঙহন্নিংদবা মতৌ লৈরম্ববু পল্লদুনা, মমা মপা ওইবশিংগী মওং মতৌদা হোংলক্লিবা ৱাফমশিং থমখি। স্তেতকী, লৈবাক্কী, নৎত্রগা মালেমগী থাক্তা ওইরবসু মখোয়গী অঙাংশিনা হীরম অসিদা মায় পাক্লকপদা মমা মপা ওইবশিংনা চাউথোকচবা পোক্নরক্লিবা হোংলক্লিবা ৱাখল্লোনবু মহাক্না পুথোক্তুনা থমখি।
প্রধান মন্ত্রী মোদীনা শান্নরোয়শিংগী মায় পাকপশিংবু হরাও তয়াম্না নুংঙাইবা ফোঙদোকপা অমদি ইকায়খুম্নবগী মরুওইবা ৱাফমশিং থম্লদুনা হায়খি, “লাইরিক লাইশুগী লমদা মায় পাকপদা হরাও তয়াম্না নুংঙাইবা ফোঙদোক্নবগুম, ঐখোয়না শান্ন-খোৎনবগী লমদা হৈথোই শিংথোইবশিংবু ইকায় খুম্নবগী চৎনবী অমা শেমগৎকদবনি।” মহাক্না শান্ন-খোৎনববু হরাও তয়াম্না পাঙথোক্লিবা অমদি ফুতবোলদগী লমজেল ফাওবদা, বেদমিন্তনদগী বোক্সিং ফাওবদা, ৱৈইলিফ্তিংদগী চেস ফাওবদা মশান্ন শিনবা থুংনা শান্নরোয়শিংবু পুক্নিং থৌগৎলিবা অৱাং নোপোক লমদমগী ইনাক খুল্লবা শান্ন-খোৎনবগী চৎনবীদগী মতৌ তমশিনবগী মথৌ তাবা ৱাফম থমখি। প্রধান মন্ত্রী মোদীনা খেলো ইন্দিয়া য়ুনিভর্সিতী গেম্সতা শরুক য়ারিবা শান্নরোয়শিংনা মমল য়াম্লবা এক্সপিরিএন্সশিং ফংবতা নত্তনা লৈবাক শিনবা থুংনা শান্ন-খোৎনবগী চৎনবীবু খুমাং চাওশিলহনবদা থৌদাংসু য়াগনি হায়না থাজবা ফোঙদোকখি।
প্রধান মন্ত্রীনা নহাশিংগী খুদোংচাবগী হোংলক্লিবা ইকোসিস্তেমগী মরমদা পল্লদুনা, “খেলো ইন্দিয়া, তোপ্স, নৎত্রগা অতৈ থৌরাংশিংবু ওইরবসু, ওইথোকপা য়াবশিংগী অনৌবা ইকোসিস্তেম অমা ঐখোয়গী নহা মীরোলশিংগীদমক শেমগৎলি,” হায়খি। ত্রেনিং ফেসিলিতীদগী হৌরগা স্কোলারসিপ, অমদি চহি অসিদা শান্ন-খোৎনবগী ওইনা লুপা করোর ৩৫০০গী রেকোর্দ ওইবা বজেৎ চাকথুং ফাওবদা, শান্নরোয়শিংগী শাফগদবা মফম অমা শেমগৎনবা লৈঙাক্না হোৎনরিবশিংবু মহাক্না ফোঙদোকখি।
প্রধান মন্ত্রী মোদীনা মালেমগী শান্ন-খোৎনবগী থৌরমশিংদা ভারতকী মায় পাকখিবশিবু চাওথোকচনা পাউদমখি। মহাক্না ভারতকী শান্নরোয়শিংনা ২০১৯দ মেদল ৪ খক্তমক ফংলমবদগী ২০২৩দা পুন্না মেদল ২৬ ফংলক্তুনা হান্না পানরুদবা মওংদা মায় পাক্লকখিবা ৱর্ল্দ য়ুনিভর্সিতী গেম্স য়াওনা তোঙান তোঙানবা তুর্নামেন্তশিংদা শিংথানিংঙাই ওইবা মওংদা মায় পাক্লকখিববু পল্লদুনা মালেমগী থাক্তা ভারতনা হিদান্নবা ঙম্লকপবু মহাক্না হরাও তয়াম্না নুংঙাইবা ফোঙদোকখি। এসিয়ন গেম্সতা রেকোর্দ ওইবা মওংদা মেদল ফংলকখববুসু মহাক্না পনখি। “মসি শুপ্নতগী মেদল মশিংখক নত্তে, মখোয় অসি করিগুম্বা ঐখোয়গী শান্নরোয়শিংদা সাইন্তিফিক ওইব পরম অমদা মতেং পাংবিরবদি মখোয়না ফংবা ঙমগদবশিংদুগী খুদম চাংদমশিংনি”, হায়না মহাক্না হায়খি।
শান্ন-খোৎনবনা পুরক্লিবা নুংগী ওইবা ৱাখল্লোনশিংগী মরমদা ফোঙদোক্লদুনা, “শান্ন-খোৎনবদা মায় পাকপা হায়বসি হৈ-শিংবা খক্তদগী হেন্না মথৌ তাই; মসিদা লৌশিনবা ঙম্বা, লুচিংবগী মতিক ময়াই, অপুনবগী থৌদাং, অমদি খাঙবা কনবা চঙই”, হায়না প্রধান মন্ত্রী মোদীনা ফোঙদোকখি। মহাক্না নহাশিংগী মফমদা শান্ন-খোৎনববু হকচাং ফনা লৈনবখক্কী নত্তনা মরুওইবা পুন্সিগী মশিনশিং শেমগৎনবগীদমক কোনশিন্নবা ৱাফম থম্বগা লোয়ননা, “শান্নরিবশিংদুনা মশা মরেং ফন্দোরকই” হায়খি।
প্রধান মন্ত্রী মোদীনা শান্নরোয়শিংগী মফমদা শান্নবুংগী ৱাংমদা চত্তুনা অৱাং নোংপোক লমদমগী ফজববু কোয়না চত্তুনা য়েংননবা ৱাফম থমখি। মহাক্না মখোয়গী মফমদা থৌরম মতুংগী এদভেঞ্চরদা চৎনবা, নীংশিংনিংঙাই ওইরবা মমিশিং লোকশিন্নবা অমদি মখোয়না থেংনরকপশিংবু সোসিএল মীদিয়াদা হেসতেগ #NorthEastMemories শীজিন্নদুনা থাগৎলক্নবা পুক্নিং থৌগৎখি। মসিগী মথক্তা, মখোয়না চৎলুরিবা মফমদুগী মীওইশিংদা ৱারী ৱাতায় শানদুনা মখোয়গী কল্চরেল এক্সপিরিএন্স হেনগৎহন্নবা লমদমদুগী ৱাহৈ ৱাতা খরা তমশিন্নববা ৱাফমসু থমখি। পি.এম. মোদীনা মখোয়গী মফমদা ভাসিনী এপ চাংয়েং তৌননবা ৱাফমসু থমখি।
***
(Release ID: 2007380)
Visitor Counter : 59
Read this release in:
English
,
Urdu
,
Marathi
,
Hindi
,
Bengali-TR
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam
,
Malayalam